Dual PanelMus Hep One Noda
1Me Christian bredren, ef somebody da do sinful ting an oona find out bout um, oona wa da do wa God Sperit tell oona, oughta go hep dat one fa stop sin. Oona mus dohn taak scrong ta um. An mus watch out so dat oona, too, ain gwine wahn fa do ting wa ain right.
2Wen sompin da trouble somebody an e da beah hebby load, oona mus hep um. Wen oona do dat, oona gwine do wa Christ chaage oona fa do.
3Ef somebody tink e sompin great, wen fa true e ain nottin tall, e jes da mek a fool ob esef.
4Ebrybody oughta tink bout wa e da do an cide ef e da do right. Ef e da do right, den e kin be sattify. E ain oughta look at wa oda people da do fa cide ef e da do right.
5Cause ebrybody gwine haffa beah e own load.
6De one dat dey da laan God wod ta, e oughta gii some ob all de good ting e hab ta e teacha wa da laan um.
7Mus dohn mek a fool ob oonasef. Ain nobody kin fool God. Waeba oona plant, dat wa oona gwine haabis.
8E jes like wen a faama plant seed, e gwine git waeba e plant. Same way, wen somebody do bad ting dat e sinful haat jes wahn fa do fa please esef, God gwine punish dat one. E gwine git stroy. An wen somebody do wa God Sperit tell um fa do fa please God, dat one gwine git haabis ob life dat ain neba end.
9So we mus dohn git tired ob do good. Cause ef we ain gii op, de time gwine come wen we gwine git a good haabis.
10So den, any time we git de chance, we oughta do good ta all people, een paaticula ta we Christian bredren, cause dey blongst ta we fambly een Christ.
De Las Wod Paul Write een Dis Letta
11Oona see de big letta A da mek, as A da write ta oona wid me own han now.
12De people wa da try fa mek oona git circumcise, dey jes wahn fa show off an brag bout how dey body look. Dey da do all dat jes so dat people ain gwine mek um suffa. Cause people gwine mek um suffa ef dey taak bout how Christ done dead pon de cross fa sabe people.
13Eben dem people wa hab people circumcise um ain da do wa de Law say. Dey wahn fa hab oona circumcise so dat dey kin brag, say dat oona done leh um circumcise oona.
14Fa me own paat, A ain gwine brag bout nottin cep de det ob we Lawd Jedus Christ pon de cross. Cause Jedus done dead pon de cross, de way ob de wol, dey ain mean nottin ta me no mo. A done dead ta dem way, an dis wol ain got nottin fa do wid me no mo.
15Ef we git circumcise o ef we ain git circumcise, dat ain mean nottin tall. Bot de ting wa matta mo den all, e dat God change we life, mek we a nyew nyew kind ob people.
16A da pray dat God gii peace an mussy ta all dem people dat lib dis way dat A done tell um, all dem wa mek op de Israel ob God.
17Las ob all, A da write oona say, “A da chaage oona dat oona mus dohn leh nobody bodda me no mo. Cause A got de scar pon me skin dat show A da Jedus slabe.
18Me Christian bredren, A da pray dat we Lawd Jedus Christ bless oona. Amen.