Dual Panel1Labi ba hari Sabat abo Yahudi dam labe ibi iho gi azibe im digat meida labe Yesus Aba vi tau meedam damti iho bak mei bake lalo modemu gandum dee zie labe lada. Ladam di labe Yesus Aba vi tau meedam dam labe ame gandum oo amdeheda lam auet vi vuu footoi anekehà esu gigime fet veimome ab vou à ladamam.
2Labi vou à ladam di labe Farisi dam totbaho labe ame bak lam aahemu Yesus bake ab gut gagoham. “Ne, etei nim gi hari Sabat abo im Yahudi dam labe ibi iho gi azibe im digat nim akati modi Oba vi tau meedam dam labe na oo auet vi vuu footoi vou à ledàla? Ne, im tai ahamda Musat aham di iube neha, ‘Hari Sabat fum di na a meedamule,’ lahame toeme fi hasi esuhuna akati modi Oba vi tau meedam dam labe ailahigeàmu na meedàla?”
3Lahame labi gut vameadume modeha Yesusat fa ab gagoham. “Ne, im tai ahamda Boehàda Daud labe aho amu modehe im lam meit Alat Vameadaha Im Toedahana laba im meida nim um aame vi ozobohudehe vaba? Amu Daud aba vi tau meedam damti idoalehemu dam ahamda labe iho Teohet Mome Fa Faatoiam Num Fihamna abo Alat Israel dam bake le tau im vameaidam num laba oli Ala bake lu fi haha beahuba laba esuhu roti lam aho visoi faheme am dam bake lodume iho vahi àdaha bak lam um vi ozobohudehe vaba? Dat ahamda Musat aho aham di iube neha, ‘Ame roti lam damat Ala bake lomna ve vua vahudam toheda zi labe ihimo àm rotit modem bak. Ba dam giida tau àm fi ham roti modem bak,’ lahame gagu fi hasi esuhu roti lam ame dam giida labe àhà bak. Lahana ame dam labe iho ba, ‘Faina modeho,’ lahaha vabak.”
4(6:3)
5Lahame vameadume neàdi Yesusat neo ab vi gagoham. “Alat Gagu Fihasi Vimteme Oluhu Dat Boehàda Asum Ahoba Iubet Bak Niba Li Dateleheda nim Em ame Da amemu ame hari Sabat deda Em am bak. Labiham labe Ehemo neha, ‘Ame digat labe im nehasu modem neàte. Im nehasu a modemule,’ lahame ozome gagomda Em am bak,” lahame ab gagoham.
6Labi ba hari Sabat meida labe Yesusat neo ame Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli dam bake vahokeda. Dam bake vahokedam di labe dat anekehà ahi totbaho nutabedeheda laha ame num laba amu vi tau oli aida.
7Labi ame di labe Farisi damti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labihasu laba tau nusualadaha labe Yesusat ame hari Sabat mei modi fa neàdem bak labna zohàme vou faovoi Yesus bake fakot zisda. “Yesusat ame da niba modi fa neàdem bak aahazobe fa vàluse,” lahame fakot zisda.
8Lahana Yesusat Aho ame dam labet ibi iho ozoho bak lam ozobohunàme ozahit dat anekehà nutabedeheda laba ab gagoham. “Om usai tomba niba li duzule,” lahame labi gagoha dat nisileheda labe usai damat nusualadaha doni tomba laba le ab duzuham.
9Labihazobe Yesusat ahit gi dam labe modem bak ozobohuna fi bovai ame lab nusualadaha dam laba ab vameadamam. “Ne, uho ozom, hari Sabat abo gi azibe im digat nim im tai ahamda Musat, ‘Akatihasu modem neàte?’ lahame gagu fi hasi esuhela? ‘Im neàna modem bak modele,’ lahaheo? ‘Im fai bak modem bak modele,’ lahaheo? Im adida Musat gagu fi hasi esuhela? Laham vaba, ‘Mei elolo modem di iho modi fa neàdem neà bak,’ lahaheo? ‘Mei otem bak modem neà bak,’ lahaheo? Im adida Musat gagu fi hasi esuhela?”
10Lahame labi vi ailo gagoha dam ba Aba im vi gagomda kai. Làhàmu fakot ahamo vi nabidume vi ozolaha vabamu Yesusat fa dat nisileheda niba ab gagoham. “Om anekehà nasi vamdemale,” lahame gagoha da nibe am anekehà vamdeheilahit fa ab neàdeham.
11Labi modeha Farisi dam lamti Yahudi dam ibi iho tu vuzehem im vuusum guru zi lamti Yesus bake faki neha, “Uho ozom, im Yesus bake akati modela?” lahame im aa ab odoadamam.
12Labi ba digat meida iube Yesusat Ahamo tom gagom bak ozome bak buzoho laisi le aibut Ala bake tom gagodahit vou diha.
13Labi dihasi dihambet Yesusat Aba Aho vahokedam im ozobohudelo vi tau meedam dam zi lam neo gagome Aba ab vi laitedaham. Labi dozeadume neàdi gagu gi dam dua belas lamota fàsi ve, “Aho gagu olu Am im vameadume esmozi laiam dam,” lahame ee ab taluham.
14Aba Aho fi me vaha dam dua belas lam neha: Simon ee Yesusat ba taluhuda Petrus ame. Labi Simonam vahada Andreas ame. Labi Yakobus ame. Yohanes ame. Filipus ame. Bartolomeus ame.
15Matius ame. Tomas ame. Labi Alfeus am adat Yakobus ame. Labi Simon Meohoda ame.
16Labi Yakobus am adat Yudas ame. Labi Yudas Iskariot ba Yesus otem bake vou foholo modemda ame. Labihasu Yesusat debe fàsi vaha dam dua belas am.
17Labi Yesusat Aho fi me vaha dam dua belas lamti ame bak buzoho labet fa buoba bake lezi odosi aaha Aba Aho vahokedam im ozobohudelo vi tau meedam dam totbaho zi ame. Labi dam dua totbaho amomoi zi ame. Labihasu li dozeadaha bak ab aaham. Ame dam dua totbaho zi lam zoho Yudea bak labe am num debu meida Yerusalem labet le. Labi dam zoho ame Yudea bak laba modealaha num debu mei num debu meime lahadaha bak labet le. Labi dam zoho fa itea feàna obe modealaha num debu Tirus lamti num debu Sidon lamti laham bak labet le. Labihasu li dozeadaha bak ab aaham.
18Damat im nehasu ozome li dozeada. Yesusat Aho lab vahokedam bak aim bak ame. Labi im dam totbaho ahaladiame gailedaha bak lam, “Yesusat fà modi neàdese,” laham bak ame. Labihasu ozome li dozeada. Labi ame di lam dam setan oli veimahada zi lam laha tau ledahemu Yesusat ame setan laba gagu futodume ilida.
19Labi, “Alat Yesus bake modi teudehe labe Aho fa ame dam zi lam modi fa neàdedà?” laham bak lam dam dua zoho labe neo vi aame, “Yesusam alihi vi ulase,” lahame àhàki ab meedamam.
20Ame dam zi labe, “Yesusam alihi vi ulase,” lahame àhàki meedume modeha Yesusat ozo, “Aho vahokedam im nim dam duada zi labe fà aise,” làhàmu Aba Aho vahokedam im ozobohudelo vi tau meedam dam zi laba ahit aasu im faasi ab vahokedamam. “Um na vab dam oa, um na vab damat meedamnàme Alat uba deeli vame Am damali Aho uba ab vuusu im vahokedamam bak. Labihadamdaleàmu etei bisi deelehe bohu vuusdam dam um am bak.
21Labi etei na vabali idoali meedam bakti ulohona Alat Aba Aho lolo modemna valo àhàki ozodam dam oa, Alat uba modi asimdi neàdeda tame. Labihadamdaleàmu etei bisi deelehe bohu vuusdam dam um am bak. Labi etei faina meedàmu it ozome ahu faidi mebe izidam dam oa, Alat ba diamut uba modi um ahu fa deeleda tame. Labihadamdaleàmu etei bisi deelehe bohu vuusdam dam um am bak.
22Labi Em Abo Asum Ahoba Iubet Bak Niba Li Dateleheda modemu uho Eba tu vi tau meedàmu damat uba aame neha, ‘Dam mei,’ lahame uba faki feàtàdume um ee gagomti momnàme um gi ozahigeàmu keàtet lahasu meedam dam oa, uho bak niba meedaha bake gohali lodamna Alat asum ahoba iuba esu ahumdehena abo feàte. Labihadamdaleàmu etei bisi deelehe bohu vuusdam dam um am bak. Meit uba labihasu vabidamnàme um gi ozahit vei deeli etoedam labe kuguidale. Nehaha bak. Aham di iube ame dam labe im tai ahamda zi labe fa Alat vameadaha im aime fa dam bake ahate vameaidaha dam ahamda zi laba ame baket laha meedaha bak. Labihàmu ame dam labe uba etei ame baket neo meedameam làhà gi ozahit vei deeli etoedam labe kuguidale.
23(6:22)
24Aiee! Lahana Eho ozoha, um etei nazoh dualehe dam lam ba gi fai bak bohu tadem bak. Ame na uho amu gi ab vame asimdeham bak. Um ba diamut abo gi ahu faidi dehabalem labe gi fai bak bohu tadem bak.
25Aiee! Um etei na aha odosdam damat mode? Làhà um ba gi diamut abo gi aha alia iddam labe gi fai bak bohu tadem bak. Aiee! Um etei ahu deeleha azim dam lam um ba diamut abo gi ahu faidi meddam labe gi fai bak bohu tadem bak.
26Aiee! Dam dua bak labe um neà bak meeda tibame uba vou baedam labe um ba gi fai bak bohu tadem bak. Nehaha bak. Ame uba etei vou baedam dam labe im tai ahobada zi labe aham di iube laha meit neha, ‘Alat vameadaha im aime fa dam bake ahate vameaidaha dam im ame dam am tame,’ lahame vageme fa dam bake giomim vou vameatem dam ahamda laba amu laha vou baedaha bak. Um etei bada gi ame amu giomim vou vameatedam damti uloholelo modem labe ame dam totbaho labe fa uba vou baedam bak. Aiee! Um ba diamut Alat laha um beodam labe gi fai bak bohu tadem bak.” Lahame ab vahokedaham.
27Labi im lada lam vahokedume neàdi Yesusat neo nehame Aba vi tau meedam dam dua zoho laba ab vi vahokedamam. “Um etei Em im aidam dam ade? Em im meida nim neo uba vahokedalo mozo. Uba fakemoholehe dam laba uho gi ozahigeàmu fa vei deelele. Labi laha uba adat faki ziesobulem dam laba uho gi laha ozahigeàmu fa vei neàdi ame dam laba neà bak tadi meedale.
28Meit uba uloome neha, ‘Seee. Naat beole,’ lahame uloome gagomda laba uho gi ozahigeàmu vei neàdi fa Ala bake neha, ‘Ai oa, Oho da lam fa im neà bak modi esule,’ lahame tom gagodale. Labi laha dam uba fai bak meedam dam laba uho a fa ame baket vi modi vataumule. Gi ozahigeàmu fa vei neàdi Ala bake, ‘Ai oa, Oho da lam fa im neà bak modi esule,’ lahame tom gagodale.
29Labi laha meit oba faki eobu visoi om udehà totbaho laba beomeam làhà oho gi teoli neo udehà totbaho ame da laba fi sule. Labi laha meit om sue sona ahoba dusuhuda tet vietomeam làhà om sue sona ada dusuhuda a malemule. Gi ozahit sue lada lam laha vihitoi vi lole.
30Meit oba neha, ‘Na lam eba lom neào?’ lahame vi ailo gagomeam làhà ame na lam a malemule. Gi lodale. Labi om na tet si vietohoda laba a, ‘Em na fa veiale,’ laham bak lam ba a vi gagomule. Gi labihasule.
31Uho nehi ozo, ‘Da labe eba nehi meedase,’ lahame uho labi ozomeam làhà uho ozoho bak lam ame da laba nasi meedale.”
32“Um Eba vi tau meedam dam uho gi dam uba deelem dam lamota fa ot deeliameam làhà Alat ba uba deeli vou baedam vabak. Ne, dam faina meedam dam labe gi dam iba deelem dam lamota ot deeliam meo damat modem bak. Lahana Alat ame dam laba ba deeli vou baedam vabak. Labiham labe um laha ame baket modemeam làhà Alat laha ba uba deeli vou baedam vabak.
33Labi um laha uho gi dam uba neà bak tadem dam lamota fa neo neà bakta ot modidameam làhà Alat ba uba deeli vou baedam vabak. Dam faina meedam dam labe ame bak lam modem meot. Ame dam labe gi dam iba neà bak tadem dam lamota fa neo neà bakta ot modidam meo damat modem bak. Lahana Alat ame dam laba ba deeli vou baedam vabak. Labiham labe um laha ame baket meedameam làhà Alat laha ba uba deeli vou baedam vabak.
34Labi um laha uho na lodam di gi uba fa ame baleà vouhodam dam lamota na lodameam làhà Alat ba uba deeli vou baedam vabak. Dam faina meedam dam labe ame bak lam laha meedam meot. Ame dam labe na ibida lodam di vedi neha, ‘Ame da labe fa eba ame baleà vouhou fa vi vam bak ehete,’ lahame vi ozome uledi na lodam meo damat modem bak. Lahana Alat ame dam laba ba deeli vou baedam vabak. Labiham labe um laha ame baket meedameam làhà Alat laha ba uba deeli vou baedam vabak.
35Um Eba vi tau meedam dam a labihasu meedamule. Um gi neham bakta meedale. Dam uba fakemoholehe dam laba uho gi ozahit fa vei neàdi ame dam laba deeli gi im neà bakta meedale. Labi laha meit oba nehameam, ‘Om na lam eho teohe vou lam neào?’ laham di modeo, meit oba nehameam, ‘Om na lam eho vase. Labi eho ba vamda lam fa oba baleà vouhose,’ laham di modeo, lahame labi gagomeam làhà ame na lolo modem di a nehi fet ozome lodamule. ‘Eba fa ame baleà vouhoe?’ laham bak a ozome lodamule. Gi lu olum neàte. Uho gi labihasu meedameam làhà Alat uba ame bak gohali lolo modemna lam abo feàna lolo modem bak. Labi laha Alat Bisi Feàda asum ahoba iuba azimda labe Aho uba neha, ‘Um Em data am tame,’ lahame gagom bak. Am abo im nehasu meedam Alat modem labe Aho labihalo modem bak. Meit na lom di, ‘Neàte,’ laham bak ozome fa gagom mom dam lamti dam labe bisi fai bak meedam dam lamti labihasu meedam dam laba Aho gi ozahigeàmu fa vei neàdi neà bakta meedam meo Alat modem bak. Labihàmu uho gi ulohona meedale.
36Im Ai Alat meia aame faobekesi ozahit meedam bak lamti ulohona um laha meia aame faobekesi ozahit meedale,” lahame Yesusat ame dam laba ab vahokedaham.
37Labi im lada lam vahokedume neàdi Yesusat im meida neo nehame vi vahokeda. “Uho meia a aame ozomsu gagodamule. Uho labiham labe Alat laha uba ba aame ozomsu gagodam vabak. Labi laha uho meia a, ‘Om gi faina meedam dàt moz. Alat fà om beom neàte,’ lahame a labihasu ozomsu gagodamule. Uho labi modem vabameam làhà Alat laha uba ba labihasu ozomsu gagodam vabak. Labi laha meit uba fai bak meedamda laba uho gi ozahigeàmu fa vei neàdedale. Uho labiham labe ubu uho faina lab meedam bak lam Alat laha ozahigeàmu fa vei neàdedam bak.
38Uho laha meia na ilabdi lodam labe bohu vuusdale. Uho labi modemeam làhà Alat uba lolo modemna laha gi abo na ilabdi lodam labe bohu vuusdam bak. Ame na lodam di gi nehasu meedam bak. Gi mei ahoba vi vaheme bekesi totbaho goaitolo modemu auet vi neioeme neo vi vaheme zibulem bak. Nasi vi ozodale. Ubu uho meia meedam bak lam Alat gi ame baket ulohodesu fa uba meedam bak,” lahame Yesusat im lada lam neo ab vahokeham.
39Labi im lada lam vahokedume neàdi Yesusat Aba vi tau meedam dam labe im Abada mahate ozobohudehe vaba fa Farisi dam labe ibi iho vahokedam im laba aidume tu vuzehem bak labna zohàme Yesusat neo ame dam zi laba dam fako aubesuhuna laba vàlu im totobe nidi nim nehame ab faasi vi fi koadamam. “Dam fako faida behàsu labe dat meida anekehà vuusu vou lam biem bak. Labihameam dam ahim lam gi amait bak bumat laba nom ilum bak.
40Labi laha meit vahokedam bak aidamda labe aho ba aba vahokedam guru laba fa vafozi feà datelem vabak. Gi meit vahokedam bak aidamda labe fa aba vahokedam guru labe im ahebu vahokedam bak lam aidume vi ozome ozobohudi fa am guru lamti uloholem bak,” lahame Yesusat im lada lam ab vahokedaham.
41Labi im lada lam vahokeme neàdi Yesusat im meida neo nehame ab vi vahokedamam. “Um vahi azim dam meida labe am fako gi ut nu keobe bitehena uho bisi aame gagodamna akati modi fako ubuda ut gahebabu bitehena it aame gagom vaba mode?
42Fako ubuda ut gahebabu bitehena uho it aame veiom vab dam akati um vahi azim dam meida labe am fako ut nu gi keobe bitehena aame nehame gagodàla? ‘Ba oa, om fako ut nu keobe bitehe bak eho aame veiose,’ lahame akati labi gagodàla? Um abo gi ahit ahobat neàdi meedam damat modem bak. Um nasi fako ubuda lam ut gaheba bitehena it veioi voole. Uho labi modemeam làhà fako ut nu keobe meibada bitehe bak fa aasu veiom neàte,” lahame ab vahokedaham.
43Labi im lada lam vahokedume neàdi fa, “Damat ibi iho modem bak lam, ‘Neào? Faio?’ laham bak ozobohudelo modem di gi aba aho modem bak laba iho aame ozobohudem bak,” laham bak vahokelo Yesusat im totobe meida nim neo nehame ab vi fi koadamam. “Ut neàda oo modeo, bu modeo, ba faina valem vabak. Labi laha ut faida oo modeo, bu modeo, ba neàna valem vabak.
44Meit ame utso lam, ‘Neào? Faio?’ lahame ozom di gi ame ut labe am oo modeo, am bu modeo, laba aame am so ozobohudem bak. Neham bak. Dam gokio lo ali labe nigobuli sitom vabak. Labi laha ile lo ali labe sei voeli faitom vabak.
45Dam ahu ahebu laha labiham bak. Mei ahu laba vahedam im zi modi fa tombalemna im aha am bak. Labiha labe da neàda am ahu gi im neà bakta vahedam labe aho im meedam di modeo, am aha labe im vameadam di modeo, gi im neà bakta meedam bak. Lahana dat bisi faina meedamda labe am ahu gi im fai bakta vahedam labe aho im meedam di modeo, am aha labe im vameadam di modeo, gi im fai bakta meedam bak,” lahame Yesusat im totobe lada lam ab fi koadaham.
46Labi im lada lam vahokedume neàdi Yesusat ame dam zi laba im totobe meida nim neo nehame ab vi fi koadamam. “Ne, um Eho na im gagom di gi ailahigeàmodamehamdem dam akati Eba neha, ‘Ai iba vuusdam Boehàda oa,’ lahame labi gagodàla?
47‘Meit Ebe Eho vameadam im aime meedamehamdemda lamti akatihamdati ulohote,’ làhàla?
48Gi neham bak. Da nibe num abada moho di abo bak simaheme neàdi bao nom zisiddume ke vame bakmat laba vou vaheteme neàdi bak bauletedume teudehedati uloho bak. Labi ba vao belu num laba zizehe di bao lam teudehe labe ba nigome agutehe vabak. Abo aho amu num moho di gi iademe moho labe labihaha bak.
49Lahana, ‘Meit Ebe Eho vameadam im ailahigeàmomda lamti akatihamdati ulohote,’ làhàla? Gi neham bak. Da nibe num moho di gi bao zisum vabna loat giame ame num ab moham. Labi ba vao belu ame num laba zizeha num lam gi vaot beome biti agube ab vàhàdeme seteham. Dat num labi momda lamti Ebe Eho vameadam im ailahigeàmomda lamti uloho bak,” lahame Yesusat dam zi laba im labihasu ab vahokedaham.