Dual Panel1Labi im lada lam vameadume neàdi Yesusat fa neo dam duada zi lamti Aba vi tau meedam dam lamti im meida bohu neo nehame faasi ab vahokedamam.
2“Dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti labi ame Farisi dam lamti iho Alat amu Musa bake vameadume Musat fa ot vai vameadaha im lam iho neo ot vai im dedamali dam bake vahokedam bak.
3Labihàmu ame dam labe iho lab vahokedam im lam uho mahate vuzehi meedale. Lahana ame dam labe ibi iho meedam bak uho a vi vouhodamule. Gi aalahigeàmole. Ame guru zi labe ibi iho meedam bak gi nehadam bak. Ame dam labe iho ame im lam vahokedamta vahokeda. Lahana naedamat gi ozahigeàmu fa im mei meedam bak ame.
4Labi ame dam lam meia na asimbuna lu vohom di ba ot vam vaba gi meia ahumdem bak ame. Ame bak lam gi neham bak. Ame dam labe gi Musat aham di iube lab toedume fi hasi esuhu im lamota meia vahokedam kaio. Abo dam iho ahulat vi ozodam im zi lamti vi tau vahokedume meia modi vanamam damat modem bak. Lahana ame im zi lam, ‘Akatihasu modi neàdela?’ laham bak lam ba iho fet vouhodam vabak. Gi meia ahumdeda.
5Labi ame dam labe ozo, ‘Dam amomoit fà iba aame vou baedase,’ lahame meedam labe iho Ala bake tom gagodam di vedi iho dauha gimsumna koena buà fi stoi Alat Vameadaha Im Toedahana nom dumna buà lam dam ihimo veimdi fa baa buduali gimsuidam bak ame. Labi laha, ‘Im bisi Musat toedume fi hasi esuhu im ulohodesu meedam dam im am bak,’ lahame im sue ahoba dusumda sona bohu lam dusum di vedi veimdi fa obuso bohulali vààudume duadam bak ame.
6Labi laha ame dam labe vedi na zi vaheme àlo modem di vedi dam feàda nusu na àm bak laba bisi netàdi vi tau nusu na àdam meo bak ame. Labi laha iho Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba olem di vedi dam feàda ihimo nusum bak laba deeli nusualadam meo meo bak ame.
7Labi laha ame dam labe iho dam duana zi dokbuedam bak laba labohotelo modem di damat nom bohualame, ‘Ai Guru oa, om abo neàte,’ lahame iba labi gagom bak ozome deeli meedam bak ame. Labihasu meedam damat modem bak.
8Lahana um Eba vi tau meedam dam nim damat im ahu adat iedi uba, ‘Ai guru,’ lahame gagom bak lam uho malele. Neham bak. Um guru ba tameho vabak. Um guru bisi imboda gi vàmtea bak. Labi um laha ubu mei dam zi laba gagom di gi um dubu ziti um vahada ziti lahadam bak.
9Labi laha uho bak niba esdam lahasuhu di nim a dam amomoi laba ee vousai, ‘Aia,’ lahame a labi gagodamule. Um ai ba tameho vabak. Um Ai gi Vàmtea asum ahobada ium bak.
10Labi laha damat uba, ‘Boehàda,’ laham bak lam uho laha malele. Um Boehàda ba tameho vabak. Gi vàmtea bak. Alat Gagu Fihasi Vimteme Oluhu Dat Boehàda vàmtea Em am bak.
11Um meidavat neha, ‘Em fa feà datelese,’ lahame ozome modelo àhàkemeam làhà gi fa feà vab dateli mei na meedam datelele.
12Eho gi neham bak ozome uba labi gagoho bak. Meit neha, ‘Em abo bisi feàda am tame,’ lahame it daetbadume am ee vousai gagomda laba Alat modi fa ee vou usi feà vab datelemda am bak. Lahana meit neha, ‘Em feà vabda am bak,’ lahame it ozome am ahu nemahuba neàt ee vousam vabda lam Alat ame da laba modi fa ee vousai feà datelemda am bak
13Aiee! Um dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti um Farisi dam lamti labihasu ba vàhàdem bak vabili meedalo. Um gi ahobat neàdi meedam damat mozo. Meit neha, ‘Em abo Alam damali Aho eba vuusu im vahokedase,’ lahame ozodam dam lam uho vedi fa zie audam bakti ulohona modi ame dam labe iho Alam damalem bak uho maedam bak. Ebe eho lab vahokedam im gàhàna lam uho vuzehi Alam damali Aho uba vuusu im vahokedam mom damat modem labe uho vedi ubu uho ahulat vi ozodam im zi lam fa Musam im laba vi tau vahokedam labe meit, ‘Alam damalese,’ laham bak modelo meedam dam lam uho zie audam bak. [
14Aiee! Um guru zi lamti Farisi dam zi lamti um ba vàhàdem bak vabili meedalo. Um gi ahobat neàdi meedam damat modem bak. Uho gi maboe zi laba ahit neha, ‘Im om vou aasdalo mozo,’ laham dam labet vedi ahi vageme netàdi maboe nazoh fetehesu vi vadume dualem damat modem bak. Lahana uho Ala bake tom gagodam di uho lab faina modehe bak lam vedi ahit vasti uhumo neà damali gi Ala bake la gagoi le gagoidam labe bohulaleda. Aiee! Um labihasu meedam damat modem labe Alat ba diamut uba, ‘Fà duana modi geàdase,’ lahame na asimbuna feà meeda tame.]
15Aiee! Um guru zi lamti um Farisi dam zi lamti um ba vàhàdem bak vabili meedalo. Um gi ahobat neàdi meedam damat modem bak. Uho vedi neha, ‘Imo meia le ibi iho Farisi damat meedam bak modi vizese,’ lahame ozome gi ozahit bak bohula bake le dat vàmtea buà laba modi vizem meo damat modem bak. Lahana ubu uho lab modem bak labet modi ame dat vàmtea labe aho vizi meedàmu gi vua eludamna sutem gikina bohu laba voomda am bak. Labi um laha laba voom bak. Lahana uho ba modi vizeheda lam bisi abobo ame vua eludamna sutem gikina bohu laba voomda am am bak.
16Aiee! Uho vedi, ‘Im abo Alat vameadaha im vahokedam damat modem bak,’ lahamna um ba vàhàdem bak vabili meedalo. Um abo gi fako faidi na aam biem bakti uloholi meedam damat vedi fa dam fako faida laba neha, ‘Neà bak neam tame,’ lahame vahokedam damat modem bak. Uho vedi nehi dam bake git vahokeda. ‘Meit im fet gagu vàmadi esulo modem di labe im nehasu gagoda, “Fihasi Ala Bake Vou Baedam Num Vàmteabu ame nim. Eho ba mode tame,” lahame ame num buduabo laba vàlu ee gagu vàmadehena fa vazidazemeam làhà Alat ba ame da laba neha, “Om ohu vaha bak zidazeho,” lahame ba gagom vabak. “Gi voom neàte,” ’ lahame uho labi git vahokedam damat modem bak. Lahana uho vedi neo nehi vi vahokeda. ‘Meit im fet gagu vàmadi esulo modem di labe damat ame Num Vàmteabu laba vahedam emas laba aho vàlu gagomeam làhà ba ame bak lam veimdi voom vabiem bak. Gi abobo ab gagu vàhàdeham bak.’
17Uho labihasu vahokedam damat um akati fa vei ahusobuli meedà? Uho ozom, ame emas lam fa ame Num Vàmteabu labe fa vafozi feà nazohalehe? Vabo. Um git ozoho bak. Gi ame num buduabo labet modi ame emas lam modi fi hasi Alam nazohalehe bak.
18Labi laha uho vedi nehi dam bake git vahokedam bak. ‘Meit im fet gagu vàmadi esulo modem di labe ame Num Vàmteabu labe am ad oli aam bak tomba laba modesu Ala bake lomna vua vahudamnabu laba vàlu ee gagu vàmadehena fa vazidazemeam làhà Alat ba ame da laba neha, “Om ohu vaha bak zidazeho,” lahame ba gagom vabak. “Gi voom neàte,” ’ lahame uho labi git vi vahokedam damat modem bak. Labi uho laha vedi neo nehi vi vahokeda. ‘Meit im fet gagu vàmadi esulo modem di ame vua vahudamnabu laba esuhu fi ho laba vàlu gagomeam làhà ba ame bak veimdi voom vabiem bak. Gi abobo ab gagu vàhàdeham bak,’ lahame git vahokedam damat modem bak.
19Aiee! Um gi fako faidi na aam biem bakti uloholi meedam damat modem bak. Um ozom vaba? Na adida bisi feànalehela? Ame na fi hot feànalehe? Vabo. Um git ozoho bak. Gi ame vua vahudamnabu labet modi ame na fi ho modi fi hasi Alam nazohalehe bak.
20Labihàmu um ozom vaba? Meit neha, ‘Eho ame bak mode tame,’ lahame fet gagu vàmadi esulo modem di ame na vahudamnabu laba vàlu gagomeam làhà aho gi ame na fi ho lamti vahi vàlu gagodam bak. Ba na vàmtea lamota vàlu gagom vabak.
21Labi laha ame da labe aho lab fet gagu vàmadi esulo modem di lam aho ame Fihasi Ala Bake Vou Baedam Num Vàmteabu laba vàlu gagomeam làhà aho gi ame num lam Ala ehe bakti vahi vàlu gagoho bak.
22Labi laha ame da labe aho lab fet gagu vàmadi esulo modem di lam aho asum ahoba iuba vàlu gagomeam làhà aho gi Alat nusu dam bake vuusu im vahokedam di nusumna feàda lamti Alati vahi vàlu gagoho bak.
23Aiee! Um dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti um Farisi dam lamti um ba vàhàdem bak vabili meedalo. Um gi ahobat neàdi meedam damat modem bak. Uho vedi Ala bake vou baedam di Musat lab gagoho bak lamti ulohona meedam damat modem labe um utoho laba usihina keobe lam ahebu vame vou li debe vàmtea utasi Ala bake esu. Labi sembilan totbaho lam uho naedamat va. Labi neo ame na totbaho lam neo debe vàmtea utasi Ala bake neo esu. Labi sembilan totbaho lam uho naedamat va. Um gi im lada lamota meedam damat modem bak. Abo na et nakbe ahana neàna vizemna modeo, ut àhàkebu oo keobena modeo, nae modeo, labihasu debe ulohodesu fahedam damat modem bak. Lahana dat ahamda Musat aho toedume fi hasi esuhu Im Feàna zi labe im tombuda nim uho mu voedam damat modem bak. Abo dam bake iademe ahu vamdesu meedam bak ame. Labi meia aame faobekesi im neà bak tau meedam bak ame. Labi im gagom di ba vageme ame bak lam vàmtea buà voom vaba ahebu meedam tadem bak ame. Labihasu uho meedam vab damat modem bak. Uho im keobe lab meedaha bak lam meedamta neàt. Lahana ba gagoho zoho nimti vahi meedam bak lam bisi neà bak am tame.
24Um abo gi fako faidi na aam biem bakti uloholi meedam damat vedi fako faida meida laba neha, ‘Neà bak neam tame,’ lahame vahokedam damat modem bak. Eho ahole uba vi tozohona ozohomu gagodam bak. Uho vedi uho udemna lam udelo modem di vo gatbe lam feàktoi na buduada untata vekesi udem dam taia? Uho vedi gi im totobe vi ozome meedam damat modem labe im tombuda uho gi fa ab voedaham bak.
25Aiee! Um guru zi lamti um Farisi dam lamti um ba vàhàdem bak vabili meedalo. Um ahu abo meia ozom vaba gi, ‘Nazoh dualese,’ lahame meia mali soat ziemausi vadam damat modem bak. Um gi, ‘Meit fà aase,’ lahame ahobat neàdi meedam damat modem bak. Labiham labe um abo mokzohti fi lihibati kikem di am ad totbaho gi gihobu lahasuhu bak lam kikehe vaba gi toha totta kikem bakti uloho damat modem bak.
26Um Farisi dam gi fako faidi na aam biem bakti uloholi meedam damat modem bak. Lahana um gi neham bak vi ozome meedam vaba? Amu nasi adahu tot kikeme boz neàdemeam làhà toha totbaho lam gi ahamo boz neàdem bak. Um abo ahu meia ozom vaba gi, ‘Nazoh dualese,’ lahame meia mali soat ziemausi vadam bak lam nasi voedale. Uho labihasu modemeam làhà ahobati vahi neàdem bak am bak.
27Aiee! Um guru zi lamti um Farisi dam lamti um ba vàhàdem bak vabili meedalo. Um gi ahobat neàdi meedam damat modem bak. Um gi Yahudi damat koei ilehà ehe bak vabi gohatemeam faidi vàhàdeme fi ham bak labna zohàme koei ilehà ahoba laba na fauhana foom bakti ulohona meedam bak. Ame koei ilehà num lam damat aam dita fauha neà bakta aadam bak. Lahana bak ad ium dam faati meia modi vizi faidi vàhàdemna na meiti na meiti ehe bak.
28Um laha gi ame bak lam modem bakti uloho bak. Neha: Ubu uho Yahudi damat meedume baleàhà im lam meedam bak lam damat aam dita uho gi im Alat Aba Aho gagoho im vuzehi vamdesu meedam bakta aada. Lahana um ahu ad labe meedam bak lam gi neha: uho bisi faina meedam bak ame. Labi meia ahi vageme ahobat neàdi meedam bak ame. Um gi fai bak ad laba vasti meedam damat modem bak.
29Aiee! Um guru zi lamti um Farisi dam zi lamti um ba vàhàdem bak vabili meedalo. Um gi ahobat neàdi meedam damat modem labe uho vedi nehi ozo, ‘Imo dam ahamda Alat vameadaha im aime fa dam bake ahate vameaidaha dam aham di iube meit oddume elodaha dam zi laba vi ozome faobekese,’ lahame im koei baumahe bak laba ilehà moadume gàhàdi aam neàdedam damat modem bak. Labi laha, ‘Dam ahamda Alat Aba Aho gagoho im vuzehi vamdesu meedam dam amu elodaha bak laba vi ozome ozobuhudese,’ lahame dam zi labe im koei ilehà modesuhu bak laba laha vi vabiedume fa aam neàdedam damat modem bak. Um gi, ‘Damat fà iba aase,’ lahame labihadam damat meedam bak.
30Uho vedi daetbadam labe nehi ot gagoida. ‘Mit ahea! Im ame di lam ehelemeam làhà im tai ahobada laba vi tau vazisi fa ame Alat vameadaha im aime fa dam bake ahate vameaidaha dam zi lam ba oddume im vasea bake veàmodam vabak,’ lahame vi ozome it daetbadam bak meedam damat modem bak.
31Lahana um ozom vaba? Um laha Alat etei uba oudaha dam labe iho vou lehe im lam ailahigeàmu meedam damat modem labe vedi ahobat neàdi Alat amu oudaha dam ahamda labe im koei ilehà vabiedume fa neàdedam damat modem bak. Uho labihasu meedam bak labet modi um tai ahobada labe ame Alat amu oudaha dam ahamda zi laba oddaha bak lam ab modi tombaleham bak.
32Làhà um tai ahobada zi labe ibi iho mei oddaha bak laba vi ozome uho laha nasi neo ame baket vi susume dam neo vi oddume neàdemeta.
33Ea, um gi meoli fai bak tadi meedam dam labe fa ozbat meoli meedam bakti ulohona meedam damat modem bak. Um ahu vabali nehi ozohe? Alat uba ba uloodume vi aime ozobohudi neàdi gagu vua eludamna sutem gikina bohu laba um ba olum vaba moe? Ba oluhu vaba mom vabak. Abo olum bak.
34Eho gi neham bak ozome uba labi gagoho bak. Um tai ahobada zi labe iho dam im fai bak meedaha vab dam abo Alat Aba Aho gagoho im vuzehi vamdesu meedam dam zi lam abo duana oddaha bak. Abo Alat na ahebu ahamte modehe di iube um tai ahobada zi labe iho dat im vamdesu meedamda ahamda Habel amu nasi alimeat oteheda am bak. Labi neo gi vou ote usdume Berekiam adat Zakaria ab oteham bak. Ame da Zakaria lam uho Fihasi Ala Bake Vou Baedam Num Vàmteabu labe am ad oli aam bak tomba laba abo ame num lamti labi na Ala bake lomna nom vaheme vua vahudamnabu lamti laha donibu laba otehe bak. Labihàmu um dam bada zoho nim Eho neo ahit damat Alat vameadaha im aime fa dam bake ahate vameaidaha dam amomoi ziti dam busaoda Alat vameadaha im ozobohu dam ziti Em im ozobohudi dam bake vahokedam guru ziti labihasu uba neo ouda tame. Oudahemu uho fa neo ame dam zoho lam odda. Labi ame dam zoho lam uho neo dam bake gagu ut tetehesuhunaso lam bake esu ame dam labe im anekehà vuu kidadesu paku dodume eloda. Labi ame dam zoho lam uho neo um Yahudi damat uhumo fi hasi bakamta vahi Alat vameadaha im ahamda dogoit aidam bakti im meiti meedam num laba na sokba nasbe ahit alibulehena labe ame dam laba foadume geàda. Labi ame dam zoho lam uho laha neo dam iho le esdam num debu bak laba vi nohisi dam lam neo ilime num debu meida laba neo le esu. Gi labihadam bohu meeda. Um labihasu lab meedam bak lamti um tai ahobada zi labe iho aham di iube dam im vamdesu meedam dam zi laba oddaha bak lamti labihasu Alat fa ame baleà vouhou um dam bada niba fa vi beoda tame.
35(23:34)
36Imbo bak. Em ba giomim gagom kaio. Um tai ahobada zi labe iho ame dam lab oddaha bak lam Alat vi ozome ame baleà vouhom di gi uho Eho li meedaha im nim aaha aiha laham dam lam vàlu beom dam um am tame.”
37Lahame labi vi vahokedume neàdi Yesusat neo kota Yerusalem laba vahi azim Yahudi dam labe ibi iho aham di iube meedaha im lam vi ozome ahu faidi gi bak kiat ab vameadamam. “Aiee! Um kota Yerusalem laba azim dam Eho uba faobekesi meedalo. Nehaha bak. Dam ahamda Alat vameadaha im aime fa dam bake ahate vameaidaha dam zi lam um tai ahobada labe odda. Labi neo Aho gagu olu Am im vameadume esmozi laiam dam uba neo oudume modeha uho neo ame dam lam laha gi ket beodume oddume eloda. Um gi labihadam dam debut modem bak. Um Yahudi dam labihadàmu Alat uba ba beom bake Eho kuk ameaso labe am adambe meia vou faovoi am busehà labe delai dae kokoadam labe fa baguamdi vamatem bakti ulohona modi Eho uba soat vaususome iuba le modeme leidaha um gi Eba mohet vanamai moho bak.
38Iumeee! Um Em moholahit um kota Yerusalem iumti ame uho Fihasi Em Ai Ala Bake Vou Baedam Num Vàmteabu lamti labihasu Alat vou esmozi ab alimdeham bak.
39Em uho ba aam vaba vausi modesdamehamdi ba diamut uho Em alihi aahazobe fa um ahu uledi nehasu Eba gut gago, ‘Alat Aho Gagu Olu Ot Vai Im Dedateli iba etei ledamda nim abo feàteee!’ lahame uho ule neàt Eba gut valo modem di lam uho Em alihi ba aam di am tame,” lahame Yesusat fet ab vameadume esuham.