Alkitab Mobile SABDA
[VER] : [GULLAH]     [PL]  [PB] 
 <<  Efesus 6 >> 

De chullun an Dey Fada an Mama

1Chullun, ebry one ob oona mus do wa ya fada an modda tell ya fa do cause dat de right ting fa do.

2Een all de law wa God gii Moses, de fus one wa got a promise long wid um say, “Ya mus gii hona ta ya fada an ya modda.”

3De promise wa go long wid um say, “So dat all ting wa happen ta ya gwine be good fa ya an ya gwine lib a long time yah een de lan.”

4Oona wa be fada, mus dohn say an do ting ta oona chullun wa gwine mek um bex. Steada dat, oona mus gim Christian trainin an laan um wa dey oughta do.

De Massa an E Slabe

5Oona wa be slabe, oona mus show spec ta oona massa an do wa dey tell oona fa do. Mus do de wok wid all oona haat jes as ef oona beena do um fa Christ.

6Mus dohn do oona wok good jes wen oona massa da watch oona, jes so dat dey gwine praise oona. Bot cause oona a slabe ob Christ, oona mus do wa God wahn wid all oona haat.

7Oona mus do good wok wid heppy haat like oona da do um fa Christ, an not jes fa people.

8Cause oona know fa sho dat Christ gwine gii ebrybody e pay fa de good wok dat e do. Ain mek no neba mind ef dat one a slabe o ef e free.

9Oona wa be massa, oona mus treat oona slabe dem een dat same good way. Mus dohn mek um scaid, da tell um how haad oona gwine be on um. Cause oona mus dohn neba fagit dat oona an oona slabe dem blongst ta de same Massa een heaben. An e ain gwine treat one poson mo betta den noda.

De Cloes Dat God Gii Oona fa de Fight

10Leh me tell oona dis las wod. Oona mus leh de Lawd keep on da mek oona mo scronga een oona fait een um an leh um gii oona e mighty powa.

11Oona mus pit on all dat God got fa protec oona wen oona fight ginst ebil, jes like sodja dem pit on dey iron cloes fa protec all dey body. Oona mus do dat so dat wen de Debil come wid e ebil scheme, oona gwine be able fa stanop ginst um.

12Cause we ain fightin ginst people yah. We da fight ginst dem powa wa we ain able fa see, de ebil sperit dem high op dey oba de heabenly lan. We da fight ginst de scrong powa dem wa da rule oba people wa ain bleebe pon God, wa got tority now een dis daak time we da lib een.

13So den, oona mus pit on all dat God got fa protec oona een de fight, so dat wen de day come dat ebil come ta oona fa true, oona gwine be able fa stanop an fight ginst all de ebil scheme ob de Debil. An long as de enemy come ginst oona, oona gwine keep on fightin um. Oona gwine still stanop ginst um.

14So den, mus keep on da stand op scrong ginst de Debil. Leh all wa true be like de belt wa oona fasten roun oona waist. An leh de right way oona da do, be like de iron plate wa oona da weah fa kiba oona chest fa protec oona wen oona da fight.

15An leh de Good Nyews bout de peace wa God gii keep oona da stand scrong, like de shoe oona da weah pon oona foot.

16Fudamo, leh oona trus een Christ be like a shield dat oona cyaa. Dis shield yah gwine protec oona, so dat all de bunin arrow dem wa de mos ebil sperit, Satan, da shoot, ain gwine do nottin ta oona.

17Oona mus leh de sabation dat God gii, protec oona, like a helmet wa oona da weah pon oona head. An leh de wod ob God, wa de Holy Sperit gii oona, be like a sode fa fight ginst de enemy.

18Oona mus pray wiles oona do all dat. Waeba oona da do, leh God Sperit hep oona pray all kind ob pray an fa ting oona da aks God fa. Fa do dat, oona mus dohn neba gii op. All de time, keep on da pray fa all God people.

19An oona mus pray fa me too, dat God gwine show me wa A oughta say wensoneba A staat fa taak, so dat A ain gwine be scaid wen A tell people bout de Good Nyews ob Christ, dat dey ain know fo.

20Fa de sake ob dis Good Nyews, A God messenja yah een chain een de jailhouse. Oona mus pray fa me so dat A ain gwine be scaid fa tell people bout Jedus Christ, jes de way A oughta tell um.

Paul Las Wod Dem een Dis Letta

21Tychicus, we deah Christian broda, e a faitful woka fa de Lawd. E gwine tell oona ebryting bout me, so dat oona gwine know how A da do an wa A da do.

22Dat hoccome A da sen um ta oona, so dat e kin tell oona how we da do, an e gwine courage oona wid e wod.

23A pray dat God we Fada an de Lawd Jedus Christ gii peace ta all de Christian bredren, an dat dey fait een Jedus Christ mek um all lob one noda.

24An A pray dat God bless all dem wa lob we Lawd Jedus Christ wid lob wa ain neba gwine end.


  Share Facebook  |  Share Twitter

 <<  Efesus 6 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran