Alkitab Mobile SABDA
[VER] : [BAUZI]     [PL]  [PB] 
 <<  Wahyu 21 >> 

1Labi im lada lam aadume neàdi eho neo vi aaha asum amudati bak amudati ahebu ab seddume fa neo asum gàhàdati bak gàhàdati modesuhu bak eho ab aaham.

2Labi ame di labe Alat azihi kota abo kota Yerusalem gàhàda Alat asum ahoba iubet nom vousdamna eho ab aaham. Ame kota lam Alat abo gi nam dat valo modem nam labe am soa it naedume aho valo modem dat laba ahumtedi vou faodam bakti ulohona ame kota laba modi neàdehena ahum abo alihi aam neàna fauha neàna ogatedamna nom vousdam bak eho ab vi aaham.

3Eho ame bak laba aasdume modeha na daevat ame Nusumnabu labet bisteat dae buduana nehame buddamna eho laha vi aida. “Nasi aimale. Alat fa bak niba nom ilu dam bakdati fa vahi azilo modem bak ab vou fuham bak. Aho dam bakdati vahi azi fa ame dam laba modi Am damalelo modem bak. Labi Aho fa dam bakdati vou ali ahu vàmadi meeda tame. Labi dam bakda fa Ala bake ahu adat iedi, ‘Om abo feàte. Oho iba vuusdam neàte,’ lahame Am ee vousai vou baeda tame.

4Labi bak damat iho medaom fa vaksa lam Aho fa uhulamome sedda tame. Labi dam bakda iho amu bak niba esdam di kikezi gailedam bak modeo, elodam bak modeo, na im iba modi ahu faidi mem bak modeo, labihasu Alat modi fa sedda tame. Ba im amu bak niba meedaha im neo vi meedam vabak.”

5Lahame labi vameadume neàdi ame Nusumnabu laba nusdamda labe Aho eba im nehasu neo ab vi gagoham. “Nasi aamale. Na ahebu Eho fa ab modi gàhàdelo modemam bak.” Lahame gagu neàdi Aho neo eba nehi vi gago, “Oho nasi om sunit baa laba Eho lab vameadam im nim ahebu toedume esule. Im Eho nib gagodamna nim ahebu abo imbo imot modem labe ba modehe vaba alia voom vabak. Abo imbodem tadem bak.”

6Lahame labi gagu neàdi Aho nehi eba neo vi gago, “Neàdeho! Ebe Eho fet ozome esuhu im ahebu ab meedume neàdi vaitoham tame. Eho damat bak niba meedaha im ahebu Eho ahamte faasi meedume ba novam zoho vou fusi vaitomda Em am bak. Em abo Ahamteda Em am bak. Labi laha Ba Vi Novamda Em am bak. Labihaha bak. Labiham labe meit valo àhàkemda laba Eho vao aana abo meia modi elom gikina ahe neàna bohu vuusdam vao lam eho ame da laba ilabdi lu ude tame.

7Labi laha uho meidavat naat uba vabidume geàdamnàme geàmu uho Eba lab tu vuzehi meedaha bak lam mu voom vaba gi keàtet meedam bohu vuusu meedam dam laba Eho etei neà bak lab vou gago ladaha bak lam ahebu ame dam laba meeda tame. Labi ame dam lam Eho fa Em adamale. Labi ame dam labe fa Eba neha, ‘Im Boehàda am tame,’ lahame Eba vou baeda tame.

8Lahana dam im nehasu meedam dam ame vua elum feàna itea nobu bakti ulohona abo vua gazihi feàna eludam bak laba voedaha dam am tame. Damat neha, ‘Em Yesus bake tu vuzehemeam làhà damat eba faki modi geàda tame,’ laham bak labna zohàme iedi ba Eba tu vuzehi im Ebeda meedaha vab dam ame. Labi dam eba tu vuzehem mom dam ame. Labi Eho aam ahasbeam dam ame. Labi dam fi loholi la modi le modidam dam ame. Labi mei oddam dam ame. Labi mei ahugia vaitom dam ame. Labi ostam alalehena laba vou baedam dam ame. Labi meia vagemoholehe dam ahebu ame. Labihasu ahebu gi ame vua elum feàna itea nobu bakti ulohona abo vua gazihi feàna eludam bak laba voedam dam am bak. Ame dam lam gi eloho bak behàsdem dam am bak,” lahame eba vameadahana eho ab aiham.

9Labi im lada lam eho aidume modeha ame Alat Am im gagu vou usem dam tujuh ehe dam labe iho fi hiba abo, “Alat Aba fakemoholehe dam laba Aho faki feà bak fuhemu vabime vàhàdem bak ehete,” lahame ozom fi hiba zi ahala vuusualame dam bake fai bake vabidume novaha dam tujuh eho amu edehesi aadaha dam lam meida vàmtea labe eba nom ilu ab gagoham. “Nasi eba tau lele. Domba Adat labe Aho valo modem nam eho oba fi se.”

10Lahame labi gagoha Alam Aha Nutabe Neàna labe Aho eba modi vizi veimai vuusdam labe ame Alat Am im gagu vou usemda labe em visoi vousai sibu feàda laba ab vou laiteham. Laba vou laisi aho eba neha, “Nasi aama,” lahame eba labi gagohemu eho neo vi tom aaha Alat azihi kota abo kota Yerusalem gàhàda Alat asum ahoba iubet nom vousdamna eho ab aaham.

11Ame kota lam Alat Am feà bak modesu fako aam iedemna ogateda. Labi ame kota labe am ogatedam bak lam gi dam anekehàso modesumna laba taasumna doi feàna vam ke keobe ogatedam bak lamti ulohona meeda. Abo ke yaspis laham ke damat vabieme alihoehena ààmomna ogateda. Abo itaamna alihoehena aam lafutom bak modesda.

12Labi ame kota bàhàgo obe laba tàme vabousdamna kilana fai modesda. Labi ame vabousdamna labe am olem doo baabu dua belas ehena Alat Am im gagu vou usem dam laha dua belas ehe dam labe ame doo baabu laba ahala duzuiame vou aasda. Laham doo baabu zi labe am aha obe bako tot ahoba tetehesuhu bak laba Israel aho faaha adam dua belas labe iho vou faat ledaha dam debu dua belas labe im ee doo laba ahala toeidahana eho ab vi aaham.

13Ame doo baabu dua belas ehena labe ahala faheiame làteladi nehi modealada. Meida làtela ala zizem zoho iuba modesu. Labi meida làtela ala nom fi olem zoho iuba modesu. Labi meida làtela ba totbaho iuba modesu. Labi meida làtela ba totbaho meida iuba modesu. Labihada.

14Labi ame bàhàgo obe laba tàme vabousdamna labe am tom odotlahada gi ke alihi mei alihi meime vou fi bovai odosu. Labi neo ke alihi mei alihi meime vou fi bovai odosu. Labihadume tom vou vahe laidume ab dua belasleham. Labi ame lab tom vou vahe laidahana lam Domba Adat Aho gagu olu Am im vameadume esmozi laiam dam dua belas labe im ee ahala laba toeida. Lahadaha bak eho ab aadamam.

15Labi Alat Am im gagu vou usemda em vou le im vameadamda labe aho na ulohomnaso emasat modehena vuusu ame kota lamti fa neo am bàhàgo tàme vabousuhunabu labe im olem doo baabu zi lamti uloholo vuusdam bak ehet.

16Ame kota labe am modesuhu bak labe am oula ahia ehete. Labi am bohula bakti baabu bakti gi ulohote. Labi ame Alat Am im gagu vou usemda labe aho ame kota labe am bohula bak lam ulohoha abo dua ribu empat ratus kilometer ehete. Labi neo am baabu bak lamti am vousaha bak lamti gi ulohot. Dua ribu empat ratus kilometer ehete.

17Labi aho neo bàhàgo tàme vabousuhunabu lam neo am tamzohobu bak ulohoha enam puluh meter vou fuhuna ozomom bak. Ame Alat Am im gagu vou usemda labe gi dam bakda labe ibi iho na ulohom bakti ulohona ulohoho bak.

18Labi ame bàhàgo tàme vabousuhunabu lam gi doi feàna vam ke ee gagom yaspis laham ke labe mei ahoba vou vahe ziddume modehe labe ogatedamnat moz. Labi ame num debu bak ahebu gi emas abo vabieme giho neàdehena modehenat moz. Abo fakot aam di gi itaamna alihoehena alihi voena aadam bak.

19Labi ame bàhàgo obe laba tàme vabousdamna labe am tom odot vou vahe laidahana dua belaslehena lam doi feàna vam ke aam neàna labet modeme ahaladiame tom vou vahe laidaha bak. Ame ke neha: Ahamte vaheme fi bovai odosuhuda lam gi ke yaspis laham ke abo ut et gàhà lamti ulohona aam lafutom neà kebu vaheme fi bovai odosu. Labi meida gi ke nilam laham ke giholehena toi tauti ulohona koena aam lafutom kebu vaheme fi bovai odosu. Labi meida gi ke mirah laham ke alihi boz fauhalehena bimehe tauti ulohona koena aam lafutom kebu vaheme fi bovai odosu. Labi meida ke zamrud laham ke sibe gàhà alihoehena koena aam lafutom kebu vaheme fi bovai odosu.

20Labi meida ke unam laham ke alihi bozina fauhat tohesuidaha kebu vaheme fi bovai odosu. Labi meida ke sardis laham ke alihi bozina eluao busehà tau alihoehe kebu vaheme fi bovai odosu. Labi meida ke ratna cempaka laham ke haualihoehena abo geme tuhu tauti ulohona aam lafutom biem kebu vaheme fi bovai odosu. Labi meida ke beril laham ke gàhà fauhat uladdahana fatbati ulohona aam lafutom kebu vaheme fi bovai odosu. Labi meida ke krisolit laham ke haualihoehena ahaga am ahude tauti ulohona aam lafutom kebu vaheme fi bovai odosu. Labi meida ke krisopras laham ke gàhàna bihi ooti ulohona koena aam lafutom kebu vaheme fi bovai odosu. Labi meida ke lazuardi laham ke alihi giholehena fehole ohu tauti ulohona kebu vaheme fi bovai odosu. Labi meida ke kecubung laham ke alihi giholehena biobolo busehà tauti ulohona aam lafutom kebu vaheme fi bovai odosu. Labihasuhuna tom odot vou vahe laidahana dua belas eho ab vi aaham.

21Labi am doo baabu dua belas modealahana lam doo baabu meida gi mutiara ke buduana vàmtea amu vabiedume aliholi ààmomna ogatedam labe ahamo doo baabuli modesu. Labi meida gi neo ame baket mode. Labihasu ahaladiame modealadume dua belaslehena eho ab vi aaham. Labi ame kota labe am zie tomba feàna lam abo damat gohatemna lam gi emas abo vabieme giho neàdehena alihi itaamna alihoehena aam lafutomna neàna modesda.

22Lahana eho ame kota laba aaha di lam ba ame Fihasi Ala Bake Vou Baedam Num Vàmteabu ame kota laba vi tau modesuhu bak aaha vabak. Neham labe labihaha bak. Ame Num Vàmteabu lam gi im Boehàda Ala abo Bisi Feà Datebo lamti Domba Adat lamti ihimo fa ot vai ab modesdamam bak. Gi ame kota labe am zoho iuba modeo, am zoho iuba modeo, lahadam bak ahebu Alati ame Domba Adat lamti gi ostame lab vou baedam bak tadehe bak.

23Labi ala digaddati ala usehedati ame kota laba modesu fauhaedam kai. Neham labe labihaha bak. Alat Am ogatedamna feà lam fi ddam labet modi ame kota laba modesu fauhaeda. Labi Domba Adat labe ame kota labe am vuagatso ààmomna am bak. Labihasu modesu fauhaedam labe labihaha bak.

24Labi ame kota lab fauhaedam bak labet modi dam debu meiti debu meiti abo dam bakda ahebu gi ame fauhaedam bak fi ddamna lam esu goom bak. Labi ame dam labe ibi iho vuusdam soa maehena zi lam ame kota laba vou oedume ahu adat iedi Alati ame Domba Adatti, “Feàte,” lahame vou baeda tame. Labi laha dam bakda vuusdam boehàda zi labe neo ihimo gi ame baket meeda tame. Labi laha ame kota labe am bàhàgo laba vabousu tàhànabu im doo baabu dua belaslehena labe lab modealahana lam gi digat bohu oskihi bak lahasdam labe ba baguamdem vabak. Ame bak lam ba aibu bak vab labe gi labihaha bak.

25(21:24)

26(21:24)

27Lahana ba Alat ozo, “Faite,” lahame ozome gagu fi hasi esuhu dam nazohti modeo, Alat aam di ahasbeam im meedam dam modeo, meia vagedam dam modeo, labihasu ba ame kota laba vi tau oedam vabak. Gi Domba Adat labe aho vuusdam buku abo Dam Ba Elom Gikina Ahe Neàna Bohu Vuusdam Dam Labe Im Ee Toedaha Buku laba ee toedaha damta ihimo oedam bak. Laham im lada lam labihasu eho ab vi aadaham.


  Share Facebook  |  Share Twitter

 <<  Wahyu 21 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel