Dual PanelDe Sodja wa Nottin Ain Mek Ton Back
1Ya, me son, mus leh de blessin we git cause we one wid Christ Jedus mek ya keep scrong.
2Dem wod wa ya yeh me say fo plenty people, ya mus pass um on, da tell dem ta faitful man dem wa gwine keep um een dey haat an be able fa laan oda people dem same ting yah.
3Ya mus beah op onda ya paat ob we suffrin cause ya a true sodja ob Jedus Christ.
4De sodja wa dey een de aamy gwine wahn fa mek de offisa wa tell um wa fa do, sattify wid um, so e ain gwine git mix op wid dem ting dat people wa ain sodja da do.
5Same way so, de one wa da ron een a race ain gwine be able fa win de prize ef e ain da folla de rule dem.
6De faama wa done wok scronga fa mek de crop, e oughta be fus fa git e paat ob de haabis.
7Study ya head pon wa A da tell ya, cause de Lawd gwine mek ya able fa ondastan all dem ting.
8Memba Jedus Christ wa come fom David fambly line. God done mek um git op fom mongst de dead an lib gin. Dat wa A da taak bout wen A tell people de Good Nyews.
9An cause A da tell people de Good Nyews, A da suffa yah. Dey eben chain me op like a crimnal. Bot dey ain gwine chain God wod.
10Cause ob dat, A da beah all ting fa sake ob de people wa God done pick, so dat dey too gwine git de sabation wa come fom Christ Jedus an bring um glory wa ain neba end.
11Fa true ya kin trus um wen dey say: “Ef we done dead wid Christ, we gwine lib wid um too.
12Ef we da beah op we gwine rule wid um too. Ef we say we ain know um, e too gwine say e ain know we.
13Ef we ain keep on trus um, stillyet e da keep ta e wod. Cause fa true e ain gwine change wa e da, needa wa e promise we.”
De Wokman wa God Sattify Wid
14Ya mus keep on da memba de bleeba dem bout dem ting yah. An chaage um fo de Lawd dat dey mus dohn aagy bout wod dem wa ain mean nottin. Dat ain hep nobody, an e jes stroy de people wa da listen.
15Do all ya kin do fa mek God sattify fa true wid ya, a wokman wa ain got nottin fa be shame fa, an wa da laan people God true wod, een de right way jes like ya oughta laan um.
16Stay way fom foolish taak wa ain got nottin fa do wid God, cause dat jes gwine mek people stop da folla God mo an mo.
17De ting wa dem people laan oda people gwine spread mo an mo, same like gangrene kin spread een a open sore, da nyam de body mo an mo. Hymenaeus one ob dem teacha yah, an Philetus noda one.
18Dey done ton way fom de way ob trute, da say dat de time wen people wa done dead gwine git op fom dey grabe done pass. Dey da opsot de fait ob some people wa been bleebe fo.
19Bot fa sho, nottin ain gwine shake de scrong foundation dat God done mek. An de wod dem wa been write pon dat foundation say: “De Lawd know dem dat blongst ta um,” an “Ebrybody wa say e blongst ta de Lawd mus oughta stop fa do dem ting wa ain right.”
20Now den, eenside de bighouse ya kin find all kind ob dish an bowl. Some been mek ob gole an silba, an people nyuse dem fine ting fa jes special time dem. Bot oda been mek ob wood an clay, an people nyuse dem cheap one ebry day fa all kind ob dorty ting.
21So ef somebody stay way fom do dem ting wa ain right, e gwine be like one ob dem fine gole dish. God gwine nyuse um fa do special wok, cause dat one done gii e Lawd all e life. E da do all de wok e Lawd gim fa do, an e ready fa do all kind ob good wok.
22Ya mus ton way fom wahn fa do de sinful ting dem wa nyoung people haat kin gim fa do. Try ya bes fa do wa right een God eye an trus een God. An try fa lob all people an lib peaceable. Ya oughta try fa do all dem ting yah, long wid all dem people wa got clean haat an wa da pray ta de Lawd fa hep um.
23Mus dohn hab nottin fa do wid dem foolish aagyment dat people wa ain ondastan nottin git eenta, cause ya know de quarrelment dey kin end op wid.
24An de one wa da do de Lawd wok mus dohn quarrel. E mus be good ta ebrybody an able fa teach good an beah op onda all ting.
25E mus dohn taak scrong wen e da laan dem wa ain gree wid um. Cause maybe sometime God gwine gim de chance fa be saary an change dey way an come fa know de true way.
26Den dey gwine know dat wa dey beena do ain right. An dey gwine git out ob de trap ob de Debil, cause e done beena ketch um an mek um do wa e wahn.