Dual Panel1Jepga Yesus gamjon ga kawetena jena angtane Yahudimana aa jep ge betwebuwefaram jebe. Angtane aasaje ga jep nwini, tafna afwenefener aa jemanem terbenerem.
2Ginanggwa Yesusmana jei ga jep ge nwinbene. Jei Yesusfe kapkaiserem jes ne terelbef, jei enggam ge gubif, "Yesus Jei kapka gam eyebili!" Jega jem temawer jei Yesus ga gemer ne gerebana, angtane afa kese waakentana nunu jeiserem jeme, nunu Sabat. Afa Yesus Jei angtane jam se waakentanaram, jei enggam ga sege gubili, "Yesus Jei awelna gam gwebili nunu Sabateme, nunu nei awelna nejama gwebiyen. Je kapka."
3Yesus ga angtane tafna aa jemanem terbenerem ga bala, "Au, sa jal, aaf ga is fina nenennaber!"
4Ane Yesus ga angtane jep aa jei ge nwinbenerem ga tenebaabili, "Jei bas batabil Hukumu Nabi Musa aa jes tulistababilim jebe? Nei bas negama eyebili nunu Sabateme? Ke waakenaiserem jesma eyebili, afa kapkaiserem jesma eyebili? Ke angtane jam waakentaasif, afa jam munbof?" Jengga jei jam ge tamawolbiyen, jafner ge nwinbene.
5Yesus Jei angtane unggwanfer jeiserem ga gerebaabisnenne, Jelem inipfener nasbabili. Ane ini Jeman jegme aa jenbana, aam temawer angtane jeiserem jemna duka kekelna, ane jei jam ge towaswebiyen enggame angtane jam batobalaiserem jeiba waakenam. Jepga Yesus ga bala angtane tafna aa jemanem terbenerem, "Tafna imna se nornorsosi!" Jei tafna jemna ga nornorsosini, ane tafna jemna gamjon ga waakennebana.
6Angtane safna Farisimana aa ge tobitintye jena angtane Yahudimana aa jep ge betwebuwefaram jeiserem jewer. Ane jes jeberserem jei ga Herodesem safan mesnaiserem jebar ge betwebili. Jei ula ga aane tagalsini Yesus jam ne munbofe.
7Jepga Yesus ane angtane Jei aa jei ne tikwebaatinennerem ga aa ge tobitintye, ga aa ge sofobili foboganabe, foboga bosna ga Galileya. Ane angtane ona Galileyamana unggwanfersus Yesus ga aane onsobana. Ane angtane ona Yudeyaminiwer jei mese jei ga aa ge jalbili Yesus jam ne onsobafe.
8Ane angtane afwer kota Yerusalemwer ge jalbili, ane afwer ona Idumeyawer, ane afwer Fona Yordan jimwer, ane afwer kotana Tirus angtane jewermana, ane angtane kota Sidonmana. Jei seyafter Yesusminip ge sofobifelwetya, aam temawer jei taterisi Yesus aa jes eyebaabuwenaram jes ne sarbabuwena.
9Angtane aa jei ge forobuwetyaram ga unggwanfersus, jei Yesus jam ne gwetmantaasif. Jega jem temawer Yesus ga angtane aa jei ne tikwebaatinennerem ga balbabili, "Atf sa terel! Atdusa jam isa domolaram, ga isa menetulsini Ai jep gam As juwili." Yesus Jei jes gamserem gam aa jewer balbabilirim, Jei ga enggalf balbabili, jega angtane unggwanfer jeiserem jei Yesus jam ne baftananayan.
10Yesus angtane anesus fwater mes waakentababili bwera-bwerna nafis-nafsi jei aa jes ne domolwenaram jewer. Jega jem temawer angtane seyafter bwernabaraiserem jei jena ga aane bafsonanna enggalfe tatarfer gam gwif Yesusem gwetmanaber, Yesus jam ne entefe, bwernawer gam waakenswef.
11Ane angtane bwata kapka aa jei ge kayipmuwenaram, jei Yesus aa galap ne damtanaram jei jen jena ge janbili Yesusem tarnabe, aam temawer jei mes ge towaswebili Yesus ba baabetabara. Ane ga gam gwarenwena, "Aameiba Tane Uwa Sanbagirmanam!"
12Jengga Yesus ititmer ga balbabili bwata kapka jeiserem, "Angtane nafsi ijama towastababiyen Ai nansa!"
13Jepga Yesus ga tauna taarenabe, ane angtane Jena aa jes balbabilirim ga jenbebili. Angtane jeiserem Yesusminibe ga aa ge forobitye.
14Yesus angtane dua belas ga destabaabili angtane seyafter jeiserem jemniwer. Yesus angtane dua belas jeiserem ga balbabili, "Ai aamei isAs destabaabili enggalfe, aamei Abara nwinf. Ane ga enggalf Ai aamei jam isAs baftabilirim aamei gam isa sofwa, Taterisi Waakena Uwa Sanbagirmanaiserem igama nasbinennef!
15Ane Ai baabeta ibe isAs golmini enggalfe bwata kapka jem igama surbobife."
16Angtane dua belas jeiserem Yesus aa jes destabaabilirim, jemna bose-bosna ga aas: Simon, (jemna bosna afwer Yesus aa jes gulbanaram ga Petrus).
17Yakobus ane osona jemna Yohanes, tannawan Sebedeusmana. (Tannawana jeiserem jemna bosna afwer aa gam ne jenmuwenaram ga Boanerges. Bosna jeiserem jem igiserem ga enggam "Tane irismana". Jei irsi aa gam gam gwenaram, jei ga gam gangge nasowena.)
18Anderyas, Filipus, Bartolomeus, Matius, Tomas, Yakobus tane Alfeusmana, Tadeus, Simon angtane Patriot,
19ane Yudas Iskaryot, angtane Yesus aa jei geram angtane kakalaiserem jem tafnabe.
20Yesus jepga gwina Jem jenabe. Jes jepserem angtane unggwanfersus ga aa ge forobuwetya jamere Yesus ane angtane Yesus aa jei ne tikwebaatinennerem jei dwona jam ne domolyan jam twenfe.
21Angtane afweraiserem ga aa ge gubili, "Yesus Jei miriwer mes kabwakswena syefer nasouna!" Ene Yesusmana, ane Jelem osona, ane Jelem afelen mesna, jei taterisi jeiserem jam aa galap ne sarbilirim, jei ga aa ge sofobili Yesus jam ne gaariufenefe.
22Guru-guru afweraiserem Hukumu Nabi Musa aa jes tulistababilim aa jei ne towas-towastababuwenaram, jei ga aa ge jalbili kota Yerusalemwer. Jei ga aa ge gubili, "Belsebul jei sanbaka bwat kapka seyafter gemerserem jemniwer, jei Yesusem inip nuniton." Angtane afweraiserem ga aa ge gubili, "Belsebul jei baabeta Yesusfe mes gulbana, jega jem temawer Yesus Jei samfer bwata kapkaiserem jem se surbobili."
23Jewer ga Yesus angtane unggwanfer jeiserem ga jenbebili, ane seisya taterisi jep ga nasipmini. Jei ga enggam nasipmini: "Jeje fomfoma bawas jei jena gam suribene?
24Angtane negara daamfennaiserem jep aa jei ge nwinbenerem, afa jei jam gangge syensyanwebilirim safna nafis-nafismer, ane safna jeiserem jei ga jena gane uskamswemini ane jei ga gangge erabana, afa ga gam jes gemerserem, gam jega negara jeiserem jei ga wasferwebili.
25Ane wini yo anggwana jelem tannabaner aa jei gangge nwinbenerem jena daamfennaiserem jebe, afa jei jena jam gane uskamsweminennerem, waakenfer jam ge nwinbeyen, wini yo anggwana ane tanna jelemana jeiserem gwela jemna gam kabwakswemini.
26Ane bawas ane bwata kapka jei aa jei ne onsobanaram, afa jei jenjen jam gangge erabanaram, jepga gangge syanwena, ane bawasa jemna baabeta fas jamere bawas jei bar.
27Angtane baabetyenaiserem jei jam gam gunurum jam kawetefe angtane baabetabaraiserem jem jenabe enggalfe apgal jigala gam komkomtababisif, jei angtane baabetabara gwanan ga jam gam tafresnenne. Jepga jei apgal jigala jemna ga gam komkomtababisini.
28Gasa sarsi! Angtane etam-etama jam gam eyebilirim, ane Uwa Sanbagiri gam imei-imeitana, afa jei jam gam tikwenaram etam-etamawer, Uwa Sanbagiri angtane jeiserem etam-etama jemna gam wirulbono.
29Jengga angtane Mafnana Uwa Sanbagirmana Jem temawer nimnafer aa jei gam nasbilirim, Uwa Sanbagiri Jei etam-etama kapka jeiserem Jam wirulboyon. Etam-etama jeiserem jeba etam-etamsam gemer gam folbana, jam barwebayan jamer abak-abaksus."
30Yesus seyafter jes gamserem gam aa jewer gunurum, Jei ga aam temawer gunu, angtane Yesus enggam aa jewer ne balaram, bawasa jei ga Yesusem inip nuniton.
31Jepga Yesusem eneserem ane Jelem oson mesna ga aa ge forobitye. Jei sitawer ge fibili, angtane nafsi ga aane baftana Yesus jei gaartaabonfe mwonawer.
32Angtane ga unggwanfersus Yesusem gwetmanap aa jei ge nwinbenerem, angtane jeiserem jei Yesus ga aane bala, "Iye ane Im oso mese jei sitawer ge fibitne, Ims ne jenbetne."
33Yesus ga tamawolbaabili, "Iye ane Am oso mese jeje nansa?"
34Jepga Yesus ga angtane seyafter jep aa jei ge nwinbenerem ga gerebaabisnenne, ane ga gutena, "Angtane aaiserem jei mese iye ane oso Amna.
35Angtane aa jei ne eyebilirim Uwa Sanbagiri aa gemer gam gunurum, angtane jeiserem jei ga iye mese oso Amnaiserem, bunar-bunarsusfer ga jes."