Dual Panel1Am afelen mesna, safnant, aamei seyafter guruf ijama gweyan. Angtane daamdema tefner Taterisi Uwa Sanbagirmana ga jep sene towas-towasulmini, aam temawer aamei imsa towaswena ai guruf ajeya gwenaram, nunu umwef jemserem Uwa Sanbagiri angtane aa jem tenebaabuwesaram, nunu jeiserem jeme Uwa Sanbagiri Jei as tenebaabuwena uskambar, ane angtane nafsi Jei Jam tenebaabuweyan uskambar.
2Nei seyafter waakenaiserem fas jeber-jeber nejama eyebuweyan. Jengga angtane taterisi kapkaiserem fas jam nasbiyeneiserem, angtane jeiserem jei ga waakensusu, jei jen jena jamer gam gerebaasnenne tifni seyafter gemerserem.
3Nei newa janma fwirebaasiwilirim kudam aaremabe enggalfe, nei gemer negama gunurum kudana jeiserem gemer gam eyebif, ane nei kudana jeiserem jamer ganma nornortaasfele nei gemer negama gunurum jewer sofwefe.
4Gamjon atdusa domol. Atdusa jeiserem safe unggwandusa, deye unggwanfersus ga je gwirinfele, ane naarema safe bastouya atdusa jeiserem ga jei gam nornorulsfele. Ane atdusa jeiserem ga gam sofwa angtane naarema aa jei gam taabilirim aa gemer gam gunurum.
5Maflama nemna ga gam jes gamserem. Bunar-bunarsus maflama nemna safe bastantowaisusu, safe gala, ula unggwandusa ba jener gam nasbili. Sa domol, tokwana safe bastantouya, kakatargiri sasana ba jener gam dutana.
6Maflama ga tokwana galserem. Tifni nemnaiserem jebe, maflama ga etam-etama kapka jei gam nasbili, ane kapka jeiserem ga gam wofena tifni nemna seyafter gamserem jebe. Ane bawasa ga tokwana afa maflam jener gam forsona jamer ertefe, ane ini nemna ga nes gam kabwaktabaipmini, ane gwela nemna seyafter nes gangge kabwaksweipmini.
7Seyafter ogiribe aa jei ge wofobilirim, junu seyafter, twen mese, ane jigala seyafter, seyafter jeiserem angtane samfer gane tainbili ofofe, ane fwater mesane tainbil.
8Jengga angtane afa fasfasus maflama jemna waakenfer jam gerebaasnenefe. Maflama kakalsusu, ane angtane maflama fas jam ne gerebaasneneyen. Jei beraakini galserem angtane gam tere.
9Maflama nemnaiserem ga enggalf Uwa Sanbagiri nejema balf enggame, "Ase samfer golmini." Ane maflama jeiserem jeme angtane jem negama babapsobana, angtane Uwa Sanbagiri aa jes eyebaabilirim numu Jemna galserem.
10Maflama nemna ga daamfenna, ane maflama jeiserem jeme taterisi waakena yo kapka ga jem negma nasbabili. Am afelen mesna, jes gamserem nepsama eyebilirim!
11Fo mwona afa ke jere aa jei sosetyaram fona waakena ane fona finibere, fo mwona daamfenna jeiserem jewer?
12Am afelen mesna, ti gatara jam teyan eremufe; ane gwili jam teyan gatarfe. Fo mwona finibereiserem je fona waakenaiserem jewer jam totinyen. Ane maflama imnaiserem jei ga gam, taterisi kapka yo waakena jeme ijama nasbabiyen.
13Afa aamei tousaiserem jam isa taabilirim, galabe aamei ina ijama tetenanayan. Ijama tikweyan waakenfer eyebiliserem jewer, jega angtane gam sege towaswebili enggame tousaiserem jeiserem jei bunar.
14Jengga aamei afa ina jam isa tetenannaram, ane aamei angtane nafsi afa jam igma nasbanaram, gam jega aamei ijama afaf-afafweyan enggam ga igma gunu, "Ai tousaiserem amsa domola."
15Tousaiserem jes galserem je taman waaken-giriwer jam jelyan. Jengga ogiriwer gam etamwena, ini kapka nemnaiserem ga jewer gam jela, ane bawasminiwer gam jela.
16Afa angtane jei jena jam gane detenaram, ane jena jam gane nasminirim, doksol-doksola jes jep gam falaram, ane kapkaiserem jes galserem gala ga jep gane eyebaabili.
17Jengga tousaiserem winsiwer aa jei gam iretyaram, jei bunarsus tabalbalsusu. Afa angtane tousaiserem jam gam domolaram, angtane jeiserem jei angtane nafsiserem jebar waakenfer ga gangge gwena. Jei angtane nafsi gam tagbana. Jei angtane nafsi uskambar gam nesiktababili, ane jei jeber-jeber waakenater gam eyebili. Jei angtane seyafter gemerserem jebe armanaber gam eyeipmini, jei akar-akarem jam eyeipmiyen. Ane jei aa gemer gam gunurum, ga gemer gam gwena.
18Angtane sarabosna aa jei gam taatwebanaram waakenfer jam gwefe, jeiserem ga waaken-waakensusu enggalfe gamjon jem jitefwer seyafter waakenfer gam gwef.