Alkitab Mobile SABDA
[VER] : [GULLAH]     [PL]  [PB] 
 <<  Efesus 2 >> 

God Gii We Life

1Oona nyuse fa be people wa done dead, cause oona ain do wa God tell oona fa do an oona keep on da sin.

2Oona nyuse fa folla de ebil way ob dis wol. Oona beena do wa de ebil one wa da rule oba de sperit dem een de sky wahn. Dat de sperit wa da hab tority now oba people wa ain do wa God tell um fa do.

3We all nyuse fa lib jes like dem people. We beena do jes wa we sinful haat an we body an we mind tell we fa do. We been people jes like ebrybody else, an so e haffa happen dat we been gwine suffa cause God bex wid we, cause ob we sin, jes like all dem oda people.

4Bot God lob we sommuch. Cause ob dat, e hab a whole heapa mussy pon we.

5So den, eben wen consaanin de ting ob God we been people wa done dead cause we ain do wa God tell we fa do, God gii we life togeda wid Christ. Wen God sabe oona, dat ain been cause dat fittin coddin ta wa ya done do.

6Cause we blongst ta Christ Jedus, God done mek we git op fom mongst de dead people, jes like e mek Christ git op an lib gin, an e mek we fa seddown fa rule wid Christ een heaben.

7God done dis fa show fa all time fa come how walyable fa true e blessin pon we, mo den we kin eba tell. An e show how e lob we by wa e done shru Christ Jedus.

8Wen God sabe oona, dat ain been cause dat fittin coddin ta wa ya done do. E done dis cause oona trus een Christ. Eben dat trus wa oona got ain come fom oonasef. E gif fom God.

9So den, oona ain got nottin fa brag bout, cause dey ain nottin oona kin do fa sabe oonasef.

10God de one wa mek we, an e mek we one wid Christ Jedus fa do dem good ting dat e plan way back yonda.

Christ Mek We All One People

11Cause ob dat, oona wa ain Jew, oona oughta memba wa oona nyuse fa be. Oona be dem wa de Jew people call “people wa ain circumcise,” an dey call deysef “people wa been circumcise.” (Dat mean fa say dat dem man cut dey son dem fa show dat dey God people.)

12Oona memba dat back den, oona ain been one wid Christ. Dey ain been count oona mongst de Israel people wa God done pick. An so oona been jes like come yah people. Back den, oona ain hab no paat een de cobnant dem wa God mek wid e people. Dem cobnant been God promise ta e people fa mek um God own. Een dat time, oona been jes dey een de wol. Oona ain bleebe pon God, an oona ain hab no hope.

13Oona nyuse fa be faa way fom God. Bot now oona come fa be one wid Christ Jedus. Christ done shed e blood an dead fa oona fa bring oona ta God.

14Cause Christ da we peace. E done mek de people wa ain Jew an de Jew people come fa be one people. Fo dat, dey been cut off fom one noda an enemy wid one noda. Bot wen Christ dead pon de cross, e broke down de wall ob hate wa beena cut um off fom one noda.

15Jedus Christ pit de Jew Law wid dem rule wa chaage de people an tell um wa dey haffa do, ta one side. Christ done dat so e could mek dem people wa ain Jew an de Jew people come fa be one nyew people, e own people. Dat de way e done mek um all be peaceable wid one noda.

16Wen Christ dead pon de cross, e done stroy de hate tween um. E done mek um come fa be one body, an e bring um back ta God.

17Christ come an tell oona de Good Nyews wa kin mek all people come fa be peaceable. E tell oona bout dat peace, oona wa ain Jew an wa nyuse fa be faa way fom God, an e tell um ta de Jew people, wa been close ta God.

18Wen Christ dead pon de cross, e done mek a way by de one Holy Sperit ob God fa all ob we, de Jew people an dem wa ain Jew, fa come ta we Fada God.

19So den, oona wa ain Jew, oona ain no screnja needa come-yah people no mo. Now e jes like oona wid God people come fom de same country. We all come ta blongst ta God fambly togeda.

20Oona, too, come fa be paat ob de buildin wa got de postle dem an de prophet dem fa e foundation. An Christ Jedus, e de fus stone, wa gii scrent ta de buildin.

21Christ Jedus, e de one wa mek all dat buildin fit togeda an da mek um grow bigga an bigga fa be God own house wa blongst ta de Lawd.

22Oona too, come fa be one wid Christ Jedus, an e da build oona togeda wid all de odares wa bleebe, eenta a buildin weh God da lib, by e Sperit.


  Share Facebook  |  Share Twitter

 <<  Efesus 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel