Alkitab Mobile SABDA
[VER] : [GULLAH]     [PL]  [PB] 
 <<  Ibrani 11 >> 

Wa E Mean fa Trus God

1Wa dey mean wen dey say somebody da trus God? Wen somebody da trus, dat mean fa say dat dat one know fa sho dat e gwine git de ting wa e pit e haat pon. An e know dat dem ting wa e ain see, dey dey fa true.

2Now cause de people wa been lib way back dey beena trus God, God say e heppy wid um.

3Cause we trus um, God mek we ondastan dat de wod wa God been taak, dey mek de wol, so dem ting we da see, dey come fom dem ting we ain see.

4Cause Abel trus God, e offa a betta sacrifice ta God, mo betta den de one Cain mek. Wen God say e heppy wid de sacrifice dat Abel mek, we know dat God da say Abel da waak scraight wid um. Eben dough Abel done dead, we still da laan bout wa e mean fa trus God by how Abel trus um.

5Cause Enoch trus God. e ain dead. Stead ob dat, God tek um op, wen e still beena lib. Nobody ain shim gin, cause God done tek um op. Wen Enoch still been yah een dis wol, fo God tek um op, God say e heppy wid Enoch.

6Ain nobody able fa please God ef e ain trus um. Cause dem wa come ta God haffa trus dat God dey an dat e da do good ta de people wa da saach fa um wid all dey haat.

7Cause Noah trus God, e pay tention wen God waan um bout ting wa gwine happen. Eben dough Noah ain been see dem ting yet, e done wa God tell um fa do. Cause Noah trus God wod, e mek one big boat so dat e an e fambly kin go eenside um an git sabe. An de wata wa beena kiba de wol ain do um no haam. So Noah fait een God show dat de oda people een de wol beena do bad wen dey ain trus God. An God say Noah a scraight poson cause Noah trus um.

8Cause Abraham trus God, e done wa God tell um fa do, wen God call um an sen um fa go ta de place wa God promise fa gim. Abraham got op an gone dey eben dough e ain been know dat place weh e da gwine.

9An cause Abraham trus God, e lib like a come-yah poson een dat lan wa God promise fa gim. E lib dey een tent dem, long wid Isaac an Jacob. An God mek dat same promise ta dem.

10Abraham lib like a scranja dey cause e beena wait fa de city wa God been plan an build, wa stanop scrong pon e foundation, an wa ain neba gwine faddown.

11Cause Abraham trus God, e an Sarah been able fa bon a chile ob dey own, eben dough Abraham been too ole an Sarah ain been able fa bon no chullun fo. Cause Abraham trus God dat e gwine do wa e promise.

12So den God gii dis one ooman, eben dough e done ole, a heapa granchullun-chullun. E gim so many til dey been as many as de staa dem een de sky an like de san on de seasho wa nobody kin count.

13All dem people yah still beena lib een de way ob fait wen dey dead. Fo dey done dead, dey ain git dem ting dat God promise um. Bot dey beena see fom faaway wa God been gwine gim, an dey been heppy fa wa God promise um. Dey know an tell de people, say dat dey scranja an come-yah people een dis wol.

14De people wa taak like dat sho fa true dat dey beena look fa a country wa gwine blongst ta um.

15Fa sho, dey ain beena tink bout de country dat dey come fom. Cause ef dey beena tink bout dat place, dey been gwine git de chance fa go back dey.

16Stead ob dat, dey beena wahn a country dat mo betta den weh dey come fom. Dey beena wahn a country dey een heaben. So God ain shame ob um, wen dey call um dey own God, cause e done been mek a city ready fa um.

17Cause Abraham trus God, wen God test um, e gree fa offa op Isaac, e onliest son, fa sacrifice um ta God. Abraham been ready fa sacrifice Isaac, eben dough God promise um fo bout Isaac.

18God promise um say, “Isaac gwine hab de chullun wa gwine gii ya ya granchullun-chullun.

19Abraham trus God dat ef Isaac dead, God able fa mek Isaac lib gin. An so we kin say dat eben dough Isaac ain dead den, e stan like somebody wa done dead, bot e come back ta Abraham.

20Cause Isaac trus God, e tell Jacob an Esau say, “God gwine bless oona.” E beena taak bout de blessin dem wa dey gwine git later on.

21Cause Jacob trus God, e bless Joseph son dem, one by one, wen de time come wen Jacob been bout fa dead. An at dat time dey, e lean pontop ob e waakin stick an woshup God.

22Cause Joseph trus God, wen e been bout fa dead, e taak bout de time wen de Israel people gwine come outta Egypt. An Joseph tell um wa dey oughta do wid e body atta e done dead.

23Cause Moses fada an modda trus God, dey hide Moses way een dey house fa shree mont atta e bon. Cause dey see dat Moses been a fine chile, an dey ain been scaid fa broke de law wa de king pass, wa say dat dey mus kill all dey son dem.

24Cause Moses trus God, atta e grow op, e ain leh um call um de son ob King Pharoah daughta.

25Moses say e betta fa suffa long wid God people den fa mek merry, da do bad ting wa ain gwine mek um glad fa long.

26E mek op e mind dat ef people hole um cheap an mek um suffa fa sake ob Christ de Messiah, dat way wot mo fa true den ef e woulda got all de fine ting dem een Egypt. Cause Moses pit e haat pon de blessin wa e gwine git atta wile.

27Cause Moses trus God, e come outta Egypt an e ain been scaid, eben dough de king been real bex wid um. E ain neba ton back. E keep da go on, cause e da see God wa people ain see.

28Cause Moses trus God, e keep de Passoba feas an e chaage de Israel people fa sprinkle de blood pon dey door, so dat wen de Det Angel wa da kill de fusbon son, come, e ain gwine kill none ob de fusbon son ob de Israel people.

29Cause de Israel people trus God, dey gone right shru de Red Sea, da cross oba um jes like dey da waak pon dry groun. Bot wen de Egypt people try fa cross oba, dey all been drown een de wata.

30Cause de Israel people trus God, de wall wa been dey roun de city name Jericho, faddown. Dem wall faddown atta de Israel people done maach seben day roun um.

31Cause e trus God, de screet ooman name Rahab ain dead wen de Israel people been killin de Jericho people wa ain do wa God tell um fa do. Rahab ain dead cause e glad fa hide de scranja dem een e house wen dey come fom Israel fa look oba de city.

32Well den, A ain need fa say no mo, ainty? Dey ain nuff time fa tell bout Gideon, Barak, Samson, Jephthah, David, Samuel an de prophet dem wa beena tell people God wod.

33Cause dey trus God, wen dey fight ginst oda country dem, dey been able fa win de war. Dey done dem ting wa right een God eye, an God gim wa e been promise fa gim. Cause dey trus God, dey shet de lion mout so dey ain nyam um.

34Dey pit out real hot fire dem, an de flame ain do nottin ta um. An God sabe um fom dey enemy dem wa wahn fa kill um wid dey sode. Dey ain been got no scrent, bot God gim scrent. God gim powa wen dey da fight war so dey win out oba de sodja dem ob oda country, an mek um ron way.

35An cause some ooman dem trus God, dey gone fa meet dey own people wa done dead an den git op fom mongst de dead an lib gin. Some oda people beena suffa plenty real bad ting dat dey enemy done ta um. Dey beena suffa til dey done dead, bot dey ain neba say dey ain trus God, so dat dey enemy dem gwine leh um go. Dey suffa all dat cause dey trus dat atta dey done dead, dey gwine rise op fom mongst de dead people an lib gin, da git life wa way mo betta den dey life yah.

36De enemy dem ob some ob de people hole um cheap, tek um fa fun an beat um wid whip. Dey enemy tie op some ob um wid chain an pit um een de jailhouse.

37Dey stone some ob um til dey done dead. Dey cut some een two, an dey kill some wid dey sode. Dem people yah wa suffa so, dey been people wa ain got nottin, so dey beena waak roun da weah jes sheep skin an goat skin. Dey enemy mek um suffa an treat um real bad.

38Dey been real good people, too good fa dis wol yah! Dey beena wanda roun like scranja een de desat an de hill dem, da lib een de cabe an een hole een de groun.

39All dem people yah trus God, an fa true, God say e heppy wid um. Stillyet, een dat time ain none ob um git wa God promise.

40Cause God done plan fohan an do sompin way mo betta fa we. E mek um so dat jes wen we jine togeda wid um, jes den dey an we all gwine be all God plan fa we fa be.


  Share Facebook  |  Share Twitter

 <<  Ibrani 11 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran