Alkitab Mobile SABDA
[VER] : [GULLAH]     [PL]  [PB] 
 <<  2 Korintus 8 >> 

How Christian Oughta Gii fa Hep Dey Broda

1Me Christian bredren, we wahn fa mek ya know bout de blessin wa God been gii de choch dem een Macedonia.

2Eben dough dey beena suffa a heapa trouble wa test um fa true, stillyet dey real heppy. An cause ob dat, dey wahn fa hep oda people an dey gii way a whole heapa ting, eben wen dey ain got much tall ob dey own.

3A da tell oona fa true dat dey gii all dey able fa gii an eben mo den dat, cause dey wahn fa do um.

4Dey beena beg we wid all dey haat fa leh um hab de blessin fa be able fa gii ta God people wa got need.

5We ain beena spect um fa do all dey done. Fus dey gii de Lawd dey life an den pit deysef een we han, jes like God wahn um fa do.

6So den, we courage Titus, wa staat dis wok, fa go on wid um an hep oona fa finish op dis special wok weh oona da gii plenty, cause oona lob oona Christian bredren.

7Oona way head ob oda people een all dat oona do een trus God, een fine taak, een laan heapa ting, een do ting wid all oona haat, an een oona lob fa we. So jes like oona way head ob oda people een dem ting, oona oughta be way head, too, een dis special wok yah fa gii.

8A ain da chaage oona dat oona haffa do um. Bot wen A da tell oona how oda people wahn fa true fa hep fa do dis wok, A da try fa find out dat de lob dat oona got da come fa true fom oona haat.

9Oona know de way we Lawd Jedus Christ bless we. Eben dough e got ebryting op dey een heaben, stillyet fa oona sake e come fa lib een dis wol jes like a human wa ain got nottin. E done dat fa mek oona git all ting op een heaben.

10Now listen yah ta wa A tink oona oughta do bout dis offrin. E betta fa oona fa finish op tarectly wa oona done staat fa do las yeah. Oona been de fus fa staat fa gii fa de offrin ta God people, an oona been de fus ta wahn fa gim sompin.

11So finish op de wok. Jes like oona been wahn fa true fa git um ready fo, so now oona oughta finish um op. An oona oughta gim coddin ta wa oona got.

12Ef somebody wahn fa gii real bad, God gwine be sattify coddin ta wa dat poson got, an not coddin ta wa e ain got.

13A ain da try fa tek oda people hebby load fom off um an pit um pon oona.

14A mean dat e good fa all ta share an share de same. Right now, oona got lotsa ting an oona oughta hep dem wa ain got wa dey need. Den wen de time come dat oona ain got wa oona need, dem wa got lotsa ting gwine hep oona. Dat way, all oona gwine share de same.

15Like dey write een God Book say, “De one wa geda a lot ain got tommuch, an de one wa geda jes a leetle bit got wa e need.”

Titus Come ta Corinth

16A tell God tankya fa mek Titus haat open fa hep oona, jes like me haat open ta oona.

17Wen A aks Titus fa go ta oona, e been heppy fa go. Bot fa true e been real heppy fa go hep oona. E de one wa mek op e mind fa go.

18An we da sen, long wid Titus, dat Christian broda wa ebrybody praise een all de choch dem, cause ob e wok da tell de Good Nyews.

19An e ain only dat, de choch dem pick um fa go wid we wen we do dis wok ob lob, da cyaa de offrin ta de Christian dem een Judea, so dat de Lawd gwine git de praise, an dey gwine see dat fa sho we wahn fa hep um.

20We wahn fa tek cyah dat nobody ain gwine blame we bout de way we nyuse dis big gif ob money yah.

21We da try we bes fa do wa right, not jes fo de Lawd, bot fo people too.

22We da sen noda ob we Christian bredren fa go long wid um. E show we lotsa time an een lotsa way dat e wahn wid all e haat fa hep. An now dat e trus oona good fashion, e wahn fa hep oona mo den eba.

23Now bout Titus, e de one wa fa true da wok long side me an wok wid me fa hep oona. Dem oda ob we Christian bredren, dey da gwine long wid Titus fom de diffunt choch dem wa sen um fa go ta oona. Dey da bring hona ta Christ.

24So den, oona oughta show um how oona lob um, so all de choch dem gwine know fa true dat oona lob um, an dey gwine know dat we right wen we tell um we heppy fa true bout oona.


  Share Facebook  |  Share Twitter

 <<  2 Korintus 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel