Dual Panel1Mattette’nana Daud ri saorajana, riséuwaé esso naobbini Nabi Natan namakkeda, "Itai, iyya’é monroka ri saoraja iya riyébbué polé ri aju camara Libanongngé, na Petti Assijancinna PUWANGNGE banna ri laleng kémaé!"
2Nappébali Natan, "Pogau’ni sininna niya’na Datu saba’ Allataala tulungngi Datu."
3Iyakiya iyaro wennié makkedai Allataala lao ri Natan,
4"Laono sibawa palettukengngi atak-Ku Daud pasengngéwé, ‘Tenniya iko patettongek-Ka matu bolaé.
5Sipongenna Upaleppe bangsa Israélié polé ri Maséré lettu makkekkuwangngé, dé’pa naengka Uwonro ri laleng séddié bola. Tuli sollé-Ka sibawa monro riséddié kéma.
6Sipongek-Ku sollé silaong bangsa Israélié dé’pa naengka Umakkutana ri pamimping-pamimping iya puraé Upilé, aga saba’na nadé’ mennang napatettongek-Ka séddi bola polé ri aju camara Libanongngé.’
7Rimakkuwannanaro, Natan, powadanni atak-Ku Daud makkedaé Iyya, PUWANG Iya Pommakuwasaé, makkeda lao ri aléna, ‘Purano uwala polé ri jama-jamammu makkampi bimbala’é ri padangngé, sibawa Upancaji arung ri umma’-Ku Israélié.
8Purano utulung kégi-kégiko lao, sibawa sininna balimmu Upaccappui wettummu mammusu. Uwébbuko matu tarompo pada-pada sining pamimping iya kaminang battowaé ri linoé.
9Untu’ umma’-Ku Israélié purani Upassadiyangeng onrong untu’ mancaji wanuwanna kuwammengngi naulléi tuwo tennang tenrigangguna. Sipongeng apolénna mennang ri tanaéwé riyolo, sibawa dé’napa mennang nappunnai arung, rigasai mennang risining tau iya pojiyéngngi ateddekengngé. Iyakiya iyaro gau’é dé’na nakajajiyanna matu. Majjanci-Ka maélo caui sininna balimmu, sibawa maélo-Ka mpérékko wija-wija.
10(17:9)
11Matti, rékko narapini ajjalemmu sibawa rikuburu’ko ri tampunna toriloyomu, séddi polé ri ana’ worowanému Uwakka matu mancaji arung. Aléna ritu matu patettongek-Ka bola. Upakkasse’i matu akkarungenna, sibawa untu’ mannennungeng séddi polé ri wija-wijanna mapparéntai matu selaku arung.
12(17:11)
13Maélo-Ka mancaji ambo’na na aléna mancajiwi matu ana’ worowané-Ku. Maélo-Ka tette pogau’i makessingngé lao ri aléna situru sibawa jancik-Ku. Jancik-Ku ri aléna tette’i Uwakkatenning, dé’ napada iya Upogau’é lao ri Saul iya puraé Upaésa polé ri tudangenna kuwammengngi weddikko mancaji arung.
14Ana’ worowanému iya Upiléro upancajiwi matu arung ri umma’-Ku sibawa akkarungek-Ku untu’ mannennungeng, sibawa ana’ eppona massossoreng mapparéntai matu selaku arung.’"
15Natan paissengiwi Daud sininna iya puraé napannessa Allataala ri aléna.
16Nanauttama’na Arung Daud ri Kémana PUWANGNGE. Tudanni sibawa massempajang, "Oh PUWANG Allataala, iyya sibawa kaluwargaku, dé’ nasitinaja tarimai sininna akessingeng iya Muwajjellokengngé ri iyya iya labe’éwé.
17Mala Mupogau’i lebbi naiyaro; purano mébbu janci passalenna wija-wijakku untu’ wettu mangoloé. Mala Mugaukekka selaku séddi tau maraja.
18Agapi wedding upowada lao ri iko, oh PUWANG Allataala? Muwisseng manengngi passalenna atam-Mué, namuni mabbéréko pappakalebbi lao ri iyya.
19Nasaba élo-Mu muto sibawa untu’ apentingekku Mupogau’i sininna pangkaukeng battowaéwé sibawa mannessa-nessa.
20Banna Iko bawang Allataala, dé’ gaga iya padaé sibawa Iko. Riissengngi gau’éro saba’ pura riyappaissengengngi riyolopa nariyolo.
21Ri sininna linoé dé’ gaga bangsa pada-pada Israél. Israél iyanaritu alé-aléna bangsa iya Mupaleppe’é polé ri angatangengngé untu’ mancaji umma’-Mu muto. Sininna pangkaukeng battowaé namakalallaing iya Mupogau’é lao ri mennang mébbui asem-Mu tarompo ri sininna linoé. Mupaleppe’i umma’-Mu polé ri Maséré, sibawa panyingkiri’i bangsa-bangsa laingngé wettunna maju umma’-Mu mammusu.
22Purani Mupancaji bangsa Israélié umma muto untu’ mannennungeng. Na Iko, oh PUWANG, mancaji Allataalana mennang.
23Makkekkuwangngé oh PUWANG Allataala, tapakkasse’ni untu’ mannennungeng janci iya Mupowadaé passalenna aléku sibawa wija-wijakku. Tapogau’ni aga iya puraé Muwajjanciyanro.
24Kégi-kégi tuli napakarajai matu tauwé asem-Mu sibawa makkeda, ‘PUWANG Iya Pommakuwasaé iyanaritu Allataala ri Israélié.’ Untu’ mannennungeng séddi polé ri wija-wijakku mapparéntai matu selaku arung.
25Baranika paénré’i iyaé sempajangngé lao ri Idi, oh Allataala, saba’ Idi muto pura mappaissengengngi lao ri iyya makkedaé ana’ eppoku massossoreng Mupancajiwi matu arung ri bangsaéwé.
26Idi, PUWANG, iyanaritu Allataala, na gau’ iya magelloéro puraka Mujanciyang.
27Rimakkuwannanaro, uwéllauwi, tabarakkakini wija-wijakku kuwammengngi namannennungeng tette’i narasa pammasému. Saba’ Idi pura barakkakiwi umma’-Mu, oh PUWANG, natette matu mennang ribarakkaki untu’ mannennungeng."