Dual Panel1Kristus bake tu vuzehi vahi meedam dam abo Alam damalehe dam num debu Korintus laba esdam dam oa, eho Paulusat sunit nim toedume uba oluho. Eho uba oluhu sunit nim um Alam damalehe dam ame bak Akaya laba modealadaha num debu totbaho ahebu lam laha aame gagodam neàte. Alat amu eba neha, “Kristus Yesus labe gagu Am im vameadume esmozi laiamda meidatelese,” lahame eba fet gagu vàmadi esuhu labe eho ame im modem datelehe bak. Eho ame da meida nibe sunit nim toedume uba oluho. Imti vahi Kristus bake tu vuzehi meedamda meida Timotius nibe eba tau uba laha, “Neàte,” lahame sunit nim toedume oluho.
2Im ahim nibe neha, “Im Ai Alati im Boehàda Yesus Kristusti ahili uba ozahit deeli im neà bak modi esuidase. Labi uba modi um ahu faheme fi goaitom vaba gi vabademsuse,” lahame im ahim nibe ozodume Ala bake labihasu tom gagodam bak.
3Imo im Boehàda Yesus Kristus labe Am Ai Alat nehi meedaha bak laba vi ozome Aba vou baedase. Iba dam bakdate aam faimu faobekesi im neà bak meedam bak ame. Labi laha iba vabededume im ahu teudedam tadem bak ame. Labihasu modem Ala laba imo vou baedase.
4Na im ahebu iba modi geàdam di Alat gi labaha bohu iba vabededume im ahu fa vei teudedam bak. Aho gi neham bak ozome labihadam bak. “Na im im dam totbaho laba modi geàdam di Alat amu iba vabededume im ahu fa teudedaha bak labet modi iho fa neo ame dam laba gi ame baket neo meedase,” lahame ahit labihaha bak.
5Na im amu Kristus bake modi geàdamna bohu lam iho Aba tu vuzehi meedam dam niba ame bak labet iba laha modi geàdam bohu meedam bak. Ame bak lam labihahemu iho Kristusti vou ali ahu vàmadehemu Alat laha iba duana vi vabededume im ahu vei teudedam bak.
6Na im iba modi geàdam di gi modem imot modem vabak. Abo gi ame bak labet modi Alat fa neo uba vabededume um ahu modi teudedam bak. Labi laha Aho um ba soat vausu fa vei neàdedam bak. Gi labihadamnat modem bak. Labi laha Alat iba vabededume im ahu vei teudemeam làhà Alat fa neo uba laha vabededume um ahu fa vei teudedam bak. Labi Alat uba vabededume um ahu fa vei teudedaha labe na im iba modi geàdamna lamti ulohona fa uba neo meedam di um gi keàtedi teudi bohu vuusu meedam bak.
7Labihàmu iho uba vi ozodam di gi neham bak labaha bohu tu vi ozodam bak. Na im uba modi geàdam di um ba bedem vaba um gi labaha keàtet bohu vuusdam bak. Neham labe labihaha bak. Na im iba modi geàdam bak lam uba laha neo ulohona modi geàdam di lam Alat iba lab vabededume im ahu modi fa vei teudedam bak lam Aho laha uba ame baket neo modi um ahu vei teudedam bak. Laham bak lam im ozobohu bak.
8Emti vahi Kristus bake tu vuzehi meedam dam oa, iho amu Asia bak laba le esdam diat na im iba modi geàdam bak lam um biem bake eho ahit, “Um ozobohudedase,” lahame nehi uba vameadalo mozo. Iho Asia bak laba esdaha diat na im iba modi geàdam di ame im lam feànat modem labe iho ozomta, “Iho modem biemna feàt modem labe im ba ahedem vaba gi eloe moio?” lahame im ahu faidi vi ozodam bak.
9Ame iba lab meedaha di lam iho ozomta, “Im gi elom bak ab vou fuhame?” lahame im ahu ab vi ozodamam bak. Lahana Alat neham bak ozoho labe Aho ahit iba modi iho labi ozoho bak. Ihimo fa iba it modi vei neàdem bak laba it ozome tum vaba, “Abo bisi feà Ala abo mei elohona modi fa ahedi usam Ala laba iho vi ozome tuse,” lahame Aho ahit iba modi iho geàdaha bak.
10Neham bak. Amu di iube, “Na im iba belu fà elose,” laham im feà lam Alat fa iba modi soat vausu fa vei neàdehe labe im ba elom vabak. Labi etei nim laha na im iba modi geàdam di Aho neo iba gi ame baket neo meeda tame. Labi laha na im iba ba diamut modi geàdam di iho gi neha, “Alat iba gi labaha vatohedume fa vei neàdedam bohu modesdam Alat modem bak,” lahame iho ab tu vi ozodam bohu ab meedamam bak.
11Naat iba beom vaba Alat iba soat vatohedume fa vei neàdedam bake uho mahate iba vi ozome tau Ala bake tom gagodale. Uho dam duada labe iba vi ozome lab tom gagodaha bak labet modi na im iba belu elom bak feà lam Alat fa iba faobekesi ozahit iba modi soat vatohedume fa vei neàdem labe dam dua totbaho labe fa Ala bake, “Am abo neàte,” lahame vou baedam bak am tame.
12Emti vahi Kristus bake tu vuzehi meedam dam oa, iho gi uba modeo, dam bakda totbaho ahebu modeo, iho na im meedam di iho im ahu adat it ozodam di iho neha, “Im ba uba im keobe vabak. Im gi uba iademe meedam bak. Abo imbote,” lahame it ozome deeli gagodam bak. Alat deelem bak laba ozome iho na im meedam di Alat iba modi vizi teudi im gi vamdesu meedam damat modem bak. Abo gi ahu giho neàna vàmadehena meedam damat modem bak. Ame baket meedam di iho bisi meedam bak lam gi uba Korintus dam laba meedam bak am bak. Labi iho ame bak lam meedam di ba dam bak damat ibi iho na im ozome meedume baleàhà bak lamti ulohona meedam vabak. Iho gi Alat iba ozahit deeli im neà bak modi esuidam bak laba vi ozodam labe na im meedam bak.
13Eho gi neham bak ozoho labe uba labi vameadam bak. Iho lab oudaha sunit lam ahebu uho ve aame gagodam di ba uho ozome ozobohudem biem im toedaha vaba gi, “Um ahu ozobohudi fi gatese,” laham bak laba ozome iho sunit lam toedume uba oudaha bak. Labi ebe eho tu vi ozodam bak gi neha:
14Ibi iho lab meia vagem vaba gi imbona vameadam damat modem bak lam um dam totbaho mahate ozobohudi fi gatei neàdehe vab damat modem bak. Làhà, “ ‘Iho meia vagem vab dam gi imbona vameadam damat mode?’ laham bak lam um ahebu fà ozobohudi fi gatei ozobohu aabodese,” lahame eho uba labihasu ilahu tu vou faodam bak. Labi ibi iho lab ozome meedume baleàhà bak lam uho etei ozobohu aabodemeam làhà ba diamut im Boehàda Yesus fa lem di iho uba vi ozome deeli vou baedam bak lamti ulohona uho laha fa iba vi ozome deeli vou baedam bak am bak.
15“Uho iba vi ozome deeli vou baeda tame,” laham bak lam eho tu vi ozodàmu eho nehi fet ozome esuhu bak. Eho Efesus vou esmozi fa bak Makedonia niba lelo modem di uba nasi lebe azibe lebohoti Makedonia niba lem bak. Labi fa neo Makedonia vou esmozi fa lam di neo uba labe azibe fa neo lam bak. Labiham labe eho uba tau azi vabiedam bak behàsdem bak am bak. Labi eho fa labe uba tau azim di uho fa neo eho Yudea lam bak ozome eba vi tau faobekesi eba nazoh beà vi lodume olum zoaha.
16(1:15)
17Eho lab fet ozome esuhu im lam eho ame baket meedaha vaba gi fa faatoho bak ehenàme uho vedi eba neha, “Em gi im gagom di fa faatomoho dat modem bak,” lahame eba feàtàdàla? Um ozom vaba? Em gi im bisi imbona duzum labet im eho gagohoda fa vazidazidam bak. Em ba ostame modem vabak. Uho ozom, em dam bak dàt modehemu gi ebe eho ozoho baket ozome meia im gagu, “Lo,” laham dàt fa kehàm vabna neha, “Vabà,” laham dàt mode?
18Vabà! Em ba labiham dàt modem vabak. Alat Aba Aho gagoho bak vagem vaba abo modem tadem Alat modem labe Aho eba aam di em gi laha ame baket meedam dàt modem bak. Neham bak. Eho uba neha, “Lo, eho neha tame,” lahame uba fet ozome gagu esum di im bisi feàna duzum vabameam em ba veimdi neha, “Vab. Eho ba modem kaio,” lahame ba gagom vabak.
19Neham bak. Iho Silasti Timotiusti iho Alam Adat Yesus Kristus labe Aba Aho meedaha Im Neàna lam uba vou vameatedume uba modi fi gatehe im lam iho gi Dat im gagoho vàmadehena fa faatom vab imot meedamda labe Am im lam uba vameadume uba modi fi gatehe bak. Ame Da Kristus ba Aba Aho gagoho im fa faatoi veimdem vab Dàt modem bak. Aho meia neha, “Lo, Eho modem bak,” lahame Aho lab gagu esuiam im lam gi ab modi imbodidamam bak.
20Eho etei lab gagoho bak lam imbote. Neham labe labihaha bak. Kristus labe Aba Aho tohedateli meedam bak labet modi Alat Aho neha, “Lo, Eho meeda tame,” lahame iba fet gagu esum im zi ahebu modi fa imbode tame. Labi ame Da Kristus labe Aba Aho lab meedaha bak labet modi im dam ahebu iho Ala bake neha, “Imbote! Aba Aho amu di iube fet vameadume esuhu im zi lam ahebu ab imbodeham bak,” lahame Am ee vousai vou baedam bak.
21Alat Ahamo im ahebu abo imti umti modi Am Adat Kristus bake fa vou ali ahu vàmadi teudi laodoamsum Ala Am am bak. Labi laha, “Am damali im Abada fà meedase,” lahame ahit iba fi hasi gagu esuhu bak lam gi Alat Ahamo modehe bak.
22“Im vahi Am dam am tame,” laham bak iho it ozobohudem bake Alat ahit Am Aha Nutabe Neàna iba olu im ahu ad niba modi vizehe bak. Iho neha, “Ba Aba Aho iba modem im zoho ehete,” lahame iho nasi tu vi ozodam bake Aho nasi Am Aha Nutabe Neàna iba fet lu im ahu ad niba ab modi vizi meedamam bak.
23Emti vahi Kristus bake tu vuzehi meedam dam oa, Ala amta nim. Em ba uba giomim gagolo modem vabak. Alat em ahu ad niba modesuhuna Amota ozobohu bak. Eho uba Korintus dam bake fa neo laha vabak lam gi nehaha bak. Eho fa uba le dae meona vameadameam uho aime ahu faidem bak labna zohàme em uba nasi fa neo laha behàsdem mu meedam bak.
24Im bisi uba neha, “Im nehasu tu vuzehi meedase,” lahame ba uba im ooteme vahokedam bak ozodam vabak. Uho Kristus bake lab tu vuzehi meedam bak lam uho gi amu di iube faasi keàtedi ab meedamam bak. Akati iho bisi uba neo vi vahokedamehamdela? “Um Korintus dam um ahu faidehe vaba gi Yesus bake labaha bohu tu vuzehi deelehat dozeadase,” lahame iho umti vahi tau meedalo modem bak.