Alkitab Mobile SABDA
[VER] : [GULLAH]     [PL]  [PB] 
 <<  2 Petrus 1 >> 

1A Simon Peter, wa da wok fa Jedus Christ, an A one ob e postle dem. A da write ta oona wa trus een Christ. God gii oona dat fait, same like we own an dat fait mo betta den ting wa money kin buy. Jedus Christ, we God an Sabior, e da do wa right.

2A pray dat God gii oona e blessin mo an mo an full op oona haat wid peace. God gwine bless oona dat way as oona come fa know um an we Lawd Jedus mo an mo.

God Call We fa Lib fa Um fa True

3Jedus Christ, by de powa ob God been gii we all ting we need so dat we kin hab life an lib fa God fa true, jes like e wahn we fa lib. All dat blongst ta we, cause we beena come fa know God mo an mo. E call we fa leh we git we paat ob own glory an fa mek we good like e good.

4Dat how God beena gii we e wondaful blessin wa money cyahn buy nohow, dem blessin wa e beena promise. Dat wa e do, so dat dem blessin yah gwine leh oona keep way fom dem bad ting een de wol, wa come cause een dey haat people een de wol wahn fa do ebil. An cause ob dem blessin, oona kin come fa be mo an mo like God.

5So den, cause God do all dat fa oona, try de bes oona kin. Oona trus een Christ. Pontop ob dat, lib good, da waak een de right way. Pontop ob dat gin, git fa know God mo an mo, ondastandin wa e wahn oona fa do.

6Pontop ob dat, mus be able fa trol oonasef. An pontop ob dat gin, laan fa beah op onda all ting, an pontop ob dat, oona life mus show dat oona God people.

7Now pontop ob dat, lob oona Christian bredren an lob all people.

8Ef dem ting yah dey een oona haat an oona da do um mo an mo, dey gwine mek oona do plenty wok wa good fa true, same time oona come fa know we Lawd Jedus Christ mo an mo.

9Bot ef somebody ain got dem ting yah een e life, e same like a bline eye man wa ain see haadly nottin fa true. An e done fagit dat God done tek way de sin dem dat e done beena do an fagib um.

10So den, me Christian bredren, try de bes oona kin, fa do de ting wa show dat God done call oona an pick oona, fa true. Cause ef oona do dat, oona ain neba gwine fall way.

11Den God gwine gii oona haaty welcome ta weh we Lawd an Sabior Jedus Christ, da rule faeba.

12Oona know dem ting yah, an oona bleebe fa sho dem true ting wa oona beena laan. Stillyet, A ain neba wahn fa stop membrin oona bout dem.

13A tink e right fa me fa keep on da memba oona bout dem ting yah, long as A da lib.

14A know dat fo long, A gwine pass oba. Cause we Lawd Jedus Christ done show me so.

15A gwine do all A able fa do fa mek a way so dat atta A done pass oba, oona gwine be able fa memba dem ting yah all de time.

Peter an de Oda Postle Dem Taak Bout wa Dey See

16Wen we tell oona, say we Lawd Jedus Christ gwine come back ta dis wol wid great powa, we ain beena tell oona no story wa schemy people jes mek op. Wid we own eye we beena see Christ wen God show Christ mighty powa.

17We been dey wen God we Fada gii Christ hona an glory. We been dey wen dat boice ob God, de Glory wa great mo den all, come ta Christ, an God tell Christ say, “Dis me own Son, wa A lob. A heppy wid um fa true!”

18We done yeh dat boice wa come outta heaben, wen we been dey wid Christ pontop God mountain.

19Dat mek we bleebe mo den eba de wod wa de prophet dem beena taak. E gwine good fa oona ef oona pay mind ta dem wod yah. Cause dey like a lamp wa da shine een a daak place, til de Day Christ come an de light ob de maanin staa come an shine eenside oona haat.

20Mo den all, ondastan dat dey ain nobody, by esef, wa able fa ondastan an splain dem wod wa de prophet dem done write een God Book.

21Cause ain neba been no true wod ob no prophet wa jes come fom waeba some poson tink o wahn fa taak. E been de Holy Sperit wa beena trol dem prophet, da tell um de wod dem wa God wahn um fa taak.


  Share Facebook  |  Share Twitter

 <<  2 Petrus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel