Alkitab Mobile SABDA
[VER] : [BAUZI]     [PL]  [PB] 
 <<  Markus 1 >> 

1Alam Adat Yesus abo Alat Gagu Fihasi Vimteme Oluhu Dat Boehàda labe Aho meedaha Im Neàna lam eho Markusat faasi toedaha bak debu nehaha bak:

2Dat ahamda Alat vameadaha im aime fa dam bake ahate vameaidahada Yesaya labe aho Alat Am Adat Yesus bake vameadaha im aho nehame fet toeme esuhu bak. “Eho Em im le vameadamda nasi dam bake olu neàdi Om ba olu tame. Damat Om ule neàt gut vam bak laba ozome ame da labe nasi le duzu zie vueme neàdehena ahum Om ba vula tame.

3Ame da labe aho bak aotba baa bohu dam vaba alim bak laba azi dam aba valadamda zi laba dae buduana nehi vameada. ‘Alat Gagu Fihasi Vimteme Olulo Modem Dat Boehàda lem zie laba uho nasi duzu zie fet vueme neàdehena ahum Am ba lese. Aho lem zie a kibuna vuemule. Abo vamdesuhuna bàneàna vuele.’ ”

4Lahame Yesayat aho aham di iube lab fet toeme esuhu im lam imbodi Yohanesat ab faasi meedamam. Ame da Yohanes lam ba ibi iho bak damat modi baleàhà bakti uloho vabak. Aho gi nehada. Abo sue keàbebuna unta tau neme etehàsoali fa sue baabuli sue sona bohu tademe dusu. Labi am kemohode laba laha sapi sokbat gimsu. Labi na àm di gi sàgàhàti bonahi ila labe am vaksati àda. Gi labihasu meedam dàt modem bak. Lahamda labe aho dam vaba alim bak laba le azi Alat amu aba gagoho im aho fa ot vai dam bake ab vameadume fi dedamam. Labi laba azi vameadume fi dedam di labe dam feà bak aba fet lei fet leida. Neha: Dam Yudea bak labe am num debu meida Yerusalem laba azim dam zi lamti ame Yudea bak labe am num debu mei num debu meime esdam dam totbaho lamti labihasu, “Imo iuba le Yohanesat lab vameadam im lam aidase,” lahame Yohanes bake abo gi dihasi valaida. Labihàmu aho im nehasu ab gut vameadume fi dedamam. “Ubu uho faina meedam bak lam nasi voedume fa ahu neà bak meedale. Labi um ahu vàmadehezobe eho um vuu valo baptisleidase. Labi dam totbaho fà vi aame ozobohudese. Uho faina meedam bak lam Alat ozahigeàmu fa faamome uba beolo meedam bak lam fa vei mu neàdem bake labihadale,” lahame ab gut vameadume fi dedamam. Labi aho lab vameadaha im lam damat aime iho faina meedaha bak ahate gagodume afoezobe Yohanesat ame dam lam vame Yordan Soabo laba vuu valo ab baptisleidamam.

5(1:4)

6(1:4)

7Labi aho neo dam bake im vameadam di gi im nehasu vou vameateda. “Dat ba em ohuse vi vulelo modemda lam bisi feàda am bak. Em gi feà vab dàt modem bak. Ba akati eho mei na teo meedamdati uloholi fa fota nusu Am naba dusumna lo tadehena lam eho ba ziamoe? Em ba labiham uloho vabak.

8Dam giida labe iho uba aame ozo, ‘Uho faina meedam bak lam voedume fa ahu neà bak meedalo vàmadi fa Ala bake tu vuzehehe?’ laham bak aame ozobohudem bake eho uba gi vaota baptisleidam bak. Lahana Dat ba lemda labe li uho Aba tu vuzehi meedàmu Aho Alam Aha Nutabe Neàna lam uba modi vizi teudeda tame,” lahame vou vameateda.

9Labihadam digat meida labe Yesus Galilea bak labe am num debu meida Nazaret labe lehe labe Yordan Soabo laba li Yohanesat Yesus ab vuu valo baptisleham.

10Labi valo baptisli neàdi Yesus gi etei vao labet sikisi duzu aaha asum ab fatahivaham. Labi tom aaha asum fatahivai bumatalehe bak labet Alam Aha Nutabe Neàna labe fa bume doleti ulohonali nom vou oaedume Aba nom vousi nusu vizi ab teudeham.

11Labi modeha Alat Aho asum ahoba iube Yesus bake ab nom gagoham. “Om Em Adat vàmtea Ebe Eho bisi deelemda Om am tame. Em abo Obo Oho meedam bak lam Em aam deeleho,” lahame ab nom gagoham.

12Labi Yesus baptisli neàdi Alam Aha Nutabe Neàna labe Aho neo Yesus modi ame bak lam vou esmozi fa ame bak aotba baa bohu dam vaba alim bak labe aba zoho laba ab vou laham.

13Labi vou le aidam di labe Iblisit Aba modi ozolo modidume usi ab empat puluhleham. Labi Aba modi ozolo modidam di labe Yesus gi nohubake esumna meona ziti aida. Labi Alat Am im gagu vou usem dam zi labe Aba laha li im vi vameadume na àmna loida. Labihada.

14Labi ba di iube Yohanesat Boehàda Herodes bake im vahokedume modehat Herodesat faki am meo dam gagome Yohanes si sel ab ousuham. Damat Yohanes si sel ousu neàdehezobe Yesus Galilea bak laba fa ab laham. Le Aho Ala bake ot vaha Im Neàna lam ab faasi vameadume fi dedamam.

15Aho im nehasu dam bake vameada. “Alat Aba Aho amu di iube fet gagu esuhu digat ab vou fuham bak. Aho Gagu Oluhu Dat Boehàda lam etei bak niba lehemu Ahamo Boehàdateboli dam bake deeli vame Am damali vuusu im vahokedam bak lam etei ab faasi gàhàli meedamam bak. Labihàmu uho faina meedam bak lam nasi voedume fa ahu neà bak vàmadi Alat gagu oluhu Im Neàna nim tu vuzehele,” lahame ab vameadume fi dedamam.

16Labi ba neo digat meida iube Yesusat Itea Galilea labe am valau obet ladam labe aaha Simon am vahada Andreasti im bohe dek vou bulo meedamna ab aaham. Ame dam ahim labe ibi modi baleàhà bak bohe vadam bak am.

17Làhàmu Yesusat ab gagoham. “Um ahim Ebe Eho vahokedam im ozobohudelo vi tau meedam damalele. Um etei ba bohe vam damalem bak modem vabak. Eho uba vahokedume uho fa ot vai dam nabime vame neo vahokedume ame dam labe fa Eba tu vuzehem bak modelo mozo.”

18Lahame gi etei labi gagoha ame dam ahim labe im bohe dek gi ihe laba vou esmozi Yesusat vahokedam im ozobohudelo ab vi tau vulaham.

19Labi neo vahi ladume koena ub le Yesusat vi aaha Zebedeusam adam behàsu Yakobusti Yohanesti ihe laba nusu im bohe dek vabiedamna ab aaham.

20Gi etei lab aaha labe Yesusat ab gagoham. “Um ahim Ebe Eho vahokedam im ozobohudelo vi tau meedam damalele,” lahame labi gagoha dam ahim labe im ai Zebedeusti iba tau bohe meedam dam lamti ihe laba vou esmozi Yesus bake ab tau vulaham.

21Labi Yesus Aba vi tau meedam dam lamti neo ladume num debu Kapernaum laba ab lafuham. Laba lafusi modeha hari Sabat abo Yahudi dam labe ibi iho gi azibe im digat fuhemu Yesusat Yahudi damat ihimo fi hasi bakamta vahi Alat vameadaha im ahamda dogoit aidam bakti im meiti meedam num laba oli Alam im ab faasi vahokedamam.

22Labi lab vahokedam di labe damat aiha Yesusat ba dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi labe ibi iho ladehebeat vahokedam bakti ulohona vahokedam vaba Aho gi im dedateli vahokedàmu dam labet aime ab àvodeham.

23Labi Yesus ame num laba dam bake vahokedam lahasuhu diat setan oli veimahada amu ame num laba tau olehe dat labe dae meona Yesus bake gut alamdi ab gagu geham.

24“Aa! Yesus Nazaretda oa, Om giida akati meit ihimo modem im tau meedalo modela? Oho iba li modi vàhàdeme seddalo lehe taia? Em abo Om ozobohu bak. Om abo Alat Gagu Fihasi Vimteme Oluhu Dat Boehàda bisi Neàboda Vàmtea Om am bak.”

25Lahahat Yesusat dae meot fa ame setan laba ab gagoham. “Dae vabalele. Om taho futoi ame da nim vou esmozi itale.”

26Lahame dae meot gagoha ame setan labe futolo da laba modi aheli faa gukedume dae feàna geàdume futoi ab itaham.

27Labi modeha dam zi labe ame bak lam aahemu àvodi ab ot gagoi ot gagoidamam. “Aa làhà! Etei lab modehe bak lam im amu im lamohona aaha vab taia? Ame Da nibe Aho lab modehe bak lam gi im gàhàna modehe bak. Abo Aho im dedatelehe labe teudi ame setan zi laba, ‘Futodale,’ lahame gagom di ame setan zi lam aime uledi futodume ilidam meo bak,” lahame ab ot gagoidamam.

28Labi kehàm vabna ame dam labe Yesusat etei modehe im lam aahemu fa Galilea bak laba modealadaha num debu bake le vou vameatedume ab uloholeham.

29Labi Yesusat ame setan laba gagu futoi itame neàdi Aho Yakobusti Yohanesti Aba vi tau meedam dam totbaho lamti vazisi ame num labe futoi esmozi fa Simonti Andreasti dam ahim labe im num laba ab laham.

30Labi le oli modeha Aba vi tau meedam dam labe Aba li ab gagoham. “Simonam boholeà so galihasi duana gaili bisdalo. Oba li aamale.”

31Làhàmu Yesusat Simonam boholeà gaili bisdam num bumat laba oli ame nam laba neha, “Om gailehe bak neàdele,” lahame labi mali gagoha ame gailehe bak lam fa ab seteham. Labi kehàm vaba fa usai duzu na ohume Yesus Am damti ab lodume àdaham.

32Labi dimatali aibulelo modem di labe dam aheda zi labe im dam gaileheda ziti dam setan oli veimahada ziti labihasu Yesus bake ab vou valadamam.

33Labi valadume modeha ame num doo obe laba dam dua totbaho laba li ab dozeadamam.

34Labi dozeadume modeha ame dam zi labe im gailehe bak ahaladi ahaladiaha bak lam Yesusat modi fa ab neàdedaham. Labi dam setan oli veimahada zi lam laha Aho neo ame setan zi laba gagu ab futodume ilidamam. Labi ame setan zi labe lab futodume ilidam di labe, “Am abo Alat Gagu Fihasi Vimteme Oluhu Dat Boehàda am tame,” laham bak gagomna zohàme Aho mali gi gagome ab oudaham.

35Labi dihambe di fi zeadam diat Yesusat keesi usai ame num labe futoi num debu bak vou esmozi fa dam vaba alim bak laba le Ala bake ab tom gagodamam.

36Labi tom gagodam lahasuhu di labe Simon am dam totbahoti Yesus bake ab le nabidamam.

37Labi le nabidume Yesus aahemu ab gagoham. “Dam ahebu Oba vi nabidalo.”

38Lahame gagoha Yesusat fa gago, “Lo, Em ozobohu bak. Lahana iba netàdehe num debu mei num debu mei lahadaha bake le dam laba Alat vameadaha im vameadume fi dedalo modem bak ehe bak. Alat amu Eba neha, ‘Labihadale,’ lahame Eba gagu oluhemu Eho ame bak lam ab meedalo modemam bak.”

39Lahame labi gagu neàdi Yesusat ame num debu lam vou esmozi fa Galilea bak laba esdam dam totbaho labe im num debu mei num debu mei lahadaha bak laba le ame Yahudi damat ihimo ot vahiame im meedam num dozeadaha bak laba olidume Alat vameadaha im lam le vameadume fi deda. Labi ame di labe Aho laha mei ahu oli veimaha setan zi laba gagu futodume ilida. Labihada.

40Labi ba neo digat meida iube Yesus num debu bak meidate le aidam di labe dat sokba faidi vàhàdem bohu vuusdamda labe ame bak laba godam labe Yesus bake li, “Yesus abo feàte,” lahame ozome Aho doudam obe laba ogomasu biti ab tauledamam. “Om eba faobekem vabao? Om uledemeam làhà em sokba faidi vàhàdem bohu vuusdam bak nimti damat eba fi hasi vaitesu esdam bak lamti Oho fa eba modi neàdem bak em ozobohu bak.”

41Lahame labi tauledume gagohemu Yesusat Aho aahat aam faimu faobekesi gi ozahit Am anekehàt ame da laba nom ulasi gago, “Lo, Eho modi neàdem neà bak. Om sokba faidi vàhàdem bohu vuusdam bak lamti damat oba fi hasi vaitesu esdam bak lamti nasi setele.”

42Lahame labi gagoha ame da labe am sokba faidehe bak lam fa seti fa dam ahedati vahem bak ab neàdeham.

43Labi seti neàdehemu da labe dam bake fi dem bak labna zohàme Yesusat mali ab vi vameame olulo gagoham.

44“Om sokba faidi vàhàdem bohu vuusdàmu Eho modi fa neàdehe bak lam oho a dam bake vou vameatedume fi demule. Gi damat Ala bake lomna ve vua vahudam toheda laba le gagu ame da labe om sokba faidi vàhàdem bohu vuusdam bak lam, ‘Fa modi neàdeheo?’ laham bak aho gut nabidale. Labi nabidume neàdi fa dat ahamda Musat aham di iube Israel dam bake, ‘Nehame modele,’ lahame vahokedaha bak lamti ulohona modele. Om fi ham bak neàdi fa vahem bake na fi ho oho etei si vou lalo modemna lam ame toheda laba vou le aho gut ve oteme vua vahusu om fa damti vahem bak modele. Labiham labe dam aheda aame ozo, ‘Da nim fa neàdi im fa vahem neàdehe?’ laham bak fet aame ozobohudi fa vahem bak am tame,” lahame Yesusat ab vi vameadume oluham.

45Lahana ame da labe vedi am dam totbaho bake Yesusat aba neha, “Meia a le vou vameatedamule,” lahame gagoho bak lam geàmu dam bake, “Yesusat eba modi neàdeho,” lahame fa ab vou vameatedume fi dedamam. Làhàmu damat ozobohudi Aba valadam bak labna zohàme Yesusat ba num debu bak laba laha vaba gi bàhàgo bak dam vaba alim bak laba aida. Lahana dam vaba alim bak laba aidume modeha damat gi geàmu Aba valada. Dihasi bak iube Aba valada. Dihasi bak iube Aba valada. Labihada.


  Share Facebook  |  Share Twitter

 <<  Markus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel