Alkitab Mobile SABDA
[VER] : [BERIK]     [PL]  [PB] 
 <<  Kisah Para Rasul 1 >> 

1Teofilus am afelna, bukunu amnaiserem gwanan jeiserem, ai ames tulistaabilint seyafter gemerserem Yesus aa jes eyebilintim jem temawer. Ane ai ames tulistaabilint Yesus aa jes towas-towastababilintim, nunu Yesus aa jem tawawulsuntum Jei awelnap jem gwefe,

2jamere nunu Jei aa jem tawenantam taman waaken-giribe. Yesus nalefe Jam taweyan taman waaken-giribe, Jei angtane aa jes destabaabilirim Rasulf gwefe ga balbabili Mafnana Uwa Sanbagirmanaiserem jem baabeteme. Jei Rasul-rasulfe ga aas towasulmini, jei aa jes ne eyebiliserem.

3Yesus Jame aa tererem, Jei Jena gamjon ga gweretana nunu abakfer ga empat pulu, jamere angtane jeiserem jei aa jes destabaabilirim jei aa ge towaswebili enggame, bunar-bunarsusfer Yesusba jamam gwena. Jei Yesus ga aane damtana, ane Jei jebar ga aa ge nasbawena nunu Uwa Sanbagirmana jem temawer, nunu Uwa Sanbagiri Jei aa jem nwinirim anggwabura seyafter gemerserem jem Sanbakfe.

4Nunu daamfenna jei seyafter aa galap ne dwenaram Jebar, Yesus enggam ga balbabili, "Kota Yerusalem ijama mirsoyan, gwanan ga jeber isa fina, Mafnana Uwa Sanbagirmanaiserem Jes isa fibili. Mafnana jeiserem Uwa Amna ibe is mesam bilipminint ibe is Jam golmife, ane Ai mese Ai ibe is Amesam nasipminint Jem temawer.

5Yohanes jei aamei is fom baptistababili, jengga abakferyan Ai aamei ga isAs baptistababifi Mafnana Uwa Sanbagirmanaiserem jeme."

6Gamjon jes jepserem, angtane Yesus aa jes destabaabilirim jei Yesusfar ga aa ge betwebili. Jei Yesus ga aane tenebana, "Tuhan, Aamke namwer negeri Israelem Sanbakfe ke Aamei Is nwini, angtane gwanan aa gemer naawelam sanbakfe?"

7Yesus ga tamawolbaabili, "Aamei ijama towaswemiyen tanggala yo nunu jeiserem. Uwa Alemana Jener se destabili jeiserem gas etamwena.

8Jengga aamei baabeta isa domolfa, Mafnana Uwa Sanbagirmana aa jep iretyaram imnibe. Ane aamei angtane nafsiserem ga isa towas-towastababili Am temawer kota Yerusalemminibe, ane ona Yudeyaminibe seyafter gemerserem, ane ona Samaryaminip, ane jamer ogiri fwesabo."

9Yesus jeiserem jama tabanulurum jam nasbilibe, Jei ga tawena taman waaken-giribe Jei jemer ne gerebaiswena, ane gara ga matana Jei, aa jep ne gerebaiswenaram.

10Gemer aa galap ge gerebaiswenaram winsiwer Yesus aa jewer tawenaram, aafer-aafer angtane naura ga aa ge fyatetya fene sinsinsusu jebaner jem tarnabe.

11Ane ga ge balbabili, "Aamei angtane ona Galileyamana, jeje bafa aamei jeber ga ima fina, ga ima gaaraiswena winsibe? Jeiserem Jeiba Yesusam aa Jei tawenaram taman waaken-giribe. Jei aamei is Jam mirtebitefala, ane Jei gamjon se waraunu, aamei igemera gerebaiswenaram, jes gamserem ga gemer se iretya."

12Jewer ga Rasul-rasulu jeiserem jei taarentumu bosna Saitun ga aane mirtene, gamjon ga kota Yerusalemwer ga aa ge waraubili. Taarentumu jeiserem jemna bijauwer kilometer daamfenna Yerusalemwer.

13Jame aa galap ge forobilirim kotanabe jena nomkef jei jep ge nwinbeleiserem, jei ga aa ge tabwili mwona tagarap aaiserem jebe. Rasulu jeiserem ga aas: Petrus ane Yohanes, Yakobus ane Anderyas, Filipus ane Tomas, Bartolomeus ane Matius, Yakobus tane Alfeusmana, Simon angtane Patriot, ane Yakobus nafsiserem tane jemna Yudas.

14Jei jeber-jeber seyafter daamfennaber gangge betwebili, ane ini daamfennaber sembayanga ga gane gwebawena. Jei wi mese jebaner gam betwebili sembayanga jam gwebafe. Maria ene Yesusmana, ane Yesusem oson mesna jei mese jebaner gangge betwebili.

15Nunu daamfenna jeme, angtane Yesus aa jei ne tebanaram ga aa ge betwebili sembayanga jam gwebafe. Angtane jeiserem unggwanfer ga engbar ga enggammer 120. Ane Petrus ga irwena jam nasowefe, jei enggam ga balbabili,

16"Am afelen mesna, Mafnana Uwa Sanbagirmana Jei Raja Daudfe ini Jeyam gerbal enggalfe tateris Yudasem temawer jam tulistababife Taterisi Uwa Sanbagirmanaiserem jebe. Jei fwater aa jes tulistaabilim Yudas aa jes eyebiliserem jem temawer, jeiserem se tabanwena. Ga enggam, Yudas jei angtane kakalaiserem jei mes balbabilint Yesus jam ne tebafe.

17Yesus Jei Yudas mesam balant, jei mese awelna nemnaiserem jes gwebife, ane Yudas jeiserem ba nem afelnam."

18(Yudas jei kapkaiserem aa jewer eyebilintim, jei doini ga jem temawer tebanant. Doini jeiserem ona ga jem armantanant, ane jep ga jan, witifini ga aane bitnebaatinint unu gane subatyant, ane ga terent.

19Angtane seyafter kota Yerusalem je gemerserem, jei taterisi jeiserem mesam ne towaswebilint. Ona jeiserem ga enggam ne balwena jelem oleme, Akeldama, igi jemna ga enggam "Ona Aawisibere".)

20Petrus gamjon ga balbabili, "Buku Mazmurube jep mesam baatultel enggame: 'Taman nwini jemna gwanan saf se taman feneswena, angtane jep gwanan jam nwinyen.' Ane gamjon jegme enggam mesam baatultel: 'Safnant, angtane nafsiserem jem dwenabe jei se nwini.'

21Jega jem temawer am afelen mesna, namwer aas jepserem nei angtane nafsi afa jam nesa destabana, angtane nei nejebara wofowenaram Yesus nebar galapserem,

22nunu Yohanes aa galap towaiwuluntum angtane jam baptistababife, jamere nei Yesus neya damtanant Jei aa galap tawenantam taman waaken-giribe. Angtane nei jesa destabanaram, jeme angtane nafsi gase towas-towastababili Yesusem temawer nei gamserem. Jei enggam gase towas-towastababili, 'Yesus Jei mesam irwena aa jewer terentem.'"

23Jepga angtane jep aa jei ge betwebilirim, jei angtane naura ga aane gitmini, Yusuf afwer bosewer Barsabas (ane afwer bosewer ga Yustus), ane afelna ga Matias.

24Jes jepserem jei sembayanga seyafter ga aane gwebana, enggam ga aa ge gubili, "Tuhan, Aamei tousa ini angtanemana seyafter gemerserem. Yudas jei awelna Rasulf gwefe mes mirultefala, jei mes tere. Jega jem temawer angtane naura aaiserem, afelna abe as jam Is destabaamini, bunarsusfer ga nansa Yudasem dwonap jei gwefe.

25Jei awelna gase eyebili, Rasul Yudas aa jes mirultefalantam, Yudas jei jam sofwena tampata jei jewer sofwelaiserem jewer."

26Sembayanga jam aane tabantanaram, angtane naura jeiserem jemna bosna ton touyap ga aane tulisomini, ton touya ga aane gin-ginsona, ane tuna bosna Matiasmana aa jep ne tulisulbonorom ga jentya. Jepga Matias ga aane gaartena Rasulfe nomor dua belas, angtane Rasul sebelas jebar ge wofobafe.


  Share Facebook  |  Share Twitter

 <<  Kisah Para Rasul 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran