Dual Panel1Yesus angtane gamjon towas-towastababili fobogana Galileya je. Angtane aa jei ge forobuwetyaram ga unggwanfersus, angtane jeiserem unggwanfer jam ne eterbiyen. Jei jam aa ge betwebilirim jamer durga. Jega jem temawer Yesus ga juwili atdusa jep aa jei tenaram jebe, ane fonawer bastowaifer ga agasiwili. Angtane unggwanfer jeiserem jei ga foboga eyep ge fibili.
2Jepga Yesus taterisi nafis-nafsiserem jem temawer ga towas-towastababili. Taterisi jeiserem Jei aa jes nasbaipminirim jeba seisya taterisi. Jei ga enggam towas-towastababili:
3"Sa sar! Angtane makan anggwa ga sofna twam tanes tonolf makanabe.
4Jei twam tanna jam aa galap fasawolnannaram, twam tanna afweraiserem ga nelep ge janbili. Jepga junu ga aa ge forobitye, twam tanna jeiserem ga aane tombaabili jamer bar.
5Ane afwer ona tunabaraiserem jep ge janbili, ona unggwanfer fas. Twam tanna jeiserem ga aa ge kokosbili tatarmer, aam temawer ona bastowaifer.
6Jengga gwere kakala jam gam anggasyetyaram, twam tanna kokosa jeiserem ga gangge werenswebili, ane ga gangge serteswebili, ga gangge terbili, aam temawer tarna uskambarsus jam ge kabwiteyan onabe.
7Ane twam tanna afwer ga ona tini utuboroserem ga jep ge janbili. Tini utuboro jeiserem jam gangge kokosbili jamere unggwan-gwansus, ane twam tanna jep aa je ge kokosbilirim ga matabili, jamer twam tanna kokosa jeiserem aa ge aralakswebili, jam ge taabiyen.
8Jengga twam tanna afwer ga ona waakenaiserem jep ge janbili, ga aa ge kokosbili jamere aa ge unggwan-gwanswebili, ane igiserem ga aa ge taabili. Igi aa jei ge taabilirim, afwer ga 30 gemer ge taabili, ane afwer ga 60 gemer ge taabili, ane afwer jeiserem jemna 100 gemer ge taabili."
9Taterisi jeiserem jem igiserem aa jes syawulsinirim twam tanem temawer jama tabanulurum, Yesus ga balbabili, "Afa aamei imwanabara, taterisi Amna As jam isa saribene, ane waakensusfer isa towaswebili."
10Jepga Yesus Jentowai aa galap nwinirim, angtane taterisi aa jei ne sarbisinirim twam tanem temawer, ane angtane dua belas Jei aa jei ne tikwebaatinennerem, jei seyafter ga aa ge jalbili Jemnibe. Yesus ga aane bala Jei taterisi Jei aa jes nasbilirim jem igiserem jep jam towasulmife.
11Yesus ga balbabili, "Taterisi nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, Uwa Sanbagiri taterisi jeiserem jemna igiserem Jam towasulmiyen angtanefe jamer abaka. Jengga namwer aas jepserem Uwa Sanbagiri Jei waakenaiserem Jemna ibe is mesam kitulmini, jega enggalf aamei gam isa towaswena taterisi jeiserem jemna igiserem. Jengga angtane Ams tikwebaatiyeneiserem, Ai taterisi jem igiserem jes Agam syawulsinirim, Ai jei jem Agam towas-towastababili.
12Ai jes gemerserem As towas-towastababili jega: 'Angtane jeiserem bunarsusfer ga sene anggabisini, jengga jam domolyan. Jei sene sarbili, jengga jam ge towaswebiyen. Jengga angtane jeiserem jam ge irfwebiyen etam-etamawer enggalfe, Uwa Sanbagiri Jei etam-etama kapka jemna gam wirtabaipmife.'"
13Jepga Yesus ga balbabili jei, "Aamke seisya taterisi aaiserem jem igiserem je ke ijama sarbiyen? Afa aamei taterisi aaiserem ijama sarbiyeneye, gam jega fomfoma aamei seisya tateris nafsiserem ga isa sarbili waakenfer?
14Taterisi jeiserem jem igiserem aa jes syawulsinirim je ga enggam: Makan anggwana twam tanna aa jei fasawolnannaram, jeiba angtane taterisi Uwa Sanbagirmana aa jei gam nasibenenewenaram.
15Twam tanna nelep aa jei ge janbilirim, twam tanna jeiserem ga enggam: Angtane taterisi Uwa Sanbagirmana aa jei ne saribenerem, jengga bawasa tatarfer jam gam fortyaram, taterisi jeiserem jem iniwer ga gam amsonmini.
16Twam tanna afwer aa jei ge janbilirim ona tunabaraiserem jebe, twam tanna jeiserem je ga enggam: Angtane taterisi Uwa Sanbagirmana aa jei gane sarbilirim, ane tatarfer ga gane taabili ini saaser-saasermer.
17Jengga taterisi jeiserem jelem inibe waakenfer jam ne eganulsiyen abakfer. Jepga afa jei kabwaktala jam gane domolaram, afa jei jam gane tamtamtababili aam temawer jei taterisi Uwa Sanbagirmana mes ne taabili, jei taterisi jeiserem tatarfer ga gane dirinswebili, ane ga gangge waraubili etam-etama jelemanaiserem jebe.
18Twam tanna afwer aa jei ge janbilirim ona tini utuboroserem jem nenennabe, twam tanna jeiserem ga enggam: Angtane taterisi Uwa Sanbagirmana aa jei ne sarbilirim,
19jengga ini jemna jam gangge eseswebamini gwela ogiri aaiserem jem temawer, ane doim temawer. Jei ini enggam gangge folbamini apgal jigala unggwanfer ne damtabif. Jega jem temawer taterisi Uwa Sanbagirmana jei aa jes gane sarbisinirim, ga jem gane mastabili jelem inibe jamere jam ge taabiyen.
20Ane twam tanna ona waakenaiserem jep aa je ge janbilirim, twam tanna jeiserem ga angtane enggalaiserem: Angtane taterisi Uwa Sanbagirmana jeiserem aa jei gane saribenennerem waakenfer, ane jelem inip ga gane eganulsini waakenfer. Jei waakena tefner ga gane eyebili jamere waakenaiserem gangge taabili, igiserem afwer 30, afwer 60, afwer 100."
21Yesus gamjon ga balbabili, "Afa aamei pelitana jam igama dowolaram gwineme, pelitana jeiserem ga fof igama gaarantena? Ke enggam burwam igama motolsini jega nafa fas jam falbiyen, afa titik gwonap igama gwaalaniwili jam syetasife? Fas, bunar-bunarsus gamyan. Jengga enggam, pelitana jeiserem ga tampata dwafennaber igama gwaalantena jega nafa unggwanfer ga gam falbili, aamei waakenfer ga igama anggasini.
22Taterisi Uwa Sanbagirmana namwer aas jepserem aa je ge syetabaabisinirim, taterisi jeiserem angtane galap sene towaswebabifi. Ane taterisi angtane jam ne towaswebiyeneiserem, galap je ga sene gweraulmifi.
23Afa aamei imwanabara, taterisi Amna As jam isa saribene, ane waakensusfer isa towaswebili."
24Jepga Yesus gamjon ga balbabili, "Seyafter aamei ijesa sarbabisinirim, je ga waakenfer isa sarbabisini. Uwa Sanbagiri Jei taterisi waakenfer is nasipmini, taterisi seyafter jeiserem waakenfer ga ima sarbabili, ane Jei gamjon ga is golmini.
25Ga jem temawer, gasa sarbisi waakenfer, aamei taterisi Amna ga fomfom isa sarbili. Gasa sarbisi, aam temawer angtane aa jei sarbisinirim ini waakenaiserem jeme, ane taterisi Amna jam taayibef, angtane jeiserem jei gamjon Taterisi Waakena jem temawer gase sarbisini waakenfersus. Jengga angtane baif gwelaiserem jam sarbisife, Uwa Sanbagiri Jei se amsonbana jemniwer, jei aa jes towaswebilirim bastowaifer jeiserem."
26Yesus seisya taterisi gamjon ga jes nasbili enggame: "Nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggam fala taterisi twam tanem temawer gamserem: angtane twam tanna jelem makanap jam fasawolnanala gamserem.
27Angtane jeiserem gwinem jam gam tatifi, gwinibener gam irwesa. Nunu jeber-jeber jei aa gemer gwenaram, twam tanna jeiserem gangge kokosbili, ane ga gangge unggwan-gwanswebili. Jengga angtane jeiserem jei teisyena twam tanna jeiserem fomfom gangge etamwebilirim jam ge kokosbife ane jamer aa ge unggwan-gwanswebili.
28Ona twam tanna aa jep gam fasawolnannaram, ona jeiserem twam tanna ga jener gam gwebabili jam ge kokosbife. Nabal-nabalsusu ga tarnaiserem je gangge subamitye, ane gamjon ga sofaiserem jes gam tosobaipmisini, ane alnaiserem ga gangge subamitye jamere gangge unggwan-gwanswebili. Jewer ga gangge eseberswebili, ane igiserem ga gangge taabili.
29Ane tannaiserem jam gangge berswebilirim, angtane jeiserem ga gam jela titantanna jeiserem ga gam fulu."
30Ane Yesus gamjon ga tenebaabili, "Nei bam nesa armansosini nunu Uwa Sanbagiri Jei aa jem nwinirim anggwabura seyafter gemerserem jem Sanbakfe? Nunu jeiserem ga enggam fala taterisi aaiserem jem igiserem Ajes syawulsinirim jes gamserem.
31Nunu jeiserem je ga taterisi eremu tanna aas galserem ga gase fala: Angtane eremu tanna bastantouya gam goltena, ane ga gam tonola onabe.
32Eremu tan jeiserem safe bastantowaisusu, jengga je jam aa jep gam tonolaram, ga gam kokosbili, ane ga gam etamwena tini unggwandwasfe, tirni jemna mese unggwandusa. Ane tini jeiserem jem tirnibe junu ga gola jep ga gane eyebaabili."
33Yesus seisya taterisi unggwanfer jes galserem Jei jes nasipmini enggalfe, taterisi Uwa Sanbagirmana jem gam towas-towastababif. Daamfenna jam gane sarbilirim, gamjon nensaiserem gam golmini.
34Yesus Jei seisya taterisi angtanefe ga jetefener towas-towastabaipmini. Jei jeber-jeber Jam gam towas-towastababilirim, Jei seisya taterisi ga jetefener gam nasipmini. Jengga Jei jentowaifer angtane Jemna aa jei ne tikwebaatinennerem jebar jam gangge wofobilirim, ane aa jep gangge nwinbenerem, jes jepserem Jei taterisi jeiserem jem igiserem ga gam nasipmini.
35Nunu dafef jeiserem, Yesus ga angtane Jei aa jei ne tikwebaatinennerem ga balbabili, "Au, nei ganma sofwe fobogana jimwer!"
36Jepga angtane unggwanfer ga aane mirtebitefala, jei ga aa ge jubiwili atdusabe Yesus aa jep nunitonom. Yesusfaner ga aa ge awelbili foboga jimwer. Afwer atdusa nafsiserem jepga jubiwili, ga aane onsobana.
37Deye sanbagiri ga aane forobatya, ane muru unggwanfer ga atap denwetya, muru ga aane bowetini atap. Atdusa jeiserem fona amkom je ge tenbitye.
38Ane Yesus ga atdusa burawer tantena bantal sagabe. Jepga angtane aa jei ne tikwebaatinennerem ga aane irtetena, ga aane bala, "Guru, jas irwe! Aamke teisyena nei amkom nefoma altili?"
39Jei ga irwena, jewer ga deye yo fobogana ga ofsobana enggame, "Sa tikwe! Jafner is fala!" Ane deye ga aane tiknebana, ane fona jafner ga fala.
40Jepga aa balbabili, "Aam je bafa erne game? Aamke enggam ima gunu, Ai baabeta fas?"
41Jengga ga aa ge erebili uskambar, ane jena ga aane tenaaminenne, "Aaje nansa? Deye yo fona taterisi ga Jemna gangge saribene!"