Alkitab Mobile SABDA
[VER] : [GULLAH]     [PL]  [PB] 
 <<  1 Petrus 2 >> 

Jedus de Stone wa da Lib an Gii Life

1So den, mus git rid ob all dem ebil ting wa dey een oona life. Mus dohn tell no lie. Mus dohn be hypicrik an mus dohn hab de big eye. Mus dohn bad mout nobody bout nottin.

2Baby wa jes bon wahn milk all de time. Same way, all de time oona mus wahn de pure speritual milk. So dat e kin mek oona grow op een oona sabation.

3Like dey write een God Book say, “Now oona come fa know how good de Lawd da.”

4Come ta de Lawd. E de stone wa da lib an gii life. People beena tink dat stone ain wot nottin, an dey ton way fom um. Bot God pick dat stone, an e real walyable ta God.

5Oona too stan like stone wa da lib. Come an leh God tek oona fa build e house, weh e Sperit da lib. Een e house, oona gwine be priest dem wa blongst ta God, da offa op ta God de sacrifice wa God Sperit tell oona fa offa op. An dat mek God sattify, cause ob wa Jedus Christ done do.

6Cause dey write een God Book, say dat God say, “Look yah! A done pick one walyable stone. Dat de stone dat way mo walyable den all de odares, A da pit um fa be de conastone een de big city dey call Zion. An whosoneba bleebe pon de Lawd, dat stone, e ain neba gwine be shame.”

7Now den, fa oona wa bleebe pon um, dis stone yah walyable mo den all. Bot fa dem wa ain bleebe pon um, dey write een God Book say, “De bery stone wa de builda dem figga ain wot nottin an ton way fom, dat ton out fa be de conastone, de one dey need de mores ob all.”

8An dey write gin een God Book say, “Dis de stone wa mek people stumble. Dis de rock wa mek um faddown.” Dem people yah stumble cause dey ain do wa God wod tell um fa do. An dat wa God done been plan fa um.

9Bot God done pick oona fa be one people. Oona God own priest dem wa da saab de King. Oona a nation wa gii oonasef ta God. Oona God own people wa e pick fa tell bout de great wok dem wa e da do. E pick oona fa tell all de people, da praise God wa call oona outta de daak an bring oona eenta e wondaful light.

10Fo, oona ain been no nation ob people, bot now oona God people. Fo, oona ain know dat God mussyful, bot now oona come fa know e mussy ta oona.

Wok fa God

11Me deah Christian fren, oona wa da lib like scranja an come-yah people een dis wol, A da beg oona. Mus dohn folla oona haat fa sattify dem bad ting wa oona body wahn. Cause dem bad ting wa oona body wahn, dey da fight ginst oona soul.

12Mus lib een susha good way mongst de people wa ain know God, dat wen dey say oona da do bad, dey too gwine see dat oona da do good fa true. An dat gwine mek um praise God pon de Day dat e gwine come.

13Cause oona blongst ta de Lawd, pit oonasef onda ebry tority wa dey oba oona een dis wol. Mus do wa dey wahn oona fa do. Dohn mek no neba mind ef dat tority be de king wa dey oba all de oda rula dem.

14Mus pit oonasef onda de gobna dem wa de king sen fa punish dem people wa ain da do right an fa praise dem wa da do right.

15God wahn oona fa do good ting so dat foolish people wa ain know nottin, ain gwine hab nottin fa say ginst oona.

16Lib like people wa free, bot dat ain mek oona free fa kiba op no ebil. Lib like people wa da wok fa God.

17Show spec ta all people. Lob all oona Christian bredren. Spec an hona God, an gii hona ta de king.

De Suffrin ob Christ Show We How We Oughta Suffa

18Oona wa da saab, do all dat oona massa tell oona fa do an show um hona fa true. Show hona ta all ob um, not jes dem wa good an wa wahn fa hep people. Show hona ta dem wa mean ta people too.

19Ef oona suffa wa oona ain oughta suffa an beah op onda de pain cause oona know oona da do wa God wahn, den oona da do good een God eye.

20Bot wen oona do ting wa ain right an oona beah op onda de beatin dey gii fa punish oona, oona ain oughta git no praise fa dat, ainty? Bot ef people mek oona suffa eben wen oona da do wa right, den oona da do good een God eye.

21God call oona fa do dat. Cause Christ too done suffa fa oona an show oona dat oona oughta folla um an do jes like e beena do.

22Christ ain neba sin none tall. An ain nobody neba yeh no lie come fom e mout.

23Wen people suck dey teet at Christ an sult um, e neba ansa um nottin bad back. Wen people mek um suffa, e neba tell um say e gwine mek um suffa, bot e pit esef eenta God han. Cause God de jedge scraight.

24Christ done tek we sin ta esef een e body pon de cross, an e done dead dey fa stroy um. E done dat so dat we might oughta neba sin no mo, da lib like sin powa oba we done dead, an da waak scraight all de time we lib, like God wahn we fa do. De wound wa dey gii Christ done mek oona well.

25Oona been like sheep wa da wanda off an git loss. Bot now, oona done ton back fa folla Christ de Shephud wa da tek cyah ob oona soul.


  Share Facebook  |  Share Twitter

 <<  1 Petrus 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel