Dual Panel1Saudara-saudara jema’é ri Tésalonika, iya mancajiyé umma’na Allataala Ambo’é sibawa Puwang Yésus Kristus. Idi, iyanaritu Paulus, Silas sibawa Timotius mamménasa tennapodo Allataala mabbéré barakka sibawa asaléwangeng lao ri iko.
2Tuli sukkuru’ki lao ri Allataala nasaba Saudara maneng. Tungke’ massempajakki lao ri Allataala sibawa Ambo’ta tuli riyéngngerakko. Tuli riyassempayangekko. Maréngngerakki pekkugiko mappaitangngi ri laleng pangkaukeng makkedaé mateppe’ko lao ri Kristus, pékkugiko mamaséiwi tau laingngé angkanna tumaningiwi mennang, sibawa pékkugiko maddennuwang masse lao ri Puwatta Yésus Kristus.
3(1:2)
4Riisseng idi Saudara-saudara, makkedaé Allataala mamaséiko, sibawa pura piléko mancaji appunnangen-Na iya mallaingngé.
5Saba’ idi palettu’i Karéba Madécéngngé lao ri iko tenniya sibawa ada-ada bawang, iyakiya nasibawatto akuwasang, nasibawang Rohna Allataala. Nasibawang ateppereng makkedaé iyaro Karéba Madécéngngé tongengngi. Muwisseng pékkugiki tuwo untu’ apentingemmu wettutta engka ri tengnga-tengngamu.
6Muwaccowériwi kédo-kédota sibawa kédo-kédona Puwangngé. Namuni manrasa-rasa senna’ko, mutarimai sibawa marennu karéba iya riyabbirittangngé lao ri iko. Iyaro arennungngé nabbéréyangngi Rohna Allataala.
7Nallalengiro mancaji contoko untu’ sininna tau Kristéngngé iya engkaé ri Makedonia sibawa Akhaya.
8Saba’ mappammulai polé ri iko, biritta passalenna Puwangngé mallebbanni lettu ri Makedonia sibawa Akhaya. Na tenniya iyaro bawang, mala biritta passalenna pékkugiko mateppe’ lao ri Allataala lettu’ni kégi-kégi, angkanna dé’na taparelluna powadai agi-agi.
9Sininna iyaro tauwé mabbicarai passalenna pékkugiko tarimaki wettutta riyolo lao ri iko. Mabbicarai mennang passalenna pékkugiko salaiwi barahala-barahalaé, sibawa lao ri séddi-séddinna Allataala iya tuwoé untu’ mattumani ri Aléna.
10Mabbicara towi mennang passalenna pékkugiko mamménasaiwi apolénna Ana’na Allataala polé ri surugaé, iyanaritu Yésus, iya puraé napatuwo Allataala polé ri amaténgngé. Yésus éttonaro iya passalamaékki polé ri caina Allataala iya mangoloé.