Dual Panel1Barnabasta labiha. Lahana dat ee gagom Ananias labe am nam Safi rati im bak zoho laha meia lu doi ab vaham.
2Lahana Ananias am namti aa ot gagoiame neàdi ame doi lam totbaho fàsi aa vasti gi zohota vou le Yesusat Aho gagu olu Am im vameadume esmozi laiam dam laba lu ab vi gagoham. “Im bak gohali vaha doi ahebu neam tame,” lahame ab le gagoham.
3Làhàmu Petrusat Ananias bake ab gut gagoham, “Ananias om akati Iblisim im vuzehi uledi meedalo. Om abo Alam Aha Nutabe Neàna laba vageho. Oho vedi neha, ‘Em bak gohalehe doi ahebu vou leha,’ lahame oho etei lab gagoho bak lam gi giomimot modem bak. Doi zoho oho vasti vaho.
4Om bak lam meia loho vab di om bak deda am taia? Labi ame bak lam meia lu ame doi vame neàdehe labe om fa neo doi dedatelehe labe obo oho ozoho bake modem neàna taia? Lahana om akati modi ame bak lam mahate ozom vabna git modehela? Om gi iba dam bakdate vagehe vabak. Om abo Ala bake vagehe bak.”
5Lahame labi gagu modeha Ananias Petrusat lab gagoho bak aime modeha gi ab ub biti eloham. Làhàmu bas damat li Yahudi dam labe ibi iho koei baumsum di sue nasbe bohu giam baket giame vou futoi ab le baumsuham. Labi Ananias eloho bak lam dam ahebu aime modeha ab iedi modem faideham.
6(5:5)
7Labi faobe ame digat labe aba zoho labe tiga jam foli am nam Safi ra am dat eloho bak vabi neo ame Petrusat azihi num laba ab li oleham.
8Labihàmu Petrusat neo ame doi lam ve vuusu ab gut gagoham. “Uho modehe bak eba nasi vameadale. Doi nim om dat Ananiasti um bak gohalehe doi ahebu ameo?” Lahahat nam labe fa gago, “Lo, ame doi ahebu am bak.”
9Lahame labi gagoha Petrusat fa ab gagoham. “Om akati om datti ahu uloholi um amait neha, ‘Iho vastehe im lam, “Ala Boehàda labe Am Aha Nutabe Neànat Ahamo ozobohudi iba beoeo?” laham bak imo modi ozose,’ lahahela? Oba nasi aima. Dam om dat ve baumsuhuda gigi ledam dae num doo obe niba ab vou fuseo vabaleham bak. Om neo visoi vou le baumsulo modem bak.”
10Lahame Petrusat gi etei labi gagohoilahit Safi ra laha ab ub biti eloham. Labi amu Ananias koei vou le baumsuhu bas dam labe fa li aaha am nam laha elo. Làhàmu nam koei neo visoi vou futoi vou le am dat koei baumsuhu obe laba neo ab vi baumsuham.
11Labi Yesus bake tu vuzehi vahi meedam damti labi dam giida dua totbahoti ab aime iedi modem faideham.
12Ame di lam, “Ala abo feàte,” laham bak damat biem bake Yesusat Aho gagu olu Am im vameadume esmozi laiam dam labe iho dam giida labe aasdam tomba laba damat fet aame àvodi ozobohudemna abo na damat ihimo modem biem im feàna lam iho dam bake ahate duana meeda. Labi ame na meedam di labe Yesus bake tu vuzehi vahi meedam dam totbaho labe iho dihasi Fihasi Ala Bake Vou Baedam Num Vàmteabu labe bàhàgo natàh bak tomba laba oli, “Salomonam Num Misia Tom Fihaba Alim Baa,” lahame taluhu zoho laba le Ala bake, “Am abo feàte,” lahame ahu adat iedi Ala bake vou baedalo modem bak ozome bakamta vahe vahedume ame im meeda. Labi neo dihasi laba le neo bakamta vahe vahedume ame im meeda. Labihada.
13Ame lab meedam bak lam dam kota Yerusalem laba azim dam abo Yesus bake tu vuzehe vab dam labe dam Yesus bake tu vuzehehe dam laba, “Abo feàte,” lahame ahu adat iedi vou baedam meot. Labiham labe ame dam labe lab vahe vahedume meedam bak lam iedi ba ame dam laba vi tau vahe vahedam kai.
14Labihadamnàme dam amu Yesus bake tu vuzehi meedam dam laba damat modeo, lahit modeo, meit vi tau meit vi tau labihadam labe ame dam im Boehàda Yesus bake tu vuzehi meedam dam debu lam ab dualedamam.
15Na damat ihimo modem biem im feàna lam Yesusat Aho gagu olu Am im vameadume esmozi laiam dam labe iho meedàmu dam aheda fa dam faideheda zi ileba oumahedume meit abada viso. Meit abada viso. Labihadume vou le zie obe laba vaheda. Damat ozo, “Petrusat nibet lebohotemeam làhà am ala it iba lebe zidazi im fa neàdem bak,” lahame labi ozome zie obe laba ab vahedaham.
16Labi laha dam kota Yerusalem labe totobeti totobeti esuhu dam labe im dam faideheda ziti im dam setan oli veimahada ziti iubet vou le iubet vou le lahadume kota Yerusalem niba ab vahedaham. Labi ame dam lam ahebu im faidehe bak lam modi fa neàdeda. Labi dam setan oli veimahada zi lam laha ame setan zi laba gagu futodume ilida. Labihada.
17Labihadume modeha Damat Ala Bake Lomna Ve Vua Vahudam Tohe Dam Zi Labe Im Bisi Boehàdatebo lamti am dam totbaho abo Saduki damat vahokem im vuzehi meedam dam totbaho lamti laham Yahudi busaoda zi labe fa Yesusat Aho gagu olu Am im vameadume esmozi laiam dam laba ahu adat faki teidi ab vabidalo modemam. “Dam giida totbaho lam akati modi ibi iho vahokehe im lam mu fa Yesusat Aho gagu olu Am im vameadume esmozi laiam dam labe ibi iho vahokehe im lam fa aime vuzehi dualelo meedàla?” lahame faki ab faasi vabidalo modemam.
18Labiha labe ame Yahudi busaoda zi labe am dam amomoi gagome Yesusat Aho gagu olu Am im vameadume esmozi laiam dam lam siàdume meit faina modehezobe si ousu teudem num abo ame num debu bak laba modesuhuda laba ab oumahedaham.
19Labi disi aibuli modeha Boehàda Alat Am im gagu vou usemda meida labe usi duzu ame num doo bedi fi stoi ame dam lam ab vou futodaham.
20Vou futodume neàdi gago, “Um nasi Fihasi Ala Bake Vou Baedam Num Vàmteabu labe am ad oli aam bak tomba laba le duzu, ‘Meit akatihasu modem labe Alati vahi ahe neàna bohu vuusdàla?’ laham im lam ahebu dam bake vahokedale,” lahame it gagu vou esmozi fa ab tom ilu seteham.
21Labihàmu dihambet Fihasi Ala Bake Vou Baedam Num Vàmteabu labe am ad oli aam bak tomba laba oedume le dozeadume ame im lam dam bake ab vahokedamam. Ame Alam im vou useheda labe gagoho baket ab meedamam. Labihadam di labe Damat Ala Bake Lomna Ve Vua Vahudam Tohe Dam Zi Labe Im Bisi Boehàdatebo lamti am dam totbaho lamti iho neo Fihasi Ala Bake Vou Baedam Num Vàmteabu laba abo ibi iho im vameadam tom fi haba laba le vahi nusualada. Labi nusualadume neàdi ame Yahudit Ibi Iho Modem Im Gagu Vàmadi Esum Dam Debu lam abo tai ahamda Israel labe aho vou faat lehe dam debu vuusu im vameame faheme modiam dam busaoda zi ahebu laba ab gagoham. “Vazisi im vameadalo modem bake nasi ledale,” lahame labi gagu oluhemu ame dam totbaho labe neo ledume ab vahe vahedamam. Labi nusualadume neàdi neo dam labe ibi iho gagoho im aime ot vai meedam dam toheda totbaho laba ab gagoham. “Yesusat Aho gagu olu Am im vameadume esmozi laiam dam ame sel oumahehe dam laba le gagome vou futoi vou ledume iho avaelaha tot niba vou dozeadale,” lahame ab gagu oluham.
22Labi ame dam toheda totbaho labe le ame dam si oumahedam num laba lafusi aaha dam alimdi sedda. Làhàmu fa ab li gagoham.
23“Iho ame numa le aaha num doo gi teudi modesdamna aaho. Labi laha ame num doo vou aasdamda zi gi doo zi laba vou dozeadume aasdam lahasuhuna le aaho. Lahana iho doo bedi fi stoi aaha dam aam kaio. Gi num alim le aaho.”
24Lahame labi gagu modeha ame Fihasi Ala Bake Vou Baedam Num Vàmteabu laba vou aasdam polisi zi laba vuusu im vameame faheme modiam boehàda ame. Labi damat Ala bake lomna ve vua vahudam toheda zi laba vuusu im vameame faheme modiam dam ame. Laham dam labe vabi vi ozoda, “Soo! Labihalahit ba neo akati mode?” lahame vabi vi ozoda.
25Lahame labi vabi vi ozodaha vabamu modeha meit vi oli gago, “Iumeee! Ame dam uho ame sel laba si oumahehe dam lam futodume ilihi dam gi fa Fihasi Ala Bake Vou Baedam Num Vàmteabu labe am ad oli aam bak tomba laba oedume le dozeadume dam bake vahokedamna em aaho.”
26Lahame labi gagoha ame Num Vàmteabu laba vou aasdam boehàda lamti ibi iho gagoho im aime ot vai meedam dam toheda totbaho lamti fa vahi le ame Yesusat Aho gagu olu Am im vameadume esmozi laiam dam lam iademe betea si fa vou leda. Dam duada zi labe iba kebut beodume oddam bake iedi betea si fa vou leda.
27Labi fa vou ledume Im Gagu Vàmadi Esum Dam Debu labe iho avaelaha tot laba ab vou dozeadaham. Labi vou dozeadume neàdi Damat Ala Bake Lomna Ve Vua Vahudam Tohe Dam Zi Labe Iba Vuusdam Boehàdatebo labe aho fa dam laba uloome ailo ab gut vameadamam.
28“Im amu uba mali nehi gago, ‘Uho Yesus Aho amu meedume vou esmoho im lam uho a dam bake vou vahoketedamule,’ lahame uba mali gagoho bak. Lahana uho vedi geàmu kota Yerusalem niba azihi dam ahebu vou vahoketedume uloholehe bak. Uho labi meedam labe, ‘Yesus gagu oteheda im ame dam am tame,’ lahame iba vàlulo modem damat modem bak.”
29Lahame labi gut gagoha ame Yesusat Aho gagu olu Am im vameadume esmozi laiam dam labe meida Petrus labe fa ab gagoham. “Alat iba, ‘Nehame meedale,’ laham im nim Alat iba gagu esu vàhàdehe bak. Im ba voom biem bak. Im ba im dam ahat gagomda aime modem vabak.
30Uho gagu damat Yesus ut tetehesuhunaso laba esu paku dou otehe bak. Lahana im tai ahamda ziti ibi iho vou baedam Ala labe Aho ame Da Yesus Am eloho bak labet modi fa ahedi usaha bak.
31Lahana Alat ahit, ‘Am Adat fa Boehàdateli Amti ahili dam bake vuusdase.’ Labi, ‘Dam Bake Soat Vausu Fa Vei Neàdem Datelese,’ laham bak ozome Aho Yesus fa vuu asum ahoba iuba tom vousai Am ahi totbaho laba ab vou nusuham bak. Aho gi neham bak ozome labihaha bak. ‘Im tai ahamda Israel labe aho vou faat lehe dam nibe iho faina meedam bak lam Alat gi ozahigeàmu fa faamome iba beolo meedam bak lam fa vei mu neàdem bake imo nasi iho faina meedam bak lam voedume fa ahu neà bak vàmadi meedase,’ laham bake ahit labihaha bak.
32Uho Yesus bake meedaha im lamti Am eloho bak labet Alat modi fa ahedi usaha bak lamti ahebu aame ahate vou vameatedam dam im am bak. Lahana ame im lam ihimo vameadam kaio. Abo Alam Aha Nutabe Neàna labe laha iba vi tau vameadam bak. Meit Alat gagoho im aime uledi meedàmu Alat Am Aha Nutabe Neàna labe ame da laba modi vizi teudedam bak,” lahame Petrusat ab vameadaham.
33Labi Petrusat lab vameadaha im lam ame Yahudi busaoda bisi feàda zi labe iho aime modeha, “Akati modi ibi iho gagoho im geàmu ame im vou vahoketedàla?” lahame ozome im ahu zoho ab beoham. Labi ahu zoho beoho labe ame im vameadume esmozi laiam dam laba otem bak ab ozoham.
34Lahana Farisi da meida abo ame Yahudit Ibi Iho Modem Im Gagu Vàmadi Esum Dam Debu laba vahi meedamda meida Gamaliel lam laha laba vi tau nusda. Ame da Gamaliel lam dat ahamda Musat toedume fi hasi esuhu Im Feàna zi ozobohudi fa dam bake vahokedam guru meida am. Labi laha Yahudi dam dua bak Gamaliel bake, “Feàte,” lahame ahu adat iedi vou baedamda meida am. Labihamda labe usai duzu am dam totbaho laba ab gagoham. “Dam lam uho teohe vou futoi faode,” lahame gagu neàdi Yesus Aho Am im vameadume esmozi laiam dam lam ab vou futoham.
35Labi ame dam lam vou futoi neàdi Gamaliel ame Yahudit Ibi Iho Modem Im Gagu Vàmadi Esum Dam Debu labe im ahu zoho beoho bak ozobohudi dam laba ab vameadamam. “Israel labe aho vou faat lehe dam em dam totbaho oa, uho neha, ‘Imo dam lam beose,’ lahame gagoho bak lam iademe ozome gagu aime modese. Gi ostame àvodehat a beomule.
36Nehaha bak. Imo amu di iube Teudasat modehe im laba vi ozodase. Ame da labe ahamo ozo, ‘Am abo boehàda feàda am tame. Roma dam bak ibida vou esmozi taho ilise,’ lahame it vou baedam labe dam duana abo empat ratus gagome vamatehe bak. Labihadamnàme meit ab oteham. Labiha labe ame dam labe ibi iho ozome meedam bak lam ba modem kai. Gi neisoat vaitoi am dam aba vuusdam dam lamti gi fi goaitoi setehe bak.
37Labi ba neo Galileada Yudasat neo lahaho. Amu di iube bak ahebu vuusdamda Kaisarleheda labe, ‘Aho vuusu im vahokedam dam amamohela?’ lahame dam ee toedam di labe di lam Yudas ehet. Yudas di lam ahamo ozo, ‘Am abo feàte,’ lahame iba vuusumdate faki mu fa am dam totbaho vabi esdam bak laba le im aa odoadume neàdi fa vahe vahedume Yahudi damat modem vab dam lam beom bak laba ozome mod ab usnadaham. Labihadamnàme Yudas laha damat ab oteham bak. Labiha labe aho vuusdam dam lam laha fi goaitoi ab seteham.
38Labihàmu eho etei uba gagolo modem im nim uho aime ozomale. Ame Yesusat Aho gagu olu Am im vameadume esmozi laiam dam lam iho gi labihasuse. Iho gi aalahigeàmole. Neham bak. Ame dam labe ibi iho ozome meedam bak lam gi dam labe ihimo ozome meedameam làhà gi Teudasti Yudasti meedam bakti ulohona meedam bak. Labiha labe dam labe ibi iho ozome meedam bak lam gi neisoat vaitoi dam nim gi fi goaitoi setem bak. Labihàmu ame dam labe ibi iho Yesusat meedaha im vou vahoketedaha bak lam ba iho akati gagu male? Ame dam labe ihimo faidehe bak.
39Lahana Alat gagu olumeam làhà im ba dam labe iho meedam bak lam iho ba faatom vabiem bak. Gi labihasdam bohu modesdam bak. Iho dam nim vabidameam làhà im gi Alat gagoho im lam mu voolo modem bak. Im ba feà damalem vabak,” lahame Gamaliel labihasu ab vameadaham.
40Labi Gamaliel lab vabededume vameadaha im lam ame Yahudi dam busaoda im ozobohuda zi labe ame im lam aidume vuzehi uledi ab vei neàdeham. Lahana vei neàdehenàme vedi Yesusat Aho gagu olu Am im vameadume esmozi laiam dam lam fa gagome vou olehezobe dam amomoi gagome ab fi deamahedamam. Labi fi deamahedume neàdi, “Uho Yesus Aho amu meedume vou esmoho im lam a dam bake vou vahoketedamule,” lahame mali gagu neàdi fa ab iddume oudaham.
41Labi Yesusat Aho gagu olu Am im vameadume esmozi laiam dam labe iho ame Im Gagu Vàmadi Esum Dam Debu labe iho im vameadam tom fi haba lam vou esmozi ladam di labe gi ozahit im nehasu ot gagoidume deelehat lada. “Iho Yesus bake tu vuzehi im Abada meedàmu damat iba lab beome geàdam bak lam Alat ee ibida vousalo ahit uledehe bak,” lahame ot gagoidume deelehat ab ladamam.
42Labi ame dam labe lab mali gagoho bak lam geàmu dihasi fa ame Fihasi Ala Bake Vou Baedam Num Vàmteabu labe am ad oli aam bak tomba laba modeo, dam labe num ibidate modeo, oli, “Yesus abo Alat Gagu Fihasi Vimteme Oluhu Dat Boehàda am tame,” laham Im Neàna lam dihasi vameadume vahokeda. Labi dihasi neo vameadume vahokeda. Labihada.