Dual Panel1Siyagangngaré wettu ri munrinna naakkani Arung Ahasywéros séddi tau riyasengngé Haman mancaji perdana menteri. Haman iyanaritu ana’na Hamédata polé ri wija-wijanna Agag.
2Napparéntanni arungngé lao ri sininna pegawénna kuwammengngi napakarajai Haman sibawa suju’ ri yolona. Naturusi manenni iyaro paréntaé, sangadinna Mordékhai.
3Makkutanani pegawé-pegawé laingngé ri saorajaé magi najjalékkaiwi paréntana arungngé,
4na esso-esso mennang dessa’i kuwammengngi naturu bawang, iyakiya dé’ namaélo méngkalingai. Adanna, "Iyya tau Yahudika; dé’ naweddikka suju’ lao ri tolinoé." Nainappa nalaporo gau’éro lao ri Haman nasaba macinnai missengngi tindakang aga nala matu lao ri Mordékhai.
5Macai senna’ni Haman wettunna naisseng makkedaé dé’ namaélo Mordékhai suju’ lao ri aléna.
6Na wettunna naisseng makkedaé Mordékhai séddiwi tau Yahudi, malani apettung untu’ hukkungngi Mordékhai sibawa tenniya aléna bawang, sangadinna maélo towi paccappui sininna bangsa Yahudié ri akkarungeng Persia.
7Ri taung maseppuloé duwa apparéntanna Arung Ahasywéros, ri uleng séddinna, iyanaritu uleng Nisan, nasuroni Haman mundiwi iya riyasengngé "purim" untu’ missengngi esso sibawa uleng kégaénna coco untu’ pajoppai niya’na iya majaéro. Na ripattette’na tanggala seppulo tellu uleng seppulo duwa, iyanaritu uleng Adar.
8Namakkeda Haman lao ri arungngé, "Datu, engka séddi bangsa makalallaing iya tattale’é ri tungke propinsi akkarungengngéwé. Ade abiyasanna silaingeng senna sibawa bangsa-bangsa laingngé. Dé’ mennang naturusiwi hukkung-hukkunna akkarungengngé. Jaji, makessingengngi Datu aja’ naleppessangngi mennang pogau’i siélo-élo atinna.
9Rékko dé’ nappotane Datu, sitinajai ripassu sure’ paréntaé untu’ paccappui mennang. Narékko maéloi Datu tarimai tangngana atatta, pasti naulléi matu atatta puttama 340.000 kilo péra’ ri laleng kasna Datu."
10Naéngkalinganaro, naludunni arungngé ciccing iya napaké ri jarinna untu’ ca’i sining pappallebbangeng résmié, nainappa nawéréng Haman, bali loppona bangsa Yahudié.
11Nakkeda arungngé lao ri aléna, "Iyaro bangsaé sibawa topa dowina uwérékko. Pogau’ni aga iya muwitaé makessing lao ri mennang."
12Na ri tanggala seppulona tellu uleng séddi, naobbini Haman sining jurutulisi’na arungngé. Risuroni mennang moki sure’ situru sibawa sininna iya riparéntangngéngngi, nainappa iyaro sure’é ribettuwangi ri laleng sininna basaé sibawa rilémba ri laleng sininna oki iya ripaké ri akkarungengngéro. Iyaro sure’é riyokii ri laleng asenna Arung Ahasywéros sibawa rica’ sibawa ciccinna, nainappa nakiring masitta lao risining panguwasaé, gubernur-é sibawa tomarajaé ri sininna propinsié. Lise’na iyanaritu parénta makkedaé ri tanggala seppulona tellu uleng Adar, sininna bangsa Yahudié, muwi macowa iyaré’ga malolo, muwi makkunrai iyaré’ga ana’-ana’, harusu’i riyuno temmaddampeng, sibawa rirappai waramparanna mennang.
13(3:12)
14Iyaro paréntaé harusu’i riyappallebbangeng ri tungke’ propinsié kuwammengngi na tungke’ tauwé sadiyani ri esso iya puraé ripattenturo.
15Masitta’ni joppa sining torisuroé mantara’i iyaro sure’-sure’é lao ri sininna akkarungengngé. Nasaba surona arungngé, riyappallebbangeng toni iyaro paréntaé ri Susan, ibukotana Persia. Purairo tudat-tudanni arungngé sibawa Haman ménung anggoro, iyakiya kota Susan tassélenni nasaba karébaéro.