Alkitab Mobile SABDA
[VER] : [BERIK]     [PL]  [PB] 
 <<  2 Timotius 2 >> 

1Timotius am tane, aamei baabetfer is gwena, Uwa Sanbagiri waakena Jelemanaiserem nep nes jes golminirim jeme, aam temawer nei Kristus Yesusfar daamfennaber neya gwena.

2Taterisi ajes nasbilirim angtane uskambar jem tarnabe, taterisi jeiserem aamei imsam sarbili. Aamei taterisi jeiserem ga angtane enggalaiserem ga jep is towas-towasulmini, angtane aamei fwater jes igam towaswebabilirim enggame jei samfer angtane nafsiserem ga sene towas-towastababili.

3Seisya taterisi nawer-ningna aaiserem ga jam is sarbili: Aamei Yesus jam is tikwebaatini, ane jam is menetwesini kabwaktala ijam taabife, ginanggwana waakena Dan Pos jelemana aa gemer gam tikwebaatinirim, ane ginanggwana jei ga gam menetwesini kabwaktala jam taabife.

4Angtane ginanggwaf aa jei gam gwenaram awelna jemna waakenfer gam eyebili, jega jelem sanbaka Dan Posf aa jei gam nwinirim ini jemna ga gam saaser-saasertabana. Jega jem temawer jei awelna ginanggwamanaiserem jeter gam eyebili. Angtane ginanggwaf jam gweyanaiserem awelna jei aa jes gane gwebilirim, jei jep jam taawiyen. Jei awelna Dan Pos jelemana aa jes gam bilibenerem jam eyebife, jei jetefener gam eyebili.

5Angtane bolna aa jei gam sofobilirim jam donolfe, jei aturna bolamanaiserem jam gam onsobili. Afa jei aturna bolamana waakenfer jam onsobiyeneye, jei fwaina angtane nabal danalaiserem aa jes gam taabilirim, jeiserem jam domolyan.

6Angtane makanap baabetfer aa jei gam gowenaram, Jei nananis makanmana nabala gwanan ga jei gam tebabili.

7Taterisi nawer-ningna jeiserem ai ibe isa ajes seisyatabaibenerem, taterisi jeiserem ga iniber is gwetaasini, ane taterisi jeiserem ga jam is sarbistaabonwena, aam temawer Tuhan Jei aamei is batobana taterisi jeiserem waakenfer ga is sarbili.

8Aamei Yesus Kristus se sarbastaabon! Jei asal-asala Raja Daudmana, ane Jei mes irwa terewer. Jeiserem ga Taterisi Waakena ai ajes nasbinennerem.

9Ai Taterisi Waakenaiserem jeiserem ajewer nasbinennerem, ai kabwaktala ga ajem temawer domola, ane ranteme ga asene taferna angtane kakala gamserem. Jengga taterisi Uwa Sanbagirmana ranteme jam ne fwirebayan. Angtane nafsi Taterisi Uwa Sanbagirmana aa jei ne gwirinbefelwenaram tamna nafis-nafsiserem jewer, angtane jeiserem jam ne uftabiyen.

10Jega jem temawer ai kanaufer ai fina kabwaktala seyafter jeiserem jam agalap domolaram enggalfe angtane Uwa Sanbagiri aa jes destabaabilirim ai jei agam batobaabif. Ai jes gamserem gam ajewer eyebilirim, jega enggalf angtane jeiserem jeime Kristus Yesus ga sene tebana. Ane Uwa Sanbagiri Jei angtane jeiserem gase waakentababisini, ane jei waakenfer gwelaiserem Uwa Sanbagirfar jamer abak-abaksus ga sene domola.

11Taterisi gwonawer aaiserem ba bunaram: Nei afa Jebar Jam negama tererem, nei gamjon Jebar negama gwena.

12Nei afa kanaufer jam negama finaram nei kabwaktala seyafter gemerserem jam jep negama damtabilirim, nei Jebar Sanbakfe ga negama nwini anggwabura seyafter gemerserem jem sagabe. Afa nei Tuhan jam negama baanbaanwebanaram, Jeime nei nes gam baanbaanwebili.

13Afa nei enggam nesa gunu, "Ai Yesus ajama tikwebaatif.", jengga nei fas nejama tikwebaatiyen, safe gam, Jei se eyebaabili seyafter Jei aa jes bilirim jam eyebife, aam temawer Jei jeber-jeber se eyebili seyafter Jei aa jes bilirim.

14Timotius, aamei angtane Yesus aa jei ne tebanaram jam is towas-towastababili enggame, jei seyafter jeiserem jam ne dirinswebiyen. Angtane jeiserem ga unggwanfer is balbabili Uwa Sanbagirem boseme, jei katana jafner biltelaiserem jem temawer jam ge doksobayan. Kata tefner doksobili jes gamserem jeiserem waakenyan, aam temawer angtane doksola jeiserem aa jei ne sarbilirim, jei ga sege tikwebili Uwa Sanbagiri jam onsobalawer.

15Timotius, awelna seyafter imnaiserem aamei ga waaken-waakenfersus is gwebili. Taterisi bunarsusfer aaiserem Uwa Sanbagirmanaiserem waakenfersus is towas-towasulmini. Seyafter jeiserem gam jam is eyebilirim, jega aamei ijam sefersweyan, ane Uwa Sanbagiri Jei aamei ga is bala enggame, "Aamei angtane waakena, awelna imna samfer."

16Taterisi kabwakfer nasbiliserem Uwa Sanbagiri baife aa jes gwebilirim, jeiserem ga jam is bijauwulu ileminiwer, aam temawer angtane gam aa jei gangge nasbawenaram, jei jena gane bijausona Uwa Sanbagirminiwer.

17Angtane jes galserem, jemna taterisi aa jes gane nasbilirim, taterisi jeiserem angtane nafsi ga gane gwirinenne. Jeiserem ga enggala bubwana unggwandwasusu galserem jam waakenulyonaiserem, jengga jam gam unggwandwaswesini. Taterisi Himeneus ane Filetusmana ga gam jes gamserem.

18Jei mes ge tikwena taterisi bunarsusfer aaiserem jam nasbiliwer. Jei angtane enggam ge afaf-afaftababili, "Angtane jam irwelaiserem terewer, jeiserem mes etamwena." Jega jem temawer angtane afweraiserem jei teisyena bas ne taabifi.

19Jengga Taterisi bunarsusfer aaiserem Uwa Sanbagirmana jei kanawa. Taterisi Uwa Sanbagirmana jei dutumiriti galserem, kekelna ane baabetabara. Ane Taterisi Uwa Sanbagirmana jep ga enggam baatultel: "Tuhan Jei tousa angtane Jelemana." ane "Angtane enggam aa jei gam gunurum, 'Aiba Tuhanmanam.', angtane jeiserem jei ga etam-etama kapkaiserem jewer ga jam gam tikwena."

20Jena unggwandusa jem mwonabe pirni nafis-nafsi ga anesus: afwer emasawer ne eyebaabili ane afwer perakawer eyebaabili, ane afwer tiniwer afa onnawer. Pirni emasawer afa perakawer aa jes ne eyebaabilirim, pirni jeiserem masarmana. Jengga pirni tiniwer afa onnawer aa jes ne eyebaabilirim, pirni jeiserem ga nunu jeber-jeber jes erebuwef.

21Angtane ini jenjen aa jei gam wirtanaram etam-etama kapkaiserem jewer, angtane jeiserem jei waakensusu, pirin emasa galserem. Jei Uwa Sanbagiri tefner onsobaf. Jei enggalf gam menetwesini awelna seyafter gemerserem waakenfer gam gwebif. Ane Uwa Sanbagiri Jei awelna se gulbana angtane jeiserem jebe.

22Ga jem temawer Timotius, aamei ga ina jam is bijautana angtane tanisfenna kapkaiserem jei jes ne eyebiliserem jewer. Jengga aamei jam is unggwasa aas gemerserem gam ijam eyebife: Seyafter Uwa Sanbagiri aa jes bilirim, jeiserem ga jam is eyebili. Yesus ga uskambar is tebana waakenfer. Angtane seyafter gemerserem ga jam is nesiktababili. Waakenfer isa nwini angtane nafsiber, ijama erayan. Seyafter jeiserem ga jam is eyebili angtane Tuhan bunarsusfer aa jei ne tikwebaatinirim jebar.

23Ina jam is bijautana angtane ol kapka syefer aa jei gane nasbilirim jemniwer. Angtane jeiserem jei teisyena. Aamei tousa angtane ol kapka syefer aa jei gane nasbilirim, jepga jei gangge towaiwebili aaremem jam ge doksobafe.

24Aamei angtane awelna Tuhanmana i jei gweyibenerem, ga jem temawer aamei angtane nafsiserem jebar ijam ge doksoyan. Waakenfer is eyeipmini angtane seyafter gemerserem jebe. Angtane nafsi waakenfer is towas-towastababili. Angtane jam ijep towas-towastababilirim aamei abakfer fyela gamserem ga gam is fyena, tatarmer ijam uskamsweyan.

25Afa angtane taterisi bunarsusfer aaiserem baife jam gane gwebilirim, aamei ga waakenfer igam towas-towastababili ini foler-folereme. Bawasa angtane jeiserem fwater gam tebabili, ane jei etam-etama kapka bawas aa jes gam bilirim jei jam ne eyebife, jei etam-etama jeiserem gane eyebili. Timotius, angtane jeiserem jam is towas-towastababili ini foler-folereme, aam temawer nei teisyena Uwa Sanbagiri angtane jeiserem ini jemna ke gam gwebaipmini enggalfe angtane jeiserem jei ini kapkaiserem jam ne aftabaabunnufe, ane jei taterisi bunarsusfer aaiserem ga gane towaswebili. Jepga seyafter jei aa jes gane bilirim jelem inibe ga gangge waakenswebili, ane jei bawasminiwer ga gangge waraubili.

26(2:25)


  Share Facebook  |  Share Twitter

 <<  2 Timotius 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran