Dual Panel1A John, elda een de choch, da write ta de lady wa God done pick an ta e chullun wa A lob fa true. An A ain de only one. Ebrybody wa know de trute, lob oona.
2Cause ob de trute wa lib dey een we haat an wa gwine lib wid we faeba.
3We pray dat God we Fada, an E Son, Jedus Christ gwine bless we wid mussy an peace een we haat. Leh all dem ting be ta we wa een trute an lob.
Trute an Lob
4A been too heppy wen A yeh dat some ob ya chullun da folla de trute. Same like we Fada tell we fa do.
5Now, deah lady A da beg ya: leh we lob one noda. Dis chaage wa A da write ain no nyew ting. Dat wa we done beena know fom wen we fus bleebe pon Christ.
6Lob mean dat we waak God way, da do wa e tell we fa do. Dis wa oona beena yeh fom wen oona fus bleebe pon Christ: God chaage we say, Mus all waak een de way ob lob.
7Plenty people wa ain taak de trute, dey gone out all oba de wol. Dey ain wahn fa say dat Jedus Christ done come eenta de wol as a man. People like dat ain taak de trute an dey da fight ginst Christ.
8So den, oona mus tek cyah. Mus dohn loss wa oona done wok fa, so dat oona gwine git all dem ting wa God done promise oona.
9Wen somebody ain keep on da laan people jes wa Christ laan um, an no mo, bot e da laan um oda ting mix een, dat one dey ain hab God een e haat. De one wa da laan people jes wa Christ laan um, dat one hab de Fada an e Son dey een e haat.
10So den, ef somebody come fa laan oona an e ain bring jes wa Christ laan we, jes dat an no mo, mus dohn tek um eenta oona house. Mus dohn welcome um tall.
11Cause de one wa gim welcome, e da jine op wid um een de bad wok e da do.
De Las Wod een Dis Letta
12A got plenty ting fa tell oona, bot A ain wahn fa write um down wid paper an pen. Stead ob dat, A hab hope fa come see oona, an taak ta oona face ta face, so dat we kin be full op wid joy.
13De chullun ob ya sista, wa God done pick, dey tell oona hey