Dual Panel1Jes galapserem angtane Yesus waakenfer aa jei ne tebanaram ga aa ge unggwanswebili. Jewer ga angtane Yahudimana Yunani oleme aa jei ge nasbawenaram, jei ga angtane Yahudimana Ibrani oleme aa jei ge nasbawenaram, jei baif ne gwebabili jebar jam ge nasbawefe. Angtane Yahudimana Yunani olem aa jei ge nasbawenaram, jei ga aa ge gubili, "Saamira wini amnaiserem jei tumilgala nunu jeber-jeber afa jam ne taabiyen, aa galap ne syentabaamuwenaram."
2Jega jem temawer dua belas rasul jeiserem jei angtane seyafter Yesus aa jei ne tebanaram ga aane dupdupbulu, ane jepga jei ga aane balbabili, "Aaiserem je kapka, afa taterisi Uwa Sanbagirmana ajama nasbiyeneye, jengga ai afa tumilgal tefner asa syentabaabili.
3Am afelen mesna gam jega samfer, aamei angtane imniwer ga tuju igemera destabaabili, angtane nafsi aa jes ne balbabilirim, Mafnana Uwa Sanbagirmana angtane jeiserem ginggitfer mes ne tebabili, ane tousaiserem jemna uskambarsus. Jewer ga ai enggam ga asa balbabili, 'Awelna nensa jeiserem aamei se eyebi!'
4Jepga ai Uwa Sanbagirfe sembayanga jam asa gwebabawena, ane taterisi Uwa Sanbagirmana aya nasibenenne."
5Angtane seyafter jei enggam ge gubili sya, rasulu jeiserem aa gemer ge gubilirim. Ane jepga Estefanus ga aane destabana, jei Yesus bunarsusfer aa jei tebanaram, ane Mafnana Uwa Sanbagirmana jemnip uskambar ga aa kabwatya. Ane angtane aaiserem gamjon ga aane destabaabili: Filipus, Prokorus, Nikanor, Timon, Parmenas, ane Nikolaus jei angtane kotana Antyokyamana. Jei angtane Yahudimanyan, jengga jei agama Yahudimanaiserem ga jes onsobili.
6Angtane tuju jeiserem rasulminibe ga aane aftabuwena, ane rasulu jeiserem jepga jei sembayanga ga aane gwebana, ane tafna jem sagabe ga aane bunulminiwili.
7Taterisi Uwa Sanbagirmana gamjon aa je wofobanaram, ane angtane Yesus aa jei ne tikwebaatinennerem gamjon anesus kota Yerusalem je. Ane imam-imam mese jeime anesus Yesus ne tebana.
8Uwa Sanbagiri Jei waakena Jelemanaiserem Estefanusfe mes gulbana, ane baabeta jemna unggwanfer enggalfe bwembwema unggwanfer jem gam eyebif angtane uskambar jem tarnabe.
9Jengga angtane afwer jei Estefanus ne nasbana. Jeiba angtane aa jei ge betwebilirim, jena angtane Yahudimana aa jep ge betwebuwefaram bosna enggam aa jes ne bilwenaram "Jena Angtane Bebasmana". Jeiba angtane Yahudimana, jei kotana Kirene yo kotana Aleksanderya ga jewer ge jalbili. Angtane Yahudimana ona Kilikyaminiwer ane propinsi Asyaminiwer jei Estefanusfar jena jam ne uskamswemini, ane jebar aarememfener ga aa ge doksobana.
10Jengga jei enggam jam ge gubiyen, "Taterisi Estefanus aa jes bilirim je kapka." Jei taterisi jeiserem jam ge gubiyen, aam temawer Uwa Sanbagiri Jei Mafnana Jelemana Estefanusfe mes gulbana, ane baabeta mese. Jei ga waakenfer nasowelaiserem Uwa Sanbagiri Jei gam gulbana jem nasowefe.
11Angtane Yahudimana jei angtane nafsi doim ga aane agwitababili enggalfe jei enggam gangge gubitef, "Ai angtane jeiserem amsama sarbana, jei Nabi Musa ane Uwa Sanbagiri nimnafer ga jes nasmini."
12Ane jei gamjon angtane seyafter jepmana ga aane taatwebaabili jam ge doksobafe, angtane Yahudimana jem sanbak-sanbakaiserem, ane guru-guru Hukumu Nabi Musamana aa jei ne towas-towastababuwenaram. Jepga jei ga aa ge sofobili Estefanus jam tebafe, ane ga sene aftayala Safna Angtane Yahudimana Sanbak-sanbaka Seyafter Gemerserem jemnibe.
13Jepga angtane nensa ga aane jenbebili, taterisi afaf-afafaiserem aa jei ne nasbabilirim Estefanusem temawer. Angtane nensa jeiserem ga aa ge gubili, "Angtane aaiserem jei ga Jena Uwa Sanbagirmana waakenaiserem, ane Hukumu Nabi Musa aa jes tulistababilim, ga jei imei-imeitababuwena.
14Ai amsama sarbana jei enggam gunu, Yesus angtane Nasaret Jei Jena Uwa Sanbagirmana se wirulsini, ane Jei ga osiri nemna seyafter Nabi Musa aa jes golmilim nebe, gase wirulsini."
15Angtane seyafter jep aa jei ge betwebilirim Safna Angtane Yahudimana Sanbak-sanbaka Seyafter Gemerserem jemnibe, jei seyafter Estefanus ga aane gerebana. Ane jes galapserem mir mase Estefanusmana ga enggam ge falibene, mir mase malaikatmana gemerserem.