Alkitab Mobile SABDA
[VER] : [BERIK]     [PL]  [PB] 
 <<  Wahyu 16 >> 

1Jepga taterisi ol dagam ga ai sarbili Uwa Sanbagirem Jenawer. Taterisi jeiserem malaikata tuju ga jes balbabili enggame, "Gasa sofwe, ane asayunu tuju kakala Uwa Sanbagirmana jeiserem ogir sagap ga isa sutobaabisini ogiri gam kabwaktaf. Gasa eyebi enggam gamserem angtane fo kakal gemer gam suwulsinirim jili gol jam kabwakulf."

2Malaikata gwananaiserem jei ga aa gwina, ane asayunu jemnaiserem ogir sagap ga aa suwulsini. Jepga angtane tandana twen kakalminiwer aa jei ne damtabilirim, ane patunga aa jei ne pujitababuwenaram, jei saasiw kapka ane siginsusu ga aa ge falipmini.

3Jepga malaikata afelnaiserem jeime asayunu jemna finip ga aa suwulntena. Ane fini ga enggam fala aawisi angtane jam tere jemna aawisi gamserem, ane apgal jigala seyafter finip aa gemer naawenaram ga aa ge terbili.

4Jepga malaikata nawer-ningnabaraiserem jeime asayunu jemna ga aa suwulntena fonabe ane fo mwonap mese, ane jepga fona enggam ga aa ge falbili aawisi galserem.

5Malaikata baabeta aa jemanem folbanaram fona jeiserem jebe, ai malaikata jeiserem ga ai sarbana, jei ga enggam gutena: "O Uwa Sanbagiri, Aamei tabalbalsusu, Aamei namwermanaiserem ane Aamei gwananmanaiserem. Tamtamtalaiserem Aamei Ijes golminirim jeba waakena.

6Jei angtane Imna aawisi jemna mes ne sutobaipmisini, ane aawisi nabi-nabi mese jemnaiserem, ane Aamei namwer ga Ijes eyebili enggalfe jei aawisi gam ne telbebistowelam. Jeiserem jeba fwaina bunarsusferam eyeipmini jebe."

7Jepga taterisi ga ai sarbili Uwa Sanbagirem mejanawer jei enggam tamawolbana, "Tuhan, Uwa Sanbagiri baabeta Imna unggwandwasusu! Tamtamtalaiserem Aamei Ijes golminirim jeba bunar ane waakena."

8Jepga malaikata nawer-naurabaraiserem asayunu jeman jon gwerep ga suwulsini, ane jepga gwere ga enggam fala sarsarsus angtane jebe gangge taabisif, gwer kakala jeiserem jeme.

9Gwere kakalfenna angtane ga jemfener ge taabisini, ane jei ga bosna Uwa Sanbagirmana jam ne babapsoibene, aam temawer Jei tamtamtababiliserem jes golmini. Jengga jei etam-etamawer jei jam ge tikwebiyen, ane baabeta Uwa Sanbagirmana jei jam ne pujiwulboyon.

10Jepga malaikata limanabaraiserem asayunu jemna twen kakala galserem jem taman nwin sagabe ga aa suwulsini. Jepga twen kakala jeiserem jemna ona seyafter jep ga enggam fala gwin. Angtane jei ga maflama jelemana gane jerbebili bweram temawer,

11ane jei Uwa Sanbagiri taman waaken-girip aaiserem ga aane babapsobana, aam temawer jei bwerna aa jewer ne domolaram, ane jei saasiw aa jewer ge falipminirim. Jengga jei etam-etama kapkawer jei jam ge tikwebiyen.

12Jepga malaikata enamabaraiserem asayunu jemna ga suwulntena fona unggwandusa bosna Efrat je. Ane fona jeiserem ga aa safwena, jega nels geramini raja-raja jei jewer ge difabiliserem gwer anggasyela jewerserem jewer.

13Jepga bwata kapkaiserem nawer-ningna ga ai damtabili, jemna numu ga enggala sajala galserem. Bwat kapka jeiserem bwildusa jem aaremawer totintye, ane twen kakala galserem jem aaremawer totintye, ane nabi ol kapkaiserem jem aaremawer totintye.

14Jeiserem jeiba bwata kapka, ane jei bwembwema gane eyebili. Bwata kapka nawer-ningna jeiserem jei gangge sofobili, ginanggwana rajamanaiserem jam betbetulfe ogirip seyafter gemerserem jewer, aam temawer nunu unggwandusaiserem jem gam eraf Uwa Sanbagirfar, Jemna baabeta unggwandusa.

15Jeiserem taban Yesus enggam ga gunu, "Imsa sar! Nunu Ai Ajam foryalaiserem nunu jeiserem angtane jam ne towaswebiyen, nunu komkom anggwana jam foryala jem ne towaswebiyene gamserem. Angtane nustayanaiserem, jengga fene jemna mes menetebabisini, angtane jes galserem jei ga Ams damtaf. Ai Ajep fortyaram, ini jemna waakenfersus sege folbamini, aam temawer jei ilyak-ilyakmer Amnibe jam ge jalbiyen, ane jei jam ge seferswebiyen angtane unggwanfer jem nwenabe."

16Jepga bwata kapkaiserem ginanggwa ane raja-raja ga dupdupbulu jam ge betwebife. Ona jei aa jep ge betwebiliserem, Ibranim oleme ona jeiserem enggam gane bili, "Harmagedon".

17Jepga malaikata tujunubaraiserem asayunu jemna winsibe ga suwulsini. Ane jei taterisi ol dagam ga sarbili taman nwini sanbagiri Uwa Sanbagirmanaiserem Jem Jenawer, enggame aa jei gutenaram, "Maa, bar!"

18Jepga irsi ga aa bwere-bweretana, ane iris tere ga teisyenem folbana, ane jam kwanemwebawena, ane giniri unggwandwasusu ga gwena. Gwanan Uwa Sanbagiri angtane Jame aa galap eyebaabilim jamere namwer aas jepserem, ginir enggame fas jam gweyan, giniri jeiserem jeba unggwandwasusum!

19Babel kotana unggwan-giri jeiserem, jei ga mes wogwogwena, woga ga nawer-ningna ga gangge falbili, ane kota-kota ogiri seyafter gemerserem jei ga jam ge kabwakswebili. Ane Uwa Sanbagiri Jei kota Babel unggwan-giriserem ga aa sarmistaabona, ane Jei angtane jepmana gam taatwebaabili jei fo anggur kakala Jemna gane telbif Jem mangkonawer, afa igi ga enggam angtane jepmana mes ne enolbana kakala Uwa Sanbagirmana.

20Naanteya seyafter sege asobili, ane taaren mese jeme sege asobili.

21Arouwa es batu unggwandusa galserem winsiwer gane nyentya, jemna darna ga enggammer lima pulu kilogram. Winsiwer gangge janbitye angtane jem gam jubobif. Ane angtane Uwa Sanbagiri ga sene babapsobana, aam temawer jei kapkaiserem aa jes ne domolaram arouwa es batuminiwer. Arouwa es batu jeiserem Uwa Sanbagirminiwer jeba kabwaksusum.


  Share Facebook  |  Share Twitter

 <<  Wahyu 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel