Alkitab Mobile SABDA
[VER] : [BERIK]     [PL]  [PB] 
 <<  Efesus 1 >> 

1Ga ip, aamei angtane Uwa Sanbagirmana, kota Efesus je ijeya nwinirim. Aamei ga seyafter Kristus Yesus imsa tebana, ane imna gwela Jebar ga daamfennaber. Surta aaiserem amniwer Paulus, kota Roma je. Uwa Sanbagiri Jei ams destabana enggalfe ai rasulfe gam gwef. Jei ams baftana enggalfe, ai Taterisi Waakena Kristus Yesusem temawer ai agam nasbinennef.

2Ai sembayanga as gwebabana Uwa Sanbagirfe, Uwa nemna, ane Tuhan Yesus Kristus mese, jega Jei nawersamer waakena Jelemanaiserem ip is ga sege golmini, ane ini imna is sege gwebaipmini waakenfer is ga sege folbamini.

3Nei Uwa Sanbagiri ganma pujite, Jeiba Uwa Yesus Kristus, Tuhan nemna. Nei Jebar daamfennaber sa gwena, ane jega jem temawer Uwa Sanbagiri bunarfersus waakenaiserem ga nes mes eyeipmini. Jei baabeta nes mes golmini, ane jes mese seyafter waakena Jelemanaiserem taman waaken-giriwer.

4Uwa Sanbagiri ogiri nalef Jam eyebayan, Jei nei nes mes destabaabil enggalfe nei nesa etamwesa angtane Jelemanfe, ane nei Kristusfar daamfennaber negama gwef. Ane Uwa Sanbagiri Jei nes mes destabaabil enggalfe nei negama gwef kapkaiserem nejama eyebiyen, jengga waakena tefner negama eyebili Jelem nwenabe.

5Uwa Sanbagiri nes jewer nesiktababilirim, Jei gwanan-gwanansus ga enggam mwangbisil nem temawer, jega nei gasa etamwesa Jelem tanefe, Yesus Kristus aa jes eyebisirim jeme. Uwa Sanbagiri ba gamam gul.

6Nei Uwa Sanbagiri ganma pujite, aam temawer Jei bunarsusfer waakena unggwandusaiserem Jemna nep nes mes golmini. Ini Uwa Sanbagirmana waakensusu nem temawer, jega jem temawer Jei Tane Jemna aa jes nesiktenerem mes baftannunt enggalfe nei nes gam batobaabif.

7Yesus Jei mes terent nem temawer, aawisi Jemna ga tenbentenant. Ane nei Yesusfar daamfennaber nejewera gwenaram, Uwa Sanbagiri Jei etam-etama kapkaiserem nemna nes mes wirtabaipminint, ane Jei nes mes aftabunnunt etam-etamawer. Waakenaiserem Uwa Sanbagirmana nebe jeba unggwandwasusum!

8Ane Jei waakena Jelemana jeiserem uskambarsus nes mes golminint. Uwa Sanbagirmana tousaiserem jeba unggwandwasusum, ane Jei jeber-jeber tousa apgal jigala seyafter gemerserem jam eyebife.

9Uwa Sanbagiri Jei ogiri nalef Jam eyebayan, Jei mes mwangbisil enggalfe Jener gam eyebif. Jei aa jes mwangbisilim ga enggam bil, "Ai seyafter Ajes mwangbisinirim, As tabanulsisi Kristus aa jes eyebisirim jeme." Angtane gwanan aa jei naawelam, Uwa Sanbagiri aa jes mwangbisilim jeiserem jei jam ne towaswebiyen. Jengga namwer aas jepserem Uwa Sanbagiri Jei aa jes mwangbisilim nes mes towasulmini.

10Uwa Sanbagiri aa jes mwangbisilim ga aas: Nunu Uwa Sanbagiri Jener aa jes bilirim, nunu jeiserem jam aa jep fortyaram, Uwa Sanbagiri gas tabantababisi seyafter Jei aa jes eyebaabiliserem, jega Yesus Jener gase nwinsi apgal jigala seyafter gemerserem jem Sanbakfe, taman waaken-girip ane ogiri aaiserem jep mese.

11Uwa Sanbagiri ga eyebili, jega seyafter jeiserem aa jei ge etamwebilirim, jei daamfennaber ga sege falbili Uwa Sanbagiri aa jes mwangbisilim. Uwa Sanbagiri ogiri nalef Jam eyebayan, Jei nei ga nes destabaabil enggalfe nei nesa etamwesa angtane Jelemanfe, ane nei Kristusfar daamfennaber negama gwef. Uwa Sanbagiri ba gamam gul.

12Aiba angtane Yahudimanam, angtane nabal-nabalsusu Kristusmana foryala aJeya fiyibennerem. Ane aga Uwa Sanbagiri ga asa pujitene, ga enggam asa gutena, "Seyafter Uwa Sanbagirem temawer jeba unggwandwasusum!"

13Ane aamei angtane Yahudimanyanaiserem, aamei taterisi bunarsusfer aaiserem igalaba sarbilintim, aamei Taterisi Waakena Kristusem temawer imsa taabilint, ane Uwa Sanbagiri is mes waakentababisinint. Ane Jei mes eyebilint, jega aamei Kristusfar daamfennaber gam isa gwena. Ane Uwa Sanbagiri Mafnana Jelemana aa jes bilim is mes golminint. Ane Jei Mafnana Jelemana ip is jewer golminintim, jega jem temawer aamei ga ima towaswena aamei ga Uwa Sanbagirem angtanesam.

14Mafnana Uwa Sanbagirmana nem inip nuniton, ga jem temawer nei bunarsusfer ga neya towaswena neiba Uwa Sanbagirem angtanesam. Ane nei bunarsusfer ga neya towaswena, Uwa Sanbagiri Jei ga nes erbifelse Jeleminibe, ane Jei ga nese golmisi seyafter Jei aa jes bilim nes jam golmife. Nei Uwa Sanbagiri ganma pujite, ga enggam nesa gutena, "Seyafter Uwa Sanbagirem temawer jeba unggwandwasusum!"

15Ga jem temawer, ai jeber-jeber sembayanga as gwebabawena im temawer. Ai gwanan agalap sarantam aamei Tuhan Yesus imsa tebana ginggitfer, ane aamei angtane Uwa Sanbagirmana seyafter gemerserem imsa nesiktababili, jeber-jeber ai sembayanga as gwebawena, ai Uwa Sanbagiri enggam ai bala, "Ase samfer gulbana, angtane Kristen aa jei ge nwinbenerem kota Efesus je jem temawer."

16(1:15)

17Uwa Sanbagiri, Uwa nemna, Jeiba baabetabaram ane nafabaram, ane Jeiba Uwa Tuhan Yesus Kristusmanam. Ai Uwa Sanbagirfe sembayanga as gwebabana, jega Mafnana Jelemanaiserem tousaiserem ga is golmini ibe, ane Mafnana Uwa Sanbagirmana Jeiserem, seyafter bunarsusfer gemerserem ga is towas-towastababili. Ai sembayanga as gwebana seyafter jeiserem jem temawer enggalfe, aamei ga Uwa Sanbagiri bunarsusfer gam isa damdamtaasini.

18Ai sembayanga as gwebana Uwa Sanbagiri Jei ini imna is gase fertebaipmisini, ane jega jem temawer aamei ga isa towaswena seyafter Uwa Sanbagiri aa jes bilirim Jebaner ga isa damtabisi. Ane aamei ga isa towaswena seyafter Uwa Sanbagiri aa jes bilirim Jam golmife Jelem angtanefe, jeba bunarsusfer waakenam.

19Ane aamei ga isa towaswena baabeta Uwa Sanbagirmana jeba unggwandwasusum, ane baabeta jeiserem jeme Uwa Sanbagiri nei ga nes jem batobaabili, nei Jei nejeya tebanaram. Baabeta jes galaterserem jeme,

20Uwa Sanbagiri Jei Kristus ga Jem irtesent terewer, ane ga aa gaartesant jamer taman waaken-giribo. Jep ga Kristus Jei Sanbakfe ga aa nwini Uwa Sanbagirem taasfolawer.

21Namwer aas jepserem ane jamer abak-abaksus, baabeta Kristus aa jes domolaram Jei Sanbakfe Jam nwinfe, baabeta jeiserem jeba tagarsusum baabeta nenes-nensa seyafter gemerserem jemniwer--baabeta malaikatmana, baabeta bwata bawasmana, ane baabeta angtane sanbakmana.

22Uwa Sanbagiri ga eyebili jega seyafter gemerserem jeba baabeta Kristusmanaiserem jem gwonawer. Uwa Sanbagiri Jei Kristus destabana, jega angtane seyafter gemerserem Jei aa jei ne tebanaram, Jei jem Sanbakfe gase nwini.

23Nei Kristus nemsa tebana, ane Jeiba Sanbaka nemnam. Nei nejeya tebanaram, neiba tifni Jemna galserem, ane Jei ga nem nenennap gase nwini, ane Jei Sanbakfe gase nwini seyafter gemerserem jem sagabe, ogiri aaiserem jebe ane taman waaken-girip mese.


  Share Facebook  |  Share Twitter

 <<  Efesus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel