Dual Panel1Urusang apparéntanna akkarungeng Israélié riyatoro’i ri kapala-kapala kaluwargaé, sining pamimping appangngé sibawa sining parawiraé. Tungke’ taung siuleng ittana engka séddi kalompo iya majjamaé secara makkaléléng ri yawa pappimpinna séddi kapala. Tungke’-tungke’ kalompo 24.000 tau. Iyanaé asenna sining kapala kalompo iya majjamaé untu’ tungke uleng: Uleng mammulangngé: Yasobam ana’ Zabdiél (anggotanai appang Pérés suku Yéhuda). Uleng maduwaé: Dodai, wija-wijanna Ahohi. Wakkélé’na iyanaritu Miklot. Uleng matellué: Bénaya ana’ Imang Yoyada; pamimpinnai "Kalompo Telluppuloé Parawira" (wakkélé’na iyanaritu Amizabad ana’na). Uleng maeppaé: Asaél silessurenna Yoab (passulléna iyanaritu Zébaja, ana’na). Uleng malimaé: Samhut, wija-wijanna Yizrah. Uleng maennengngé: Ira ana’ Ikes, polé ri kota Tékoa. Uleng mapitué: Héles, wija-wijanna Efraim polé ri kota Péloni. Uleng maaruwaé: Sibkhai polé ri kota Husa (anggotanai appang Zérah, suku Yéhuda). Uleng maaséraé: Abiézer polé ri kota Anatot ri daérana suku Bényamin. Uleng maseppuloé: Maharai, wija-wijanna Zérah polé ri kota Nétofa. Uleng maseppuloé séddi: Bénaya polé ri kota Piraton ri daérana suku Efraim. Uleng maseppuloé duwa: Héldai wija-wijanna Otniél polé ri kota Nétofa.
2(27:1)
3(27:1)
4(27:1)
5(27:1)
6(27:1)
7(27:1)
8(27:1)
9(27:1)
10(27:1)
11(27:1)
12(27:1)
13(27:1)
14(27:1)
15(27:1)
16Iyanaé daftar asenna kapala sukué ri laleng bangsa Israélié: Suku ~~ Kapalana; Rubén ~~ Eliézer ana’ Zikhri; Siméon ~~ Séfaca ana’ Maakha; Léwi ~~ Hasabya ana’ Kémuél; Harun ~~ Zadok; Yéhuda ~~ Elihu, sala séddinna silessurenna Arung Daud; Isakhar ~~ Omri ana’ Mikhaél; Zébulon ~~ Yismaya ana’ Obaja; Naftali ~~ Yérimot ana’ Azriél; Efraim ~~ Hoséa ana’ Azarya; Manasyé ri seddé yajanna Salo Yordan ~~ Yoél ana’ Pédaya; Manasyé ri seddé alauna Salo Yordan ~~ Yido ana’ Zakharia; Bényamin ~~ Yaasiél ana’ Abnér; Dan ~~ Azareel ana’ Yéroham;
17(27:16)
18(27:16)
19(27:16)
20(27:16)
21(27:16)
22(27:16)
23Dé’ nabilangngi Arung Daud sining tau iya makkéumuru’é ri yawana 20 taung, saba’ PUWANGNGE pura majjanci maélo mébbui tau Israélié singngéga wéttowingngé ri langié.
24Mappammulani Yoab ana’ Zéruya mabbilang, iyakiya dé’ napappuraiwi, saba’ Allataala hukkungngi tau Israélié, nasaba iyaro abbilangengngé. Iyanaro saba’na jumellana mennang dé’ nataroki ri laleng kitta’na Arung Daud.
25Iyanaé daftar asenna sining pangurusu’na waramparanna arungngé: Sining gudangngé ri saorajaé sibawa ri Yérusalém: Azmawét ana’ Adiél Sining gudang risaliwenna Yérusalém: Yonatan ana’ Uzia Pajjama-jama dare’é: Ezri ana’ Kélub Sining palla anggoro’é: Siméi polé ri kota Rama Onrong-ngonrong attarong anggoro’é: Zabdi polé ri kota Syifmi Pong zaitungngé sibawa pong araé (ri ponna bulué seddé yajang): Baal-Hanan polé ri kota Gédéri Onrong-ngonrong attarong minnya zaitungngé: Yoas Olokolo’é ri padang Saron: Sitrai polé ri kota Saron Olokolo’é risining lompo’é: Safat ana’ Adlai Untaé: Obil wijanna Ismaél Kaleddé’é: Yéhdéya polé ri kota Méronot Bimbala’é sibawa bémbé’é: Yazis, tau Hagrié.
26(27:25)
27(27:25)
28(27:25)
29(27:25)
30(27:25)
31(27:25)
32Amuréna Arung Daud iya riyasengngé Yonatan, iyanaritu séddiwi pappangaja iya maccaé sibawa matanré aggurunna. Aléna sibawa Yéhiél ana’ Hakmoni riwéréng tanggung jawa’ lao ri pendidikanna ana’-ana’ worowanéna arungngé.
33Ahitofel iyanaritu pappangaja arungngé sibawa Husai tau Arkié, iyanaritu pappangaja sibawa sellao maréppé’na arungngé.
34Maténana Ahitofel, risulléiwi ri Abyatar sibawa Yoyada ana’ Bénaya. Pallima tentarana akkarungengngé iyanaritu Yoab.