Alkitab Mobile SABDA
[VER] : [BERIK]     [PL]  [PB] 
 <<  Kisah Para Rasul 13 >> 

1Jes galapserem angtane Kristen kota Antyokya je, afwer nabifam naawena ane afwer gurufam naawena. Jemna bosna ga aas mese: Barnabas; ane Simeon, angtane seiseye; ane Lukius, angtane kota Kirenemana; ane Manahem, jei Gubernur Herodesfar ne sweinint; ane Saulus.

2Nunu nafsiserem jeme jei Tuhan aa galap ne pujitenerem, ane jam ne dwenyan enggalfe Uwa Sanbagiri gam ne pujitef, Mafnana Uwa Sanbagirmana ga balbabili, "Barnabaso Saulus sa serkensosi enggalfe, awelna Amna tefner As jei ge gweyibef."

3Jame aa galap ge tabanswebilirim tumilgala jam ne tumilyen enggalfe Uwa Sanbagiri gam ne pujitef, ane sembayanga aane gwebana taban, jei tafna ga aane tosomuntena angtane nawana jeiserem jemnibe, ane ga aane bafsona jam ge sofwefe.

4Mafnana Uwa Sanbagirmanaiserem Jei Barnabaso Saulus ga gitmini enggame, "Kota Seleukyawer sege sofwe, ane jewer ga atdusa layarabaraiserem jem ga is ge sofwa jamere naanteya Siprus jebo."

5Jame aa galap ge fornaram kota Salamis je, jepga taterisi Uwa Sanbagirmana ga aa ge nasibenenne jena angtane Yahudimana aa jep ge betwebuwefaram. Ane Yohanes Markus ga jei onsomini jam batomife, taterisi Uwa Sanbagirmana jebar ne nasibenenef.

6Jei naantei jeiserem jem nenenesamer ge sofobili jamere kota Pafoso aa ge forobili. Ane angtane Yahudimana aasaje ga jep ga aane damtana bosna jemna ga Bar Yesus. Jei faatrewabara, ane jei jena enggam bala, "Aiba nabisam."

7Jes jepserem Sergius Paulus jei Gubernurfe ga jei nwini naanteya jeiserem jebe, ane jei Bar Yesus angtane faatrewabara jeiserem jebar jena waakenfer ge damdamsosini. Gubernur jeiserem tousaiserem jemna uskambar, ane jei Barnabaso Saulus ga jenmini. Jei enggam gunu, "Ai tateris Uwa Sanbagirmanaiserem ajewer saribaasif."

8Jengga angtane faatrewabaraiserem bosna Bar Yesus, bosna jemna Yunanim olem jei Elimas, jei Barnabaso Saulus baif gwemini. Jei ini Gubernurmana gam dektebef, jega Gubernur jei Yesus jam tebayan.

9Jepga Saulus, jemna bosna afwer ga Paulus, jei Mafnana Uwa Sanbagirmana mes bugufswebana, jei Elimas ga gerebana,

10ane ga bala, "Aamei tane bawasmana gamserem. Aamei waakenaiserem baif im gwebili. Aamei angtane nafsi gam afaftababili uskambar, ane aamei angtane faatrewa imnaiserem ijem afaf-afaftababuwena. Tuhanmana bunarsusferaiserem aamei jeiserem enggamem bili je bunaryan.

11Namwer aas jepserem tafna Uwa Sanbagirmanaiserem is jese denbene. Nwena imna is jam sene kofnebana jamer abaktouya, gwer nafa ga ijam damtayan." Jes jeberserem angtane jeiserem jei jena ga entene nwena gar seiseye motsobaasinirim, ane jei ga sarananna angtanef enggalfe jei aftafalfe.

12Gubernur Sergius Paulus jame aa galap domolaram aa je etamwenaram, jei Yesus ga tebana. Jei taterisi Tuhanem temawer jam bitbitwebili.

13Paulus ane angtane jei aa jebar ge wofobanaram, jei kota Pafoswer ga aa ge sofobili, jamere kota Pergaminibe propinsi Pamfilya je jep aa ge forobili ateme. Jes jepserem Yohanes Markus jei jelem afelen mesna ga jep mirtebitefala, ane jei kota Yerusalemwer ga warauwa.

14Paulus ane angtane afweraiserem kota Pergawer ga aa ge sofobili, ga kota Antyokyaminibe ona Pisidya jep ga aa ge forobili. Nunu Sabateme, nunu angtane Yahudimana aa jem ge nwinbisiwefaram, jem ga aa ge gubili jena angtane Yahudimana aa jep ge betwebuwefaram, jep ga aa ge nwinbene.

15Taterisi Nabi Musamana ane taterisi nabi nafis-nafsi jei aa jes ne tulistababilim, seyafter jeiserem jam aa galap ne tabanulurum jam gerabaabistelabe, angtane sanbak-sanbaka jena jemnaiserem aa jep ge betwebuwefaram jei ga aane balbabili, "Am afelen mesna, ke samfer aamei taterisi angtane jem kanautababiliserem jes isa nasbili? Ai taterisi jeiserem ajama sarbisif."

16Paulus ga irwena, tafna kukmer ga gwemini, ane ga balbabili, "Angtane Israelmana, ane angtane Yahudimanyan Uwa Sanbagiri aaf aa jei ne pujitawenaram, ai as imsa sarbasi!

17Uwa Sanbagiri angtane Israelmana aa jes ne pujitawenaram, Jei asal-asal amnaiserem mes destabaabil. Gwanan unggwanferyan jamere unggwanfersus, negeri Mesir je aa galap ge nwinbelem. Jei ga enggam ge nwinbel, angtane foryala gamserem. Jepga Uwa Sanbagiri Jei baabeta unggwandusa Jelemanaiserem jeme, angtane jeiserem jem ga aftabifel negeri Mesirwer, ga aa ge sofobil.

18Tahunu ga empat pulu, angtane afweraiserem jemniwer jei safe kapkaiserem jes ne eyebuwel, Uwa Sanbagiri Jei jebaner waakenfer ge nwinbel taman dwisgiribe.

19Uwa Sanbagiri Jei anggwabura tuju gam falamulsil ona Kanan je, ane Jei ona jeiserem angtane Jelemanaiserem jep ga gaarmil.

20Seyafter jeiserem tahunu ga 450 ga jem fal. Seyafter jeiserem taban, jepga Uwa Sanbagiri Jei angtane sanbak-sanbaka jep ga kitulmini enggalfe, angtane jei ne balf bunar afa fas. Ane angtane sanbak jeiserem jei sanbakfe ga jei naawel jamere Nabi Samwel aa foryal.

21Jepga angtane jei Uwa Sanbagiri enggam ga aane bal, 'Uwa Sanbagiri, abe ase Raja se gaarmi.', ane Uwa Sanbagiri ga Raja Saulus ga gaarmil. Raja Saulus jei tane Kismana, anggwabura Benyaminmanaiserem, ane jei tahunu unggwanfer ga empat pulu sanbakfe jamer nwinibe.

22Uwa Sanbagiri Jei Raja Saulus aa galap balam, 'Aamei Rajafe gamjon ijam gweyan', jepga Uwa Sanbagiri gamjon Daud ga gaartel Rajafe. Uwa Sanbagiri Jei Daudtem temawer enggam gul, 'Ai Daud tane Isaimana, Amsa bala: Angtane jeiserem jei samfer, ane jei seyafter gemer gam eyebili Ai gemer Agam gunurum.'

23Ane asal-asala Daudmana Jeiba Yesusam, Uwa Sanbagiri aa Jes gaarminirim angtane Israelfe enggalfe angtane gam waakentababisif, Jei gwanan aa gemer gulum.

24Yesus nalefe awelna jam gwebiyen, Yohanes angtane Israelmana mesam balbabilint enggame, jei ga etam-etam kapkaiserem jewer gam ge tikwebif, ane gane baptistababif.

25Ane jes galapserem Yohanes awelna jemna amkom fom tabanulu, Yohanes angtane ga balbabilint, 'Aamei seyafter ifoma gunu, ai nansa? Ai ke angtane aas aamei ijesa fibanaram. Jengga sa angga, Angtane jeiserem se fortya awelna amna ajep tabanulurum. Tofgol newa Jemna ajam fersobaasiyen, aam temawer Jei Tane Uwa Sanbagirmana, ane ai angtane bastantouya.'

26Am afelen mesna, asal-asal Abrahammana, ane angtane Yahudimanyan aaf Uwa Sanbagiri aa jei ne pujitawenaram, Uwa Sanbagiri Jei taterisi nes mes golminint enggame, Jei nes fomfom se waakentababili.

27Angtane Yerusalemmana ane jem sanbakfe aa jei ge nwinbenerem, jei teisyena enggame Yesus Jei angtane se waakentababili. Jei jam ge towaswebiyen taterisi nabi-nabimana aa jes ne gerabistowefaram jeber-jeber nunu Sabateme, nunu angtane Yahudimana aa jem ge nwinbisiwefaram. Taterisi nabi aa jes ne nasbilim jeba bunaram, aam temawer angtane jei Yesus mes ne munbonont, nabi-nabi fwatermana jei gwanan aa gemer ne nasbilim.

28Safe etam-etama jam ne domolbayan Yesus jem munbofe, jei Gubernur Pilatus enggam ne bala Yesus jam munbof.

29Ane seyafter jeiserem ga taban, seyafter Yesusem temawer aa jes ne tulistababilim Taterisi Uwa Sanbagirmanaiserem jebe, jei Yesus jam tinswef ti salibiwer, ane gam tirnnuf tonmwa bitisibe.

30Jengga Uwa Sanbagiri Jei mes irtenent terewer.

31Ane nunu unggwanferyan Jei Jena ga aa ge sanant angtane tarnabe, angtane Jebaner aa jei ge jalbilirim ona Galileyawer jamere kota Yerusalemo. Ane jei ga Yesusem temawer jep ne nasipmini angtane Israelfe.

32Ane namwer aas jepserem Taterisi Waakena ai is ajama nasipmif, Uwa Sanbagiri asal-asala nemnaiserem jebe aa jes bilipmilim enggame, 'Jeiserem Aba As eyebili.'

33Jeiserem Uwa Sanbagiri abe mes eyeipminint, asal-asala jemnaiserem. Jei ga Yesus gamjon Jam irtef terewer. Mazmur naura jep ga enggam baatultel: 'Aamei Tane Amna, Ai Ames etamwena Im Uwafe nunu namwer aaiserem.'

34Uwa Sanbagiri Jei Yesus mes irtenent terewer, ane Jei gamjon Jam butsweyan. Taterisi jeiserem ga Uwa Sanbagiri gwanan aa jes bilim: 'Ai waakena IsAs eyeibene Ibe, Ai gwanan Raja Daudfe Ajes bilibenerem.'

35Gamjon pasala nafsiserem jep bil: 'Aamei Angtane waakensusu Imna Ijam balyan, jam butswefe.'

36Raja Daud jei ga taterisi Uwa Sanbagirmana mes onsoibel, jei aa galap gwelam, jamere aa tere. Jepga aane tirnnul asal-asala jemnaiserem jem tarnabe, ga jep butswel.

37Jengga Angtane Uwa Sanbagiri aa Jes irtenentem terewer, Jei Jam butsweyan.

38Jengga aamei am afelen mesna, aamei seyafter taterisi aaiserem jam isa towaswebili enggame, Yesus Jei etam-etama kapka nes mes wirulmisini, gamjon jeiserem Jam sarbistaabonyan.

39Aamei seyafter jam isa towaswebili enggame, Yesus seyafter aa jei ne tebanaram, etam-etama jemna mes ge barweipmini, ane Uwa Sanbagiri enggam gunu, angtane jeiserem jei waakena. Jengga Hukumu Nabi Musa aa jes tulistababilim, Hukumu jeiserem jeme etam-etama kapka angtanemana fas jam borolmiyen.

40Ga jem temawer aayai, jega gam jam etamweyan imnibe, nabi-nabi aa jes ne tulistababilim:

41'Se domol, aamei syefer ijesa nasbilirim Uwa Sanbagirem temawer, aamei isa bitbitwena, ane ga isa tere. Namwer aas jepserem, Ai jes As eyebili aamei baife ijesa gwebilirim, safe angtane is jas ne nasipmini ibe.'"

42Pauluso Barnabas jena angtane Yahudimana aa jep ge betwebuwefaram jep aa galap ge totintyerem, jei ga aane gitmini, "Sabata gamjon jepserem, taterisi jeiserem gamjon ga jam is nasbili."

43Angtane jeiserem jei jam aa galap ge tobitintyerem, angtane Yahudimana unggwanfersus, ane angtane Yahudimanyan Uwa Sanbagiri aa jei ne erebenerem, jei Pauluso Barnabas ga aane onsomini. Rasul nauna jeiserem jei angtane jeiserem ga jes ge towas-towastababili, ititmer ga aa ge balbabili, "Aamei isa fina waakenaiserem Uwa Sanbagirmana Jei aa jes kitulminirim jeme."

44Nunu Sabat gamjon jeiserem, angtane safe seyafter aa gemer ge nwinbenerem kotana jeiserem jebe, jei ga aa ge jalbili enggalem temawer Taterisi Uwa Sanbagirmana jewer ne sarbisif.

45Jengga angtane Yahudimana aa galap ne damtabilirim angtane unggwanfer jeiserem, ini jemnaiserem ga kabwakfer ga aa ge folbamini, ane jei Paulusfe kapkaiserem ga aane nasbaibene, ane baif ne gwebabili taterisi Paulus aa jes nasbilirim.

46Pauluso Barnabas jei jam ge ereyen, jei baabetfer ge nasowena, "Taterisi Uwa Sanbagirmana ai nabala ga ip ge nasipmini, jengga aamei ibaifa gwebili. Aamei enggame ima gunu, 'Waakenfer gwelaiserem jamer abak-abaksus ajama taabiyen.' Jega jem temawer namwer ai isa jam as ge mirtebitefala, ane ga ajewer ge sofwa angtane Yahudimanyanaiserem jemnip.

47Aaiserem je Tuhan abe as jes bilipmilim: 'Ai ga imter gitmini, aamei nafabara ga aamei is ge nwini angtane Yahudimanyan jemnibe, aam ga taterisi waakenaiserem ga aamei is ge gwirnenne jamere ogiri fwesa jepserem jebo.'"

48Angtane Yahudimanyan taterisi jeiserem aa galap ne sarbilirim, ini jemna saaser-saaserfer ge folbamini, ane ga aa ge gubitena, Taterisi Uwa Sanbagirmana je waakena. Ane angtane seyafter Uwa Sanbagiri aa jes balbabilirim jes ne taabili waakenfer gwelaiserem jamer abak-abaksus, angtane jeiserem ga aane taabili.

49Ane Taterisi Uwa Sanbagirmana ga aane jawola ona jeiserem jebe.

50Jengga angtane Yahudimana jei wi sanbak-sanbaka Uwa Sanbagiri aa jei ne erebenerem, ane angtane sanbak mese kotana jeiserem jebe, ga aane balbabili, "Taterisi jeiserem ijama taabiyen!" Ane kapkaiserem jes ne eyeipmini Pauluso Barnabas jebe, ane ga aane surmini ona jeiserem jewer.

51Jepga Pauluso Barnabas tufa ga aa ge tentebaabisini sonabara, jega angtane kotana jeiserem jepmana jei gam ge towaswebif jei kapkaiserem jena ga jes ne eyebili. Ane Pauluso Barnabas kota Ikoniumwer ga aa ge sofwa.

52Ane angtane Yesus aa jei ne tikwebaatinennerem kota Antyokyawer jeiserem, jemna ini saaser-saaserfer ge folbamini, ane Mafnana Uwa Sanbagirmana jei mes bugufswebabili.


  Share Facebook  |  Share Twitter

 <<  Kisah Para Rasul 13 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran