Dual Panel1Wija-wijanna Saul iya laingngé iyanaritu Méfibosét, ana’worowanéna Yonatan. Képpangngi sipongenna makkéumuru limattaung, iyanaritu wettunna Saul sibawa Yonatan maté. Saba’ wettunna karéba passalenna amaténna mennang lettu polé ri kota Yizreel, indo’ pasusunna Méfibosét mépa’i nalari; iyakiya nasaba iyaro makkunraié mapperi-peri senna’i, mabuwangngi iyaro ana’é angkanna mancaji képpang. Wettunna Isybosét ana’worowanéna Saul méngkalingai makkedaé riyunoi Abnér ri Hébron, teddénni sumange’na, sibawa métauni sininna bangsa Israélié. Isybosét mappunnaiwi duwa tau parawira iya mancajiyé kapala pasukang paggasa; iya séddié riyaseng Baana, iya séddiéssi riyaseng Rékhab. Ana’nai mennang Rimon, polé ri Beerot suku Bényamin. (Beerot ribilangngi daéra Bényamin. Pabbanuwa aslinna larini lao ri Gitaim nanaonro kuwaro mappammulai wettuéro.)
2(4:1)
3(4:1)
4(4:1)
5Iya duwa tau parawiraéro, iyanaritu Rékhab sibawa Baana joppani lao ri bolana Isybosét nalettu kuwaro ti tangassoé, wettunna matinro esso Isybosét.
6Makkunrai panganrowang bolaé cakkaruddui wettunna pépaccingiwi gandongngé, namatinro. Rimakkuwannanaro Rékhab sibawa Baana naulléi muttama.
7Matteruni mennang muttama ri bili’ atinrong iya naonroiyé Isybosét matinro memme, nanagajangngi gangka maté. Narette’ni mennang ulunna nanatiwii lao. Puppu benni mennang joppa molai Lompo Yordan.
8Nainappa mennang nabbéréyang ulunna Isybosét lao ri Daud ri Hébron nakkedato, "Iyanaé ulunna Isybosét ana’na Saul, balinna Datu iya makkuragaé maélo mpunoi Datu. Iyaé essoé PUWANGNGE pura mpale’i pangkaukenna Saul sibawa wija-wijanna lao ri Datu."
9Iyakiya mappébaliwi Daud, "PUWANG iya tuwoé, iya puraé passalama’ka polé ri sininna abalaé, naisseng makkedaé iya maéloéwé upowada tongeng.
10Wettunna ri Ziklag engka tau powadakka passalenna amaténna Saul, nasengngi aléna tiwii karéba madécéng. Iyakiya utikkengngi sibawa uwunoi. Iyanaro saro uwéréngngi selaku pamale’na lao ri karéba iya natiwié.
11Temmaka lebbi tane’na pasi pahukkungeng iya maéloé upakennaiwi tau maja iya puraé mpunoi tau iya dé’é napasala sibawa iya matinroé ri bolana muto! Makkekkuwangngé utuntu’i pamale’na ri iko nasaba abbunowangngéro, enrengngé pallennye’ko polé ri yasé’na linoéwé!"
12Purairo napparéntanni Daud ri ana’ buwana untu’ mpunoi Rékhab sibawa Baana. Puranana riyuno, rirette’ni limanna sibawa ajéna mennang narigattung ri seddé kolangngé. Iyakiya ulunna Isybosét riyalani narikuburu ri kotaéro ri laleng kuburu’na Abnér.