Alkitab Mobile SABDA
[VER] : [BERIK]     [PL]  [PB] 
 <<  Ibrani 7 >> 

1Angtane aaiserem bosna Melkisedek jeiba Rajasam kota Salemwer nwin, ane jei awelna Uwa Sanbagirmana imanf gwebil, Uwa Sanbagiri aa jes ne gaartenaram tagarsusup. Jei aa ge dorwel Abrahamfar aa jewer foryalam. Abraham aa waraunal tampata raja-rajafar aa jewer ga eralbalam, ane jei mes menangswel. Melkisedek jei sembayanga aa gwebal Uwa Sanbagirfe, Jei Abrahamfe waakenaiserem gam gulbaf.

2Ane Abraham jei apgal jigala eral tampatap mes damtabil, ane apgal jigala jeiserem jei afwer (sepersepulu) ga Melkisedekf kitulbol. Bosna Melkisedekmana igi ga enggam, "Raja jeber-jeber bunarsusfer eyebuwena." Ane bosna jemna afwer ga enggam, "Raja kota Salem", ane jem igiserem ga enggam, "Raja Eral-erala fas".

3Jam ne tulisulyon Taterisi Uwa Sanbagirmanaiserem jebe, Melkisedekem uwa ane iye ane asal-asala jemna jem temawer. Ane nunu fas jam ne tulisulyon jei aa jem surulum, afa nunu jei aa jem terem. Jei ga Tane Uwa Sanbagirmana gamserem, jei jam nwini imamf jamer abak-abaksus.

4Gasa sarsi! Melkisedek jeiba bunaram angtane sanbagirsusum. Asal-asala nemna bosna Abraham jeime sanbagirem, jengga jei apgal jigala aa syenul eral tampatawer, ane afwer ga Melkisedekf kitulbol.

5Hukumu Nabi Musa aa jes tulistababilim jep ga enggam tulisul, asal-asala Lewimanaiserem jei imamf jam gam etamwenaram, jei jeber-jeber apgal jigala afwer (sepersepulu) gane taabili angtane Israelminiwer. Jei samfer gane taabili jeiserem, jei safe jem afelen mesna ane seyafter asal-asala Abrahammana.

6Melkisedek jeiba imamsam, jengga jemna asal-asala Lewiminiweryan. Safe gam, jei apgal jigala Abrahamminiwer taabil. Ane jei sembayanga aa gwebabal Uwa Sanbagirf enggalfe Jei waakenaiserem gam gulbaf Abrahamfe. Abraham jeiba taterisi Uwa Sanbagiri aa jes bilim jeyam taabil.

7Ane nemsa towaswena enggame, angtane waakenaiserem aa jei gam taabilirim Uwa Sanbagirminiwer, jei jem gwonap angtane sembayanga Uwa Sanbagirfe aa jei gam gwebabanaram enggalfe waakenaiserem gam gulbaf. Gam jega ga enggam, Abraham jei Melkisedekem gwonap.

8Imam-imamem temawer, jeiba angtane apgal jigala afwer (sepersepulu) aa jei gane taabilirim, ane jei ga galap ga gangge terbili. Jengga Melkisedekem temawer, jeime aa taabili apgal jigala afweraiserem (sepersepulu), jengga angtane enggam ge gubili, jei gemer nwini.

9Angtane enggam gunu, Lewi ane angtane asal-asala Lewiminiweraiserem jei imamf ge etamwebil, ane jei apgal jigala aane taabuwel angtaneminiwer. Jengga Abraham jei apgal jigala afwer Melkisedekfe aa galap kitulbolom, ane Lewi jegme aa kitulbol. Jeiserem je fomfoma?

10Angtane gam gunu, aam temawer Lewi jei nalef jam suruyon, jei jes galapserem Abrahamem unup, Melkisedek jei Abrahamfar aa galap ge dorwelam.

11Gwanan Uwa Sanbagiri Jei Hukumu Jelemanaiserem angtane Israelfe aa golmil. Hukumu jeiserem ga enggam gunu, asal-asala Lewimanaiserem jei awelna imamfe jei sene gwebili. Ane imam-imam jei awelna jemnaiserem gane gwebili, jengga awelna jeiserem angtane jam batobaabiyen waakensusfer jam ge etamwebife Uwa Sanbagirem nwenabe. Afa jeiserem samfer angtane jam batobaabife, gam jega imam safna nafsi Melkisedek jes galserem jei jam foroyan. Imam jeiserem jei safna Harun asal-asala Lewimana galserem galyan. Jengga Imam ibirmi mes fortya safna Melkisedek jes galserem.

12Ane safna imam ibirmiserem jam aa jep ge forobityerem, jepga hukumu gwananmanaiserem jei ga gam barwena, ane gamjon ga hukumu ibirmiserem jes gane goltaanni.

13Ane Tuhan Yesus Jeiba Imam ibirmiserem Jesam. Nei seyafter nemsa towaswena enggame, Tuhan Yesus Jei asal-asala Lewiminiweryan, Tuhan Yesus Jei asal-asala Yehudamana. Jengga Nabi Musa jei fas jam guyon enggame, asal-asala Yehudamana awelna imamf sene gwebili, gam jega asal-asala Yehudamana jei fas awelna jeiserem jam ne gwebiyen.

14(7:13)

15Jengga Yesus, Imam ibirmiserem safna Melkisedekmana Jei Jena mes gweretana, ane jewer ga neya towaswena bunarsusfer hukumu gwananmanaiserem jei ga gam barwena.

16Jei imamfe jam gweyan aam temawer taterisi fwatermanaiserem jep enggam tulisul, asal-asala Lewimanaiserem imamfe ga jenefener gam gwena. Jengga Jei gam gwena, ane baabeta gam domola jem gwefe abak-abaksus. Jega jem temawer Jei imamfe ga gam gwena.

17Taterisi Uwa Sanbagirmanaiserem jep ga enggam baatultel: "Aameiba imamsam abak-abaksusfer Is jei gwelaiserem, Melkisedek jes galserem."

18Hukumu gwananmanaiserem je baabeta fas, ane je nejama batobaabiyen. Je angtane jam batobaabiyen waakensusfer jam ge etamwebife Uwa Sanbagirem nwenabe. Jega jem temawer Uwa Sanbagiri Jei ga aa borolsini taterisi fwatermanaiserem. Namwer ga nele ibirmi ane waakena, ane jewer nei Uwa Sanbagiri ga nesa gwetmantaasini.

19(7:18)

20Uwa Sanbagiri Jei Jena Jam gaarstenanayan angtane nafsi jei imamf aa galap etamwelam. Jengga gwanan jes galapserem Uwa Sanbagiri Jei Jena mesam gaarstenanal, Jei enggam gul Yesus Jei nem imamf se gwena.

21Yesus Jei imamfe aa galap etamwelam, Uwa Sanbagiri Jei Jena enggam ga gaarstenanal: "Tuhan Jei Jena enggam mes gaarstenanna, ane Jei Jam wirulsiyen, 'Aameiba imamsam jamer abak-abaksus.'"

22Ane aam temawer Uwa Sanbagiri Jei Jena mesam gaarstenanal, taterisi Uwa Sanbagirmana ibirmiserem Jei aa jes bilipminirim Yesusminiwer nejesa domolaram je ga baabetabara, ane mes ayintye taterisi Uwa Sanbagirmana fwatermanaiserem Nabi Musaminiwer nejesa domolaram.

23Ane gwanan taterisi Nabi Musamana aa galap ne onsobilim, imam ga unggwanfer awelna aa jei ne gwebilim, aam temawer afwer gangge terbilirim, imam ibirmi ga gangge kabwitetya.

24Jengga Yesusem temawer ga enggam, Jei jamer se gwena jamer abak-abaksus. Ane Jei imamf se nwini jamer abak-abaksus.

25Jega jem temawer Jei ga samfer angtane se waakentababisini jamer abak-abaksus, angtane Jei aa jei ne tebanaram, Uwa Sanbagiri aa jei ne gwetmantaasinirim. Jei jes gamserem gam eyebili, aam temawer Jei se gwena abak-abaksus, ane Jei jeber-jeber sembayanga gase gwebaipmuwena angtanefe.

26Yesus Jei Imam Sanbagirsususerem nemna waakena, Jei nes gam batobaabili. Uwa Sanbagiri aa bala ini Jemna tabalbalsusu aa jemanem folbanaram. Jei etam-etama kapkaiserem Jam eyebiyen. Jei gwanan angtane etam-etama kapkabaraiserem jebar ge nwinbenent, jengga Jena Jei etam-etama kapkaiserem Jam eyebiyen. Jei namwer bunar-bunarsus tagarsusup Uwa Sanbagirfer ge nwini taman waaken-giribe.

27Imam-imam sanbagirsusu afweraiserem jei ga Uwa Sanbagirfe domba tane aawis gane kitulbono. Domba tane aawisi jeiserem gane kitulbono enggalfe, etam-etama kapka jelemanaiserem ane angtane nafsimanaiserem jem gam wirtabaabif. Jengga Yesus Jei jes galserem galyan. Jei aawisi Jelemana mes gula daamfenfener ti salibibe, ane jes gamserem Jei gamjon jam eyebiyen.

28Angtane imam sanbagirsusfe aa jei gam etamwenaram Hukumu Nabi Musamana aa gam gulum, angtane jeiserem jemna baabeta fas. Hukumu jeiserem je gwananmanaiserem, jepga Uwa Sanbagiri Jei Jena enggam gaarstenanal, Tane Jelemanaiserem Jei se gwena imamfe. Ane Jei ga bunarsusfer gase gwebili awelna Uwa Sanbagirfe jamer abak-abaksus.


  Share Facebook  |  Share Twitter

 <<  Ibrani 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel