Alkitab Mobile SABDA
[VER] : [BAUZI]     [PL]  [PB] 
 <<  Lukas 2 >> 

1Labi Yohanes faasi fota àdesdume Kaisar Agustus labe aho Roma dam vuusu im vahokedam lahasuhu di labe aho nehi am dam laba vameada. “Um ahebu dat mei ee toedamda iuba la. Iuba la. Lahadume ee gagodume toedale. Eho vuusdam dam ahebu delo mozo,” lahame ab vameadume oluham.

2Ame lab vameadume oluhu im lam Siria bak laba azim dam vuusdam Gubernur Kirenius labe aho dam vuusdam di labe alimeat modehe imot modem bak.

3Labi vameadume oluhemu Kaisarleheda labe aba aho vuusdam dam abo bak iudu iumti bak iudu iumti ahebu im ee toem bake im tai ahamdat azihi num debu bake ab ladamam.

4Labihàmu Yusuf laha Galilea bak labe num debu Nazaret vou esmozi fa Yudea bak labe num debu Betlehem laba ab laham. Abo am tai ahamda Boehàda Daud labe am faaha num debu bak laba Yusufat ozoha, am Daud vou faat lehe mekehàda amemu Betlehem laba ab laham.

5Aho na vahedam nam soao zubulehe nam Mariati Betlehem laba ee toedam bake ab laham.

6Labi le azi modeha am data faam bak ab fuham.

7Am data faam bak fuhemu daboseà datahida ab faaham. Labi faasi sue nasbe bohu giame teohet lemda im num kekehemu Maria am daboseà ousum biehemu gi fi ho na vahem beahuba laba am data ab ousuham.

8Labiham di labe domba vou aasum dam Betlehem bàhàgo sibe baa laba domba zi aibut vou azi aasda.

9Labihadam di labe Alat Am im gagu vou usemda meida labe damat aidam bak laba ab nom ilu duzuham. Duzuha Alat Am na fauhalemna feà labe damat aidam bak laba fauhali ogatehe labe dam fako ab iedeham. Labi dam labe ab udovai ab iedi modem faideham.

10Labihàmu ame Alat Am im gagu vou usemda labe dam laba ab vameadamam. “Um a iedemule. Em im neàna uba vou leho. Eho vameadam im nim uho aime fa dam bake fi demeam um dam ahebu aime deeli vàhàde tame.

11Etei di nim tai ahamda Boehàda Daud faaha num debu bak laba uba Soat Vausu Fa Vei Neàdemda etei faaho. Ame Da lam abo Alat Gagu Fihasi Vimteme Oluhu Dat Boehàda am tame. Abo uba vuusdam Boehàdatebot modem bak.

12Um biem bake le nabime aameam sue nasbe bohu giame fi ho na vahem beahuba laba ousdam Data aameam làhà ame Data am tame. Labi eho etei uba gagoho bak nim, ‘Imboo?’ laham bak um aame ozobohude tame,” lahame ab vameadaham.

13Labi vameadume neàdi modeha Alam im vou usi vameadam dam duada zi neo vi tau nom ilu dozeada. Dozeadume ame Data faaha bake ozome Ala bake ab vou baedamam.

14“Imo Ala abo asum ahoba iuba azihida, ‘Abo bisi feàte,’ lahame vou baedase. Labi dam bake esuhu dam niba Aho ozome deeli fi me vaha dam lam Alati ot deeliame fa vahe vahedase. Labi laha im dam bakda nim Aho iba modi ot deeliame fa vahe vahedase.” Lahame Ala bake ab vou baedaham.

15Vou baedume neàdi ame domba zi vou aasdam dam labe im domba ziti vou esmozi fa asum ahoba ab tom iluham. Labi modeha dam labe, “Imo Alat Am im gagu olum dam labe iba vou li vameaha im lam Betlehem bake le aamase,” lahame ot gagoiame neàdi ab usname emoeham.

16Usname emoeme num debu Betlehem bak laba le nabime aaha ab imbodeham. Yusufti Mariati fi ho na vahem beahuba laba ousdam datati ab le aaham.

17Aame neàdi ame dam labe fa dam duada laba ame Alat Am im gagu vou usem dam labe iba vameadaha im lam ab vou vameatedaham. Abo ame Data nim, “Ana Data modela?” laham bak vou vameateda.

18Vou vameatedume modeha dam ame im aihida lam ab aime àvodeham.

19Lahana Maria ame im lam ahebu im amu modemdati ba modemdati azi ahulat vi ozoda.

20Labi ame domba zi vou aasdam dam labe aame neàdi fa ibi bake ab ladaham. Fa ladam di labe dam labe iho aihi bak lamti iho aaha bak lamti ozome Ala bake, “Am abo feàte,” lahame vou bae lada. Alam im vou usi vameadam dam labe iba vameadaha im lam imbodehemu Ala bake vou bae lada.

21Labi ame Data faasi ba usi delapanli Yahudi dam labe ibi iho daboseà faasi modem diat laso aubehà sokba ukbom bak modem digat fuhemu ame bak modi ee, “Yesus,” ab taluham. Ame ee lam Alat Am im gagu vou usemda labe amu Maria zubulehe vab di iube taluhu ee am. Làhàmu ee, “Yesus,” lahame ab taluham.

22Labi vou faome Yusufti Mariati fi ham bak neàdi fa vahem digat ab fuham. Labi ame digat fuhemu Alat amu dat ahamda Musa bake neha, “Yahudi dam daboseà alimeat faahada fi hasi Eba naedate lodale.” Lahame toeme esuhu im lada lamti labi, “Yahudi lahi daboseà faasi fi ham bak neàdi fa vahelo modem bake meki fi ho behàsu modeo, gi meki adatea behàsu modeo, vou le damat Ala bake lomna ve vua vahudam toheda laba lu ame da labe ve oteme Ala bake lole.” Lahame toeme esuhu im lada lamti labihasu Yusufti Mariati ame bak lam meedalo ame na behàsu lamti ame Daboseà Yesus lamti vame kota Yerusalem laba ab vou lalo meedamam. Ame Daboseà lam Alam im meedam datelem bake ozome gagu esulo ve ab vou laham.

23(2:22)

24(2:22)

25Labihadam di lam dat ee, “Simeon,” lahame taluhuda kota Yerusalem laba aida. Ame da Simeon labe aho Ala bake ahu adat iedi Alat Aba Aho, “Nehame meedale,” lahame gagu esuhu im zi lam ahebu iademe vamdesu meedamda am bak. Alat Gagu Fihasi Vimteme Olulo Modem Dat Boehàda li Yahudi dam labe ibi iho faina meedam bak lam soat vausu fa vei neàdem bak lam, “Taho modese,” lahame vou faodamda am. Labi Alam Aha Nutabe Neàna labe aba modi vizi vuusu meedamda am.

26Labihamda laba Alam Aha Nutabe Neàna labe amu nehame fet gagu esu. “Alat Gagu Fihasi Vimteme Oluhu Dat Boehàda lam om aame ba elo tame,” lahame fet gagu esuhu bak ehe bak.

27Labihadamda laba Alam Aha Nutabe Neàna labe ahit modi Fihasi Ala Bake Vou Baedam Num Vàmteabu labe am ad oli aam bak tomba laba ab oleham. Labi oli aidameam aaha Yusufti Mariati am Data Yesus lam ba ab vou li vi oleham. Amu im tai ahamda Musat, “Nehame modele,” lahame toeme esuhu bak lam modelo ab vou oleham.

28Labi vou oli modeha Simeon ame Data lam aame gut si sivai Ala bake ab vou baedamam.

29“Ai Ala oa, Oho amu eba gagoho bak ab imbodeham tame. Dam bake Soat Vausu Fa Vei Neàdemda Oho bak niba oluhuda em fako nim ab aame neàdi asimdeham bak. Em Om im meedamda nim elom neàdehe bak.

30(2:29)

31Ame Dam Bakdate Soat Vausumda nim Oho gi Yahudi dam nimota modi olum kaio. Abo dam ahebu modi oluho.

32Ame dam bake Soat Vausu Fa Vei Neàdemda nim abo uma usime fauhalem bakti ulohoda Am am bak. Labiha labe ame Da nibe Yahudi damat modem vab dam abo dam giida modi Obo Oho meedam bak ozobohudemda Am am bak. Labi laha ame Da im Yahudi damat faahemu dam giida zi labe fa iba abo dat ahamda Israel labe aho vou faat lehe dam nim Om dam niba, ‘Feàte,’ lahame vou baedam bak am bak.” Lahame Ala bake ab vou baedaham.

33Labi vou baedume neàdi modeha Simeon ame Data niba labi gagohemu ame Data labe Am aiti oiti vi ozoha vabamu fa vei àvode.

34Labi Simeonat neo Ala bake, “Ala Oho dam nim im neà bak modi esule,” lahame Ala bake tom gagoda. Tom gagodume neàdi Simeon Data nibe Am oi Maria bake neha, “Alat ahit modi dat ahamda Israel labe aho vou faat lehe dam abo Yahudi dam lam fàsi totbaho ame Data nibe Am im aim momda lam beo. Labi totbaho ame Data nibe Am im aime vuzehemda lam soat vausu. Labihasu modelo ahit gagu oluhu bak. Labi laha damat Ala biem bake, ‘Data nibe modi fi gatedase,’ lahame Alat ahit ame Data nim gagu oluhu bak. Labi ame Data nibe ame bak lam fet vouhome damat aameam dam dua totbaho labe aame ozo, ‘Ostam im,’ lahame aalahigeàmu feàtàme tozo tame.

35Labiham labe ame Data nim damat ahu adat ozome vastem im lam Aho modi fa ahate tombalem bak. Labi ame im lam ahebu labi modem labe om ba aame ahu faidi admahem bak,” lahame Maria bake ab vameadaham.

36Labi ame di labe Alat vameadaha im aime fa dam bake ahate vameaidaha nam ee, “Hana,” lahame taluhu nam laha ame num zoho labe lehe labe ame Data niba ab li aaham. Ame nam lam Fanuel labe am adnamat abo Asyer debu labe vou faat lehe namet modem bak. Labi aho amu dat ve vou aidume tujuh tahun foli modeha am dat eloho namet modem bak.

37Labi am dat eloi maboeli azibehamdi abo delapan puluh empat tahun foli aolehe namet modem bak. Labi ame nam labe laha gi Fihasi Ala Bake Vou Baedam Num Vàmteabu labe am ad oli aam bak tomba laba Ala bake vou baedam di gi labaha digat ahebu dihasi modi dihasi modidahit vou disidam namet modem bak. Labi aho ame bak lam meedam di labe gi ozahit na àm bak mu Ala bake tom gagodam namet modem bak.

38Labihadam namet ame Data aahemu nehame vameada. “Data nim faaha bak abo neàte,” lahame Ala bake vou baeda. Labi laha Yahudi damat neha, “Dam giidat iba simtedi beodam bake Alat iba Soat Vausu Fa Vei Neàdemda adi diat iba oluela?” laham bak vou faodam dam laba Hanat ame Data lam, “Akatihasu modem datat modela?” laham im lam ame dam laba vou vameateda.

39Labi Yusufti Mariati ame Alat aham di iube Yahudi dam bake neha, “Nehame meedale,” laham im lam amu dat ahamda Musat toeme esuhu Im Feàna zi lam abo Yahudi dam labe ibi iho daboseà faam diat meedam im lam kota Yerusalem laba ab modeme neàdeham. Labi modeme neàdi ame Data lamti fa Galilea bak labe aba zoho num debu meida Nazaret laba fa ab vou laham. Abo num debu bak ibidate fa ab laham.

40Labi fa le vou azibe ame Data buduali teudi im ab ozobohudedamam. Labi Alat Aba deeli tau vuusdam labe gi Aba im neà bak ab modi esuidamam.

41Yahudi dam bada nibe iho im tai ahobada zi labe Im Adam Datahida Alat Oddaha Vabat Labohotehe Bake Vi Ozome Roti Fikidehe Vabna Àme Iziam di ee gagom Paskah laham di fuhudaleàmu Yusufti Mariati kota Yerusalem laba ladume ame bak lam modi fa leda. Labi ba neo ame bak fuhudaleàmu neo kota Yerusalem laba ladume ame bak lam modi fa leda. Labihada.

42Labihadume Yesus bos di abo dua belas tahun lehe di labe Yusufti Mariati ibi iho ame na àm bak neo modelo kota Yerusalem bake ab ladaham.

43Labi ladume ame na modeme àme izidume neàdi fa aba bake ab ledamam. Lahana Yesusat vedi gi kota Yerusalem laba aida. Yesusat gi kota Yerusalem laba aidamna Am aiti oiti vabi ab vou esmoham.

44Vedi imti vahi ledam dam nim ame Data lamti vahi leda tiba vabi ledume le ab disiham. Labi, “Yesus akete?” lahame imti vahi ledam dam ibi mei dam ziti dam giidati dam laba gagu aiha, “Ame Daboseà nib kaio,” làhàmu nabidume modeha vi aaha aam vabamu laba izi dihasi Yesus setehe bake nabilo fa kota Yerusalem laba le nabime ab iham.

45(2:44)

46Labi izi dihasi neo nabime aaha Yesusat gi ame Fihasi Ala Bake Vou Baedam Num Vàmteabu labe am ad oli aam bak tomba laba Alat aham di iube Yahudi dam bake, “Nehame meedale,” laham im lam ozobohudi meia vahokem dam ziti vahi im ot vameaidamna ab aaham. Yesusat ame dam zi labe iho vameadam im aida. Labi Aho fa ame dam zi laba im amomoi neo vabi vi gagu aida. Labi ame dam zi labe fa Yesus bake im amomoi vabi vi gagu aida. Lahadamna ab aaham.

47Labi dam totbaho labe Yesusat fa ame dam zi laba gagoho im aiha, “Aa làhà! Daboseà nim abo im ozobohu Dàt mode?” lahame ab àvodeham.

48Labihadam di labe Yesus Am aiti oiti neo vi aame modeha laha ab àvodeham. Àvodi Am oiat Aba neha, “Dat adat oa, Om akati iho laha bake vulehe vaba modela? Em Om aiti abo Om setehe bake àvodi nabiti nabitime abo ahu faidi seteha.”

49Lahame gagoha Yesusat fa ab gagoham. “Ne, um akati Eba nabidàla? Em abo Em Ai aabom numa aidalo ahit uba vulehe vabake. Om bak lam biehe labe Eba nabidà?”

50Lahame labi gagoha Am oiti aiti Aho gagoho bak lam aimta ai. Lahana, “Em Ai aabom numa aidalo,” laham bak vabi vi ozoda.

51Labi vi ozodume Yesusat Am aiti oiti fa vahi Nazaret fa ab laham. Labi fa le aidam di lam Yesusat gi Am aiti oiti gagom im aime uledi vou meeda. Labi Am oiat im amu modeheda iumti etei modeheda nimti azi ahulat vi ozoda.

52Labi Yesus buduali neo im vi ozobohudi ozobohudidume ab dualeham. Labihadam labe Alati damti ame Da laba ab deeleham.


  Share Facebook  |  Share Twitter

 <<  Lukas 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel