Alkitab Mobile SABDA
[VER] : [BERIK]     [PL]  [PB] 
 <<  Matius 27 >> 

1Gwinibenersus angtane imam-imam sanbakaiserem seyafter gemerserem, ane angtane sanbaka Yahudimana, jei ula ga aane tagalbaasini Yesus jam ne munbofe.

2Jei Yesus gane taferna, ane ga aane aftafala, Pilatusfe ga aane gerbana. Pilatus jeiba Gubernur pemerinta Romamanaiserem ba jesam.

3Yudas, angtane Yesus aa jei geraram, jei jame aa galap angganaram angtane jei Yesus jam ne munbof, jei ga gunu jelem inibe, "Ai Yesus enggam je abaf gwebana?" Ane jei doini tiga pulu perak gamjon ga wartabaipmini angtane imam-imam sanbakaiserem ane angtane sanbaka Yahudimana jebe.

4Jei angtane jeiserem ga balbabili, "Ai etam-etama kapkaiserem ames eyebilint. Angtane olyanaiserem ai isa ajewer destabaaminintim ibe. Ane namwer aamei Jei ga ijama munbof." Angtane sanbaka jeiserem jei ga aa ge tamawolbili, "Kabwaktala jeiserem jeke amna. Jeiserem aamei infentowai im eyebilint!"

5Yudas jei doini jeiserem titikip ga taptabisiwili Uwa Sanbagirem Jenabe, ane ga mirtebitefala. Jepga aa gwina, jena ga taferna botonabe, ane jena ga daktanswena, jamer futu.

6Angtane imam-imam sanbakaiserem jei doini jeiserem ga aane kitultena, ane ga aa ge gubili, "Doini aaiserem je aawis doi, doini aa jei armantanaram angtane jem munbof. Hukumu nemna Nabi Musa aa jes tulistababilim jep aa gemer batonaram, nei doini aaiserem nejama katanteyan doi funabe Jena Uwa Sanbagirmanaiserem jebe."

7Jei jenjen ga aa ge nasbawena jamer jei daamfennaber ga aane bili, jepga jei ona ga aane armantana, ona jeiserem jei ona pirni aa jep ne eyebaabuwenaram. Jei ona jeiserem ga aane armantana enggalfe angtane Yahudimanyanaiserem jep gane tirnnuf.

8Jega jem temawer jamer nunu aas jepserem ona jeiserem ga enggam ne jenbewena, "Ona aawisibere".

9Jepga Taterisi Nabi Yeremia aa jes nasbilim ga mes tabanwena: "Tuhan abe aa jes bilibenerem enggame, 'Jei doini tiga pulu perak ga sene tebana, doini anggwabura Israelmana daamfennaber enggam aa jes ne balaram jei Angtane jeiserem Jem ne armantaf.

10Ane doini jeiserem jeme, jei ona angtane pirni aa jei ne eyebaabuwenaram ga jem ne armantana.'"

11Yesus Jei Gubernur Pilatusem danggonawer fina. Gubernur jei Yesus ga tenebana, "Aamke anggwabura Yahudimanaiserem jem Raja?" Yesus ga tamawolbana, "Ba gamam, iner imsam gutena."

12Angtane imam-imam sanbakaiserem ane angtane sanbaka Yahudimana ga aa ge gubili, Yesus Jei etam-etama kapka anesus gam eyebaabili. Yesus etam-etama safe Jam eyebiyen, jengga Jei taterisi jeiserem afa fas jam tamawolbiyen.

13Jepga Pilatus Yesus ga tenebana, "Aamke Ijam saryan seyafter kapkaiserem Im temawer Is jes ne balbaibenerem?"

14Jengga Yesus Jei ula daamfenna afa fas Jam tamawolbiyen. Jega jem temawer Gubernur jei unggwanfer ga aa bitbitwena.

15Tahunu jeber-jeber nunu unggwandusa bosna masar Paska, Gubernur jei angtane bwiyip aa jei gam nwinirim ga jem aftabunnuwefa. Angtane unggwanfer jei aa jes gane destabanaram angtane jam aftannufe, Gubernur ga angtane jeiserem ga jes gam aftannu.

16Jes jepserem angtane bosna Barabas aa jes ne tebanaram, bwiyip ga aane gaataantena. Angtane uskambar jepmana Barabas mes ne towaswebana.

17Jega jem temawer angtane unggwanfer aa galap ge betwebilirim, Gubernur Pilatus ga aa tenebaabili, "Aamei inansa bala ai isa ajes aftamunnufe ibe? Ke Barabas, afa Yesus aa jes ne jenbewenaram Mesiaseme?"

18Pilatus jes gamserem game jama gunurum, aam temawer jei tousa angtane imam-imam sanbakaiserem Yesus aa jei ne geraram, jei jelem inibe ga jam ge uskamswebili Yesusem temawer.

19Jes jepserem Pilatus ga mwonap nwini, mwona angtane sanbaka angtane nafsi aa jep gam teneba-tenebawenaram enggalfe, jei gam balf afa angtane waakenfer gam eyebili afa kabwakfer gam eyebili. Wini Pilatusmana taterisi aaiserem Pilatusfe ga enggam baafulbono mwona jei aa jep nwinirim jebe, "Aamei ijam guyon Angtane olyana jeiserem Jei jam munbofe, aam temawer ai namwer esere ames tasa Jem temawer, ane ini amna jeme as kabwaksusfer falbili."

20Jengga angtane imam-imam sanbakaiserem ane angtane sanbaka Yahudimana, jei ga angtane unggwanfer jeiserem enggalf ga gemer ne malin-malintababili jei Pilatus gane balfe enggame, "Barabas tefner se aftannu! Yesus ga is gera, jam munbofe!"

21Jewer ga Gubernur angtane unggwanfer jeiserem gamjon ga tenebaabili, "Angtane naura aaiserem, aamei inansa bala, ai ip isa ajes aftamunnufe?" Ane jei ga aa ge tamawolbili, "Barabas!"

22Pilatus ga tenebaabili, "Afa ga gam jes gamserem, ai ga basas eyeibene Yesusfe aa jes ne jenbewenaram Mesiaseme?" Jei seyafter ga aa ge tamawolbili, "Ti salibip sa daktanswe, jamer futu!"

23Pilatus ga tenebaabili, "Jeje bafa? Angtane aaiserem Jei kapka fwersa gam eyebili?" Jengga jei seyafter gamjon uskambar ga aa ge tetenbili, "Ti salibip sa daktanswe, jamer futu!"

24Pilatus aa galap towaswenaram game, "Ai gamjon ajam eyebiyen.", ane angtane jeiserem ga damtabili jei jam ge erabaf, jei fona ga goltena. Ane jei tafna ga wirsona angtane unggwanfer jeiserem jem nwenabe, jega angtane gam ge towaswebif enggame jei Yesus jam balyan Jam terfe. Jei ga gunu, "Etam-etama kapkaiserem jei imna. Angtane aaiserem Jemna aawisi ga im tafnap. Tafna amnaiserem ames wirsona, aawisi Jemna am tafnap fas."

25Angtane uskambar seyafter gemerserem ga aa ge tamawolbili, "Sya samfer, aawisi Jemnaiserem ga am tafnap, ane tane asal-asala amnaiserem jem tafnap mese."

26Jepga Pilatus jei Barabas ga aftamunnu angtane jeiserem jebe. Ane jei angtane ga balbabili Yesus jam ne safsaftafe newa utuboroserem jeme, ane ga gaarmini Jam ne daktanswef ti salibibe, jamer futu.

27Jepga ginanggwana Gubernurmanaiserem jei Yesus ga aane aftafala jadusa Gubernurmanaiserem, tampata ginanggwamanaiserem jem gwetmanabe. Ane ginanggwana seyafter jep gemerserem ga aa ge betwebili Yesusem tarnabe.

28Jei fene Yesusmana ga aane soksobaasini, ane fene bwalna berbere ga aane doksobaaniwili, fene raja aa galater gam kamwinirim.

29Jepga jei newa utuboro ga aane egwaisona topini gamserem, ane newa utuboro jeiserem ga aane gwelabatena Yesusem dukabe, topini raja aa galater gam gweltenaram. Jei komol boroma galserem ga aane gulbana, ga tafna taasfolawer gwirni, raja galater gam gwirinsinirim. Ane jei somwan dumem ga aa ge nwinbetena Yesusem danggonawer, ane ga aane bisobana. Jei ga enggam ne bisobana, "Samfer, Raja anggwabura Yahudimana!"

30Jei maka ga aane sirbesiwena. Ane daamfen-daamfennem komol boroma jeiserem ga aane erak-eraktana, Yesus jem ga aane safsaftana dukabe.

31Jei jam aa ge tabanwebilirim Yesus jam ne bisobalabe, jepjon ga fene bwalna jeiserem ga aane soksobaasiwili, ane fene Jelemana gwanan aa jes ne soksobaasinirim, fene jeiserem gamjon ga aane kayimbene. Jepga Yesus ga aane aftafala kota sitawer jam ne daktanswef ti salibibe.

32Nel nenennabe jei ga aa ge dorwebili angtane kota Kirenemanaiserem jebar, bosna jemna ga Simon. Jei angtane jeiserem ga aane tergenbana salibi Yesusmana gam sutunbofe.

33Ane ga aa ge forobili taman bosna Golgota je, jemna igi Ibrani olem ga enggam, "Taman Dwak Otam".

34Jes jepserem Yesusfe fo angguru obat syelabar dupdupbuluserem Yesusfe saf jes ne gulbafe. Jengga Yesus Jei jafner bwerawultena, Jei bai Jam telbife.

35Jepga jei Yesus jam ne daktanswena ti salibibe. Aa galap ne tabantanaram, jepga ginanggwana jei undiana tuna bastantouya galserem ga aane jejetana enggalfe, fene Yesusmana jem gam ne syenulbof.

36Jepga jei ga aa ge nwinbetena enggalfe, jei gam gerebaasnenef.

37Yesusem dwak bolap tulisana ga aane fwirebaaiswena tinibe, jei jep aa jes ne tulisulurum kapkaiserem jei aa jes ne bilibenerem Yesusem temawer. Jei ga enggam ne tulisulu: AI YESUSAM, RAJA ANGGWABURA YAHUDIMANAM.

38Angtane komkoma nauraiserem ga Jebar ne daktabaabunswena ti salibibe, afelna Jem taasfolawer, ane afelna ga Jem gwejawer.

39Angtane ti salib tarasamer aa jei ge ayebintyerem, jei Yesus ga aane imei-imeitana, duka ga aane jejetababili, enggam ga aane bala,

40"Yesus, Aamei enggam Im gununt, 'Ai Jena Uwa Sanbagirmana samfer As wirulsini, ane jena jeiserem nunu nawer-ningginfenna gamjon ga As gwitiri ibirmiter.' In Ina Jam se waakentaasini! Afa Aamei bunarsusfer Tane Uwa Sanbagirmanaye, Jas ireya ti salibiwer!"

41Jes galserem angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram, ane angtane sanbaka Yahudimana, jes mese Yesus ga aane bisobana.

42Jei Yesusem temawer enggam ga aa ge gubili, "Jei angtane nensa gam waakentaasini, jengga Jei Jen Jena Jam waakentaasiyen! Jei ke Raja anggwabura Israelmana? Afa Jei Jam se iretyaram ti salibiwer, nei Jei waakenfer ga nesa tebana.

43Jei enggam gunu, 'Ai Uwa Sanbagiri Am tebana waakenfer. Ai Tane Uwa Sanbagirmana.' Sya, ganma gereba Uwa Sanbagiri Jei namwer kese waakentaasini."

44Ane angtane komkom nauna Jei aa jebar ne daktabunswenaram ti salibibe, jeime gemer ge bisobana, angtane nafsi Jei aa gemer ne bisobanaram.

45Jema 12.00 gwere bolap aa falaram, gwere nafa fas, ane ona seyafter jep gemerserem gwini ga fal, jamer jema 3.00 dafef.

46Ane jema engbar jema ga 3.00, Yesus Jei uskambar ga gwarna Ibrani oleme, "Eli, Eli, lama sabaktani!" Igi jemna ga enggam, "Uwa Sanbagiri Amna, Uwa Sanbagiri Amna, Aamei Ai As Ibaf mirtetefala?"

47Angtane jep aa jei ge fibilirim ga aane sarbana, ane ga aa ge gubili, "Yesus Jei Eliya nabi fwatermanaiserem, ga jes jenbene Jam batobaf."

48Angtane daamfenna jemniwer jei tatarfer ga nunggirfele, jei fenbit fona jem soromolaiserem ga goltena. Jei fenbiti jeiserem fo angguru garsamaiserem jep ga osoltena, ane tini bwalnaiserem jep ga fwiretena. Ane Yesusem mif tarnap ga gwirinswena jam telbife.

49Jengga angtane nafsi ga aa ge gubili, "Nei ganma fya! Nejesa gerebafe Eliya kese fortya, Yesus kese waakentaasini."

50Yesus gamjon uskambarsus ga gwarna, jepga Jei mafnana Jelemana Jei Jener bili, "Se totini Amniwer!" Ane Jei ga tere.

51Jes jepserem kain unggwan-giri aa je taannurum Uwa Sanbagirem Jenabe ga ne bitnetini nenennaber, bolawer jamer gwonabo. Ane ogiri ga gin-ginwena, ton-gir ga aane bitwetini.

52Tonmwa bitis seyafter ga aa ge gwawebitini, ane angtane Uwa Sanbagirmana anesus aa jei ge terbilim gamjon ga nwesantababili.

53Jei ga aa ge tobitintye bitis mwonawer. Yesus Jei jame aa galap irwelam terewer, jei kota Yerusalem kotana Waakensusu jeiserem jep ga aa ge kabwitena, ane jep ga angtane unggwanfer ga aane damtabili.

54Angtane sanbaka 100 ginanggwamana ane ginanggwana afweraiserem Yesus aa jei ne gerabisnennerem, jei seyafter uskambarsus ga aa ge erebili giniri aa galap ne domolaram, ane seyafter aa je etamwenaram. Jei ga aa ge gubili, "Bunarsus, Angtane aaiserem Jeiba Tane Uwa Sanbagirmanam!"

55Jes jepserem wini unggwanfer ga bijauwer ge fibili, ane ga aane gaarabili seyafter aa jei etamwenaram. Wini jeiserem jei Yesus ne tikwebaatinenne ona Galileyawer, gam ne batobaf.

56Wini afweraiserem wini seyafter jeiserem jemniwer, bosna jemna ga aas: afwer bosna Maria Magdalena; ane afwer bosna Maria, iye Yakobus ane Yusufmana; ane afwer jei wini Sebedeusmana.

57Ona aa jem gigitswelam gwini jeiserem jeme, angtane galgalabaraiserem jei ga jem fortya. Bosna jemna Yusuf, jei tamna Arimateya tane. Ane jei mese angtane Yesus aa jei ne tikwebaatinennerem.

58Jei Pilatusminip ga sofwa, ane Yesusem futunu ga bala, jam tinswefe ti salibiwer. Jei futunu Jemnaiserem jam gaarantef tonmwa bitisibe. Pilatus jei ginanggwana ga balbabili jei Yesusem futunu Yusufe ga aane gerbana.

59Yusuf ga Yesusem futunu ti salibiwer ga tinswena, ane ga aane taferna kain waakena ibirmiserem jeme.

60Yusuf tonmwa bitis ibirmi jener aa jes domolaram, tonmwa bitisi jeiserem ga otumton jewer ne eyebili. Jei Yesusem futunu ga jep gaarantena. Jepga jei tuna nafsi unggwan-giri ga aane irfifitaansowena, jei ga tonmwa bitis jem ne motolsini, ane ga sofwa.

61Maria Magdalena ane Maria nafsi jep ge nwini, tonmwa bitis danggonawer.

62Nunu jem gwirmer aaiserem, nunu Sabat, angtane imam-imam sanbakaiserem ane angtane safna Farisimana, jei Pilatusminip ga aa ge sofobili.

63Ane ga aa ge gubitena, "Uwa, ai mese ba aa gemer ma sarbistaabonwena, Angtane afaf-afafa jeiserem Jei gemer gwanan aa galap gwenantam, Jei mesam gununt enggame, 'Ai nunu nawer-ningnabaraiserem Ai gamjon ga jem As irwefa terewer.'

64Ga jem temawer, angtane ga jam is balbabili tonmwa bitis jei ne gaarabisnenefe waakenfer, jamere nunu nawer-ningnaiserem se ferwena. Afa fas bitisi jeiserem jam ne gaarabisneneyen, angtane Jei aa jei ne tikwebaatinennerem Jem futunu galap ga sene komkomtaasini, ane ga sege gubili angtaneminibe, 'Jei fwater irwena terewer.' Ol kabwak umwefsus aaiserem jei kabwaksusu gwanan jeiserem jemniwer."

65Pilatus ga tamawolbaabili, "Sya, ginanggwa amnaiserem jesa kitulifene enggalfe, jei tonmwa bitis jeiserem jei ga sene gaarabisnenef. Sa gwi waakenfer gam isa matabaabisini bitis mwona jeiserem."

66Jepga angtane sanbaka imammana, ane angtane safna Farisimana, aa ge sofobili, ane tonmwa bitis gane motolsini newa natabaraiserem jeme, ane tandana Pilatusmana ga gam. Jei ginanggwana Pilatusmana ga aane balbabili, "Aamei ga aafer isa fina."


  Share Facebook  |  Share Twitter

 <<  Matius 27 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran