Dual Panel1Ayana osona jei jena aa gemer gangge nesiksonaram, aamei jegme ina ga gemer isa nesiksonanna.
2Aamei angtane Kristen taman-tamna nafsiserem jewer aa jei gangge jalbilirim, angtane jeiserem ga jam igama balbabili enggalfe im jenap jam nwinfe. Angtane gam aa jei gane eyebilirim, jei ga malaikat mes gane tebabili, jengga jei teisyena enggame jeiba malaikatsam.
3Aamei angtane bwiyip aa jei ge nwinbetonom ga jam isa batobaabili, aam temawer aamei ga enggam igama enola ilem inibe, aamei angtane jeiserem jebaner seyafter bwiyip jam nuninona gamserem. Ane aamei angtane kapka aa jei gane domolaram angtane nafsiserem jemniwer, angtane jeiserem ga jam igama batobaabili, aam temawer aamei ga enggam igama enola ilem inibe, kapka jeiserem aameiya domola jei gamserem.
4Angtane seyafter gemerserem jei ga waakenfer sege gubili jelem inibe, wini yo anggwana jei waakenfer gangge nwini jem temawer. Wini jei anggwana jelemanaiserem ga jebanefener gangge tana, ane anggwana jegme gemer. Uwa Sanbagiri Jei fwaina kapkaiserem gam gulbana angtane taterisi wini yo anggwana jem temawer jeiserem aa jei gam ayebenerem, ane angtane maaryena aa jei gam gwebilirim jes mese.
5Imna ini unggwan-giri doi mese apgal jigal jepfener ipsam ge folbaminirim, jengga aamei apgal jigala ijesa damtabilirim, ini imnaiserem ga is jem sege saaser-saasersweipmini. Sa sarbistaabon Uwa Sanbagiri Jei enggam gul: "Ai bunarsusfer aamei isa Ajam mirtebitefalyan; Ai aamei jeber-jeber isa Agam gerebaabisnenne."
6Ane nei bunarsusfer ga neya gunu enggame: "Ai ajam ereyen, angtane ap aa jes gane eyeibenerem, aam temawer Tuhan Jei as batobana."
7Angtane taterisi Uwa Sanbagirmana ip gwanan is jei ne nasipminirim, angtane jeiserem ijama dirinswebabiyen. Sa sarbistaabon jei fomfom naawena, ane jei fomfom ge terbili. Jei Uwa Sanbagiri aa gemer ne tebanaram, aamei jegme gemer isa tebana.
8Ane gasa sarbistaabon enggame, Yesus Kristus Jei Jam irfifweyan. Jei jeber-jeber galateram, ir, ane namwer mese jamer abak-abaksus.
9Taterisi nafis-nafsiserem ijama onsobiyen. Taterisi jeiserem gam ke taterisi bunarsusfer aaiserem fwater ip is jes ne towas-towasulminintim. Jengga jasa taabi waakenaiserem Uwa Sanbagiri nep nes jes golminirim, je ga nes kanautababili. Hukumu tumilgalem temawenefener jam onsobiliserem, jeiserem nei nes jam kanautababiyen. Angtane hukumu jeiserem aa jei gam onsobilirim, jei jeme jam batobayan.
10Nei angtane Kristenfe nejeya gwenaram, nemna tampata ga daamfenna enggalaiserem tampata Uwa Sanbagirfe domba tane aa jep gane giranbaibaasinirim, tampata jeiserem je ga salibi Yesusmanaiserem ga jes Jei aa jep tersentem. Imama awelna Uwa Sanbagirem tenda jenap aa jei ne gwebuwenaram, jei tumilgala fas jam ne domolyan tampata nemnaiserem jewer.
11Imam sanbagirsusu jemnaiserem jei ga aawisi domba tanemana ane sapi tanemana jeiserem ga erbiwena Mwona Waakensususerem Uwa Sanbagirmana jebe. Jei aawisi jeiserem ga Uwa Sanbagirf gulbana enggalfe, etam-etama angtanemanaiserem jemna jem gam motolmisif. Jengga domba tane ane sapi tane jemna tifni ane niniserem jei ga aa ge tobitintye tampata angtane aa jep ge nwinbenerem jem sitawer, jep ga aa giranbaipmisini.
12Jega jem temawer, Yesus Jeime gemer, ti salibibe Jeime ne daktanswenant, ane jep ga ter kotana jeiserem jem mwa kautela sitawer. Jei ga enggalf ter etam-etama angtanemana gam wirulmif aawisi Jelemanaiserem jeme.
13Jega jem temawer au, nei ganma sofwe tampata Yesus aa jep nwinirim, tampata angtane gemer aa jep ge nwinbenerem jem sitawer. Ane au, nei Jei ga ganma onsoba, safe angtane nafsi nes kabwakmer sene balbabili, jei Yesusf kapka aa gemer ne bilibenerem.
14Ogiri aaiserem jebe, nei tampata abaksusfer jep nwiniserem nejama domolyan, jengga kotana abaksusfer jep nwiniserem nei ga nejesa fimini, nei nejeba nwiniserem jamer abak-abaksus.
15Jeiserem ga enggam, angtane fwatermanaiserem jei domba tane aa gemer ne kitulbowelam Uwa Sanbagirfe, jes gemerserem neime gemer nei jeber-jeber Uwa Sanbagiri ganma pujite, ane nei ga negama gunu, "Ase samfer golmini bosna Yesusmanaiserem jeme."
16Ane ijama dirinsweyan waakenaiserem jes eyebife, ane afa aamei galgalabaraye, jeiserem ga afwer ga angtane galgalyenaiserem ga jep igama kitulmini. Jes gemerserem ga gemer isa eyebili, aam temawer ini Uwa Sanbagirmana saaser-saaserfer gam folbana, angtane berna aa jei gam gularam jem temawer.
17Angtane im sanbakfe aa jei gam naawenaram, aamei jei ga jamer igama onsobaabili. Jei aa jes gane bilirim, aamei jeiserem ga jamer isa eyebili. Jei jeber-jeber aamei is gane gerebaabisnenne, aam temawer galap jei awelna jemnaiserem Uwa Sanbagirfe gane bilibene. Ane aamei jei ga jamer isa onsobaabili, jega awelna jemna jeiserem ini saaser-saasermer ga gane gwebili. Afa aamei jei ijama onsobaabiyeneye, gam jega awelna jemna waakenfer jam ne gwebiyen, ane jeiserem jeme aamei is jam batobaabiyen.
18Sembayanga jeber-jeber ap ga as igama gwebamini. Ai enggam aya towaswena, ai waakena tefner aya eyebili. Jeiserem ga ajesa bilirim, jeber-jeber waakenfer agma gwena.
19Ane sembayanga gamjon ga enggam isa gwebana, abakferyan ai gamjon ga as waraufaltya imnibe.
20Ai sembayanga ga ai gwebabana Uwa Sanbagirfe, ini waakena aa jei kitulmuwenaram angtane Jelemanaiserem jebe. Jei Tuhan Yesus aa Jei irtestenantam terewer. Yesus Jeiba nem Gembalagirsam, nei nes Jei gam gerebaabisnennerem. Ane aawisi Jemnaiserem jeme, Uwa Sanbagiri Jei ga baabeta jem golbili taterisi ibirmi Jelemanaiserem Jei aa jes bilipminirim. Taterisi jeiserem gase fala jamer abak-abaksus.
21Ai sembayanga enggalf ai gwebabana, jega Jei waakenaiserem seyafter ibe is gase kitulmini, jega aamei waakena tefner gam isa eyebili Jei aa jes bilirim jam eyebife, baabeta Yesus Kristusmanaiserem jeme. Ane ai sembayanga as gwebabana enggame, baabeta Jemnaiserem jeme Jei ga awelna nemnip gase gwebili, jega Jei aa jes bilirim nei jetefener negama eyebili. Ane nei ga Jei tefner ga negama pujitene jamer abak-abaksus. Amin, jes gamserem ga gamfener!
22Am afelen mesna ai isa enggam ai balbabili, aamei taterisi aaiserem ga waakenfer isa sarbisini ini saaser-saasermer. Ai surta aaiserem ga enggalf ai tulisulu aamei is gam batobaabif, jega aamei kanaufer gam isa fina. Ai enggam ai gunu alem inibe surta aaiserem jei bwalenyan.
23Ai aamei isa ajam towastababif enggame, nem afelna Timotius jei bwiyiwer mes totintye. Afa jei amnip tatarmer jam se fortyaram, jepga ai ga as ge gwina imnibe.
24Aamei angtane sanbaka ilemanaiserem, ane angtane Uwa Sanbagirmana seyafter gemerserem jes mese, aamei taterisi amniwer aaiserem ga enggam isa bilipmini, "Kelek, waakenfer sa gwe!" Ane angtane Kristen negeri Italyamanaiserem jei is enggam ne balbabili, "Kelek, waakenfer sa gwe!"
25Ai sembayanga as gwebabana, jega Uwa Sanbagiri Jei waakena Jelemanaiserem ip ise golmini aamei seyafter gemerserem. Tabana ga aaf. Amin.