Dual Panel1Angtane safna Farisimana ane guru-guru Hukumu Nabi Musa jes tulistababilim aa jei ne towas-towastababuwenaram jei mese, jei ga aa ge jalbili kota Yerusalemwer enggalfe, Yesus jam ne damtaf.
2Jei angtane Yesus aa jei ne tikwebaatinennerem aane damtabili, jei aa galap dwenaram, angtane afwer jei nabala tafna jam ne wirtabaabiyen. Ane jei ga aa ge gubili, "Jeiserem ba kabwaksusu! Jei nele waakena agama nemna jam ne onsobiyen."
3Angtane safna Farisimana jei mese anggwabura Yahudimana afwer seyafter gemerserem, jei osiri fwatermanaiserem agama jemna waakenfer ga jei ne onsobili. Agama jemna ga enggam: Angtane nalef jam twenyan, gwanan ga tafas gam wirsona, nele agama jemna jes gamserem.
4Ane jei pasarawer jam gangge waraubitnerem, jei tumilgala aa jes gane armantababilirim jei gwanan ga jam gane wirtabaabili, nele agama jemna gamserem. Ane osiri nafis-nafsiserem unggwanfer, asal-asala jemna aa jei ne towas-towastababuwefaram, jes mese jei jes ne onsobuwena jeber-jeber. Ga enggam, jei pirin mese, mok, ane balangan ga jam gane wirtabaabili, nele agama jemna gamserem.
5Angtane safna Farisimana ane guru-guru Hukumu Nabi Musa aa jes tulistababilim aa jei ne towas-towastababuwenaram, jei Yesus ga aane tenebana, "Jeje bafa angtane Aamei Is jei ne tikwebaatinennerem osiri asal-asala nemna aa jes towastababilim, jeiserem jei jam onsobiyen? Jengga jam twenabe tafa kabwakmer gane dwena? Game kapka."
6Yesus tamawolbaabili, "Aameiba angtane akar-akarem ijeya gwenaram! Nabi Yesaya bunarsusfer enggam mesam nasbil im temawer: 'Uwa Sanbagiri enggam gunu, anggwabura aaiserem Ase aarememfener gane gaartena, jengga ini jemna bijua Amniwer.
7Jei Ai As jewer ne pujitenerem, jam sege elbesini, aam temawer taterisi jei aa jes ne towas-towastababuwenaram, jei enggam ne balbabili taterisi jeiserem Amna, jengga taterisi jeiserem Amanyan, taterisi jeiserem angtanemana.'
8Taterisi Uwa Sanbagiri aa jes balbabilim jeiserem ga ijama taabiyen, jengga osiri angtane fwatermanaiserem ga ijesa taabili."
9Yesus gamjon ga balbabili, "Taterisi Uwa Sanbagiri aa jes balbabilim aamei baife ijesa gweyibenerem, taterisi jeiserem aamei imsa towaswebili, jengga aamei osiri fwatermana asal-asala ilemanaiserem ga ijema tefnera onsobili.
10Nabi Musa mesam gul, 'Aamei ga waakenfer isa nwini iye yo uwa jebar.' Ane jei gamjon aa gul, 'Tanna iye yo uwa kabwakfer aa jei gam gitminirim, tane jeiserem galap gane tamtamtana jamer futu.'
11Jengga aamei ga enggam ima towas-towastababili, afa angtane jam gam gitminirim ene afa jeta, 'Ai bagal jigals as golmini ibe, ai apgal jigala jeiserem ai korbanf golf, Uwa Sanbagirfe ajes gulbaf.'
12Afa tanna jei ene jeta jes gemerserem gam jam gam gitminirim, gam jega aamei enggam syefer ima towas-towastababili, tanna jeiserem jei apgal jigala gamjon jam golmiyen ene yo jeta jelemanaiserem jebe.
13Gam jega aamei Taterisi Uwa Sanbagirmana ga ijama firulbaanuwili, ane osiri fwatermana asal-asala ilemanaiserem ga jetefener ima towas-towastababili. Ane kapka jam eyebiliserem unggwanfer jes galserem ga ijesa eyebaabili."
14Jepga Yesus ga angtane unggwanfer jeiserem ge jenbebili Jemnip ge jalbife. Jei enggam ga balbabili, "Aamei seyafter gemerserem, Amsa sarbasi! Aaiserem ga waakenfer isa sarbisini.
15Tumilgala afa fas angtane aa jes gane tombaabilirim, tumilgala jeiserem angtane jam kabwaktayan. Fas, jengga etam-etam kapka iniwer aa jei gam tawetyaram, jeiserem angtane ga je gam kabwaktana.
16(Afa aamei imwanabara, taterisi Amna As jam isa saribene, ane waakensusfer isa towaswebili.")
17Yesus angtane unggwanfer jeiserem gam mirtebitefala, jenap ga kawetena. Ane angtane Jei aa jei ne tikwebaatinennerem ga aane tenebana seisya tateris jeiserem jem temawer.
18Yesus ga balbabili jei, "Aamke ijama saryan? Angtane aa jes gam tumilirim, tumilgala jeiserem angtane jam kabwaktayan.
19Tumilgal jeiserem jeke enggam inip gam kautena; fas, jengga witifinip. Ane unu gamserem ga gam nana witifiniwer." Yesus jes gamserem gam aa jewer gunurum, Jei enggam gunu tumilgala seyafter ga waakena.
20Yesus gamjon ga balbabili, "Angtanem iniwer aa je gam tawetyaram, jeiserem angtane ga je gam kabwaktana.
21Angtanem iniwer taweyalaiserem ga enggala aas galserem: ula kapka angtane gemer aa jei gam gunurum jelem inibe; angtane naura jei wi anggwayan makanap ge dorwena; jigala jam komkomulsiliserem; angtanes munbolo; maaryens gam gwebili;
22angtane ini unggwan-giri aa jemanem gam folbanaram galgala unggwanfer jam damtabife; kapkaiserem jes gam eyebili; angtane jam gam afaf-afaftana; maaryens gwelaiserem angtanem nwenabe; ini mamar-mamara falbalaiserem; angtane nafsi nimnafener gam bala; ina jam gaartela; angtane teisyenaiserem waakenaiserem jes eyebiliserem ane kapkaiserem jes eyebiliserem.
23Kapka seyafter jeiserem angtanem iniwer taweyalaiserem, ane jeiserem ga angtane je gam kabwaktana."
24Yesus ona Galileya ga firsona, ane ga sofna ona kota Tirusem gwetmanap aaiserem jewer. Yesus Jei jenap nwini, ane Jei bai angtane jam ne towaswebafe. Jengga Jei masef, Jei Jam sewesiyen.
25Ona jeiserem jebe, wini aasaje ga jep nwini, ona Fenisya propinsi Sirya je aa jei surulum. Jei angtane Yahudimanyan, jei Yunani olem gam nasowena. Wini jeiserem taterisi Yesusem temawer mes sarbili. Jei jame aa galap sararam enggame, Yesus mes fortya ona jeiserem jebe, jei tatarmer ga jela Yesusminibe. Jei jener ga jena Yesusem tarnabe jam sembatafe. Tane yafma jemna bwat kapka aa jei kabwilirim, jei jenap nwini. Wini jeiserem Yesus enggam ga bala, "Uwa, bwat kapka tane amnaiserem jemniwer jam Is surbili!"
26(7:25)
27Yesus ga gunu, "Gwanan tane unu jei ge falbami. Gam jam naaweyan, tumilgala tanemana ga gwalaf gane fasawolmini." (Taterisi jeiserem jem igiserem ga enggam, Yesus Jei anggwabura Yahudimana jes batobaabili danna, angtane Yahudimanyan jei amnup.)
28Wini jeiserem ga aa tamawola, "Uwa bunar, jengga gwalna meja gwonap jei tumilgala tomna tanemana jei ne tombaipmini."
29Jepga Yesus ga aa tamawolbili, "Samfer, aamei bunarsusfer im gutena. Jega jem temawer, Ai tousa aamei As im tebana. Gase warauwa ilem jenabe, bwat kapka jeiserem taneminiwer mes gwisini."
30Wini jeiserem jenabe aa galap fornaram, tane bwernabara jeiserem jep domolswena, tikar sagap tantena. Jei jafner tanna bwerayan, bwat kapkaiserem jei mes totifele.
31Yesus ga kota Tirus aa firsona, kota Sidonwer ga sofna. Jei ga ona Sepulu Kota ga jeter ayenni, ane Foboga Galileyawer gamjon ga warauwa.
32Jepga angtane imwana mutuserem, jei jam nasowelabe ga bastowaifer gam nasowena, angtane jeiserem ga aane aftafala Yesusminibe. Ane angtane jepmana gemerserem Yesus gane bala, "Uwa, tafna Imna se tosobaaniwi angtane aaiserem jem sagabe, jam waakentafe."
33Jepga Yesus ga angtane imwa mutu jeiserem ga aa aftafala angtaneminiwer, jepga Yesus ga tafna naura imwa mwonap ga aa kasobantena, gamjon maka tafa bolap ga sirntena, maflamap ga batabatena.
34Yesus gamjon winsiwer anggaswena, ini ga garstaabona, aam temawer jei angtane jeiserem gam nesiktene. Ane Yesus ga bala, "Efata!" afa nem olem, "Se waakenswe!"
35Jes jeberserem angtane jeiserem ga sara, ane maflama weren-wernaiserem jeme waakenfer ga nasowena.
36Jepga Yesus ga balbabili, "Taterisi aaiserem ijama nasipmineneyen angtane nafsife!" Jengga Yesus safe gam nasbabisiwena, jei uskambarsus ga aane nasbinenne taterisi Yesus aa jes eyebilirim jem temawer.
37Jei jam ge bitbitwebili, ane ga aa ge gubili, "Taterisi jeiserem jeje fomfoma? Seyafter Jei aa jes eyebilirim, je waakensusu. Angtane imwa mutuserem jei waakenfer mes ge sarbisini. Angtane gwanan jam ge nasbaweyanaiserem, jei mes ge nasbawena!"