Dual PanelChrist da Hep We
1Me deah chullun, A da write dis ta oona so dat oona ain gwine sin. Bot ef somebody sin, we got Jedus Christ wa ain hab no sin, fa taak ta de Fada fa we.
2An Jedus de one wa done sacrifice esef so dat God kin paadon we sin. An ain jes we own sin no mo dat God da paadon. E da paadon all people sin.
3Ef we do wa God chaage we fa do, dat de way we kin ondastan fa sho dat we come fa know God fa true.
4De one wa da say, “A come fa know God,” bot e ain do wa God tell um fa do, dat one dey da lie. Dey ain no trute een um.
5Bot de one wa da do wa God tell um fa do, dat one show dat God da full um op wid e lob. Dis de way we know fa true dat we lib een God.
6De one wa say e da lib een God, e oughta waak same like Jedus Christ done waak.
De Nyew Chaage
7Now den me deah bredren, dis ain no nyew chaage wa A da write down yah, da chaage oona fa keep um. Dis de ole chaage dat oona beena hab fom de fus. De ole chaage, dat de wod oona beena yeh.
8Stillyet, A da write oona a nyew chaage. De way ob Christ show we dat true. An dat true een oona too. Cause de daak da pass way. An de true light done staat fa shine.
9De one wa say e da lib een de light, bot stillyet e hate e broda, dat one dey, e still da lib een de daak eben til now.
10De one wa da lob e broda, dat one da keep on da lib dey dey een de light. So dey ain nottin een dat one fa mek um sin.
11Bot de one wa hate e broda, dat one da lib dey stillyet een de daak. E da waak roun een de daak, an e ain know wa side e da gwine cause de daak done mek um so e ain able fa see.
12Me deah chullun, A da write oona cause God beena paadon oona sin fa de sake ob Jedus Christ name.
13Oona me fada dem, dem wa done ole, A da write oona cause oona beena know de one wa been dey fom de fus. Oona nyoung man dem, A da write oona cause oona beena win out oba de ebil one, Satan. A write oona, me deah chullun, cause oona beena know de Fada God.
14Oona me fada dem, A write oona cause oona beena know de one wa been dey fom de fus. Oona nyoung man dem, A write oona cause oona scrong. God wod da keep on da lib dey een oona haat an oona beena win out oba de ebil one.
15Mus dohn lob de wol, needa pit oona haat pon dem ting wa dey een de wol. Ef oona lob de wol, dat show dat oona ain lob God de Fada eben a leetle bit.
16Cause all dem ting dey wa blongst ta de wol, dey come fom de wol. Dem ting de bad wa dey dey een poson haat wa da mek um pit e haat all de time pon ting, dem ting wa poson kin wahn bad bad wen e see dem, an all dem ting een de wol wa da mek poson tink proud, all dem ain come out fom de Fada. Dey come fom de wol.
17De wol an all de ting een de wol dat people wahn so bad, all dem da pass way. Bot de one wa da do wa God wahn um fa do, e gwine keep on da lib faeba.
Enemy ob Christ
18Me chullun, de time ob de end done come close. People beena tell oona dat de enemy ob Christ haffa come. An now a heapa enemy wa fight ginst Christ done beena come. Dat mek we know dat de time ob de end done come close.
19Dem enemy dey ain been we own people. Dat wa mek um leabe we. Cause ef dey hadda been we own people, dey woulda been stayin on dey wid we. Bot dey done lef we so dat all people gwine know dat none ob um been we own people.
20Bot de Holy Sperit done been pour out pon oona, so oona all know de trute.
21So A ain write oona cause oona ain know de trute. No, A write cause oona know de trute, an oona know dat dey ain no lie wa kin come fom de trute.
22So den, who dat one wa da lie? E de one dat say Jedus ain de Messiah Christ. E de enemy ob Christ. E ain wahn fa hab nottin fa do wid God de Fada, needa wid God de Son.
23Ef somebody ain wahn fa hab nottin fa do wid God de Son, needaso e cyahn hab nottin fa do wid God de Fada. Bot de one wa da tell people, say Jedus, e God Son, e got God de Fada too.
24So den, fom de fus, oona beena laan de trute bout um. Mus keep all dat een oona haat. Ef dem fus ting wa oona beena yeh stay da lib dey een oona haat, den all de time oona gwine be one wid de Son an wid God de Fada.
25An we hab life wa ain neba end, de ting wa Christ esef e gwine gii we.
26A write oona fa tell oona bout dem people wa da try fa mek oona stop folla de true way.
27Bot de Holy done been pour out pon oona, an now dat e dey eenside oona haat, oona ain haffa hab nobody fa laan oona. Cause Christ Sperit da laan oona all ting, an all wa e da laan oona, dat true. E ain no lie. So den, oona mus be one wid Christ, all de time da lib een um, jes like e Sperit laan oona fa do.
28Now den, me chullun, mus be one wid Christ all de time, so dat wen e come back we kin be full op wid courage an we ain gwine hide een shame fom um, wen e come back.
29Ef oona know dat Christ e right, den oona know fa true dat ebrybody wa da keep on da do wa right, dey God chile.