Alkitab Mobile SABDA
[VER] : [BERIK]     [PL]  [PB] 
 <<  Yohanes 12 >> 

1Nunu enam masara Paska nalefe jam falyan, Yesus ane ai tamna Betanyaminiwer ga aya sofwa. Lasarus Yesus aa jes nwensantanantam terewer, jei tamna jeiserem ga jep nwini.

2Jepga angtane tumilgala ga aane eyebaipmini Yesusfe, ane Marta ga jei batobaabili tumilgala ga jei bunulntena mejanabe. Lasarus ane angtane afwer gemerserem jei Yesusfaner seyafter mejanap ga aa ge nwinbitena.

3Jepga Maria ga aa fortya, jei botol ga jes gwirni. Botolap aa je falitonom minyaka wangi narwastu. Minyaka jeiserem ga litera nenennap, jemna ninsini waakensusu, ane jemna hargana unggwanfer. Ane Maria ga minyaka jeiserem Yesusmana tufa jem ga sukusobana, ane nabal safna bwalna jelemana jeiserem jem ga tufa Yesusmana ga gweyimbene. Ane jena jeiserem minyak waaken ninsin tetenem ga fina.

4Jengga Yudas Iskaryot, jeiba daamfenna amniwer angtane Yesus Jei ajeya tikwebaatinennerem, ane jei Yesus aa jei se geraram angtane kapka jem tafnabe, jei enggam ga tenebaabili,

5"Jeje bafa nei minyaka aaiserem nejama jualtababiyen hargana 300 doi perakeme, ane doini jeiserem angtane galgalyenaiserem jep ga negama kitulmini?"

6Yudas jei game aa jewer gutenaram, aam temawer jei angtane komkoma, jeke enggalem temawer jei angtane galgalyenaiserem jes gerebaabisnenefe. Ane jei doini basyamer gam gosortena, doini funawer jei aa jes girnennerem, doini ai angtane dua belas seyafter ajesa orobanaram.

7Jengga Yesus ga aa gutena, "Safnant, wini aaiserem jamfener sa gerabi. Jei aaiserem enggalf eyebili, nunu Ai As jem ne gaataantena tonmwa bitisibe, jei Ap ga As jes menetulbaasini.

8Angtane galgalyenaiserem jei jeber-jeber ibaner ima nwenwena, jengga Ai ibar abakef seyafter nejama nwinweyan."

9Angtane Yahudimana anesus jei enggam jame aa galap ge sarbilirim Yesus Jei Betanyawer, jei jewer ga aa ge sofobili. Jei jewer aa jewer ge sofobilirim jeke enggalfefener Yesus jewer ne damtaf, jengga jei Lasarus mese jewer gam ne damtaf, Lasarus Yesus aa jes nwensantanaram terewer.

10Angtane Yahudimana anesus jei bwembwema Lasarusminibe aa je etamwenantam jei gane towaswebili. Ane jei angtane imam-imam sanbakaiserem jam onsobaabiliserem jewer ne mirtebitefalf, ane jei Yesus ga aane tebana. Jega jem temawer angtane sanbaka imammana jei Lasarus mese gam ne munbof.

11(12:10)

12Jem gwirmer angtane anesusfer ga aa ge forobitye Paska Masara gam ne gwebif, jei enggam ga aa ge sarbili Yesus Jei nelep jam jela kota Yerusalemwer.

13Ane jei jepga garam alna ga aane dasona, jei ga aa ge sofobili enggalfe Yesusfar gam ge dorwebif, ane jei ga aa ge tetenbuwena, "Nei Uwa Sanbagiri ganma pujite! Uwa Sanbagiri waakena Jelemanaiserem gase gulbana Jebe, Angtane aa Jei fortyaram Tuhanem boseme! Uwa Sanbagiri waakenaiserem Raja Israelfe gase gulbana!"

14Yesus Jei jepga keledai tane ga domola, ane Jei jem sagap ga aa juswena, Jei kotanap jem gam kautefe. Jei jeiserem ga enggalf eyebili, jega taterisi gwanan aa jes baatultelam Taterisi Uwa Sanbagirmanaiserem jebe, jeiserem gam etamwef:

15"Aamei angtane kota Siyonmana ijama ereyen! Gasa damta, Raja imnaiserem Jei mes foryal, Jei keledai tane sagap nunnu."

16Seyafter jes galapserem aa galap etamwenaram, ai angtane Yesus Jei ajeya tikwebaatinennerem ai waakenfer ajama towaswebiyen. Jengga Yesus jame aa galap ne gaartetyaram taman waaken-giribe, ai jepga aya sarbistaabona enggame, Taterisi Uwa Sanbagirmana Yesusem temawer mesam tulisul, ane seyafter aa jes tulisulum jem temawer, angtane Jebe mes ne eyeibene.

17Angtane unggwanfer jebe seyafter aa jei ge fibilintim Yesus Lasarusam futunu aa galap jenbenentem terewer jam nwensantafe, ane tonmwa bitisiwer jam totinyefe, angtane unggwanfersus jeiserem jei ga bwembwema jeiserem ga aane nasbinenne.

18Angtane unggwanfer jeiserem jame aa galap ge sarbilirim enggame Yesus Jei bwembwema jeiserem ba Jeyam eyebilint, jei Yesusminip ga aa ge sofobili Jebar gangge dorwebife.

19Jepga angtane safna Farisimana jeiserem jei jena ga aane towas-towasona enggame, "Nei apgal jigala afa nejama eyebiyen angtane jem ge tikwebife Yesus jam ne onsobalawer. Gasa angga, angtane ogiribe seyafter gemerserem, jei Jeter ne tikwebaatini!"

20Angtane unggwanfer kota Yerusalemwer ga aa ge sofobili enggalfe, jei Uwa Sanbagiri gam ne pujitef masara jeiserem jebe. Angtane afweraiserem angtane aa jei ge sofobilirim jemniwer, jei ga angtane Yunanimana.

21Angtane Yunanimana jeiserem jei Filipusminip ga aa ge jalbili, ga aane bala, "Uwa, ai enggam aya gunu, ai Yesusfar ajama dorwef." Filipus jei angtane tamna Betsaidamana, ona Galileyawer, ane jei Yesus mesam tikwebaatini.

22Filipus jewer ga sofwa enggalfe jei taterisi jeiserem Anderyasfe gam nasibef. Ane gamjon ga jei nawersamer ga aa ge sofwa taterisi jeiserem Yesusfe ga aa ge nasibene.

23Jepga Yesus ga aa gitmini, "Nunu Amna ga As mes fibayal enggalfe Uwa Sanbagiri Ai Tane Angtanemana angtaneminibe As jam gwertafe, ane waakensususerem Amnaiserem jes mese.

24Ai isa bunarsusfer nasipmini, afa miru tanna daamfenna afa jam ne tonolyan, gam jega jei jam kokosyan, ane tifni jam butsweyan. Jengga afa angtane jei miru tane jeiserem jam gam tonolaram, alna gam subamitye, ane tifni ga gam butswena, ane gamjon ga gam kokosa, ane jemna igiserem uskambar ga gam tena. Ane Ai ga gam miru tane jes galserem.

25Angtane afa jei gwela jelemana jam gam nesikulu ogiri aaiserem jebe, gwela jemna jeiserem taman waaken-giribe gam asobana. Jengga angtane gwela jelemana uskambar jam nesikulyonaiserem ogiri aaiserem jebe, jei gwela waakena jemna abak-abaksusfer taman waaken-girip aaiserem ga jei gam domola.

26Angtane awelna Amna As jei gam gweyibenerem, jei gwanan Am gam tikwebaatini. Jei Amter gam tikwebaatini, jega tampata Ai Ajep nwinirim jei mese jeme seyafter Abaner ga As ge nwini. Angtane awelna Amna As jei gam gweyibenerem, Uwa Alemanaiserem Jei angtane jeiserem jem temawer enggam gam bala, angtane jeiserem jei waakenaiserem ga jes eyebili."

27Yesus gamjon ga aa gutena enggame, "Ini Amna As jam jenbana. Ai namwer aas jepserem ga bas As biltena? Ai ke enggam As gutena, 'Uwa, As jam Is waakentaasini kapkaiserem jewer.'? Fas, Ai gam Ajam guyon. Jengga Ai nunu aaiserem ga enggalf Ai fortya kapkaiserem jeme Agam domolf.

28Jengga Ai enggam Ai gutena, 'Uwa, Aamei waakensusu unggwandusa Imnaiserem angtanefe gwanan Im gwerauwulmi.'" Ane jepga taterisi taman waaken-giriwer ga aane sarbili, enggam aa jei gutenaram, "Ai waakensusu Alemanaiserem Ai mesam gwerauwulunt, ane Ai gamjon Ajam gwerauwulf."

29Angtane uskambar jep seyafter aa jei ge fibilirim, jei taterisi jeiserem ga aane sarbili, jei ga aa ge gubili enggame, "Jeba iris tersam." Jengga afweraiserem jei enggam ge gubili, "Jeiserem jeiba malaikata Yesusfar aa jei ge nasowenaram."

30Jepga Yesus Jei ga as balbabili, "Taterisi nei nejesa sarbilirim, jeiserem gam ke Ai As gam batobaf, jengga aamei is jei batobaabif.

31Namwer ga nunu jebe ga mes fala angtane ogiri aaiserem jebe aa jei ge nwinbenerem gam tamtamtababife. Ane namwer ga bawasa ogiri aaiserem aa jem saaser falaram ga jei gase surbono.

32Afa Ai As jam sene gaartenaram ti salibibaner ogiri aaiserem jem sagabe, Ai jepga angtane seyafter gemerserem ga As dupdupbulsini Aleminibe."

33Yesus Jei game aa jewer gutanaram, Jei enggam ga jem gweraulmini Jei se tere ti salibibe.

34Angtane uskambar jep gemerserem jei ga Yesus ga aane bala, "Taterisi Uwa Sanbagirmana jep ga enggam baatultel, Mesias, Angtane Uwa Sanbagiri bunarsus aa Jes balam Jam baftanafe, Jei jamer se gwena nunu abak-abaksus. Aamei Ibaf gutena enggame Tane Angtanemanaiserem Jei ti salibibaner sene gaartena ogiri aaiserem jem sagabe? Tane Angtanemana jeiserem Jei ga nansa?"

35Yesus ga aa tamawolbaabili, "Nafa je nomkef im tarnabe. Gasa wofwe nele ilemanaiserem jebe nafa jeiserem aa gemer falaram, gwini nalefe jam jelyan. Angtane gwinibe aa jei gam wofenaram, jei teisyena jei fomfom gam sofwa.

36Aamei Angtane nafa aa jei gularam, Angtane jeiserem ga jamer isa tebana, Angtane nafa aa jei gularam Jei ibar aas galapserem. Jei sa teba, jega aamei Angtane nafa aa jei gularam Jem tanefe gam isa gwena."

37Yesus Jei safe bwembwema uskambar eyebuwenant jem nwenabe, jengga jei gemerje jei Yesus jam ne tebayan.

38Seyafter jeiserem gam mes etamwena, jega taterisi Nabi Yesaya aa jes nasbilim, gase etamwena: "Tuhan, taterisi nemnaiserem ga nan mese sene taabili? Baabeta Tuhanmanaiserem ga nan mese sene domola?"

39Angtane jeiserem jei jam ne taabiyen, aam temawer Nabi Yesaya jei enggam bil:

40"Uwa Sanbagiri Jei ga enggam gul: 'Ai nwena jemna As koftabaipmisini, jega jei jam ge anggabisiyen. Ane Ai ini jemna As kekeletabaipmisini, jega jei waakenfer jam ge towaswebiyen. Ai gam Ajewer gwebabilirim, jega jei gamjon Amnibe jam ge waraubifelyen, ane Ai jei ga As waakentababisini.'"

41Yesaya jei game aa jewer gulum, jei ga aam temawer gul jei Yesusmana waakena unggwandusaiserem jei mesam domolbana, ane jei ga Jem temawer nasowena.

42Angtane sanbaka unggwanfer angtane Yahudimanaiserem jemniwer jei Yesus mes ne tebana. Jengga jei enggam jam ge gubiyen, "Nei Yesus nemsa tebana.", aam temawer jei angtane Farisimanaiserem ga jes ne erebaabili. Afa angtane safna Farisimana jam sege towaswebilirim angtane jei Yesus mes ne tebana, jei galap sege gubili enggame, "Aamei jena angtane Yahudimana aa jep ge betwebuwefaram jep ijama kauteyan."

43Angtane safna Farisimana jeiserem, ini jemna saaser-saaserfer ga enggalf ge folbamini afa angtane enggam jam sege gubilirim, "Angtane safna Farisimana jei angtane waaken." Ini jemna unggwan-girfer jam ge folbamiyen taterisi Uwa Sanbagirminiwer jam sarbife enggame, "Aamei waaken."

44Jepga Yesus uskambar ga aa gutena, "Angtane Ams tebalaiserem, jei ke enggam Am tefner gam tebana, jengga Uwa mese Jes gam tebana Ai As Jei baftannuntum.

45Ane angtane Ams damtalaiserem, jeime Uwa gam damtana Ai As Jei baftannuntum.

46Ai ogiri aaiserem jebe enggalf Ai fortya Aiba nafa gamserem, jega angtane Ams tebalaiserem jei gwinibe jam ge nwinbeyen.

47Angtane taterisi Amnaiserem aa jei saribenerem, jengga jei jam tikwebaatiyeneye, Ai angtane jeiserem Ajam tenebaweyan. Ai ke aam temawer Ai jela angtane ogiri aaiserem jebe aa jei ge nwinbenerem Agam tenebaabuwef, jengga Ai angtane ogirip aaiserem jei Agam waakentababisif.

48Angtane afa baife Ai As jei gwebanaram, ane jam eyebiyen Ai jesa gam bilibenerem, nunu umwef jepserem jei tamtamtala gase domolsa. Taterisi Ai Ajes nasipminirim, nunu umwef jepserem taterisi jeiserem angtane ga jese tamtamtasa.

49Ai Ajam nasoweyan baabeta Alemanaiserem jemfener, jengga Uwa Ai As Jei baftannuntum, Jei ga Ams bala seyafter Ai ibe isa Ajes nasipmife.

50Ane Ai Amsam towaswena enggame, taterisi jeiserem afa jam taabiliye, gam jega taterisi jeiserem angtane jeiserem gase aftabifele waakenfer gwelaiserem jamer abak-abaksusu jebe. Uwa Sanbagiri Jei Abe Ase gemer nasibenentem, Ai ga ibe isa gemer nasipmini."


  Share Facebook  |  Share Twitter

 <<  Yohanes 12 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran