Alkitab Mobile SABDA
[VER] : [BERIK]     [PL]  [PB] 
 <<  Kisah Para Rasul 20 >> 

1Angtane kota Efesusmana gwanan ini uskamer aa jemanem ge folbaminirim, angtane jeiserem gamjon aa galap ge waakenswebilirim, Paulus jei angtane Yesus aa jei ne tebanaram ga jenbebili, ane ini jemna ga aa kanautabaipmini. Taban, Paulus ga balbabili, "Kelek-kelek." Ane jei ga aa sofwa propinsi Makedonyawer.

2Jei Makedonya ga jep wofena, ane jei angtane Yesus aa jei ne tebanaram, esorola jep ga nasipminenne enggalfe, jega angtane jeiserem ini jemna gam ge kanausweipmif. Jewer ga Paulus negeri Yunaniwer ga sofwa, ane jep ga forna.

3Jei Yunani je aa nwinirim muara ga nawer-ningna. Jewer ga jei ga gunu, "Ai ajam sofwef propinsi Siryawer atdusame." Jengga Paulus jam aa sararam enggame, angtane Yahudimana Sirya je, jei Paulus mes ne mwangbasini jam ne munbofe, Paulus jei gamjon ga warauwa propinsi Makedonyawer.

4Angtane Paulusfar aa jei ge sofobilirim, bose bosna ga aas seyafter: Sopater tane Pirusmana, kota Bereya jep surnunt; Aristarkus ane Sekundus, angtane nawan jeiserem jei kota Tesalonikawer ge jela; Gayus jei ga kota Derbe tane; Timotius; ane Tikikus ane Trofimus, jei ga propinsi Asyamana.

5Angtane jeiserem nabala ga jei ge danabili, ane jei Paulusfar ai ase kota Troas je jep sene fimini.

6Masara Roti Tanyana jes Tombaabif jamer taban, ai kota Filipiwer ga as ge sofna atdusame, ane nunu unggwanfer ga tafna gwiri kota Troas je jep ga as ge forna, ane angtane jeiserem jebar ga asa dorwena. Jepga minggunu daamfenna ajamera nwinibe.

7Nunu gwanan aaiserem minggunu jeiserem, jepga aya betwena enggalfe, Rotini gam bitabaabif jam tombaabife Yesus gam sarbastaabonf. Paulus angtanefe ga aa ge nasipmini. Jei gwirmer sofwelabar, ane jega jem temawer jei taterisi jam nasbilibe jamer gwini nenennap.

8Mwona bolap jeiserem, ai ajeba betwenaram, lampunu jep ga anesus aane dutabaabilirim.

9Tansi aasaje bosna jemna Etikus, jei jendelanap nontena. Paulus jei abaksusfer nasowena, ane tansi jeiserem Paulus jamer sarbasilibe jamere nunu folbana. Jei jeber ga tastefala, ane ga efsosini tingkata ningnaiserem jewer ga jentya. Angtane jei jame aa galap ne gaartenaram, jei fwater tere, futunuter ne gaartena.

10Jengga Paulus ga iretya. Jepga tansi jeiserem jem sagabe jei ga aa tatena, ga tebana. Ane ga balbabili, "Aamei ipsama syenaram, jei gemer gaarasini."

11Paulus ga warauwa jam tawefe mwona bolabe, jei Rotini ga bitabaabisini, ane seyafter ga dwena. Aa dwena jamer taban, Paulus abaksusu jame aa nasowenaram, jamere ona naf. Jepga Paulus ga aa sofwa.

12Angtane jep aaiserem jei tansi jeiserem ga aane girinfele jelem jenabe, ane angtane seyafter gemerserem ini jemna ga kanautabaipmini.

13Ai ajama danna atdusame kota Asoswer, Paulusfar ajeba dorwef jei ai as gam nasbabisiwenantam. Jei tufsamer sofwa os tamer.

14Jame aa ge dorwebilirim kotana bosna Asos je, Paulus jei atdusap ga juwili. Jewer ga aya sofwa jamere naanteya Metileneyo.

15Jem gwirmer ga aya sofwa jamere ga aya batona naanteya bosna Kiyos jem gwetmanabe. Nunu afelnaiserem jeme naanteya Samoswer ga aya sofwa, ane nunu gamjon jeiserem ga aya forna kota Meletus je.

16Paulus mesam gunu enggame kota Efesus je ajama batoyan, enggalem temawer jei bai propinsi Asya je abakfer jam nwinfe. Ini jemna enggam folbana ai tatarmer ajam sofwef jamer kota Yerusalemo, jega enggalf ai fornaram Yerusalem je Nunu Pentakosta nalef jam falyan.

17Kota Miletus je, Paulus angtane ga baftana ula jei gwirinfelfe kota Efesuswer enggalfe, angtane sanbaka jemata Efesusmanaiserem aa jei ne taabilirim gam balbabif jam ge jalbife Paulusfar gam ge dorwebif.

18Jei jame aa galap ge forobityerem, Paulus ga balbabili, "Aamei imsa towaswena, ai afomfom nwini imnibe, ai agalap fortyantam imnibe propinsi Asya jebe jamere ai aamei is ai mirtebitefalant.

19Ini onabertalaiserem, ai awelna Tuhanmana ga ajem gweyibenent nwaafonabaner. Ai unggwasbala unggwanfer ai domolant enggala, angtane Yahudimana kapkaiserem abe ase gala gane eyeibenentem.

20Aamei imsa towaswena ai taterisi seyafter waakenfer is jei ne batobaabilirim, jeiserem isa ames nasipmini. Ane ai aamei isa mesam towas-towastababili, angtane unggwanfer jepserem, ane ilem jenap mese.

21Ai taterisi Yesusem temawer ames nasbili angtane Yahudimanfe, ane angtane Yahudimanyan jes mese. Ai jei uskambar ames balbabili enggame, 'Sa tikwe etam-etamawer, ga isa jela Uwa Sanbagirminibe, ane Tuhan Yesus ga isa tebana!'

22Ane namwer aas jepserem Mafnana Uwa Sanbagirmana ams baftana ai kota Yerusalemwer ajam gwife. Ai teisyena jebe bai se etamwena amnibe.

23Ai enggam fener ai towaswena, kotana seyafter gemerserem jebe, Mafnana Uwa Sanbagirmana Jei ai as mes bala enggame ai bwiyip asene gaataantena, ane angtane nafsi jei kapkaiserem ap sene eyeibene.

24Jengga gwela amnaiserem jem temawer ai ajam ereyen jam terf afa jam gwef. Ini amna ase enggam fener folbana awelna Tuhan Yesus ap aa jes gulbanaram, ai awelna jeiserem jamer as tabanulsini. Awelna jeiserem ga enggam, ai Taterisi Waakena jamer as nasbinenne, Uwa Sanbagiri Jei waakena Jelemanaiserem nep nes jewer golminirim jem temawer.

25Ane ai ames towaswena enggame aamei seyafter gamjon ase ijama damtayan, safe ai aamei seyafter is amesam towasulmini nunu Uwa Sanbagiri Jei jem gwelaiserem anggwabura seyafter gemerserem jem Sanbakfe jem temawer.

26Nunu namwer aaiserem ai ga uskambar ai nasowena, afa Uwa Sanbagiri Jei aamei is jam waakentababisiyeneye, jeiserem jeke ai kabwakulu.

27Ai ajam gwesiyen taterisi Uwa Sanbagirmana seyafter gemerserem ip isa ajam nasipmuwelabe.

28Aamei in ina waakenfer isa gaaramisnenne, ane jemata seyafter jegme waakenfer isa gerebaabisnenne, aam temawer Mafnana Uwa Sanbagirmana Jei awelna aaiserem ibe is mes golmini. Aamei jemata jeiserem ga enggam isa gerebaabisnenne, angtane domba jelemana aa gemer gam gerebaabisnennerem. Uwa Sanbagiri Jei jemata jeiserem mes armantababilint aawisi Tane Jelemanaiserem jeme, Jame aa galap terentem.

29Ai amesam towaswena enggame, ai jame ajep sofwaram, angtane kakalaiserem im nenennap ga sege jalbili, ane jei kapkaiserem ga sene eyeipmini angtane Yesus aa jei ne tebanaram jebe.

30Ane angtane ileminiwer, jei taterisi Uwa Sanbagirmana bunarsusfer jam ne nasbiyen, ane jei ini angtanemana ga sene dektebaipmini jeleminibe, jega jei jeter ga sene onsobaabili.

31Jega jem temawer aamei ina ga waakenfer isa waakensosini! Sa sarbistaabon enggame ai tahunu nawer-ningna, gwin gwer ajam tikweyan ai aamei isa ajam towas-towastababuwelabe nwaafonabaner, aam temawer ini amna ajam eseswebana im temawer.

32Namwer ai ga isa jam kitulu Uwa Sanbagirem tafnap, jega Jei aamei waakenfer is gase gerebaabisnenne, ane aamei taterisi Jemna ga isa taayibene. Jei baabeta ga is golmini ibe, ane Jei waakena Jelemanaiserem ga is golmini, waakena enggalaiserem Jei aa gala gam golminirim angtane Jelemanaiserem jebe.

33Ai doi afa fen afa isa jam bilipmiyen ap gulbafe.

34Aamei iner imsama towaswena, ai awelnap aner agam gwena doini jam domolfe, jega enggalf tumilgala jem agam armanulu alefe ane alem afelen mesnaiserem jep mese.

35Seyafter ai ajes eyebilirim, jeiserem jeme ai nele ga isa jem saamisini, jega awelna unggwanfer waakenaiserem jeme nei angtane baabetyenaiserem jem ga nesa batobaabili. Ane taterisi Tuhan Yesusmanaiserem aamei jeber-jeber gam isa sarbistaabona. Jei Jener gunu enggame, 'Afa aamei apgal jigala jam igama taabilirim, ini imna saaserfer ga is gangge folbamini. Jengga afa jam igama gularam ini imna saaser-saasersusfer ga is gangge folbamini.'"

36Paulus taterisi jeiserem jama tabanulurum jam nasbilibe, Paulus ane angtane seyafter jep gemerserem ga aa ge nwinbetena somwan dumeme, ane sembayanga ga aane gwebana.

37Jepga seyafter ga aa ge syebili, ane Paulus ga jamer ne tebasini, ane ga aane aalumbowena, ga aa ge gubili, "Kelek-kelek."

38Ini jemna seyafter jam ge jenbamini aam temawer Paulus jei enggam aa jewer gunurum, "Aamei ai gamjon ase ijama damtayan." Ane jei Paulus ga aane aftafala jamer atdusabo.


  Share Facebook  |  Share Twitter

 <<  Kisah Para Rasul 20 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel