Alkitab Mobile SABDA
[VER] : [BERIK]     [PL]  [PB] 
 <<  Wahyu 3 >> 

1Yesus ga gunu, "Yohanes, aamei taterisi aaiserem jam is tulistaabili, ane malaikatfe ga is baafulu, safna Ai As jei ne tebanaram kota Sardis je: Taterisi aaiserem Amniweram jela, Aiba mafnana tuju Uwa Sanbagirmana ane torbwana tuju Ai Ajes erbisini. Ai Amsam towaswena aamei ijesa eyebilirim: Angtane enggam ge gubili aamei ijama gwena, jengga fas, aamei safe imsa tere!

2Ga jem temawer sa irwe, baabetfer ga As isa onsobana, jega galap aamei bastantowaifer As ijama onsobayan, ga igama tikwena Ams onsobalawer. Ai Ames domola ijesa eyebilirim, ane Uwa Sanbagiri aa jes bilirim aamei jeiserem gemerje ijama eyebiyen.

3Ane gasa sarbistaabon, Ai gwanan isa Agam towas-towastababilintim, ane aamei gwanan ijesa sarbilintim. Ga jeter isa eyebili, ane ga isa irfwena etam-etama kapkaiserem jemniwer. Afa aamei ijama irfweyanaye, Ai ga imnibe komkom anggwana gamserem ga gam As fortya, ane aamei teisyena fonggalabara Ai ga As fortya.

4Jengga im nenennabe kota Sardisminibe, angtane afwer unggwanferyan jei fene jemna waakenfer ne gerebaabisnenne, oltunu fas, afa ga enggam jei kapka jam eyebiyen. Angtane jeiserem jei ga Abar Asa wofesa fen sinsiniber, aam temawer Uwa Sanbagiri enggam gunu jei samfer Abar As ge nwini.

5Angtane kanaufer Abar Ajeya finaram, jei angtane jes galserem fene sinsini aa jei ne kabwabisinirim, ane bosna jemna Ajam wirtabaipmisiyen bukunu angtane bosna aa jep tulistababilirim, angtane Uwa Sanbagirfar aa jei naawelaiserem. Ane Am Uwa Sanbagirem tarnabe, ane jem malaikata unggwanfer, Ai jep ga As gusu, 'Jei Amnaiserem.'

6Aamei seyafter taterisi aaiserem waakenfer isa sarbisini, Mafnana Uwa Sanbagirmana aa jes bilipminirim safna Ai As jei ne tebanaram jebe!"

7Yesus ga gunu, "Yohanes, aamei taterisi aaiserem jam is tulistaabili, ane malaikatfe ga is baafulu, safna Ai As jei ne tebanaram kota Filadelfya je: Taterisi aaiserem Amniweram jela, ini Amna tabalbalsusu, ane taterisi Amna bunar-bunarsus. Kuncini Raja Daudmana pintunu kota Yerusalem ibirmiserem jem tertesiliserem, kucini jeiserem Ayam taamini. Afa Ai jam As tertesinirim, nan angtane se matasini? Fasfasus! Ane afa Ai jam As matasinirim, nan angtane se tertesiwili? Fasfasus!

8Ai amsam towaswena aamei ijesa eyebilirim. Baabeta imnaiserem unggwanferyan, jengga aamei taterisi Amnaiserem imesa tikwebitini, ane Ai As igemera tebasini waakenfer. Gasa angga, Ai mwona ibe mesam tertemisini, ane nan angtane se matasini? Fasfasus!

9Jengga fomfoma safna bawasa aa jei ne tebanaram jem temawer, ane jei sege afaf-afafwebili, ane jei jener enggam ga sege gubili, 'Ai angtane Yahudimana, ai Uwa Sanbagiriter asa onsobana.', jengga fas. Gasa sar, Ai As eyebisi enggalfe jei gam sege jalbisif imnibe, ane somwan dumem ga sege nwinbese im danggonabe. Ane jei ga sene balbabisi Ai imsa nesiktababili.

10Aamei taterisi Amna imesma tikwebitini, ane kanaufer ima fina. Ga jem temawer Ai isAs gerebaabisnenne nunu kabwaksusu jewer. Nunu kabwaksusu jeiserem gase etamwesa ogiri seyafter gemerserem enggalfe angtane seyafter ogiribe aa jei ge nwinbenerem gam unggwasbaabif, ane Ai aamei isAs gerebaabisnenne.

11Ai babitsim ga As fortya! Taterisi waakena ileminip aaiserem ga waakenfer isa taabili, jega fwaina Ai isa Ajes golminirim, angtane nafsi jam ne amsonyan.

12Angtane kanaufer Abar Ajeya finaram, Ai angtane jeiserem As tonolsa jagomelna gamserem Jena Alem Uwa Sanbagirmanaiserem, ane jei jewer gamjon jam ge tobitinyen. Bosna Alem Uwa Sanbagirmana, ane bosna taman-giri Alem Uwa Sanbagirmanaiserem, jeiserem ga kota Yerusalem ibirmi, ga jesene iresanya taman waaken-giriwer, Alem Uwa Sanbagirminiwer -- Ai ga bosna naura jeiserem As tulisosa angtane jeiserem jem tifinibe. Gamjon bosna ibirmi Amna As tulisulsu jem tifinibe.

13Aamei seyafter taterisi aaiserem waakenfer isa sarbisini, Mafnana Uwa Sanbagirmana aa jes bilipminirim safna Ai As jei ne tebanaram jebe!"

14Yesus ga gunu, "Yohanes, aamei taterisi aaiserem jam is tulistaabili, ane malaikatfe ga is baafulu, safna Ai As jei ne tebanaram kota Laudikya je: Taterisi aaiserem Amniweram jela, bosna Amna ba Aminsam. Taterisi Amna ba bunaram, ane Ai taterisi jeiserem isa Ai towas-towasulmiwena. Ai seyafter Uwa Sanbagiri aa jes eyebaabilim jem Sanbakfe Ayam nwini.

15Ai Amsam towaswena aamei ijesa eyebilirim; aamei uskambar As ijama nasbasiyen, ane aamei uskambar As ijama nesikteyen. Aamei enggalyan fona kakala galserem afa wisimi galserem, jengga nenennap fener. Ai isa enggam Ai balbabili, aamei fo kakala galserem, afa fo wisimi galserem.

16Jengga aamei nenennaber, sarsaryan ane wisimyen. Jega jem temawer Ai aamei isAs fasawola Alem aaremawer.

17Aamei ga enggam ima gutena, 'Ai apgal jigala anesus, ane apgal jigala seyafter aare, ai apgal jigala amnibe dwona afa jam falbiyen.' Jengga aamei teisyena aamei tamtamsusup ima nwini! Aamei apgal jigala fas; nwena imna kofa, ane aamei ga ilyak-ilyaka.

18Jega jem temawer Ai ga esorola is Ai golmini enggalfe, aamei emasa Amniwer gam isa armanulu, emasa tabala, jamere bunarsusfer aamei galgala unggwanfer. Ane fen sinsini Amniwer gam isa armantababili, ane ga isa kabwabili, jega aamei ilyak-ilyakmer jewerserem, ane seferswela imna jem ga isa matabaabisini. Ane obata gam isa armanulu, ga nwenap isa batababili, jega gam igama anggasini.

19Angtane Ajes nesiktababilirim, angtane jeiserem ga jes Agam saftabana, ane tamtamtala Agam golmini. Ga jem temawer, ga isa tikwena etam-etama imnaiserem jewer, ane waakenfer ga isa eyebili.

20Gasa sar! Ai mwa kautelap fina, ane ga As jene. Afa angtane Ai Ajei sarbanaram, ane mwona gase tertesini, Ai ga Ase kautena, jebar ga As ge dorwena. Ai jebar ga As ge twena, ane jei Abar ga As ge twena.

21Angtane kanaufer Abar Ajeya finaram, jei ga As balbabili ga enggam, Ai Ajam jenyan jengga bawasa jei mes jena. Ane namwer aas jepserem Ai Uwa Amnaiserem taman nwini sanbagiri Ai Jebar ga Ajep ge nwini nawersamer. Ane angtane kanaufer Abar Ajeya finaram, jei mese Am taman nwini sanbagiri jeime ga sege nwinbetena, Abaner ga Asa nwini.

22Aamei seyafter taterisi aaiserem waakenfer isa sarbisini, Mafnana Uwa Sanbagirmana aa jes bilipminirim safna Ai As jei ne tebanaram jebe!"


  Share Facebook  |  Share Twitter

 <<  Wahyu 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel