Dual PanelGod We Fada
1Now den, all dem people yah, dey all roun we, a big crowd ob um. Dey done show how fa trus God fa true. So den, we too, mus git rid ob ebry bad ting wa da keep we fom trus God mo. We mus git rid ob ebry sin wa da hole on tight ta we. Leh we keep on runnin de race wa dey fo we. We mus dohn neba git weary long de way.
2Leh we look op ta Jedus all de time, cause e de one wa led we fa trus God an e gwine hep we fa keep on da trus til we git fa be all e wahn we fa be. Jedus ain neba gii op, cause ob de cross! Cause ob de joy wa God keep fa um, e ain tek de shame ob dyin pon de cross fa mean nottin. So now, e seddown pon de right han side ob God trone.
3Oona mus study pon Jedus an how e done beah op wen bad people fight ginst um an mek um suffa. Mus study pon um so dat oona ain gwine git weary an ready fa gii op.
4Oona beena fight ginst sin, bot oona ain neba yet haffa keep fightin ginst um til oona shed oona blood.
5Oona fagit God wod weh e da courage oona, ainty? E call oona e chullun, say, “Me chile, ya mus pay tention wen de Lawd punish ya. Mus dohn gii op wen e buke ya.
6Cause de Lawd punish de one dat e lob. E punish de one dat e tek fa be e chile.”
7Oona mus beah op wen oona da suffa. Wen God da punish oona, dat show dat e tek oona fa be e own chullun. Ain no chile wa e fada ain punish wen e do bad, ainty?
8Ef God ain punish oona like e punish all e chullun, dat mean dat oona ain e true chullun. Oona ain e own.
9Fodamo, wen we fada dem een dis wol punish we, we show um hona. So e mo betta fa true ef we pit wesef onda we speritual Fada, so dat we git true life!
10We fada een dis wol beena punish we like dey tink e right fa do. An dey punish we fa jes a leetle time. Bot God da punish we fa hep we fa sho, so dat we gwine waak scraight an be holy like e holy.
11Jurin de time wen we git punish, we ain heppy. We feel sad. Bot later on, dat punishment dey gwine hep we wa got punish, cause e gwine mek we laan fa waak scraight an lib peaceable.
Mus Dohn Say No ta God
12So den, oona mus dohn neba lose haat. Mek scrong oona droopin aam an wobbly knee.
13Mus keep on da waak een de scraight road, so dat de one wa weak an cyahn waak good, ain gwine git mo bad. Stead ob dat, e gwine git mo scronga an be able fa waak scraight.
14Try fa lib peaceable wid all people an try fa lib a holy life wa show dat oona blongst ta God, cause ain nobody neba gwine see de Lawd ef e life ain holy like God own.
15Oona mus look out dat nobody ain gwine neba ton back so dat e ain git God mussy fabor. Same way so, look out dat nobody ain gwine staat fa be bitta like a poison plant dat grow op all oba a sudden an kin spread e poison all roun. Cause dat kind ob people dey da mek trouble fa oda people an spoil plenty people life.
16Look out dat nobody ain gwine staat fa lib a free life. Same way so, mus look out dat nobody neba stop gii hona ta God an ta wa blongst ta God. Dat how Esau done wen jes fa git one meal ob food, e gii way de blessin dat God woulda gim, cause e been de fusbon son ob e fambly.
17Oona know dat atta dat, wen Esau wahn fa git e fada fa gim dat blessin, e fada ain gim. Cause Esau ain neba find no way fa change wa e done fo, eben dough e try so haad fa git dat blessin dat e beena weep.
18Oona ain come ta a mountain dat oona kin tetch, like wen de Israel people come close ta Mount Sinai. Dat time dey, fire beena bun pon de mountain, an de place been daak roun um. Dey ain been no light dey, an a big breeze beena blow.
19Dey yeh a trumpet blow loud an God boice da taak ta um. Wen de people yeh God boice, dey beg say dey ain wahn fa yeh e boice no mo.
20Cause dey ain been able fa beah wa God chaage um fa do, wen e tell um say, “Mus dohn nottin tetch dat mountain dey, not eben a animal. Ef eben a animal tetch um, oona mus shrow stone pon um til e dead.”
21Wa dey see dey een dat mountain mek um so scaid dat Moses say, “Dat mek me so scaid til me body da tremble.”
22Stead ob dat, oona done come ta de mountain dey call Mount Zion. Oona done come ta da city weh God de one wa gii life, da lib. Dat de city dey call “De Jerusalem wa dey een heaben.” A heapa heapa angel geda dey een a joyful gedarin.
23Oona come ta de choch ob de fusbon people wa folla Christ. God done write dem name een de book op een heaben. Oona done come fo God, wa da jedge all an fa be wid dem people wa scraight een God eye, dem wa God done mek dey life fa be jes wa e oughta be.
24Oona come ta Jedus wa been de go-between tween God an people fa mek a nyew cobnant. An oona come ta de shed blood ob Jedus wa wash way we sin. Jedus blood faaway mo betta den de blood ob Abel, cause Jedus blood da do way mo fa we den Abel blood.
25So den, look out dat oona ain close oona yea ta de one wa da taak ta oona. De people ob Israel done close dey yea ta de one wa beena waan um een dis wol, an cause ob dat dey ain been able fa scape. Now ef dey ain been able fa scape, fa true we ain gwine scape ef we ton way fom de one wa da waan we fom heaben!
26God boice done mek de groun shake een dat time long go. Bot now e promise say, “One mo time gin, A gwine shake de groun, an A gwine shake de heaben too.”
27Wen God say, “One mo time gin,” dat show dat e gwine tek way all dem ting wa e done mek, dem ting wa kin git shook op. E gwine do dat so dat dem ting wa sin able fa git shook op, dey gwine las faeba.
28So den, leh we tell God tankya, cause de kingdom e da rule, dat wa we da git. An ain no way dat kin git shook op. Leh we tell God tankya an woshup um een a way wa gwine please um. Leh we show um hona fa true.
29Cause we God, e like a fire wa da bun op all ting.