Dual Panel1Yesus tamna jeiserem ga mirsotefala, angtane Jei aa jei ne tikwebaatinenewenaram jebaner seyafter ga aa ge sofobili tamna Jelemanaiserem jewer, jamere aa ge forobili.
2Nunu Sabateme, nunu angtane Yahudimana aa jem ge nwinbisiwefaram, Yesus ga nunu jeiserem ga jena angtane Yahudimana aa jep ge betwebuwefaram jebe ga jem kawetena. Jepga towaiwena Jam towas-towastababife. Angtane jam aa galap ne sarbaibaasinirim Jei aa jes towas-towastababilirim, angtane aa jei ge sarbisinirim jei ga taterisi jeiserem jam ne bitbitwebili. Ane enggam ga aa ge gubili, "Taterisi seyafter aaiserem Jei fwer kitulu? Tousaiserem aa jei fonggala Jemnip jeiserem? Nei enggam ne towaswena, Jei aa jes eyebilirim, jeiserem jengga Uwa Sanbagiriserem Jener gam eyebili. Yesus, Jei nansa?
3Jei ke angtane jena aa jei eyebaabuwenaram? Jei ke tane Mariamana, Jem oson mesna ga Yakobuso Yoses, ane Yudas ane Simon? Jemna osona yafontowai aasaje nebara nwini." Angtane jeiserem gam aa jei ge gubilirim, jei Yesus jam ne sarbayan, ane jam ne tebayan, ane jep ga jei ga aane nasbana.
4Jepga Yesus ga balbabili, "Afa angtane nabi Uwa Sanbagirmanaiserem jei aa jes gam nasbilirim, angtane seyafter gane sarbana. Jengga angtane nabif gwelaiserem jelem tamnabe, angtane jepmanaiserem ane jelem afelen mesna, ane ene jeta, ayana osona jemna, jei jam ne sarbayan."
5Yesus Jei bwembwema masef jep Jam eyebiyen, aam temawer angtane jepmana jeiserem jei jam ne tebayan. Jengga angtane bwernabara unggwanferyan Jei ga jetefener waakentababili, Jei tafna aa galap bunulminiwilirim jem sagabe.
6Yesus Jei Jam bitbitwena, aam temawer angtane taterisi Jemna jam ne taayibeyen.
7Yesus angtane dua belas Jei aa jei ne tikwebaatinennerem ga jenbebili Jemnip ge jalbife. Yesus Jei baabeta ga golmini enggalfe, jei bwat kapkaiserem jem gane surbobif. Yesus ga balbabili, "Gasa sofwe nawer-naurem, angtane jam towas-towastababinenefe! Dum, sandal, saf isa erbili, ane fene daamfen-daamfennem isa erbili. Fon mese, tumilgal, doi ijama erbiyen!
8(6:7)
9(6:7)
10Tamna seyafter gemerserem aamei jep igama fornaram, jena ga daamfennater aamei ga jep igama nwini. Nafis jenap ijama tatiyen jamer aamei jewer igama sofwa.
11Afa aamei jam igama fornaram tamnabe, ane angtane tamna jepmanaiserem is jam ne taamiyeneye, ane aamei is jam ne sarmiyeneye, aamei tamna jeiserem jewer ga jam igam ge sofwa tamna nafsiserem jewer. Jam igam ge sofnaram, tufa onabaraiserem ga jam is ge tentebaabisini, jega angtane tamna jeiserem jep aaiserem jei gam gangge towaswebili, je kapka jei aamei is jam ne sarmiyen."
12Angtane aa jei ne tikwebaatinennerem, jei ga aa ge sofobili. Jei angtane enggam ne towastababinenne, "Gasa tikwe etam-etamawer, waakenaiserem ga jetefener isa eyebili!"
13Jei bwat kapka unggwanfer ne surbobinenne, bwat kapka angtaneminip aa jei gam nunitonom. Jei angtane bwernabara unggwanfer ga aane gwebabili minyakeme, ga aane waakentababili.
14Raja Herodes jeiba angtane sanbakef aa jei gwenaram ona Galileya je, ane jei taterisi Yesusem temawer ga sarbili. Angtane unggwanfer jes ne nasbinenne Yesus aa jes eyebilirim waakena, ane aa jes towas-towasulminirim. Angtane afwer enggam ga gubili, "Yohanes Pembaptis mes irwa terewer, jega jem temawer Yesus bwembwem ga eyebili."
15Jengga angtane nafsi jei enggam ge gubili, "Nabi Eliya mes warautya." Angtane afwer enggam ge gubili, "Angtane nabi mes fortya enggala nabi fwatermana galserem."
16Jengga Raja Herodes jeiserem jam aa galap sarbilirim, jei enggam ga gunu, "Yohanes, duka ai ajes targabaasinintim, jei gamjon mes irwa."
17Gwanan jes galapserem Herodes jei wini osonemana gam gula. Osona bosna jemna Filipus, ane wini jeiserem bosna jemna ga Herodyas. Yohanes Pembaptis Herodes ga bala, "Jeiserem kapka, aamei wini jeiserem ijewer gularam." Jega jem temawer Herodes jei angtanes baftabili Yohanes ne tebaf, ga sene daaferna, ane bwiyip ga sene gaataantena.
18(6:17)
19Herodyas ga Yohanes inip ga getena, ga gunu, "Yohanes jam se tere!" Jengga masef, jei kapkaiserem Yohanesfe jam eyebiyen,
20aam temawer Herodes jei Yohanes jam erebene. Jei tousa Yohanes jeiba angtane waakena, jei angtane Uwa Sanbagirmana. Herodes jei Yohanes waakenfer ga gerebana, aa gunu, "Ai bai Yohanes jam terfe." Herodesmana ini saaser-saaserfer folbana Yohanes jam sarbasife, jengga jei aa jes sarbisinirim, jei teisyena jei fwersaiserem ga jese taabili.
21Umwef ga, Herodyas nele ga damtana Yohanes jewer munbofe. Nunu Herodesmana aa jep surulurum, Herodes masara eyebili. Pegawai jemna, angtane sanbak-sanbaka ginanggwamanaiserem jei mese, ane angtane sanbaka ona Galileyaminip, angtane seyafter jeiserem ga aa ge forobitye.
22Tane yafma Herodyasmana ga jela, ane ga ginari-ginarisona. Herodes ane angtane seyafter gemerserem ini jemna saaser-saaserfena. Jepga Raja Herodes tane yafma ga bili, "Aamei ibas bili, ai as jamer is bala. Ai ibe isas golbili aamei ijes bilirim."
23Raja Herodes jei jena ga enggam gaarstenanna, "Apgal jigala aamei ijes bilirim, ai isas golbili ibe. Afa ona amna nenennap is balaram ai ip isa ajam gaarbife ibe, ai isas gaarbili ibe."
24Jepga tane yafma jeiserem ga gwina, ene ga tenaabili, "Ai basas bilibene?" Eneserem ga bili, "Enggam is bala, 'Abe Yohanes Pembaptisem duka, jega ai gam as towaswena enggame Yohanes mes tere.'"
25Jei tatar-tatarmer ga aa gwina Raja Herodesminibe, ane ga bala, "Ai ims bala, abe duka Yohanes Pembaptismanaiserem as jes is golbi pirnibener."
26Raja jei ini ga jenbana uskambar, aam temawer jei gwanan jena mes gaarstenanna angtane unggwanfer jepserem jem tarnabe, ane afa jei duka Yohanes Pembaptismanaiserem jam golbiyeneye jei gase sefersona. Ane jei bai jam ayebife jei aa jes bilirim yafma jeiserem jebe.
27Ga jem temawer, jes jeberserem Herodes jei ginanggwa daamfenna ga bala, "Se gwi! Yohanesmana duka ga is gwirinyele amnibe!" Ginanggwa jeiserem ga aa gwina, Yohanesmana duka targabana bwiyibe.
28Ane duka jeiserem pirnibener ga gwirinyele, tane yafma jeiserem jepga aa golbili, ane tane yafma jei ga enef ga golbili.
29Jepga angtane Yohanes aa jei ne tikwebaatinennerem jei taterisi jeiserem aa galap ne sarbilirim, ga aa ge jalbili, Yohanesem futunu ga aane gaartena, ane ga aane girinfele, bitisip ga aane tirnunu.
30Angtane Yesus gwanan aa jes baftabilirim enggalfe Taterisi Waakena gane nasbinennef, jei gamjon ga aa ge waraubifeltye Yesusminibe. Ane jei Yesusfe ga aane nasbaibene seyafter jei aa jes ne eyebaabilirim, ane jei aa jes ne towas-towastababilirim.
31Jepga angtane unggwanfersus Yesusminip ga aa ge forobuwetya. Angtane unggwanfersus aa ge forobuwetya Jemnibe, gamjon jam ge sofobuwena, jamere Yesus ane angtane Jei aa jei ne tikwebaatinennerem jei dwona jam ne domolyan jam twenfe. Jega jem temawer Yesus aa balbabili angtane aa jei ne tikwebaatinennerem, "Au enggam neya gwina taman tetenap, gwanan jep ganma nwintowai."
32Atem ga aa ge awolbili jimwer jamer tampata tamanfennap. Tampata jeiserem jebe angtane jam nwinyen, taman teten.
33Angtane unggwanfer tamna seyafter gemerserem jewer jei mes ne damtabili tampata jeiserem aane mirsotefalaram. Jei mes ge towaswebili angtane aa jei ge sofobilirim, jeiba Yesus ane angtane Jei aa jei ne tikwebaatinennerem. Jega jem temawer jei tamna jemna seyafter ga aane mirsotefala, ga aa ge nunggirbifele jamere aa ge forobitne, Yesus ane angtane Jei aa jei ne tikwebaatinennerem nalef jam ge batobiyen.
34Atdusa jam bitef batuwili, jepga Yesus ga jutetya, jewer ga angtane unggwanfer ga damtabili. Yesus angtane jeiserem nesiktababili, aam temawer jei enggala dombana galserem, angtane jei aa jei gerebaabisneneleiserem fas. Jem sanbakf jei nwiniserem fas, jei gerebaabisnenefe. Jega jem temawer Yesus ga towaiwulu taterisi nafis-nafsi jam towas-towastabaipmife jebe.
35Dafef angtane Jei aa jei ne tikwebaatinennerem Yesusminip ga aa ge jalbili, ane ga aane bala, "Tampata aaiserem tamanfenna, ane ona ga jam gigitsona.
36Angtanes balbabi jei gangge sofobi. Jei tumilgala ga sene armantababili, desa-desanap ane taman-tamnap ona jep gemerserem."
37Jengga Yesus ga tamawolbaabili, "Tumilgala jebe aamei sa kitulmi!" Jei ga Yesus gane bala, "Aje fomfoma asa sofwa tumilgalfe, ane tumilgala jeiserem ga nesa kitulmini jebe? Hargana unggwandusa, 200 doini perak, ane doi nemna bastowaifer."
38Yesus ga balbabili, "Rotini imnibe fomera? Sa gwi ga isa damtabitne!" Jei ga ge gubili, ane rotini ga aane damtabitne, gamjon ga aa ge waraubitne, Yesus ga aane bala, "Rotini amnibe tafna gwiri, jigala ga naura."
39Jepga Yesus angtane aa jei ne tikwebaatinennerem jei ga balbabili, "Angtane aaiserem jesa balbabi gangge nwinbete mulumsamer, kakatar ti alna ikikini sagap."
40Jepga angtane ga aa ge nwinbitena, angtane jeiserem enggam ge nwinbenenne, daamfen mulumu angtane jep afa seratus afa lima pulu jep ga gemer gangge nwinbene.
41Yesus Jei rotini tafna gwiri ane jigala naura ga tebabili, ane jewer ga taman waaken-girip ga anggaswena, ane Uwa Sanbagiri ga bala, "Ase samfer gulbana." Yesus Jei rotini ga bitabaabisini, ane ga kitulmini angtane Jei aa jei ne tikwebaatinennerem jebe enggalfe, jei gam ne syenulminenef angtane unggwanfer jeiserem jebe. Ane Jei jigala naura jes mese bitamisini angtane seyafter gemerserem jebe.
42Angtane seyafter jep gemerserem ga dwena jamere unubuguf.
43Gamjon ga roti bitbiti ane jigal bitbiti ga aane dupdupbulu, burnabara ga dua belas.
44Anggwana rotini jep aa jei ne tombaabilirim, unggwanfer ga 5.000 anggwa. Wi tane seyafter jebar jep aa jei ne dwenaram, jam ne ertebiyen.
45Jes jeberserem Yesus ga balbabili angtane Jei aa jei ne tikwebaatinennerem, "Sa jusya atap, ane aa ga danabili tamna Betsaidaminip fobogana jimwer." Jewer Jei ga balbabili angtane uskambar, "Aamei jasa warau!"
46Ane angtane uskambar jeiserem aa galap ge waraubilirim, Yesus Jenfentowai ga tawena otumube, Uwa Sanbagirfe sembayang jam gwebabafe.
47Jewer ga ona safe gemer gigitswenaram, angtane aa jei ne tikwebaatinennerem atem aa jei ge sofobilirim, jei ateme foboga nenennap ge awelbinenne, jengga Yesus Jei Jenfentowai onaber fitna.
48Yesus Jei aa damtabili awelna jemna falam atdusa jeiserem jam ne gwebinenelebe, aam temawer nindaya uskambar. Jei masef jam ge sofobiyen, aam temawer nindaya unggwanfersus ne gwebana. Ona fom nafwela jengga gwini gemer, Yesus jemnip ga jela foboga sagap wofentena. Jei jamer sofwa, Jei safe Jam ayebaabinif.
49Jei Yesus jame aa galap ne damtanaram Jei fo sagap wofentena, jei enggam ga aa ge gubili, "Jeiba spoksam!"
50Jei seyafter Yesus mes ne damtana, ane jega jem temawer jei seyafter uskambar jam ge erebili. Jengga jes jeberserem Yesus Jei ga balbabili jei, "Sa tikwe, ipsama ernerem! Ai aare."
51Yesus ga jusana atdusa jem sagabe, ane bwona ga aane tikwebana. Angtane aa jei ne tikwebaatinennerem jei ga aane bitbitwebili.
52Jei safe mes ne damtana Yesus Jei rotini tafna gwiri aa jes bitabaabisinirim angtane 5.000 jep aa jes syenulminirim, angtane Jei aa jei ne tikwebaatinennerem jei jam ge towaswebiyen enggame Yesus samfer bwembwema gam eyebili.
53Yesus ane angtane Jei aa jei ne tikwebaatinennerem aa galap ge forobilirim foboga jimwer, ona ga Genesaret ga jep ge batobili, jepga atdusa gane daktabisini.
54Atawer aa ge jubitetyaram, angtane ga aa ge anggabili enggame aa jei fortyaram Jeiba Yesusam.
55Jepga angtane aa ge nunggirbifelwena ona jeiserem jebe, ane angtane bwernabara tikarabaner ga aane towaitabili jam ne erbiyelfe Yesusminibe. Afa angtane jeiserem enggam jam gangge sarbilirim, "Yesus Jei mes fortya tamna nemnaiserem jebe.", jei angtane bwernabara ga gane erbifeltye tampata Yesus aa jep gam nwinirim jebe.
56Tamna seyafter gemerserem Yesus aa jep gam wofnaram, afa tamnap, afa kotanap, afa taman nenennap, angtane jep gangge forobitye, angtane bwernabaraiserem pasarap ga gane aftabifelwena. Jep ga jei Yesus ga gane aber-aberwobana enggame, "Ai ke samfer fena Imna fwesapfener as ensobana?" Ane angtane bwernabara seyafter fene Jemna aa jei ne taamiwenaram, jei ga aa ge waakenswebili.