Dual PanelDe Wondaful Way ob Sabation
1Cause ob dat, we mus pay mind mo den eba ta wa we beena yeh bout God Son, so dat we ain gwine waak way fom de right road.
2Cause we know fa true dat we kin trus de wod wa de angel dem bring we. Ebrybody wa ain done wa dat wod tell um fa do, ebrybody wa ain folla um, God punish um. E mek um suffa jes like dey oughta.
3So den, fa sho, we gwine git punish jes like God punish oda people, ef we ain pay no mind ta dis wondaful way God wahn fa sabe we? De Lawd Jedus, e de one wa fus tell bout dis wondaful way God wahn fa sabe we. Den, dem people wa been yeh de Lawd, dey proobe ta we dat dat way true fa sho.
4Same time, God too proobe dat de wondaful way e wahn fa sabe people, e true, by dem sign an wondaful wok wa e done. E do all kind ob miracle. E hab people git wa de Holy Sperit gim. E gim jes like e wahn.
Jedus Show People de Way wa Gwine Sabe Um
5God ain pick no angel fa hab chaage oba de wol fa come, wa we da taak bout.
6Bot dey write someweh dey een God Book say, “O God, wa mankind da, dat mek ya consaan bout um? Wa mek we wa jes people, matta so much ta ya dat ya tek cyah ob we?
7Ya mek de angel dem a leetle mo high op den people. Bot ya gii people powa an hona fa true.
8An ya mek um fa hab chaage oba all ting.” Now den, wen dey write een God Book say, “God mek man fa hab chaage oba all ting,” dat mean fa say, God ain lef nottin dat man ain oughta hab chaage oba. Bot we ain see man hab chaage oba all ting fa now.
9Bot we see Jedus fa true! Fa a leetle time God been mek de angel dem a leetle mo high op den Jedus, so dat cause ob God mussy pon we, Jedus suffa an dead fa sake ob all people. An cause Jedus suffa an dead, God gim powa an hona.
10E right dat God, wa mek all ting an wa da keep all ting like dey oughta be, mek Jedus all God plan fa um fa be, shru Jedus suffrin, so dat a heapa people gwine be God chullun an hab dey paat een e glory. Jedus de one wa gone head ob dem people dey fa bring um sabation.
11Cause de one wa da mek people holy an dem people wa e da mek holy, dey all got de same fada. So den Jedus heppy fa call um e bredren.
12Jedus say, “God, A gwine tell all me bredren bout ya. Wen ya people geda fa woshup ya, A gwine sing ya praise.”
13An e say too, “A gwine pit me trus een God.” An gin e say, “A dey yah wid all de chullun wa God gii me.”
14Dem chullun yah, dey flesh an blood fa sho. So den, Jedus too come eenta de wol as flesh an blood, so dat by de det wa e dead, e able fa stroy de Debil, wa got powa fa mek people dead.
15Dat how Jedus set free all dem people wa been jes like slabe onda de Debil all de time dey lib, cause dey been scaid fa dead.
16Fa sho, Jedus ain come fa hep de angel dem. E come fa hep Abraham chullun chullun.
17So den, dey ain been no oda way bot dat Jedus mus come fa be jes like e bredren een ebry way. E done dat so dat e able fa be de head man ob de people priest dem, full op wid mussy an da wok fa God wid all e haat, so dat e kin tek way de people sin an God kin fagib um.
18Now, cause de Debil done beena try Jedus fa mek um sin an Jedus done beena suffa, fa true dat mek Jedus able fa hep de people wa de Debil da try.