Alkitab Mobile SABDA
[VER] : [GULLAH]     [PL]  [PB] 
 <<  2 Timotius 4 >> 

1A chaage ya fa true fo God an fo de Lawd Christ Jedus, wa gwine jedge dem wa ain dead yet an dem wa done dead. Cause Christ gwine come back ta de wol an rule as King, A da chaage ya.

2A tell ya dat all de time ya mus tell people de wod ob God. Ya mus be ready fa tell um wen dey da listen an wen dey ain wahn fa listen. Ya mus show people wa right fa do. Ya mus tell dem wa know dat wa dey da do ain right, fa stop. An mus courage um so dat dey waak scraight. (An ya mus all de time beah wid um wiles ya keep on da laan um de wod.)

3Ya mus do dis cause de time gwine come wen people ain gwine wahn fa yeh true teachin. Steada dat, dey gwine folla wa dey haat tell um fa do. An dey gwine geda togeda mo an mo teacha dem wa gwine jes tell dem ting dat de people like fa yeh.

4Dem people gwine ton way fom listenin ta de trute, an dey gwine pay mind ta dem story wa ain true.

5Bot all de time ya mus keep trol ob yasef. Ya mus beah op onda suffrin. Mus keep on da tell people de Good Nyews, an ya mus do all dat ya oughta de een ya wok fa God.

6Cause fa me own paat, now de time done come fa me fa dead, like a sacrifice ta God. De time done come fa me fa leabe dis life.

7A done fight de good fight ob fait. De race wa A beena ron fo me Lawd done done. A done all dat A been able fa do. A ain neba stop trus een God an laan people dem ting dat we bleebe bout God.

8Now den, de prize da wait fa me, de crown dat de one wa waak scraight wid God gwine git. De Lawd wa da jedge right, e gwine gii me dat prize, dat Day wen e gwine come back. An e ain gwine gim jes ta me. E gwine gii dat prize ta all dem wa look fowaad wid all dey haat ta wen e gwine come.

Paul Life een de Jailhouse

9Try haad as ya kin fa come see me soon.

10Cause Demas da lob dem ting wa een dis wol, an so e done lef me an gone off ta Thessalonica. Crescens gone ta Galatia, an Titus gone ta Dalmatia.

11Jes Luke wid me yah. Git Mark fa come long wid ya wen ya come. Cause e kin hep me fa do de wok yah.

12A done sen Tychicus ta Ephesus.

13Wen ya come, bring me coat wa A lef wid Carpus dey een Troas, an bring de book dem, specially dem book wa been mek ob sheep skin.

14Alexander, de man wa mek ting outta coppa, done me nuff ebil. De Lawd gwine gim de payback fa wa e done.

15Oona, too, mus watch out fa um, cause e beena wok scrong, da taak ginst all we da teach.

16De fus time A gone ta court, nobody ain gone long fa stan op fa me. Ebrybody lef me. A pray ta God dat e fagib um fa dat.

17Bot de Lawd been dey dey ta me side. E gii me scrent so dat A been able fa tell all de Good Nyews fa all de people dat ain Jew fa yeh. An so de Lawd sabe me fom de lion mout.

18De Lawd gwine sabe me fom ebry ebil ting wa come ginst me. E gwine keep me safe an tek me ta heaben weh e da rule. Leh we praise um faeba an eba! Amen.

Paul Las Greetin

19Tell Priscilla an Aquila hey fa me, an tell dem een Onesiphorus house too.

20Erastus beena stay een Corinth, an A lef Trophimus een Miletus, cause e been sick.

21Try haad as ya kin fa come fa see me fo de wintatime. Eubulus, Pudens, Linus, an Claudia wid all de oda Christian bredren, dey all say hey ta ya.

22A pray dat de Lawd Jedus Christ be dey wid ya sperit. God bless all ob oona.


  Share Facebook  |  Share Twitter

 <<  2 Timotius 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran