Dual Panel1Mpatarruhmi kadan-Na Puang Isa lako kapala imang, guru agama sola pekaamberan to-Yahudi mpake pangpasusian nakua, "Den mesa' tau ntananni anggoro' bara'bahna. Narompoi mengguririkkina, nakali kalo'bong pangparran anggoro', nakabua' too korang la dinii mangngampa. Mangkai joo, napangpenduluanmi joo bara'bah anggoro' lako ba'tu pira-pira tomendulu, anna male lako tondok laen.
2Ia tonna wattu peanggorosanmo, nasuami to mesa' kaunanna male la nnalanni to tawana.
3Apa ia tonna ratumo lako, najokkori tomendulu, narambii, namane' ssuai pole mangpala' lo'bang.
4Nadadu' omi joo ampu bara'bah, ssua pole' mesa' kaunanna. Apa te'da bang una naangga'i susi to jolona, iamo joo nasipa'tongngii.
5Nasua pole' unapa to mesa' kaunanna. Ia joo to disua pole', nabuno unai. Susi tarruh joo napugauk lako to tonasua ampu bara'bah. Den to napakario-rio na den too nabuno.
6Indapa to la nasua tee too? Mesa'mora, ia mandamo to anak gaja napakamoja'. Jaji, mangkatampakanna, anakkanami nasua male la nnalanni to tawana. Mangkadai lan penawanna nakua, 'La nakasiri' ia to anakkaku'.'
7Apa sipangkada-kadami joo tomendulu nakua, 'Inde'mi pale' to la mpumanahhi tee bara'bah. Tabunoi, antaala ngasanni tee manahna.'
8Najokkomi, nabunoi. Ia to batang rabukkuna napembuanganni lan mai joo bara'bah."
9Ia tonna mangkamo joo, mekutanami Puang Isa nakua, "Apara la nagaukanni ampu bara'bah tuu lako tomendulu? La ratui mbuno ngasanni joo tomendulu, namane' mpangpenduluanni joo bara'bahna lako tolaen.
10Tantu denmo mibacai tee aya' lan Sura' Allataala to mpauna' kumua, 'Ia to batu naca'bean pande bola, menjajimo batu ariri petuo.
11Iamo tee panggaukan-Na Puang Allataala, to kaminang melo.'"
12Ia tonna sa'dingmi pekaamberan to-Yahudi joo pangpasusian napau Puang Isa, naissen kumua, ia napapatui joo kadan-Na. Iamo joo napangngattaimi la njokkoi to Puang Isa apa malaja'i lako tobuda. Iamo joo napada male mpemboko'i.
13Den ba'tu pira-pira to-Farisi sola taunna Raja Herodes nasua pekaamberan to-Yahudi male mekutana la silecco kada Puang Isa ke wa'dingngi naden lalan nanii mpasalai.
14Ratumi ngkutanai nakua, "Oo Guru, kiissen kumua maruruhki' mpangpangngajaran pakkaeloran-Na Puang Allataala lako tobuda, nasaba' te'da tau tapasilaenan. Iamo joo la mekutanakan, 'Ianna situru' atoran agamanta', wa'dingriki'ka mbajah sima lako Tomaraja Roma, ba'tu te'daraka?'"
15Apa naissen Puang Isa to lan penawanna joo tomekutana. Iamo joo nakuanni, "Ciapari micobana'? Pakitanna' to doi' dinar."
16Nabenmi doi' dinar. Mekutanami Puang Isa nakua, "Indara sipugambara' sola sipusanga tee?" Mebalimi nakua, "Tomaraja Roma."
17Nakuamo Puang Isa, "Ia ke susii tuu, benni Tomaraja to apanna, miben tooi Puang Allataala to apan-Na!" Jangngah ngasanni ssa'dingngi joo pebalin-Na Puang Isa.
18Mangkai joo, ratumi to ba'tu pira-pira to-Saduki lako Puang Isa. Ia joo to-Saduki te'da nakatappa'i to katuoan pole' jio mai kamatean. Nakuamo,
19"Oo Guru, mangka napangpangngajaran Nabi Musa susi tee: Ia ke matei to muane, na te'dapa anakkana joo bainena, la nasulle allonanni adinna, dikua napajajianni bati'.
20Nasaba' denni pitu muane massile'to. Ia to pamungah kebainemi, apa te'dapa anakkana, namatemo.
21Napubainemi adinna joo bainena. Apa te'da todapa anakkana, namate todami. Susi todami jaji lako adi mangpenduanna,
22ratu lako adi tampakkana. Pitumi nasibalian joo baine namate ngasan toomi, apa te'da bangngi to sijajian bati'. Mangkatampakanna mate todami joo baine.
23Ia ke dipatuo pole'mi to tomate, indannamira la sibali tarruh joo baine? Nasaba' mangka ngasanmi sibali."
24Napebalimi Puang Isa nakua, "Oo massala pahang kamu', sanga te'da miissen tonganni to apa diuki' lan Sura' Allataala, na te'da too mipahangngi to kuasan-Na Puang Allataala.
25Ianna tuo pole'mo to tau jio mai kamatean, te'damo ia tokebaine-kemuane, apa la tuomi susi malaeka' jao suruga.
26Na buttinna kumua ia to tomate dipatuo pole', tantu mibacamo to apa diuki' lan sura'na Nabi Musa, to mpaui to pangngala-ala duri dukku! Nakua Puang Allataala lako Nabi Musa, 'Aku'mo Puang Allataala to nasompa Nabi Ibrahim, Ishak na Yakub.'
27Totuora to ssompa Puang Allataala, tangngia tomate! Sala pahang ngasan kamu'."
28Den guru agama jio ssa'dingngi tonna sipangkada Puang Isa sola joo to-Saduki. Ia tonna kitami kumua tongan to pebalin-Na Puang Isa, malemi lako ngkutanai nakua, "Oo Guru, umbonnara joo parenta-Na Puang Allataala to kaminang parallu?"
29Mebalimi Puang Isa nakua, "Ia joo parenta-Na Puang Allataala to kaminang parallu susi tee: 'Ee to-Israel, pesa'dingngii! Mesa'ra to Puangta' Puang Allataala.
30La mupakamoja' tongan to Puangmu Puang Allataala, situru' canning atimmu, sininna kapaissenanmu na sininna kapakulleanmu ratu lako ssalaimmu lino.'
31Na parenta mangpenduanna, 'Pakamoja'i to padammu rupa tau, susi iko mpakamoja' kalemu.' Te'damo parenta laenna to njaonannii joo dua parenta."
32Nakua joo guru agama lako Puang Isa, "Oo Guru, tongan! Tongan to tapau kumua, mesa'ra to Puang Allataala, te'damo laenna.
33Jaji, ia to tau la mpakamoja' Puang Allataala situru' sininna kamadoanganna, sininna kapaissenanna na sininna kapakulleanna. Na la mpakamoja' too padanna rupa tau, susi ia mpakamoja' kalena. Ia joo la'bi melo, na ia to mpangkaroban apa ditunu na karoba laen lako Puang Allataala."
34Ia tonna sa'dingmi Puang Isa kumua gaja melomo to pebalinna, nakuanmi, "Ee, ci'di'mora mumenjaji umma'-Na Puang Allataala." Mangkai joo, moi mesa' tau te'damo barani ngkutanaii.
35Ia tonna mangngajahhi Puang Isa lan Bola Puang Allataala, mekutanami nakua, "Matumbai nasangai guru agama kumua, ia to Raja Mangpasalama' bati'na Raja Daud?
36Na pangpatujun-Na Roh Allataala na Raja Daud kalena mangkada nakua: Nakua Puang Allataala mangkada lako Puangku', 'Cumadokkoko ntee sa'de kanan-Ku', angkupupentalo ngasanni to ewalim-Mu mukuasaii.'
37Jaji ia ke Raja Daud mpekapuangngii joo Raja Mangpasalama', matumbai nalabati'na Raja Daud?" Ia to tobuda lan Bola Puang Allataala masannangngi ssa'ding Puang Isa mangngajahhi.
38Nakuanmi Puang Isa, "Majaga kamu' lako guru agama! Nakabudai bang male lumingka mangbaju lando tandana kumua todikasiri', namadoang bang ditaratte' jio pasa'.
39Gaja nakabudai cumadokko jio olo lan bola passambajangan sola ngenan kata'pan mata jio pangramean.
40Nauraga bang to baine matemo muanena, narampai to ewananna. Naanggai' bang too mpemalandoi passambajangna to nanii mpembunianan panggaukan gaja'na. Ia to tosusi joo la la'bi mabanda' to sessana."
41Ia tonna cumadokko sioloan patti doi' sudakka to Puang Isa lan Bola Puang Allataala, nakita rampa' tee mai tau ke mpatamai doi'na. Buda tosugih mpatama sibuda doi'.
42Anna ratu toda to mesa' baine kaasi-asi to matemo muanena napatamai dua de'pen. Iamo doi' majiongna angga'na.
43Natambaimi Puang Isa to anak gurun-Na nakuanni, "La miingaran! Sitonganna ia joo baine kaasi-asi, la'bi buda ia to napatama, na ia to napatama tuu lako tau sola ngasan.
44Nasaba' ia tuu mati' tau mangpangben jio mai kala'bianna, apa ia tee baine kaasi-asi mangpangben jio mai kakuranganna. Napangben ngasan to la naputuona."