Alkitab Mobile SABDA
[VER] : [GULLAH]     [PL]  [PB] 
 <<  1 Petrus 4 >> 

Da Lib fa God

1So den, cause Christ suffa yah een e body een dis wol, oona mus tink jes like Christ beena tink, so dat wen oona suffa, oona gwine be scrong too. Cause de one wa beena suffa yah done done wid sin rule oba um.

2So fom now til oona pass oba, de ebil ting oona beena wahn fa do fo, dey ain gwine rule oba oona no mo. Oona gwine lib da do wa God wahn oona fa do.

3Mus dohn waste no mo time da do dem ting wa de people wa ain know God like fa do. Dem man an ooman da waak een de ebil way, da do ting wa dey ain oughta do wid dey body. Oona done dat too. Oona beena folla oona haat da do dem bad ting yah an oda bad ting dem. Oona been dronka an beena hab dem wile wile paaty. Oona beena woshup op ta dem idol wa people mek fa woshup ta wa oona oughta be too shame fa do.

4Dem people wa ain know God, dey ain able fa ondastan now, cause oona ain jine um gin fa lib dat same bad life. So dey shrow eensult pon oona.

5Bot dey gwine haffa ansa ta God, wa stan ready fa jedge all people, dem wa ain pass oba yet an dem wa done dead.

6Dat hoccome eben dem wa dead now, dey done been yeh de Good Nyews. So dat eben dough een dey life een dis wol dey done pass shru de jedgiment wa all people pass shru, dey kin git de chance fa lib fa true, like God wahn um fa lib.

Een All We Do, God Oughta Git de Glory

7De time wen all ting gwine done, ain faa off. So mus keep oona head steady an trol oonasef, so dat oona kin taak ta God fom oona haat.

8Bot dis de ting wa oona oughta do mo den all. Lob one noda wid all oona haat, cause de people wa lob one noda, dey all de time ready fa paadon people wen dey do um bad.

9Gii haaty welcome ta oona Christian bredren wen dey come ta oona house. Mus dohn grumble wen dey come.

10God gii gif ta ebry one ob oona, da mek ya know how fa do special ting. So den, ebry one ob oona oughta do um good. Mus tek cyah fa pass God diffunt mussyful blessin dem on ta oda people, so dat dey gwine git de good fom wa God mek ya know how fa do.

11Ef God call oona fa taak ta de people, mus taak like God da taak da tell people shru oona. An ef God call oona fa hep people, mus do dat wok dey wid de scrent wa God gii oona. So den, een all de ting oona da do, God gwine git de glory cause oona da waak wid Jedus Christ, wa got glory an powa fa rule faeba an eba. Amen.

Da Suffa Cause Oona Blongst ta Christ

12Me deah fren, oona mus dohn wonda wen oona hab haad suffrin wa come fa test oona. Mus dohn tink dat sompin wa ain oughta happen ta oona.

13Steada dat, rejaice cause oonasef hab a paat een wa Christ suffa, so dat wen we see Christ come back wid all e glory, oona gwine be full op wid joy.

14Wen people hole oona cheap cause oona blongst ta Christ, oona git blessin, cause dat show dat de Sperit ob glory, God Sperit, da lib dey eenside oona.

15Bot mus tek cyah dat none ob oona ain kill nobody, needa tief, needa do no oda crimnal ting o pit e han een oda people bidness. Ef oona da suffa, mus dohn be cause oona do dem ting.

16Bot ef oona suffa cause oona blongst ta Christ, dat mus dohn mek oona shame. Oona oughta praise God dat people call oona Christian.

17De time wen God gwine jedge de wol da come. God gwine fus jedge e own people. An ef God staat wid we wa blongst ta um, e gwine end wid haad time fa sho, fa dem wa ain do wa God Good Nyews tell um fa do, ainty?

18Dey write een God Book say, “Dem people wa do wa God wahn, dey git sabe, bot dey hab a haad time. So dey gwine be haad time fa sho, fa people wa ain hab nottin fa do wid God an fa de sinna dem, ainty?”

19So den, de people wa da suffa cause dat wa God wahn fa um, leh um leabe deysef fa true een God han, an do good mo an mo. Cause God mek all ting, an all ting wa e promise, e gwine do.


  Share Facebook  |  Share Twitter

 <<  1 Petrus 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel