Alkitab Mobile SABDA
[VER] : [BERIK]     [PL]  [PB] 
 <<  Matius 21 >> 

1Yesus ane angtane Jei aa jei ne tikwebaatinennerem kota Yerusalem jame aa galap ne gwetmansonaram, jei tamna Betfagewer ge forna. Tamna jeiserem ga taarentumu bosna Saitun ga jem tarnap nulna. Yesus ga angtane naura ga bafsona, Jei aa jei ne tikwebaatinennerem.

2Jei ga gitmini enggame, "Sege sofwe tamna nem mukanap jeiserem, ga jes jeberserem keledai tannabara jam daktamisneneleiserem ga jep is ge domsona. Keledai jeiserem ga is ge fersosini, ane ga is ge afsoyala Amnibe.

3Ane angtane afa is jam sene gitminirim enggame, 'Aamei ibas ge eyebili?', aam ga enggam is ge bala, 'Tuhane gunu.', ane angtane jeiserem jes jeberserem keledai jafner gase afsunnu."

4Seyafter jeiserem ga mes etamwena, jega nabi aa jes bilim ga mes tabanwena:

5"Angtane Yahudimana kota Siyonminip, bosna afwer ga Yerusalem, isa towas-towastababili: 'Gasa damta, Rajana imnaiserem Jei mes foryal imnibe. Ini Jemna tofora, ane Jei keledaiyem warautna Jei keledai tannaiserem ga jem wofena.'"

6Jes galapserem angtane naura aa jei ge tikwebaatinennerem jei tamnap ga aa ge sofna, ane ga aa ge eyebili Yesus aa gemer gitminirim.

7Jei keledai tannabaner ga aa ge afsofala. Ane jepga fene fen sagap kamwiliserem ga aa ge soksosini, ga aa ge syeteswena keledai jeiserem jem sagabe. Ane Yesus ga jusona, ga nwintena keledai sagabe.

8Angtane unggwanfer fene fen sagap jes kamwiliserem jelemana ga aane bunulntena nelebe. Afwer tini tirniserem jes ne targabaasini, nelep ga aane bunulntena.

9Angtane unggwanfer Yesus aa jei ne danabanaram ane amnumana, jei seyafter ga ge gwarenbili: "Nei Tane Raja Daudmanaiserem ganma pujite! Uwa Sanbagiri waakena Jelemanaiserem gase gulbana Jebe, Angtane aa jei fortyaram Tuhanem boseme! Nei Uwa Sanbagiri ganma pujite! Jei taman waaken-girip nwini, tamna bwalesususerem."

10Yesus Jame aa galap kautenaram Yerusalem je, angtane seyafter jepga aa ge tetenbuwena. Ane jei jena gane tenaaminenne, "Jei nansa?"

11Angtane unggwanfer afwer jena ga aane tamawolminenne enggame, "Jei Nabi Yesus, Jei tamna Nasaret, ona Galileyawer ga jewer jela."

12Yesus Jena Uwa Sanbagirmanaiserem jep ga kawetena. Ane Jei ga angtane galgala aa jei ne jualtababuwenaram ane angtane aa jei ne armantababilirim, seyafter jeiserem ga surbobili. Mejana angtane doini aa jei ne tukartababuwenaram, Jei mejana jeiserem ga aa irfitababili, ane taman nwini angtane ju senaya aa jep ne jualtababuwenaram jes mese ga aa irfitababili.

13Jepga Yesus ga balbabili, "Taterisi Uwa Sanbagirmana jep ga enggam baatultel: 'Jena Amnaiserem ga enggalf angtane jei Abar Ajeba nasowef.' Jengga aamei jena aaiserem enggam ima eyebili, angtane komkoma jep ge nwinbele gamserem."

14Angtane nwe kofa ane angtane muli-mulni Yesusminip ga aa ge jalbili Jena Uwa Sanbagirminibe, ga Yesus jam waakentababili.

15Jengga angtane imam-imam sanbakaiserem ane guru-guru Hukumu Nabi Musamana aa jei ne towas-towastababuwenaram, jei bwembwema waakena aa galap ne domolaram Yesus aa jes eyebilirim, jei ga aane nasbana. Jes mese jame aa galap ge sarbilirim tantantane Jena Uwa Sanbagirminibe ga aa ge gwarenbiton, "Tane Raja Daudmanaiserem ga ajesa pujitene!", jei ga aane nasbana.

16Jei Yesus ne bala, "Aamei tane Imes sarbabili. Jeje bafa Aamei Ijam balbabiyen enggame jei jam ge tikwebi?" Yesus ga tamawola, "Bunar, Ai sarbabili. Aamei tousa Taterisi Uwa Sanbagirmana aa jes tulisulum enggame: 'O Uwa Sanbagiri, Aamei Is mesam towas-towastababili tantantane ane tane bastantansususerem, jega jei Aamei waakenfer Is gane pujitene.'"

17Jepga Yesus angtane ga firtebitefala, jewer ga totifele kota Yerusalem je, ane ga sofwa tamna Betanyaminibe. Jewer ga nustana.

18Gwirmerem gwinibenersus, Yesus Jame aa galap warautnaram kota Yerusalem je, Jei wisi ga folbana.

19Jei ga ara tini nel eyep ga domola. Jewer ga gwina ti tarnawer, ane ara tini jeiserem ala tetena gam domola, jemna igi fas. Jepga Yesus Jei ara tini jeiserem enggam ga bili, "Aamei gamjon ijam teyan!" Tini jeiserem jes jeberserem ga sasanswena.

20Angtane Jei aa jei ne tikwebaatinennerem jei ara tini jeiserem jame aa galap ne domolaram, jei ga jam ge bitbitwebili, ane ga aane tenebana "Fomfoma ara tini jeiserem jei tatarmer ga sasanswena?"

21Yesus ga tamawolbaabili, "Bunar-bunarsus Ai ims towastababili, afa aamei Uwa Sanbagiri waakenfer isa tebana, isar-isaryamer, igme isa eyebili Ai gemerserem ara tini Agemer eyebilirim. Jetefeneryan, igme taaren aaiserem samfer ga isa bala, 'Se gwisi! Finip ina ga is taptastena!', ane jeiserem gase etamwena.

22Afa aamei Uwa Sanbagiri jam isa tebanaram ane sembayanga jam isa gwebanaram, aamei ijesa bilirim jeiserem ga isa domola."

23Yesus ga warautna Jena Uwa Sanbagirmanaiserem jebe, ane jei angtane jame aa galap towas-towastababilirim, angtane imam-imam sanbakaiserem ane angtane sanbaka Yahudimana Jemnip ga aa ge jalbili, ane ga aane tenebana, "Baabeta nanmana Aamei seyafter aaiserem ga Ijem eyebili? Ane baabeta Ibe Ise nane gulbana, seyafter aaiserem jem eyebife?"

24Yesus ga tamawolbaabili, "Ai gamjon ims tenebaabili. Afa aamei Ai As jam isa tamawolbanaram, Aime aamei isAs towastababili baabeta ga nanmana Ai seyafter aaiserem Ajem eyebilirim.

25Baabeta Yohanes aa jes domolaram angtane jam baptistababife, jei fwer jela? Baabeta jeiserem ke Uwa Sanbagirminiwer, afa angtaneminiwer jela?" Angtane jeiserem jei jenjen ga aa ge doksobana. Jei enggam ga aa ge gubili, "Nei afa enggam nesa gunurum Uwa Sanbagirminiwer, Yesus Jei nei nes galap se balbabili enggame, 'Jeje bafa aamei Yohanes ijama tebayan?'

26Jengga afa nei enggam nesa gunurum angtaneminiwer, nei angtane sa erebaabili, aam temawer jei seyafter ga sege gubili, 'Yohanes jeiba nabisam.'"

27Ga jem temawer jei Yesus ga aane tamawolbana, "Ai seyafter teisyena." Jepga Yesus ga balbabili, "Gam jega Aimba aamei isa Ajam towastababiyen baabeta nanmana Aga seyafter aaiserem ga Ajem eyebili."

28Jepga Yesus gamjon ga balbabili, "Aamei ifoma gunu ilem inibe taterisi aaiserem jem temawer? Uwa daamfenna jemna tanna ga naura, girtowai nawan. Uwa jeiserem jei tanna ayanaiserem jemnip ga sofwa, ane ga bala, 'Aamei se sofwe anggur makanap, awelnap ga is gwena namwer!'

29Tanna jeiserem ga tamawolbana, 'Ai bai.' Jengga ini jemna ga waraubatna, ane jei anggur makanap ga sofwa.

30Jepga uwa jeiserem ga sofwa tane afelnaiserem jemnibe, ane jeime gemer ga gutena gwanan gemerserem. Tane afelnaiserem jei ga tamawolbana, 'Samfer uwa.' Jengga jei jam sofweyan.

31Tannawan jeiserem jemniwer, taterisi jetamana ga nane onsoibene?" Yesus ga aane tamawolbana, "Ayanaiserem ga jes." Jepga Yesus gamjon ga balbabili, "Ai bunarsus ims towas-towastababili, angtane pajak doini aa jei gane tebabinennerem ane wini maaryen-maaryenaiserem, jei nabala Uwa Sanbagirem gwonap gwena, Uwa Sanbagiri Jei angtane jeiserem jem Sanbakf nwini, ane aamei amnup.

32Ula jeiserem ba bunaram, aam temawer Yohanes Pembaptis mes jela, ane jes ga is destabaamini ibe nele Uwa Sanbagirmana waakenfer gwelaiserem. Aamei Yohanes ijama tebayan, jengga angtane pajak doini aa jei gane tebabinennerem ane wini maaryen-maaryena jei ne tebana. Safe aamei seyafter imsa domola, jengga aamei ini gamjon is jam ge waraipmiyen, ane aamei Yohanes ijama tebayan."

33Yesus gamjon ga balbabili, "Seisya taterisi nafsi sa sarbi! Angtane ona jam jemanserem jei angguru makanap tonola. Jei angguru jama tonolaram jamer taban, makana jeiserem ga isinbaasnenne ton pagarem. Jeiserem taban, jei gamjon o mwona ga terbili, galap anggur tanna jep gam jubobinenef enggalfe fo angguru gam eyebaabif. Taban, jei jena ga eyebili makanabe enggalfe jei makana jewer gam gerabaasnenefe. Jepga jei angtane anggur tonol tousaiserem enggam ga balbabili, 'Ai as sofwa negeri nafsiserem jewer, negeri jeiserem ai jebe abakef as nwini. Ai abakfer jewer ajebar nwinirim, aamei samfer anggur makana amna nomkef isa armantana, angguru jep ga isa tonola, ane jem igiserem afwer galap ap ga as isa kitulbono.' Ane jena ga sofwa negeri nafsiserem jewer, negeri jeiserem bijaususu.

34Nunu anggur jep fuluserem jam aa galap fortyaram, angtane makana jam jemanserem jei angtane awelna jemnip aa jei ne gwebilirim jei ge baftabili enggalfe, anggur afwer jemnaiserem gam tebabif angtane anggur makana nomkef aa jei ne armantanaram jemniwer.

35Jengga angtane anggur makana nomkef aa jei ne armantanaram, jei angtane aa jes baftabilirim gane tebabili; daamfennaiserem ga jam ne safsaftana, gamjon afelnaiserem jei ga jam ne munbono, nafsi jei tonem ne erafala.

36Jepga angtane makana jam jemanserem gamjon angtane awelna jemnip aa jei ne gwebilirim nafsi ga baftabili, gamjon ga unggwanfer ga baftabuwili gwanan gamserem jemniwer. Angtane makana nomkef aa jei ne armantanaram, jei gwanan gemerserem jep jegme gemer ne eyeipmini.

37Umwef ga, angtane makana jam jemanserem jei tane jelemana gam baftana. Jei ga gunu, 'Angtane makana amna nomkef aa jei ne armantanaram, jei bunarsus tanna amna aaiserem jam ne kabwaktayan.'

38Jengga angtane anggur makana nomkef aa jei ne armantanaram, jei tane jeiserem jam aa galap ne damtanaram, jena enggam ga aane gitminenne, 'Tanna aaiserem ba makana jei se tebana jeta jam aa jep tererem. Au, nei tanna aaiserem ganma munbo, jega nei anggur makana aaiserem nei gam nesa tebabili!'

39Ane jei tanna jeiserem ga aane tebana, ane ga aane taptasiwili anggur makan jitefwer, jep ga aane munbono."

40Yesus Jei angtanes tenebaabili, "Angtane makana jam jemanserem aa galap warautnaram, jei bas eyeipmini angtane makana jemna aa jei ne armantanaram jebe?"

41Gane tamawolbana, "Bunarsus angtane makana jam jemanserem angtane kabwaksusu jeiserem se munbobili. Ane jei ga angtane nensa gase terelbaabili enggalfe, makana jemna nomkef gane armantaf. Angtane jeiserem jei angguru gase kitulbono angtane makana jam jemanserem jebe, nunu jame aa jep falsaram anggur jem fuluserem."

42Yesus ga bala, "Bunarsus, aamei imes gerabistena ayata aaiserem jep aa jes tulisulum Taterisi Uwa Sanbagirmanaiserem jebe: 'Angtane jena aa jei ne eyebilirim, tuna jei aa jes ne taptasiwilirim, tuna jeiserem mes etamwena igsusufe. Tuhan Jei aaiserem ga jes eyebili, aaiserem waakensusu negama domolf!'

43Uwa Sanbagiri ga gam gul. Jega jem temawer Ai ims towas-towastababili, Uwa Sanbagiri Jei im Sanbakfe Jam nwinyen, nunu Uwa Sanbagiri aa jem gwesaram Sanbakfe angtane aa jei ne eyebaabilirim seyafter Uwa Sanbagiri aa jes balbabilirim.

44(Angtane aa jei jenaram tuna jeiserem jem sagabe, jei se wasferswena. Ane tuna jeiserem afa angtanem sagap jam se jentyaram, tuna jeiserem jei ga angtane jeiserem gase jubono, jamere sonf se etamwena.)"

45Angtane imam-imam sanbakaiserem ane angtane safna Farisimana seisya taterisi Yesusmana aa galap ne sarbilirim, jei ga aa ge towaswebili Yesus Jei jelem temawer nasowena.

46Jega jem temawer jei ga nels ne terelbene Yesus jam ne tebaf, jengga masef aam temawer jei angtane unggwanfer jes ne erebaabili, aam temawer jei galap sege gubili enggame, "Yesus Jeiba nabisam."


  Share Facebook  |  Share Twitter

 <<  Matius 21 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran