Dual Panel1Im abo Abrahamat aba aho vou faat ledaha dam ààmom damat modehe labe Alat amu Abraham bake neha, “Eho neà bak uba mode tame,” lahame fet vameadume vàmadi esuhu bak lam, “Ame neà bak iba meedam bak akete?” laham bak um biem bake eho ame im fet vouhome um ozobohudelo mozo. Neham bak. Uho um datat im aiam na misia vam bak laba vi ozodale. Aiat am na misia am datat ba vam bake nasi fet gagu esda. Labi ame na misia lam ame data nibe ba vame naedatelemnàme etei nim koe lahasuhu di nim ame na misia lam nasi vam vabak. Fa gi nehadam bak. Gi mei na teo meedamdati ulohonali aba vou aasdamda labe aba neha, “Nehame meedale. Nehame meedale,” lahame vou aasu gagoida.
2Labi laha ame na misia setem bak labna zohàme, “Nasi a vamule,” lahame mali vou faovoi aasda. Labihasu meedam labe ame data labe aba aho ozoho bak lam modem vabilehe bak. Ame bak lam gi labihadume am aiat amu am data bake neha, “Om ba buduali ame digat fuhuzobe em na zi nim oba lo tame,” lahame amu fet gagu esuhu digat fuhuzobe ame lab meedam bak lam fa vaitoi ame na misia lam ab vadamam bak.
3Ame bak lam iho Yahudi damat modem bakti uloho bak. Neham bak. Aham di iube Alat neha, “Am Adat bak niba olu tame,” lahame Aba Aho fet ozome esuhu digat fuhu vab di labe im Yahudi dam gi ame data labe ahusobuli meedam bakti ulohona meedam bak. Abo gi mei na teo meedam dam labe iba na gagome meedam dam labe im im vuzehi meedam dam lamti ulohonali meedam bak. Ame bak lam gi neham bak. Amu di iube dam bakda ihimo ibi bak niba fi hasi vuusdume baleàhà im labe iba neha, “Nehame modele. Lada lam a modemule,” lahame iba vou ootedume vabiedam im feàna lam iho vi tau vuzehi meedam bak.
4Lahana Alat Aba Aho amu fet ozome vàmadi esuhu digat fuhemu Am Adat iba bak niba ab gagu oluham bak. Alat Am Adat alimeat oluhu di lam gi im bakda namet faaha bak. Labi faasi buduali Yahudi damat modehe labe im Yahudi dam ibi iho ame dat ahamda Musat toedume fi hasi esuhu Im Feàna zi lam laba vuzehi meedam bak laba Aho vi tau meedam meo Dàt modem bak.
5Alat neha, “Ame Im Feàna lam iba Yahudi dam vuusu veimai vabidam bak lam fa vi faatoi fa neàdi ahagoa foose,” lahame Aho ahit Am Adat iba bak niba gagu oluhu bak. Labi laha, “Aho iba modi Am damali neàdehezobe Aho amu neha, ‘Eho neà bak uba mode tame,’ lahame fet vameadume vàmadi esuhu bak lam Aho ba modi imbodi iba ame neà bak meedase,” lahame Aho ahit Am Adat iba bak niba gagu oluhu bak.
6Imbote. Alat iba modi ab Am damaleham bak. Bak lam im biem bake Alat Am Aha Nutabe Neàna lam abo Am Adate amu modi vizi teudehena lam, “Iba laha modi vizi teudi ame bak lam ozobohudese,” lahame ame Aha Nutabe Neàna lam iba olu im ahu adat ab vizi teudeham bak. Labiha labe im abo Am Adatti uloholi Ala bake deeli, “Ai, im Ai oa,” lahadam bak.
7Alat Am Adatti Am Aha Nutabe Neàna lamti iba labi gagu oluhu labe, “Alat iba deeli vadase,” lahame ame Im Feàna lam iho ba vuzehi ulohodesu meedam vabak. Gi fa ab voou seteham bak. Im ba mei na teo meedam damti uloholi meedam vaba im gi fa ab Alam damaleham bak. Labi im Alam damalehe labe Aho amu neha, “Eho Em data bake neà bak mode tame,” lahame Aho labi fet vameadume vàmadi esuhu bak lam Aho ba modi imbodi iba ame neà bak meeda tame.
8Emti vahi Kristus bake tu vuzehi meedam dam oa, um Galatia dam amu Ala biem di iube uho gi ostam alalehena zi laba vou baedam bak. Labi laha ame na labe im im ootedàmu uho gi vuzehi meedume alihi nemahudam damat modem bak. Lahana uho vou baedam alalehena zi lam Ala imboda modem kaio.
9Lahana um etei nim fa Ala bake ozobohudi Amti vou ali meedam bak. Lahana ame bak lam bisi imbo bak gagom di gi neham bak. Alat fa um ozobohudi umti vou ali meedam bak. Labihadamnàme um akati ahusobuli meedàla? Uho nehadam labe ahusobuli meedam dam taia? Uho vedi neha, “Alat iba neha, ‘Im im vamdesu meedam damat modem bak,’ lahame iba ozahit deeli gagu vadase,” lahame gi dam bakda ihimo ibi bak niba fi hasi vuusdume baleàhà im lam ulohodesu meedam labe Alat uba deeli vada tiba. Um Yahudi damat modem vab dam labe vedi fa Yahudi damat ibi iho vuusu baleàhà im abo di meida iube fi hasi im meeda. Labi di meida iube fa fi ham bak vabali gi esda. Labi ala meida iube fi hasi im meeda. Labi ala meida iube fa fi ham bak vabali gi esda. Labi tahun meida iube fi hasi im meeda. Labi tahun meida iube fa fi ham bak vabali gi esda. Uho gi labihasu meedam damat modem bak. Uho fa lab vi meedam bak lam em abo àvodehe bak. Um ozom vaba? Ame im lam teu vabna um vabieme neàdem bak vabna abo Alat modi uba deeli vadam bak vabna akati uhumo deeli uledi meedàla? Làhà ame im lam uba fa neo veimai vuusu meedalo àhàki mode? Um amu ame im lam meedam di um vanamam vaba? Em abo àvodehe bak.
10(4:9)
11Uho lab meedam bak lam eho ozoha, em amu uba tau azi vahokedume vabiedume neàdehe bak lam gi vàhàdedume voou vanamai teolemna ozohomu em ahu faidi vabi vi ozodam bak.
12Galatia dam abo emti vahi Kristus bake tu vuzehi meedam dam oa, eho uba neha, “Uho ebe eho meedam bakti uloholi meedale,” lahame uba vi ootedam bak. Eho amu uba tau azihi di lam em Yahudi damat modemnàme ame Im Feàna lam eho amu gi mu voou fa umti uloholehe bak. Lahana uho vedi fa etei neha, “Alat iba deeli vadase,” lahame ame Im Feàna lam ulohodesu vi meedam damat modem bak. Lahana uho ame lab meedam bak lam nasi mu voedale. Emti vahi Kristus bake tu vuzehi meedam dam oa, eho amu uba Galatia bak ahebu num debu mei num debu mei lahadume ame Im Neàna vou vameatedaha di labe uho eba git meedaha vaba abo iademe neàna meedaha bak.
13Eho amu alimeat um Galatia bak ahebu godaha diat meedaha im lam um ozobohudehena taia? Eho bak mei bake lasome modeha em alihi nemahuhemu fa bak ubu bake le ame Im Neàna faasi ab vou vameatedaham bak.
14Ame di labe em alihi nemahuna uba lahanàme uho ozo, “Ame Im Neàna vou vameatedamda Paulus akati alihi nemahusi mode?” lahame feàtàm neànàme uho ba eba faki aam ahasbeai mu vooho vabak. Abo em Alat Am im gagu vou usemdati ulohonali em vaha bak. Abo Kristus Yesusti ulohonali em vaha bak. Uho gi labihadaha bak.
15Ame di labe eho vi ozoha, um abo eba taulo àhàki modem faidehe damat modem bak. Uho labihadam damat modem labe eho gi gagomeam um fako it valoi fa eba lu zisum meo bak. Uho neha, “Paulusat iba lehe bak Alat iba neàna modeho,” lahame deelehe bohu vuusdam bak lam em abo ozobohu bak. Lahana etei nim akati modi um ahu fa veimdi uho eba amu deeli meedam bak lam fa seti eba faki meedàla? Em abo ahu faideho.
16Eho uba im imbona vahokedam labe uho neha, “Em uba faki meedam dàt modem bak,” lahame em mu voohe?
17Lahana damat uba neha, “Alat iba deeli vadam bake iho ame Im Feàna lam ulohodesu meedase,” lahame ozome uba le giomim vahokedam dam lam gi ahobat neàdi uba vagedam damat modem bak. Ba ame Im Feàna lam uho ulohodesu meedam labe ba Alat uba deeli um vadam vabak. Ame dam labe ba uho neàdem bak laba ozome uba vameadam vab damat modem bak. Vedi, “Gi im ibidata vuzehi keàtedi meedase. Fa Paulusam im gi ohuset ailahigeàmu mu voose,” lahame vasti uba labi vameadam bak.
18Eho nehi ozo. Eho uba tau li azim di modeo, um vou esmozi fa bak mei bake le azim di modeo, meit um neàdem bak laba ozome uba li neha, “Umti amti vou ali meedase,” lahame gagom bak lam ahebu gi neàna tadehe bak. Em abo ame bak lam deelem bak. Lahana meit um neàdem bak laba ozoho vabda labe uba li neha, “Omti amti vou ali meedase,” lahame gagom bak lam em ba deelem vabak.
19Emti vahi Kristus bake tu vuzehi meedam dam oa, eho uba ozom di ebe eho faadaha damat modemna ààmodam bak. Lahana uho bisi mei im aidume meedam bak labe em ahu faidi vi ozodam bak. Em gi ahu faidi vi ozodam bohu modesdahit um Kristus am itbaho fatoi neàdem bak vou faodam bak. Labi itbaho faatoi neàdehezobe em ahu faidem bak fa vei setem bak. Ame bak lam gi lahit data faaseo meedume data faasi neàdi gem dae vabalem bakti uloho bak.
20Uho lab meedam bak lam, “Eho akatihasu uba vi vahokedàla?” laham bak vi ozome toesome modeha em ahu zohobuli vi ozom bili moho. Labihàmu em abo uba ilahu uba li em im uba ahate vameadalo àhàki meedam bak. Eho ozom, eho uba netàdem labe, “Eho akatihasu gagoe?” laham bak ozobohudi uba gi iademe gagodam bak. Ba uba dae meona vameadam vaba zoaha.
21Làhà. Um dam totbaho labe vedi neha, “Alat ozahit iba deeli gagu vadase,” lahame ame Im Feàna lam ulohodesu meedalo àhàkedam damat modem bak. Làhà um em im nasi aima. Musat Alat Vameadaha Im Toedahana laba im meida nehi toehena nim eho ozom, um mahate ozom vab damat modem bak. Làhàmu eho uba nehi vameadume um ozobohudese.
22Abrahamat adam ahim fa. Meida Ismael am. Labi meida Isak am. Ismael lam Abraham labe am nam meida Sara labe am na teo meedaha nam Hagarat faaha adat ame. Labi Isak lam Abraham labe am nam aba aho vahadatebo Sara abo meit na gagu meedaha vab nam labet faaha adat ame. Labihasu faada.
23Lahana ame mei na teo meedam nam labe aba aho faaha adat lam gi bak damat ibi iho ozoho baket abo Abrahamat ahamo modeme faaha adat modem bak. Labi nam aba aho vahadatebo Sara abo meit na gagu meedaha vab nam labe aba aho faaha adat ba labihaha vabak. Gi Alat fet gagu esuhu labe Abrahamat modeme faaha adat modem bak. Labihaha bak.
24Eho Hagarti Sarati lahi ahim laba gi vàlu fa uba im vameadalo mozo. Neha: “Iho akatihasu meedam labe Alat iba neha, ‘Im im vamdesu meedam damat modem bak,’ lahame iba ozahit deeli gagu vadàla?” laham bak lam im behàsu ozom di gi Hagar labe aba aho modehe bak lamti labi Sara labe aba aho modehe bak lamti labihasu ozome vàlu vameadam bak. Im meida neham bak. Damat neha, “Iho dat ahamda Musat toedume fi hasi esuhu Im Feàna zi lam ulohodesu meedam labe Alat iba ozom di, ‘Im im vamdesu meedam damat modem bak,’ lahame ozahit iba deeli gagu vadam bak,” lahame ozome meedam dam lam gi Hagar bake vàlu gagodam bak. Ame dam labe iho ame Im Feàna uledi meedam labe gi mei na teo meedam dam lamti uloho bak. Labiha labe aham di iube Alat bak Arab am sibu meida Sinai laba Aho ame Im Feàna lam Musa bake vameadume aho fa ve dam bake fi desi damat aidume gago, “Lo. Iho meeda tame,” lahame labi im ot vameaidume vàmadi esuhu bak laba vi ozom di im gi Hagar bake vàlu vameaidam bak. Labi laha dam etei kota Yerusalem laba azim Yahudi dam laba ame Im Feàna labe iba ootedam labe iho meedam bak lamti fa Hagar aba aho meedaha bak lamti uloholehemu iho ame kota Yerusalem laba azim dam lam ozom di gi Hagar bake laha vàlu nehame vameadam bak. “Ame Yahudi dam kota Yerusalem laba azim dam labe im oi lam ame mei na teo meedaha nam Hagar am tame,” lahame vàlu vameadam bak. Lada lam labiha.
25(4:24)
26Lahana Sara ba meit na gagu meedaha vab namet modem bak. Labiha labe aham di iube Alat Abraham bake neha, “Omti obo oho ba vou faat ladam dam lamti eho uba im neà bak modi esuida tame,” lahame fet vameadàmu Abraham gi nasi tu vuzehi fa gago, “Lo. Ba imbode tame,” lahame tu vuzehi fet ot vameaidume vàmadi esuhu bak laba vi ozom di im gi Sara bake vàlu vameadam bak. Labi laha dam bada nibe iho neha, “Alat iba deeli vadase,” lahame ba ame Im Feàna lam vuzehi ulohodesu meedam vaba gi Kristus bake tu vuzehi meedam bak laba vi ozom di im gi Sara bake vàlu vameadam bak. Im laha kota Yerusalem asum ahobada iuba le azim bak vi ozom di iho gi Abrahamam nam Sara abo meit na gagu meedaha vab nam laba vàlu nehame vameadam bak. “Im oi Sara am tame,” lahame labi vameadam bak.
27Eho gi meit Alat Vameadaha Im Toedahana laba im nehasu toehe bak laba vi ozome uba vameadam bak. “Lahi mai lahasu abo data faam vaba vàzbudume kikem bak alim lahasuhu lahi oa, om ozahit igeame etoedale. Neham bak. Om dat om voou etei mai lahasuhunàme ba diamut om data debu dualem bak. Lahi dàt bisi deeleheda labe am data debu koete. Labiham labe ozahit igeame etoedale.” Lahame Yesayat aham di iube labihasu toehe bak ehe labe eho uba labi vameadam bak. Nehaha bak. Sara laha amu gi labihaha bak. Amu maina aida. Abo data faaha vabna aoli sete. Lahana ba Alat Abraham bake fet gagu esuhu bak labet am daboseà Isak ab faaham. Labi ame daboseà lam faasi vou faat ledume im ame mekehà debu ab dualeham bak.
28Emti vahi Kristus bake tu vuzehi meedam dam oa, Alat iba fet gagu esuhu bak lam iho neha, “Ba imbodem bak,” lahame labi tu vuzehehe labe im ab Alam damaleham bak. Abo Alat aham di iube Abraham bake neha, “Om ba data faa tame,” lahame fet gagu esuhu di lam Abrahamat neha, “Ba imbode tame,” lahame labi nasi tu vuzehehe labe Isak faaha bak lamti uloholehe bak.
29Labi aham di iube Abrahamat am adat ahamo modeme faaha adat labe vedi fa Alat Aho fet gagu esuhu labe Am Aha Nutabe Neàna labe Sara bake vi tau modi faaha adat laba faki tozodume vabidaha bak. Ame bak lamti ulohona etei neo meedam lahasuhu bak. Damat neha, “Alat iba deeli vadase,” laham bak laba ozome ame Im Feàna lam ulohodesu meedam dam labe vedi fa, “Alat iba deeli vadase,” lahame Kristus bake tu vuzehi vahi meedam dam niba vabidam bak. “Ame Im Feàna lam iho ame dam laba modi iba fa laha tau meedase,” lahame iba vabidam bak.
30Ame bak lam labihadamnàme, “Im akati modela?” laham bak lam im ba biem vabak. Aham di iube Musat Alat Vameadaha Im Toedahana laba Sarat Abraham bake nehame vameadam im toehe bak ehe bak. “Ame mei na teo meedam nam labe am adatti oho mali ootedume olule. Ba ame mei na teo meedam nam labe am adat lam ba meit eba na gagu meedam vab nam nibe em adat Isak bake tau ba om na misia vam vabak.”
31Lahame labihasu toehemu eho nehi ozoho bak. Im ba mei na teo meedam nam Hagar labe am adamat modemna ozomom vabak. Im gi mei na teo meedam vab nam Sara labe am adamat modemna ozomom bak. Im ba, “Alat iba deeli vadase,” lahame ame Im Feàna lam vuzehi ulohodesu meedam vaba im gi Yesus bake tu vuzehi meedam labe Alat iba ozahit deeli gagu vadam bak.