Dual PanelPaul an de Leada Dem wa Ain Taak True
1A hope oona gwine beah wid me wiles A cut de fool. Kin ya do dat much fa me?
2Cause A jealous oba oona same fashion God esef jealous. Cause A done promise oona fa marry ta Christ, so dat A could gii oona, like ooman wa ain neba know no man, ta e one husban.
3A scaid dat wa happen ta Eve could happen ta oona too. Jes like de snake trick Eve an ceebe um, somebody could trick oona so dat oda ting dem gwine on een oona head an den oona gwine stop fa trus een Christ fa true, wid all oona haat.
4A scaid fa oona, cause oona ready fa listen ta wasoneba poson wa come ta oona, da tell oona bout noda Jedus wa ain de same Jedus we beena tell oona bout. Oona cep de sperit dey promise oona, wa ain de one oona got wen A been dey, an oona da listen ta wasoneba poson wa come da tell oona ting wa diffunt fom de Good Nyews bout Jedus wa we tell oona.
5A da taak bout dem big shot wa call deysef postle. A ain tink dey eben a leetle bit mo betta den me.
6Eben ef A ain too good a speaka, wa A know, A know um good fa sho. We done mek dat plain ta oona een ebryting an een ebryway.
7A ain aks oona fa no pay wen A beena tell oona de Good Nyews bout God. A been pit mesef down low so dat oona could come high op. Fa true, dat ain no bad ting A been do, ainty?
8Wen A beena wok mongst oona, oda choch dem been gii me wa A need fa lib. E same like A beena tief dem choch so dat A could hep oona.
9An wiles A been dey wid oona, wensoneba A beena need sompin, A neba bodda none ob oona. A ain aks oona fa nottin. Cause de bredren wa come fom Macedonia, dey bring all dat A beena need. An jes like e been fo, dat so e gwine be all de time. A ain gwine gii oona no cause no way fa warry bout me.
10A promise oona dat wehsoneba A go een all ob Achaia, A gwine taak bout dis good ting, say dat A ain tek no pay fom oona han. Ain nobody gwine stop me fa say dat. Dat de true wod wa Christ pit een me haat fa taak.
11Oona tink dat A da taak dis way cause A ain lob oona? Dat ain so. God know dat A lob oona!
12A gwine still keep on da do wa A da do now, so dat dem oda people wa some call postle, ain gwine git no reason fa brag, say dey da do de same wok jes like we da do.
13People wa da hole dat ain no true postle tall. Dey da lie bout dey wok, an dey jes da mek deysef look like dey Christ true postle dem.
14Oona ain oughta wonda bout dat. Cause Satan too kin change an mek esef look like a angel ob light.
15So den, ain no big ting wen Satan saabant dem, too, da mek deysef look like dey God true saabant wa da waak een God way. Wen dey own time done end, dey gwine git dey pay fa de ting dem wa dey da do.
Paul Suffa Lotsa Ting
16A da tell oona gin dat nobody mus dohn tink dat A a fool. Bot ef dat so oona tink, oona oughta listen ta me jes like e been a fool wa da taak ta oona, so dat A kin still taak a leetle bit bout dem good ting wa mek me too heppy.
17Wen A taak like dis now, A ain da taak wa de Lawd tell me fa taak. A da taak like a fool.
18Lotsa people da taak bout how good dey da waak, da taak jes een de way ob de wol. So A, too, gwine taak bout me good way.
19Oona got sense, an dat mek oona glad fa beah wid fool dem!
20Oona da beah wid wasoneba poson wa da mek like e oona massa an oona e slabe, o wa da tek adwantage ob oona o set trap fa oona. Oona da beah wid um wa da mek like e mo betta den oona, o wa da knock oona een de face.
21A shame fa tell oona dat we ain been scrong mout nuff fa do like dat! Bot ef somebody scrong mout nuff fa brag bout sompin--A da taak like a fool--A, too, kin be scrong mout like um.
22Dey Hebrew, dey say, ainty? A Hebrew too. Dey people ob Israel? A one ob Israel people too. Dey Abraham chullun chullun? A one ob Abraham chullun chullun too.
23Dey Christ saabant? A da taak like a mad man--bot A a saabant mo betta den dey! A beena wok faa way mo den dey beena wok. A gone ta de jailhouse heap mo time den dey gone ta de jailhouse. People done beat me op fa true mo bad den dey done beat dem op. An A come real close ta dyin oba an oba gin.
24Fibe time de Jew dem done beat me. Ebrybody ob dem fibe time, dey scrike me tirty-nine time.
25A been beat op wid a rod shree time. One time people done chunk stone at me, da try fa kill me. Shree time de boat A been on done git all smash op an sink eenta de wata. An dey been one time wen A been een de wata at sea one whole day an one whole night.
26All de time A beena trabel all oba, A been een haam way. Dey been lotsa ting wa kin kill me, big wata ob de riba, tief dem, me own Jew countryman dem, an dem people wa ain Jew, too wa try fa do bad ta me. Dey been ting wa kin kill me dey een city dem an een de desat an wen A lef de sho fa go faaway pon de sea. An dey been dem people wa beena say dey me broda, bot fa true dey been me enemy.
27Fa sho, A been wok haad, an plenty night, A ain got no sleep. Sometime A been hongry an tirsty. An plenty time A ain nyam nottin an A been cole an ain got no cloes fa weah.
28Den pontop ob all dem oda ting, ebryday A da tink bout all de choch dem, how dey da do.
29Wen somebody ain able fa stan scrong, A feel like A ain scrong. Wen somebody git trap an fall eenta sin, A feel bad fa true.
30Ef A haffa taak bout de good ting A done, A gwine taak bout dem ting wa show dat A ain scrong.
31God, de Fada ob we Lawd Jedus, e know dat A ain da tell no lie. Leh all people praise um faeba!
32Wen A been dey een Damascus, de gobna wa been dey onda King Aretas, e sen sodja dem ta watch at de city gyate fa grab hole ta me.
33Bot me Christian bredren pit me eenside a basket. Den dey done pass de basket shru a winda een de city wall an leh me down outside de city. Dat hoccome de gobna ain ketch me.