Alkitab Mobile SABDA
[VER] : [GULLAH]     [PL]  [PB] 
 <<  2 Korintus 4 >> 

We Show God Powa Eenside We

1God een e mussy gii we dis yah wok fa do. So den, we ain gwine leh nottin mek we gii op.

2We ain hab nottin fa do wid dem bad ting wa people do, da try fa hide um fom oda people an da mek um too shame. We da waak scraight wid people. An we ain da twis God wod. We say um jes like e da fa true. We da taak de trute fa all people fa ondastan, cause we know dat God da look pon we. An cause ob dat, we hope dat all people gwine be sattify dat we da waak een a good way.

3Ef some ob de people wa da yeh de Good Nyews we da tell um, ain ondastan um, dey de one dem wa da gwine pon dey way fa be loss faeba.

4Dey ain bleebe wa we da say, cause Satan, de ebil god ob dis wol, done bline dey eye, so dat dey ain able fa see de light wa da shine pon um. Dat de light ob de Good Nyews bout Christ glory, an Christ xactly de same as God.

5Cause fa true, we ain da tell oona bout wesef. We da tell oona bout Jedus Christ we Lawd. An we say dat we oona saabant fa sake ob Jedus.

6God, wa say, β€œLeh light shine outta de daak!” e de same God wa mek e light shine een we haat. An dat light wa da shine fom Christ face, dat da mek we know God glory.

7Stillyet, eben dough God da gii we dis tredja dey eenside we, we stan jes like ole clay jug. We weak an ordinary. Dat show dat de powa fa trol all ting dey een God han. Fa true, we ain got dat powa.

8Lotsa time, we got trouble ebryweh, bot dat ain mek we gii op. Lotsa time, we ain know wa fa tink, bot we ain loss we courage.

9People mek we suffa, bot all de time God dey wid we. Dey kin knock we down, bot dey ain able fa stroy we.

10De det wa Jedus done dead dey een we body all de time, so dat people kin see e life too een we body all de time.

11Cause wiles we lib een dis life, all de time we stan een de patway ob det fa sake ob Jedus, so dat people kin see e life een we human body.

12So den, we stan een de patway ob det all de time, bot oona dey een de patway ob life wa ain neba end.

13Dey write een God Book say, β€œA been bleebe wa God tell me, an dat mek me tell wa A bleebe.” Cause we too bleebe een dat same way ob fait, we da tell wa we bleebe.

14We know dat God wa mek we Lawd Jedus lib gin an git op fom mongst de dead people, e gwine mek we lib gin too, long wid Jedus. An God gwine bring we, long wid oona, eenta de place weh e dey.

15All dis da happen fa sake ob oona. An as God da bless mo an mo people, dey gwine tell God tankya mo an mo an show e glory.

We Pit We Haat pon Dem Ting wa We ain See

16Cause ob dat, we ain neba gii op. Eben dough we body da waste way, stillyet nyew life da come ta we sperit eenside we ebryday.

17De leetle trouble dem we da suffa fa dis short time, dey da git we ready fa blessin an hona faeba. An dem blessin an hona gwine be faaway mo den de suffrin we da suffa now.

18Cause we pit we haat pon dem ting wa we ain da see. We ain pit um pon dem ting wa we da see. De ting dem wa we da see, dey ain las long, bot dem ting wa we ain da see, dey gwine las faeba an eba.


  Share Facebook  |  Share Twitter

 <<  2 Korintus 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran