Dual Panel1Saulus mese je baife jam gweyan Estefanus munbofe.
2Angtane Uwa Sanbagiri uskambar aa jei ne tebanaram, jei Estefanusem futunu gane tirnunu, ga aane syebawena uskambar.
3Jengga Saulus jei nels terelbene safna Yesus aa jei ne tebanaram daamfennaber nwiniserem jewer falamulsif. Jei ga fortya jenap ga wofena jepme kawete, ane gamjon jep gam kawetena, ane wi mese anggwa ga aane tebabili, ane ga aa katabuntena bwiyibe.
4Angtane Kristen aa jei ge syensyanwebilirim, jei Taterisi Waakena Yesusem temawer sene nasbinenne aa gemer ge wofobanaram.
5Ane Filipus ga sofwa kotana ona Samaryaminibe, ane jei angtane jepmanaiserem jebe ga nasipmini taterisi Mesiasem temawer. Mesias Jeiba Angtane Uwa Sanbagiri Jei bunarsus aa Jes balam Jam baftanaf enggalfe angtane gam waakentababisif.
6Angtane unggwanfer jame aa galap ne sarbilirim Filipus aa jes nasbilirim, ane ga aane gerebaabili bwembwema aa jes eyebaabilirim, jei seyafter waakenfer ne sarbasini jame aa jes nasbilirim.
7Jes jepserem angtane unggwanfer bwat kapka jame aa jes kabwabilirim, jei ga waakentababili. Bwat kapka jeiserem ga aa ge gwarenbuwena, ane ga aa ge tobitintye angtane jeiserem jemniwer. Ane angtane muli-mulni anesus, ane angtane waakenfer jam wofeyanaiserem jei seyafter mes waakentababili.
8Jega jem temawer ini angtanemana saaser-saaserfer ga aa ge folbamini kotana jeiserem jebe.
9Angtane bosna ga Simon jei abakfer nwini, ane jei faatrews eyebili kotana jeiserem jebe, ane angtane Samarya seyafter gemerserem jam ge bitbitwebili. Simon jei aa gunu, "Ai angtane sanbagirsusum."
10Angtane seyafter, bastantouya, sanbagiri, jei waakenfer ne sarbasini, ga aa ge gubili, "Angtane aaiserem jei baabeta Uwa Sanbagirmana mes domolbana. Baabeta jeiserem angtane enggam ne bilwena 'Baabeta Unggwandusa.'"
11Angtane jei fwatersus jam ge bitbitwebili Simon jei faatrews eyebili, jega angtane jei waakenfer ga sene sarbasini.
12Jengga angtane jei taterisi Filipusmana aa galap ne taabilirim, jei jen jena gane tete jam baptistababif, anggwa mese wi. Taterisi aa jei nasbinennerem jeba enggamam, taterisi nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, ane taterisi Yesus Kristusem temawer.
13Simon jen jegme taterisi jeiserem aa taabili, jegme aa baptiswena. Jei Filipus ga onsobananna, jep ga aa bitbitwena jame aa galap damtabilirim bwembwema unggwandusa aa je etamwenaram.
14Rasulu kota Yerusalem je aa galap ge sarbilirim enggame, angtane ona Samaryamana ga Taterisi Uwa Sanbagirmana ba mesam ne taabilint, jei Petruso Yohanes jewer ga aane bafsowili.
15Rasul nauna jeiserem aa galap ge fornaram, sembayanga ga aa ge gwebana jega Mafnana Uwa Sanbagirmana angtane Samaryamana jeiserem ga jemnip gam jalf.
16Mafnana Uwa Sanbagirmana Jam ireyan angtane daamfenna jemnibe aa jei naawenaram. Angtane jepmana jei bosna Tuhan Yesusmanaiserem ga jetefener jem ne baptistababili.
17Jepga Petruso Yohanes jei tafna ga aa ge bunulntena angtanem sagabe, ane Mafnana Uwa Sanbagirmana jemnip ga jela.
18Simon jame aa galap domolaram Mafnana Uwa Sanbagirmana jam aa jelaram, rasulu naura jeiserem tafna ga aa ge bunulnsowena angtanem sagabe, Simon jei dois gaarmif jebe.
19Ga gunu, "Ap jon sa gulba baabeta jeiserem, jega ai afa tafna amna angtane sagap jam as tosontenaram, Mafnana Uwa Sanbagirmana jemnip samfer gase jela."
20Petrus enggam ga bala, "Aamei ane doini imna tokwagirip sa gwi, aam temawer aamei gunu, 'Uwa Sanbagiri aa jes golminirim, ai jeiserem doim as armanulu.'
21Aamei awelna amna as ijam onsoibiyen, aam temawer Uwa Sanbagiri Jei ini imna is enggam damtabana kapka.
22Gasa tikwe etam-etama kapka ilemanaiserem, je safnant. Jepga aamei Tuhanfe sembayanga ga is gwebabana, jega nele kapkaiserem is gase wirtabana, Tuhan Jei gamjon jeiserem Jam sarbistaabonyan.
23Ai tousa aamei galgala anesus ilem iniber igam balbabili, ane etam-etam aaiserem je ga is mes ne taferna, angtane bwiyip gamserem."
24Simon jei Petruso Yohanes ga gitmini, "Sembayang Tuhanfe is ge gwebabana, jega aamei ijes bilirim je jam falyan amnibe."
25Jewer ga Petruso Yohanes jei ga aa ge nasbili jei aa jes ge towaswebilirim Yesusem temawer, ane taterisi Tuhanmana jamer taban. Jepga jei gamjon ga aa ge warautna Yerusalemo. Ane wofera jeiserem jei ga jep ge nasbinenne Taterisi Waakena tamna unggwanfer aa je nulnaram ona Samarya je.
26Malaikata Tuhanmana Uwa Sanbagiri aa jes baftanaram, jei Filipus ga aa bala enggame, "Se irwe, ane ga is sofwa selatan jitefwer, nele aa je falaram Yerusalemwer igam sofwa jamere Gasayo!" (Nele jeiserem namwer angtane gamjon jei jam ge wofobiyen jebe.)
27Jepga Filipus ga sofwa. Nunu jes jemserem pegawai negeri Etyopyamana jei jem ga warautna jelem jenabe kota Yerusalemwer. Jei jep ga Uwa Sanbagirfe sembayanga gwebabana. Jeiba pegawai sanbagiri, jei doini Kandakemana jei tebana seyafter. Kandake jeiba wi sanbaka negeri Etyopya je. Pegawai jeiserem jei jelem kereta sagap nontena, taterisi Nabi Yesayamanaiserem gerabistena.
28(8:27)
29Mafnana Uwa Sanbagirmana Filipus ga bala, "Se gwi ane keretana ga is gwetmanulsini!"
30Filipus jei tatarmer ga aa nunggirwena, ane angtane jeiserem ga aa sarbasini, jei taterisi Nabi Yesayamana gam gerabistena. Filipus ga tenebana, "Jeiserem aamei ijes gerabistenaram, ke imes towaswebili?"
31Ga aa tamawolbana, "Ai fomfom as towaswena? Ai angtane nensa gam bala ai as jei towas-towastafe." Jepga jei Filipus ga bala, "Se tauya, ane ga is nwintena am tarnabe!"
32Taterisi Uwa Sanbagirmana jei aa jes gerabistenaram ga enggam: "Jei enggala dombana gemerserem, aa jes gane aftawenaram jamere aa jep gane munbonorom jebo. Jei domba tane galserem safna jam gane targaibaasinirim jam gwarenyan, Jei taterisi afa jam bilteyan.
33Jei kapka Jam eyebiyen, jengga angtane gane eyeibene kapka Jebe, Mafnana Jemna bar ogiri aaiserem jebe. Angtane nafsi fas taterisi asal-asal Jemnaiserem jei nasbife."
34Pegawai jeiserem Filipus ga bala, "Ai ims tenebana, Nabi aaiserem nans bala? Jelem temawer, afa ke angtane nafsim temawer?"
35Filipus jei Taterisi Waakena Yesusem temawer ga nasbili. Jei taterisi Nabi Yesaya jes tulisulum ga jewer towaiwulu jam nasbife.
36Jei gamjon ga aa ge sofwa nele jeiserem jeter, jamer fo eyep aa ge forna. Pegawai jeiserem ga gunu, "Se angga, fona aare! Ai bas as eyebili jega ai gam as baptiswena?"
37(Filipus ga bala, "Afa aamei ini seyafter gemerserem jeme Yesus imes tebalaye, aamei samfer jam baptiswefe." Jei ga tamawolbana, "Maa, ames tebana Yesus Kristus Jeiba Tane Uwa Sanbagirmanam.")
38Pegawai Etyopyamana jei keretana jeiserem jepga fyatetya, ane nawersamer, Filipuso pegawai jeiserem ga aa ge jutena fonap, ane Filipus ga pegawai jeiserem ga aa baptistene.
39Saf aa gemer ge jusetyaram fonawer, Mafnana Tuhanmana Jei ga Filipus gaartetya, ane pegawai jeiserem gamjon jam damtayan. Jeman aa sofwa jewer ini saaser-saasermer.
40Filipus jengga kota Asdodwer aa forna tatarfer. Ona jeiserem ga jep wofowena, ane Taterisi Waakena ga nasbinenne kotana seyafter gemerserem jamere aa forna kota Kaisareya je.