Alkitab Mobile SABDA
[VER] : [BERIK]     [PL]  [PB] 
 <<  Kisah Para Rasul 7 >> 

1Imam sanbagirsususerem jei ga Estefanus ga tenebana, "Angtane aaiserem seyafter jei aa jes ne biltenaram im temawer, je ke bunar?"

2Jepga Estefanus ga tamawolbana, "Am afelen mesna ane uwa mese! Gwanan amsa sarbasi! Asal-asala nemna Abraham gwanan nalefe jam gwisiyen kota Haranminibe, jei gwanan ona Mesopotamya je aa galap nwinbelem, Uwa Sanbagiri nafabaraiserem jemnip ga aa foryal.

3Ane ga aa bal, 'Ona ilemana se mirtetefal, ane iye mese uwa imna, aya mese oso jes mese se mirtebitefal, gase sofwe ona Ai ibe isa Ajes destababanaram.'

4Jepga Abraham jei ona Kasdim ga mirsotefal, jei ga kota Haranwer ga sofwel jamere aa foryal kota Haran je, ane ga jep nwin. Uwa Abrahammana aa galap terem, jepga Uwa Sanbagiri Jei Abraham ga bal, 'Kotana aaiserem se mirtetefal, ane ga is sofwa negeri nafsiserem jewer.' Ane Abraham ga sofwel jamere ona aaiserem jep aa foryal, ona am afelen mesna ane uwa mese aamei namwer ijeba nwinirim jebe.

5Gwanan jes galapserem, Uwa Sanbagiri Jei ona nemnaiserem Abrahamfe jam gerbayan, obiti bastowaifer fasfasus afa jam gerbayan. Jengga Uwa Sanbagiri Jei Abraham enggam bal, 'Abraham, aamei ane tane imna seyafter gemerserem Ai ona ibe isAs gaarmini.' Jes galapserem, Abraham ga taneyena.

6Jengga Uwa Sanbagiri ga enggam bal, 'Asal-asala imna ga negeri angtane nenseminip sege nwinbene, negeri jeiserem ga asal-asala imnaiserem jemanyan, jengga angtane nenesemana. Angtane negeri jepmanaiserem jei awelna daran-darna asal-asala imnaiserem jebe ga jei sene golmini, ane ititmer gane balbabili awelna gam gwibife tahunu abakfer ga enggammer 400.

7Jengga Ai angtane negeri jeiserem As tamtamtababisi angtane awelna aa jei ne golmiwenaram asal-asala imnaiserem jebe, ane jei negeri jeiserem jewer sege gubisini, ane jei ga ona aaiserem jep ga Ai ga Asene tebana, ane Ai Asene pujitene.'

8Jepga Uwa Sanbagiri Jei Abraham ga gulbal gwanan Uwa Sanbagiri aa jes bilibelem. Ane Uwa Sanbagiri ga enggam gul, Abraham ane asal-asala jemna seyafter gemerserem ga jamer sege sunattwebuwena enggalfe gam ne saasif, Uwa Sanbagiri jep aa jes bilipmilim jei jeiserem mes ne taabil. Ane jepga Isak ga surul, tane Abrahammanam. Ane nunu jemna ga delapan, Abraham jei Isak ga sunattal. Ane Isak jeme tane jemna bosna Yakub gam ga sunattal. Ane Yakub ga tane jemna dua belas gemer sunattababil, jeiba asal-asalgir anggwabura Yahudimana gwanan aa jei nawelam.

9Asal-asalgir nemna jeiserem ini jemna ga uskamswebal Yusufe, ane jepga jei ga aane gaar jem fwayenfe doini gam tebaf. Jei Yusuf ne jualtal enggalfe, awelna angtane nafsiminip gam gwebif angtane negeri Mesirmanaiserem jebe. Jengga Uwa Sanbagiri Jei Yusuf waakenfer gerebaasnenewel.

10Ane Uwa Sanbagiri Jei Yusuf ga aftannul awelna kabwaksususerem jewer. Raja negeri Mesirmana jei enggam ne jenbewena, 'Firaun'. Yusuf aa galap forolam Firaun jeiserem jem tarnabe, Uwa Sanbagiri angtane nensa ga gwebabil jamere jei enggam aa ge gubil, 'Yusuf jei waakena.' Ane Uwa Sanbagiri baabeta aa gulbal jamere tousaiserem jemna ga unggwandusa. Ane jepga Firaun jei Yusuf Gubernurfe ga aa destabal Mesir je, ane enggalf mese sanbakf jei gam gwef jena unggwandusa Firaunmana seyafter jep gemerserem.

11Ane jes galapserem negeri Mesir ane ona Kanan jep wisi unggwandusa ga etamwel, tumilgala seyafter barbarsus, ane angtane jepmana amkom wisi fom bartala. Asal-asala nemna tumilgala afa jam ne domolyan.

12Jengga Yakub enggame aa saram, negeri Mesir ba tumilgal gandumuborom. Ane jepga tane jemna mesna, asal-asala nemna, jei ga aa baftabil Mesirwer jam ge sofobife, sofera gwananaiserem.

13Ane sofwera naurabaraiserem Mesirwer jam ge sofobife, Yusuf ga jelem ayan mesna ane osona ga enggam balbabil, 'Aiba Yusufsam.' Ane jepga Firaun ga towaswel enggame aaba Yusufem afelen mesnam.

14Ane jepga Yusuf ga ula jelem jetefe bosna Yakub ga aa baafulbol enggame: jei ane jemna tanem mesna, ane jemna wi tane seyafter gemerserem, jei seyafter gam ge gubisif negeri Mesirwer jep gam ge nwinbef. Angtane jemna seyafter ga tuju pulu lima.

15Ane Yakub wi tane jebaner ga aa ge sofobil Mesirwer, ane jep ga aa ge nwinbel jamere Yakub ane asal-asala nemna ga aa barwel.

16Jepga jem futunu ga aane wartabinel tamna Sikeminibe, ane ga jep ne tatarbaabunul tonmwa bitisip Abraham aa jes armanulum doime anggwabura Hemorminiwer tamna Sikem je.

17Nunu jepga aa gwetmanswel, nunu Uwa Sanbagiri Jei Abrahamfe aa Jes bilibelem, anggwabura nemnaiserem negeri Mesir je ga mes unggwanswebil uskambarsus.

18Jes galapserem raja nensaiserem ga jei nwinel Mesir je, ane jei Yusuf jam damdamtaasiyen aam temawer Yusuf mes ter.

19Raja jeiserem ga anggwabura nemna gam afaf-afaftababuwel, jei kakalmer gwel asal-asala nemnaiserem jemnibe. Jei angtane enggalf tergenbaabil, tane bastantana namwer suruluserem jes fasawolf jam ge terbife, futu.

20Ane jes galapserem, Musa ga aa surul; tane aaiserem waakensusu. Jei jetam jenabe jamer nwinibe muara ga nawer-ningna.

21Ane Musa towai jei aa galap ne firtaaniwilim, Firaunem yafma jei ga aa gaartel, ane jei ga aa tain jem tane tainfe.

22Angtane Mesirmana jei Musa ga aane towas-towastal seyafter aa jes ne towaswebilim. Ane Musa ga aa nasbil, ane ga eyebil baabeteme.

23Musamana umuru tahunu empat pulu aa folbalam, jelem inibe ga aa gul, jei angtane jelemana anggwabura Israelmana jam damtabif.

24Jepga Musa ga angtane Mesirmana ga damtal jei angtane Israelmanfe kapkaiserem jes eyeibel, ane Musa ga angtane Israelmana jeiserem ga jebar ge fyal. Jepga Musa angtane Mesir tewe jeiserem ga saftaniwil, futu.

25Musa jei jelem inibe enggam gul, 'Anggwabura amnaiserem jei mes ge towaswebil enggame, Uwa Sanbagiri ga as mes destabana ai jei ajam waakentababisife.' Jengga anggwabura jeiserem jei gemerje jam ge towaswebiyen.

26Jem gwirmer jon, Musa jeme angtane Israelmana naura gam domsol, jei jam ge eral, ane Musa ga safe jam yostaasif. Musa ga safe enggam gitmil, 'Aamei aya osonem, ga ibas ge erebili?'

27Jengga angtane sarabosna jelemanaiserem aa jei saftalam, Musa ga eyewer ga aa baftawil, ane ga aa gutel, 'Aamei ise nane destabana am sanbakf nwinfe, ane ga asis nasipmini ai waakena afa fas?

28Aamke safe ase ijam saftaniwif, gwanan angtane Mesirmana ir igam saftaniwilintim?'

29Ane Musa jei game jam aa galap saram, angtane jeiserem jei gam aa gutelam, Musa ga negeri Mesirwer ga aa nunggir, ga negeri Midiyan je ga jep nwinel. Jepga wini ga gol, tane jepga naura gam domsol.

30Jep aa galap nwinim tahunu abakfer ga empat pulu tahun, malaikata Musaminip ga aa foryal, dwisgiribe taarena Sinaiyem gwetmanap. Malaikata jeiserem aa jal, ti buktouya aa jei ertesilim tokwanabara.

31Musa aa galap domolam ga jam bitbitwel. Jepga agasiwil gwetmanaber jei jep gam towaswefe enggame je basa. Jepga taterisi Tuhanmana ga aa saribel, Jei aa gutelam,

32'Aiba Uwa Sanbagiri asal-asala imnaiserem. Aiba Uwa Sanbagiri Abrahammanam, Uwa Sanbagiri Isakmanam, ane Uwa Sanbagiri Yakubmanam.' Musa jam erel ane aa egegwel, ane jei ti buktouya jeiserem baif gwebana jam damtafe.

33Jepga Tuhan ga gutel, 'Sandala ijes kamwinirim se soksosi! Ona ijep finaram, ona jeiserem ga waakensusu.

34Ai bunarsusfer aamei isa Amsam damtabili anggwabura Israelmana jei sigini jes ne enolwenaram angtane Mesirminiwer. Ai gwarna jemna Amsam saripmini, ane Ai ga Ajam iritya enggalfe jei Ajewer aftabunnuf. Au! Ai gamjon aamei is Ajam baftana aamei Mesirwer ijam waraufe.'

35Musa aaiserem jeiba anggwabura Israelmana jei baife aa jes ne gwebalam, jei enggam ne bal, 'Aamei ise nane destabana am sanbakf nwinfe, ane ga asis nasipmini ai waakena afa fas?' Jengga Uwa Sanbagiri Jei jes destabal sanbakf jei nwinfe, ane angtane jei gam waakentababisif. Malaikata jeiserem ga jes batobal, malaikata aa fortyaram ti buktouya aa jei ertesilim jebe.

36Musa jei anggwabura Israelmana negeri Mesirwer ga aa aftabifel. Musa jei bwembwema unggwanfer ga Mesir je eyebil, ane Fi Berberep mese, ane gamjon dwisgirip nunu abakfer ga empat pulu tahun.

37Musa aaiserem jeiba anggwabura Israelmana jeyam balbabil, 'Uwa Sanbagiri Jei Jener nabi se destabana nemniwer, enggame ai as gemer destabanantam.'

38Musa jei anggwabura Israelmana aa jei ge betwebilim dwisgiribe ga jebar ge nwinbel. Jei asal-asal nemnabar jep ge nwinbel, ane jei malaikatfar ga aa ge nasowel, taaren Sinai sagabe. Taterisi waakenaiserem jeyam sarbil malaikatminiwer, ane Nabi Musa jei taterisi Uwa Sanbagirmana jei erakulnonol nem asal-asalminibe enggalfe nep nes gane nasipmif.

39Jengga asal-asala nemna jei jama sarbayan, jei baif ne gwebal, ane jei gamjon negeri Mesirwer ge waraubif.

40Ane jepga anggwabura Israelmana Harun ga aane bal, 'Aamei tiboroms kwirul nei nejesa pujiwulwefe, jega tiborma jam kwirulu jeiserem nei gam nesa tikwebitini. Nei tiborma jeiserem jes ne tikwebitini, aam temawer nei namwer seyafter teisyena Nabi Musa jei fof nwini, nei Mesirwer nes jei aftabifelyentem!'

41Ane jes jepserem jei tiborma ga aane kwirul enggame, ga aane eyebil lembu tane gamserem. Ane jepga tiborma jam kwirul jeiserem ga aane pujiwul, ane tumilgala ga aane golbil, ane masara ga aane eyebil tiborma jam kwiruluserem jebe, jener aa jes ne eyebilim.

42Jengga Uwa Sanbagiri Jei angtane jeiserem Jam mirtebil, ane Jei jafner balbabil enggame, sya, angtane jei tiborma aa jes ne pujiwulwenaram jamer gen pujiwulwe. Ane jei mato mese winsibe ga aane pujitababuwel. Jeiserem nawersamer ga enggam nabi aa gemer ne baatulum enggame: 'Wai anggwabura Israelmana! Dombana aamei ijesa targabaabilirim, jeke i Aba kitulbof, jem nunu abakef ga empat pulu tahun dwisgiribe. Fasfasus!

43Tenda jena aamei ijesa gwirinennerem jeba bwata Molokmanam, ane bwat kapka mato bosna ga Refan ijesa gwirinele; tiborma jeiserem iner ijesa kwirtabaabilirim, ijesa pujiwulfe. Ane jem temawer ga Ai isAs fasawola jamer bijuap negeri Babelem jimwer.'

44Tenda Jena Uwa Sanbagirmana aa jep nwinwelam angtane nenennabe, Tenda Jena jeiserem asal-asala nemnaiserem ga jes ne gwirin, dwisgirip aa galap ge nwinbelem. Tenda Jena jatowai jeiserem ga jei ne eyebil, Uwa Sanbagiri Jener Nabi Musa aa gemer balam. Ane seyafter ga Uwa Sanbagiri Nabi Musafe aa gemer ge sabasilim, gemer ne eyebil.

45Tenda Jena Uwa Sanbagirmana jeiserem, nem asal-asala ga jei ne taabil, ga aane gwirinfel jamer ona aaiserem. Jei ga enggalap ne jei Yosuafar aa galap ge sofobilim, ane jei ona jeiserem aa galap ne tebalam angtaneminiwer, angtane Uwa Sanbagiri aa jes surbobilim jem tarnabe. Tenda Jena jeiserem ga jeber fyal jamere Raja Daud jei aa foryal.

46Daud ga ini Uwa Sanbagirmana jam dektebel, ane jei ga enggam bal, 'Uwa Sanbagiri, ai jena afa ke Isas eyeibene, Aamei Uwa Sanbagiri Yakubmana?'

47Jengga Daud jei jena jeiserem jam eyebiyen, jena jeiserem ga Salomo eyeibel Uwa Sanbagirfe.

48Jengga Uwa Sanbagiri Jemna baabeta unggwandusa, Jei jena angtane aa jei ne eyebilirim jebe Jam nwinyen. Jem temawer nabi taterisi enggam baatultel:

49'Winsi je taman nwini Amna, ane ogir ga tof jubili Amna. Aamei ga jena Abe ga asi fom isa gwitirbene? Ane taman nwini Amna fofa Ai jafner Ajep nwini?

50Jigal-jigala seyafter gemerserem Aner eyebaabil.' Uwa Sanbagiri Jei ga gam gutel."

51Estefanus jei gamjon ga gunu, "Uwa mese aamei seyafter gemerserem, duka imna jei ban kankanawa, ane aamei masef ga ima unggwasa Uwa Sanbagiri ijama tebafe! Imwana imna mat, taterisi Uwa Sanbagirmana ijama sarbiyen. Aamei ga enggammer asal-asala ilemana gamserem: aamei Mafnana Uwa Sanbagirmana waakenfer ijama sarbiyen.

52Fomfoma asal-asala imna, jei ke nabini seyafter afa ke jam ne nasbabiyen? Jei angtane taterisi Uwa Sanbagirmana aa jei ne nasibenenelem jei ne munbobil, jamer futu. Gwanan aa jep falam nabi-nabi enggam mes ne nasbinennel, 'Tane Uwa Sanbagirmanaiserem aa Jei eyebilirim Uwa Sanbagiri aa gam gunurum, bunarsusfer Jei gase fortya.' Ane namwer aa jep falaram aamei Jei imsa gerant angtane kakalaiserem jemnibe, ane ga imsa munbonont Tane Uwa Sanbagirmana jeiserem.

53Malaikat jei taterisi Uwa Sanbagirmana is mes ne golmini, jengga aamei ijama sarbiyen."

54Jepga Safna Angtane Yahudimana Sanbak-sanbaka Seyafter Gemerserem jei taterisi Estefanusmana aa galap ne sarbisinirim, jemna ini kabwaksus gangge folbamini, ane jei uskambarsus ga aane nasbana.

55Jengga Mafnana Uwa Sanbagirmanaiserem Jei Estefanus ginggitfer tebana. Ane Estefanus jei winsiwer ga anggaswena. Ane jei Uwa Sanbagirmana nafa ga domolbana, ane Yesus Jei Uwa Sanbagirminip fina, Jem taasfolawer.

56Estefanus ga gunu, "Gasa angga! Ai taman waaken-giri ames domsona mes ne tersosini, ane Tane Angtanemana ga Uwa Sanbagirem taasfolawer fina!"

57Ane Safna Angtane Yahudimana Sanbak-sanbaka Seyafter Gemerserem jei imwana jemna ga aane matabaasini, ane jepga jei ga aa ge gwarenbuwena. Jepga jei seyafter ga aa ge nunggirbuwena Estefanusem tarnabe, ane Estefanus ga aane tebana.

58Jepga jei Estefanus kotanawer ga aane aftafala, jepga toneme ga aane towaitana jam munbofe. Angtane erala jeiserem aa jei ne gaarabilirim, jei ga fene jemna ga aane bunulntena nomkefe angtanem tufap. Angtane jeiserem jemna bosna ga Saulus.

59Estefanus aa galap ne munbonorom toneme, Estefanus ga enggam gunu, "Tuhan Yesus, uwu amna ase jam Is tebabatna!"

60Ane jepga somwan dumeme ga nwini, ane ga aa gwarna ititmer, ane ga gutena, "Tuhan, etam-etama kapka aaiserem jebe Ijam fwainulmiyen." Estefanus jei game aa gutenaram, jena enggamserem, futu.


  Share Facebook  |  Share Twitter

 <<  Kisah Para Rasul 7 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran